О Харви жувэлас андо форо, Мидленд-Джанкшен (Западно Австралия). Во сас само барэдэр анда штар ԥрала. Лэско ери уӷангля пала Иегова андо 1930 бэрш. Андэ кодэла бэрша андэ страна фартэ на хутилэнас ловэ. О Харви болделя, кала лэсти сас 14 бэрш. Еқварэс, кала инке о Харви сас подроско, о ԥрал мангля, кай во тэ проадиной пэ собрания и Сторожэво башня, но во гиндояс, кай лэстэ када на вижала и отԥэнделя. Ай кодэва ԥрал лэсти ԥэндя: «Если варисаво служытелё анда лэ Иеговастири арӷанизацыя мангэл тут варисо тэ стерэс, во патял, кай тутэ вижала!» (2 Кор. 3:5). Через када о Харви поля, кай никала на трэбуй тэ отԥэндёлпэ кодэлэстар, со мангэл лэстар о Иегова.

Ай мэ уӷанглэм пала Иегова ла даса, ла барэдэра ԥьяса андэ Англия. Спэрва о дад на камэлас, кай амэ тэ служысарас лэ Иеговасти, но прожылэ бэрша и во екжэно ля тэ служый амэнца лэ Иеговасти. Хоть во и на камэлас, кай мэ тэ  болдював, мэ всаек болделэм, кала манди инке на сас дэш бэрш. Мэ камавас тэ авав пианеро, ай потом мисианеро. Но мэ полавас, кай во ман на домэкэла, пока мэ на авава совершэннолетнё, ай тэ аштярав, кала манди авэна 21 бэрш мэ на камавас. Важ када, кала манди сас 16 бэрш, мэ одманглэмпэ кай о дад тэ пэрэладав каринг и барэдэр ԥэй андэ Австралия и во ман одмэкля. И котэ, кала манди сас 18, мэ лэм пианерско.

Андэ Австралия мэ уӷанглэм лэ Харвидос. Во кадя жэ, сар и мэ, фартэ камэлас тэ авэл мисианеро. Андо 1951 бэрш амэ жэнисайлям. И дуй бэрш служысарасас пианеронэнца. Ай потом амэн манглэ, кай тэ авас андэ разъездно служэния андэ Западно Австралия. Амаро теократическо раёно сас фартэ баро. Дэкала амэнди прижаласпэ тэ ладас фартэ дур и па жара.

Андо 1954 бэрш амэн ақардэ тэ сытювас андо 25 классо Школа Галаад. И акэ, кода, со амэ фартэ камасас, можэт тэ вижал. Кала амэ пэрэлаглям андо Нью-Йорко, амэ лям тэ отдас бут время кодэлэсти, кай май драго тэ розлас и Библия. Ек уроко анда кодэя проӷрамма, када сас тэ сытювас испанско шыб, но кай о Харви нисар на вижалас тэ виԥэнэн испанско «р».

Кала амэ сытювасас, и ԥрала ԥэндэ, кай кодэла, ко камэл тэ служый андэ Япония, моӷут тэ прожан и курсы, кай тэ сытён японско шыб. Амэ погиндосардям, кай фэдэр лэ Иеговастири арӷанизацыя тэ витидэл, каринг амэн тэ бишалэл и на запистросайлям пэ кадэла курсоря. Кала пала када уӷангля о Альберто Шрёдеро, ек анда кодэла, ко сытярэл пэ Школа Галаад, во ԥэндя: «Погиндон пала када инке еқвар». Амэ всаек на запистросайям. Тоди о ԥрал Шрёдеро ԥэндя амэнди: «Амэ кодэлэнца, ко проандярэл и Школа Галаад, ужэ запистросардям тумэн. Диқаса, вижала тумэндэ тэ сытён японско шыб». Лэ Харвидостэ вижыля май вушэро тэ сытёл японско шыб, чем испанско.

