1. Сости амэн сытярэн и алава анда Экклезиаст 3:1, 7?

ДЭКО андар мэндэ любий тэ подэл дума, ай дэкасти чалёл тэ побэшэл анда тыхо ҭан. Сар ԥэнэнпэ андо стихо каринг и кадэя статья, исин время тэ ашэс мулком, ай исин время тэ дэс дума. (Адиносар Экклезиаст 3:1 *, 7 *.) Дэкала камэлпэ, кай варико анда ԥрала и ԥэя тэ дэл дума май бут, ай дэко тэ дэл дума май набут.

2. Касти трэбуй тэ чалёл кода, кала и сар амэ тэ дас дума?

² Кода, кай амэ можэм тэ дас дума, када лашимос, саво амэнди дя о Иегова (Исход 4:10, 11; Откровение 4:11). Через и Библия во поможый амэнди драго тэ дас дума. Андэ кадэя статья амэ подаса дума пала дэсавэ примероря анда Библия, савэ поможына амэнди тэ полас, кала время тэ ашас мулком, ай кала время тэ дас дума. Амэ кадяжэ поласа, сар о Иегова диқэл пэ кода, со амэ ԥэнас аврэнди. Спэрва подаса дума пала кода, кала амэ трэбуй тэ дас дума.

3. Кала трэбуй, сар пистромэ андэ Римлянам 10:14, тэ дас дума пала о Иегова и пала лэско Царство?

³ Амэ вся и время трэбуй тэ авас ӷотови тэ дас дума пала о Иегова и пала лэско Царство (Матфея 24:14; адиносар Римлянам 10:14 *). Кадя амэ тераса сар о Иисусо. Важ лэстэ сас само ӷлавно тэ росԥэнэн о чачимос пала пэско Дад (Иоанна  18:37). Но кадяжэ трэбуй тэ диқас пала кода, сар амэ дас дума. Кала росԥэнас аврэнди важ о Дэл, амэнди трэбуй тэ терас када «ковлэ одеса» и пативалэс, тэ шас сама, со кай о мануш по ди и сар во полэл лэ Дэвлэс (1 Петра 3:15). Тоди амэндэ вижала най кати тэ подас дума лэ манушэса пала Дэл, ай инке диқаса, кай во поля, пала со жал и дума, и можэт дажэ када лэла лэс лэ одестар.

4. Сар пистромэ андэ Притчи 9:9, сар лэ старейшынастири дума можэт тэ поможый аврэнди?

⁴ И старейшыноря на трэбуй тэ ашэн мулком, кала диқэн, кай варико анда ԥрала чи ԥэя хасарэл и дружба лэ Иеговаса. Вонэ витидэна время, сави поджал важ и дума. И кай тэ на авэл лажаво кодэлэсти, каса дэна дума, вонэ поаштярэна, пока пашэ никас на авэла. И старейшыноря вся и время стон зор, кай тэ дэн дума лэ ԥралэнца и лэ ԥэянца пативалэс. Но всаек вонэ ворта сыкавэн и принцыпоря анда Библия, савэ поможына тэ андярэн пэс годявэрнэс. (Адиносар Притчи 9:9 *.) Васо на трэбуй тэ дарас тэ ԥэнас аврэнди, кай вонэ варисо терэн найдраго? Шаса сама пэ дуй мануша, савэ служынас лэ Дэвлэсти. Пэрво мануш трэбуй сас строӷо тэ подэл дума пэстирэ шавэнца, ай о дуйто, трэбуй сас тэ подэл дума лэ манушэса, саво йто авэла царё.

5. Кала лэ Илиёсти трэбуй сас тэ ԥэнэн смило и ворта?

⁵ Кай о само баро рашай кай о И́лиё сас дуй шавэ. Во лэн фартэ любияс, ай вонэ на стонас нисави патив по Дэл. Лэнди випэля бари бах тэ служын, сар рашая андэ свынто бари катуна. Но вонэ на цэнинас када и най пативалэс андярэнас пэс, кала варико анэнас и жэртвы и «совэнас лэ жувлянца, савэ служынас паша свынто бари катуна» (1 Самуила 2:12—17, 22). Па лэ Моисеёско Законо лэ Илиёстирэ шавэн трэбуй сас тэ умарэн. Но И́лиё на шолас сама пэ лэндирэ ӷрехоря и кати ковлэс сытярэлас лэн, и домэкэлас, кай вонэ тэ служын андэ свынто бари катуна (Второзаконие 21:18—21). Сар пэ када диқля о Иегова? Во ԥэндя лэ Илиёсти: «Васо тути май куч тирэ шавэ, чем мэ?» О Иегова ԥэндя, кай умарэла кодэлэ дуен найлашэ шавэн (1 Самуила 2:29, 34).

6. Сости амэн сытярэл кода, со сас лэ Илиёса?

⁶ Кода, со сас лэ Илиёса сытярэл амэн, сар трэбуй тэ на терас. Если амэ уӷанглям, кай варико анда амарэ друӷоря чи родо терэл варисо против лэ Дэвлэско законо, трэбуй тэ подас  дума лэса и тэ ԥэнас лэсти пала лэ Иеговаско законо. Кадяжэ трэбуй тэ уӷанас, поможысардэ лэсти кодэла, кас стодя о Иегова чи инке най (Иакова 5:14). Амэ на камас тэ шаспэ по И́лиё. Важ када амэ на домэкаса, кай и друӷоря чи о родо тэ авэн важ амэндэ май куч, чем о Иегова. Канешно, кай тэ подԥэнас кодэлэсти, ко хасарэл пэстири дружба лэ Иеговаса, трэбуй тэ авас смило, но када можэт тэ анэн лашимос. Акана шам сама пэ авэр мануш, саво совсем на шоласпэ пэ пэрво. Када и израильтянка, савя ақарэн Авигея.

7. Васо и Авигея закамля тэ подэл дума лэ Давидоса?

⁷ И Авигея сас пала барвало мануш, саво залэласпэ ла ԥувьяса. Лэс ақарэнас Навало. Сас время, кала о Давидо и лэстирэ мануша, гарадёнас лэ царёстар, лэ Саулостар, и андэ кодэя время лэнца сас лэ Навалостирэ пастухоря. О Давидо фэрияс лэ пастухонэн, кай пэр лэндэ тэ на дэн и чора. Сас о Навало блаӷодарно лэнди важ када? Най. Кала о Давидо мангля, кай во тэ дэл лэстирэ манушэнди набут хамос и паи, о Навало росхоляйля и ля пэр лэндэ тэ ԥэнэн найлашэ алава (1 Самуила 25:5—8, 10—12, 14). Тоди о Давидо закамля тэ умарэл всаворэ муршэн, савэ жувэнас андо цэр кай о Навало (1 Самуила 25:13, 22). Можно сас тэ фэринпэ кадэла бидатар? И Авигея поля, кай поджыля и время тэ дэл дума. Вой смило жыля тэ подэл дума лэ Давидоса, савэса сас 400 боқалэ и холинатирэ воиноря.

8. Сости амэ сытювас кай и Авигея?

⁸ Кала и Авигея диқляпэ лэ Давидоса, вой дэлас дума лэса баря пативаса, ай кадяжэ смило и годявэрнэс. Хоть вой и на сас дошали андэ кода, со тердяпэ, но вой мангля, кай о Давидо тэ простий. Вой ԥэндя лэсти, кай во вся и время терэл драго англа лэ Иеговастирэ яқа. Вой патялас, кай о Иегова лати поможыя (1 Самуила 25:24, 26, 28, 33, 34). Сар и кадэя смило жувли, амэ на ласа тэ ашас мулком, кала диқас, кай варико жыля па найлашо дром  (Псалом 141:5). Амэ трэбуй пэс тэ андярас пативалэс, ай кадяжэ тэ авас смили. Амэ сыкаваса, кай амэ важ лэстэ чачунэ друӷоря, кала ковлэс подԥэнаса лэ манушэсти, со во терэл най кадя (Притчи 27:17).

9, 10. Пала со трэбуй тэ сэрэн и старейшыноря, кала сытярэн лэ ԥралэн чи лэ ԥэян?

⁹ И старейшыноря трэбуй тэ авэн фартэ смили, кала дэн дума лэ ԥралэнца чи лэ ԥэянца, савэ стердэ «варисо най кадя» (Галатам 6:1). И старейшыноря на гиндон пала пэстэ бут и полэн, кай вонэ кадяжэ найсовершэни. И можэт варикала и лэнди авэла трэбуй тэ дэн совето. Но када нащи тэ зритярэл лэн андэ кода, кай тэ сытярэн кодэлэн, касти када трэбуй (2 Тимофею 4:2; Титу 1:9). Кала и старейшыноря дэн дума кацавэ манушэнца, вонэ старыинпэ драго, би холяко тэ дэн дума лэнца. Вонэ камэн тэ поможын лэ ԥралэнди и лэ ԥэянди, важ кода кай вонэ лэнди куч (Притчи 13:24). Но со май ӷлавно важ лэндэ, када тэ ритярэн лэ Иеговаско законо и тэ фэрин и собрания лэ найлашимастар (Деяния 20:28).

¹⁰ Амэ уӷанглям, кала трэбуй тэ дас дума. Ай дэкала фэдэр тэ ашас мулком. Васо можэт тэ авэл ԥарэс тэ ашэс мулком?