Кала амэ авелям андэ Япония андо 1955 бэрш, лэ Харвидости сас 26, ай манди 24. Андэ кадэя страна сас 500 вазвещятеля. Амэн бишалдэ андо форо Кобе, котэ сас порто. И амэ служысардям котэ штар бэрш. Посли када амэн упалэ рисардэ каринг и разъездно служэния. Амаро раёно сас паша форо Нагоя. Котэ амэнди чалёлас вся, и ԥрала, о хамос и природа. Но кала чуть прожыля время, амэн манглэ тэ ладас андэ авэр ҭан и амэ упалэ на лям тэ пэнас лэ Иеговасти «най».

Амэ самас андэ разъездно служэния трин бэрш и о Японско филиало пушля амэндар, на камлоп амэ тэ пэрэладас андэ Тайвань, кай тэ росԥэнас пала Дэл лэ катутнэ манушэнди пэ шыб ами. Дэсавэ ԥрала анда кадэва народо ашэлэ отступникоря и кай тэ улэн кадэя проблема, лэ ԥралэнди анда филиало трэбуй сас ԥрал, саво драго ӷанэн тэ дэл дума пэ японско шыб *. Амэнди фартэ чалёлас тэ служысарас андэ Япония, важ када амэ най фартэ камлям тэ пэрэладас андэ Тайвань. Но о Харви полэлас, кай нащи тэ отԥэндёс кодэлэстар, со мангэн тэ стерас и ԥрала. И амэ ԥэндям «да».

Кала амэ авелям андэ Тайвань андо 1962 бэрш, катэ сас 2 271 вазвещятеля. Спэрва амэнди сас трэбуй тэ висытювас и китайско шыб. Амэндэ сас ек учебнико. Амаро учителё на дэлас дума па английско шыб. И всаек амэндэ вижыля тэ висытювас китайско шыб.

Ӥто посли кода, сар амэ пэрэлаглям андэ Тайвань, лэ Харвидос стодэ тэ авэл служытелё андо филиало. О филиало сас найбаро и важ када, кай о Харви вижалас ӥто тэ стерэл и дила, сави лэстэ сас андо Вефилё. Дэкала лэстэ дажэ вижалас трин курте андо шон тэ росԥэнэн пала Дэл лэ ԥралэнца анда народо ами. Инке дэкала во служыяс, сар обласно надзирателё и ԥэнэнас и речи пэ канӷрэсоря. О Харви моӷ тэ дэл дума пэ японско шыб, и ԥрала лэс полиноп, но о правительство домэкэлас, кай пэ барэ мероприятии тэ дэн дума пала Дэл кати пэ китайско шыб. Важ када о Харви дэлас дума пэ китайско шыб, сави во сытёлас, ай о ԥрал пэрэандярэлас пэ шыб ами.

Андэ Тайвань на сас спокойно через кода, кай и халавдэ стодэ дэсаво запрето. И кай тэ проандярэн о канӷрэсо и ԥрала трэбуй сас тэ мангэн лэндар разришэния. Када тэ домардён сас найвушэро, важ кода кай постоянно халавдэ цырдэнас время. Кала и халавдэ на дэнас и разришэния каринг кодэва курко, кала трэбуй тэ авэл о канӷрэсо, о Харви жалас андэ ваздии и бэшэлас котэ, пока лэсти на дэна и разришэния. Важ кода кай о Харви сас найкатутно, лэнди сас кадэлэстар лажаво. И лэсти дэнас кадэя разришэния.

Андэ кодэла курте, кала амэ лэ ԥралэнца росԥэнасас пала Дэл, амэнди прижаласпэ часонэнца тэ жас пешком через плая и лэна. Мэ сэрав кодэва дес, кала пэрво разо жылям андэ плая. Амэ лэ Харвидоса быстро халям и в 5:30 бэшлям по автобусо и во амэн доандярдя каринг ек дурутно гаворо. Посли када амэ пэрэжылям через и буӷли лэн и лям тэ ваздаспэ по вучо плай. О склоно сас кацаво круто, кай лэ ԥралэстирэ пятки, саво жалас англа мандэ, сас сыста мэрнэ яқэнца.