11. Со ԥэндя о Иаково, и сар када поджал каринг амари дума?

¹¹ Тэ диқас пала пэсти дума най вся и время вушэро. О Иаково ԥэндя пала када кадя: «Если варико никала на дэл дума най кадя, тоди во совершэно мануш, саво можэт андэ вся тэ зритярэл пэс андэ вас. Если амэ стас и удила лэ грастэсти андо муй, кай во тэ кандэл амэн, тоди амэ зритярас всаворэс лэ грастэс» (Иакова 3:2, 3). И удила (цынёнё састри) стон лэ грастэсти андо муй, кай кодэва, ко бэшэл пэр лэстэ лэ сариваренца тэ бандярэл лэс каринг трэбуй чи тэ тердярэл, кала када трэбуй. Если кодэва, ко бэшэл по грас одмэкэла саривари, о грас дэла тэ нашэл и авэла вэрыто и лэ  грастэсти и кодэлэсти, ко пэр лэстэ бэшэл. Кадяжэ, сар амэ на следисарас пала амари дума, кадэлэстар можэт тэ авэл вэрыто амэнди и аврэнди. Подам дума, со сас лэ манушэнца, кала лэнди трэбуй сас, ԥэнаса, тэ поцырдэн и саривари и тэ ашэн мулком.

12. Кала трэбуй тэ ашас мулком?

¹² Сар тумэ андярэн пэс лэ ԥралэса чи ла ԥэяса, савэ ӷанэн кода, со нащи тэ росԥэнэн? Ԥэнаса, тумэ диқлэпэ лэ ԥралэса чи ла ԥэяса, савэ жувэн котэ, кай амари дила заԥандадэ. Камэлпэ тумэнди тэ роспушэн лэндар, сар лэндэ котэ вижал тэ служын? Канешно, тумэ када пушэн анда оди. Тумэ любин лэ ԥралэн и пэрэжываете пала лэндэ. Тумэ кадяжэ камэн тэ мангэнпэ пала кода, со лэнди трэбуй. Но када время тэ поцырдэн и саривари и тэ на пушэн, со на трэбуй. Амэ можэм тэ допушас лэ ԥралэстар чи ла ԥэятар, савэ служын котэ, кай амари дила ԥандади. Тоди када сыкавэла, кай амэ най фартэ любисарас лэн. Кадяжэ най фартэ любисарас кодэлэн, ко надеийпэ пэр лэндэ, кай вонэ никасти на росԥэнэна пала лэндири служэния. Нико андар мэндэ на камэл, кай лэ ԥралэнди и лэ ԥэянди, савэ жувэн котэ, кай амари дила заԥандадэ, кай лэнди тэ авэл инке май ԥарэс. Если амэ екжэнэ служысарас андэ кацавэ страны, амэ на ласа вся тэ росԥэнас пала кода, сар амэндэ прожал и собрания чи сар терас авэр лэ Дэвлэстири дила.

13. Со, сар пистромэ андэ Притчи 11:13, трэбуй тэ терэн и старейшыноря и васо?

¹³ Лэ старейшынонэнди со май фартэ трэбуй тэ терэн кадя, сар пистромэ андэ Притчи 11:13 * (адиносар). Лэнди на трэбуй тэ росԥэнэн аврэнди кода, со авэр нащи тэ ӷанэн. Када можэт тэ авэл найвушэро, кала о старейшына жэнато. Кай драго тэ полэн ек еқэс, о хулай и хулаи росԥэнэн кода, пала со гиндон, со лэндэ по ди и пала со пэрэжывают. Но о старейшына полэл, кай на трэбуй тэ росԥэнэн ла хулаяти, со лэсти росԥэндэ ԥрала и ԥэя пала пэстэ. Если во росԥэнэна, тоди лэсти парашэна тэ патян андэ собрания и пэр лэстэ ужэ на стона кацави патив. И ԥрала, савэндэ исин бут дила андэ собрания, нащи тэ хохавэн (1 Тимофею 3:8). Када сыкавэл, кай нащи тэ хохавэн аврэн и нащи тэ дэн дума пала думэ. О хулай, саво любий пэстиря хулая, на лэла тэ росԥэнэн лати, со вой на трэбуй тэ ӷанэн, важ кода кай на камэл, кай лати тэ авэл ԥарэс.

14. Сар и хулаи, савятэ о хулай старейшына, поможый, кай тэ на парашэн тэ стон патив пэ лако хулай?

¹⁴ И хулаи, сави камэл, кай пэ лако хулай тэ на парашэн тэ стон патив, на лэла тэ вимангэл лэс тэ росԥэнэн лати кода, со нащи. Кацави хулаи сыкавэла, кай подритярэл пэстирэ хулас, ай кадяжэ стол патив пэ кодэла, ко лэсти патян. И со май ӷлавно, вой радуия лэ Иеговас. Кала вой кадя терэл, андэ собрания авэла мирно и всаворэ авэна ек пала еқэстэ (Римлянам 14:19).

15. Со о Иегова гиндосардя пала Елифазо, Вилдадо и Софаро и васо?

¹⁵ Анда книӷа Иов можэм тэ сытювас, кала и сар трэбуй тэ дас дума. Сар кай о Иово сас ек пала еқэстэ барэ биды, штар мануша авелэ тэ подритярэн лэс и тэ подԥэнэн лэсти. Бут время вонэ ашэнас мулком. Кода, пала со потом задинэ дума трин андэр лэндэ, о Елифазо, о Вилдадо и о Софаро, сыкадя, кай вся кадэя время вонэ на гиндонас, сар тэ поможын лэ Иовости. Ай гиндонас, сар тэ доԥэнэн лэсти, кай во дошало. Хоть дэсо вонэ ԥэнэнас чачимос, май бут вонэ дэнас дума пала кода, со сас хохаимос пала о Иово и пала Иегова. Вонэ линэ тэ сындон лэ Иовос (Иов 32:1—3). Со стердя о Иегова пэ када? Во росхоляйля пэ кодэла трин мурша. О Дэл ԥэндя пэр лэндэ, кай вонэ найгодявэрнэ и приԥэндя лэнди тэ мангэн  лэ Иовос, кай тэ мангэлпэ пала лэндэ (Иов 32:1—3).

16. Со амэ можэм тэ сытювас анда кода, со сас лэ Елифазоса, лэ Вилдадоса и лэ Софароса?

¹⁶ Со анда кадэва примеро амэ можэм тэ сытювас? Пэрво, на трэбуй тэ сындосарас амарэ ԥралэн (Матфея 7:1—5). Трэбуй драго лэн тэ виашунас англа кода, сар варисо тэ ԥэнас. Кати кадя амэ поласа, со лэнди прижыляпэ тэ пэрэжувэн (1 Петра 3:8). Дуйто, трэбуй тэ дас дума анда оди амарэ ԥралэнца и ԥэянца и тэ на ԥэнас кода, со на сас (Эфесянам 4:25). И трито, лэ Иеговасти фартэ важно кода, со амэ ԥэнас ек еқэсти.

17. Сости амэн сытярэл лэ Елиуёско примеро?

¹⁷ О штарто мануш, саво авеля каринг о Иово, сас о Елиуё, лэ Авраамоско родо. Во драго виашундя лэ Иовос, ай кадяжэ лэ Елифазос, лэ Вилдадос и лэ Софарос. Васо амэ можэм кадя тэ ԥэнас? Важ кода кай лэстэ вижыля ковлэс, но ворта, тэ ԥэнэн лэ Иовости, со во стердя най кадя. Во поможысардя лэсти тэ диқэл по пэско ԥаримос па аврятэ (Иов 33:1, 6, 17). Май ӷлавно важ о Елиуё сас тэ прославляет лэ Иеговас, ай най пэс чи инке варикас (Иов 32:21, 22; 37:23, 24). Лэ Елиуёско примеро сытярэл амэн, кай исин время тэ ашас мулком и тэ виашунас (Иакова 1:19). Кадяжэ лэско примеро сыкавэл, кай кала амэ варикасти подԥэнас, само ӷлавно важ амэндэ трэбуй тэ прославляем лэ Иеговас, ай най тэ хвалисарас пэс.

18. Сар тэ сыкавас, кай цэнисарас кода, кай можэм тэ дас дума?

¹⁸ Амэ цэнисарас, кай можэм тэ дас дума. Када дицол, кай амэ ӷанас, кала и сар тэ дас дума, сар пистромэ андэ Библия. О Дэл дя лэ царёсти лэ Соломоности гиндо и во ԥэндя: «Сар и сомнаконэ ԥаба по рупуно, вся вишындо тэляри, кадя и о алав, саво ԥэндо тоди, кала во трэбуй» (Притчи 25:11). Амарэ алава авэна кацавэ жэ кучутнэ и шукарнэ, сар сомнаконэ ԥаба, кала амэ ласа драго тэ виашунас аврэн и тэ гиндосарас англа кода, со тэ ԥэнас. И тоди бут амэ дас дума чи набут, всаек амари дума подритярэла аврэн и о Иегова лэла андар мэндэ тэ абурой (Притчи 23:15; Эфесянам 4:29). Кадя амэ май драго можэм тэ сыкавас, кай блаӷодарни лэ Иеговасти, важ кода кай можэм тэ дас дума!