Андэ кадэва жэ дес, тэсара о Харви жыля тэ служый катутнэ ԥралэнца, ай мэ екжэни служысаравас андо гаворо, андэ саво и мануша дэнас дума пэ японско шыб. Каринг о обедо мэ ужэ чуть на хасаравас и сознания, важ кода кай фартэ камавас тэ хав. И акэ о Харви авеля и андя трин сыри парнорэ, савэ парудя пэ журналоря. Во сыкадя манди, сар лэн тэ хав. Трэбуй сас лэн тэ промарас лэ дуе ригэндар и тэ випас. Хоть манди када на чалеля, но прижыляпэ тэ випав. О дуйто випиля о Харви. Ай о трито прижыляпэ тэ пав манди. О Харви  отдя манди лэс, важ кода кай лэсти авелоп ԥарэс тэ змэкэл ман пэ вас па плай, если мэ хасардоп и сознания.

Важ мандэ сас нэобычно, сар халадёнпэ андэ Тайвань. Амэ лэ Харвидоса авелям по раёно канӷрэсо и ашэлямпэ кай о катутно ԥрал, саво жувэлас паша Зало Царства. Андэ культура ами фартэ шон сама пэ кода, кай тэ халадёнпэ. Лэ раёностири хулаи ԥэндя, кай можно тэ жас андэ «ванна». О Харви сас занято и ԥэндя, кай спэрва мэ тэ халадював, ай потом во. Но кала мэ жылэм андэ «ванна», манди ашэля чудно. Вижал, «ванна» па тайвански, када вадра шудро паи, вадра ԥабардо паи и шушо тазо. Но само нэобычно, со сас важ мандэ, кай вся када тердёлас аврял англа Зало Царства, ай и ԥрала котэ андэ кадэя время ӷотовились каринг о канӷрэсо. Мэ манглэм кай и ԥэй тэ дэл манди варисави занавеска, кай тэ затулисавав, но вой манди андя прозрачно плёнка. Можно сас тэ гарадював пала цэр, но котэ сас папина, савэ ханаспэ. Тоди мэ погиндосардэм: «Лэ ԥралэнди щяс найкала, вонэ заняти. Ай если мэ када на стерава, кадэлэса мэ на става патив пэ хулая. Эх, со ж тэ терав, прижыляпэ тэ халадював».

О Харви полэлас, кай лэ ԥралэнди, савэ дэнас дума пэ шыб ами, май драго тэ полэн лэ Иеговас, кай тэ дружын лэса, ԥарэс через кода, кай вонэ най фартэ ӷрамотни. И пэ лэндири шыб на сас и библейско литература. Андо 1963 бэрш и ԥрала ами моӷли тэ пистрон пэ пэстири шыб, важ кода кай лэндэ появисайля письменность латинсконэ буквэнца. И ԥрала закамлэ тэ сытярэн, кай и катутнэ свидетеля тэ сытён тэ адинон пэ пэстири шыб. Када сас найвушэро дила, но всаек када вижыля. Андо 1966 бэрш пэ шыб ами вимэклэ пэрво библейско литература. Ай андо 1968 бэрш пэ кадэя шыб вижыля «Сторожэво башня».

О правительство домэкля, кай амэ тэ вимэкас и литература кати пэ китайско шыб. Важ када амэнди прижыляпэ тэ вимэкас «Сторожэво башня» най сар обычно. Дэсави время амэ вимэкасас и литература, андэ сави сас сразу дуй шыба, китайско и ами. Если варикасти попэлиноп кадэя литература андэ вас, тоди вонэ погиндосардоп, кай амэ камас тэ сытярас лэ катутнэ манушэн тэ ӷанэн и китайско шыб. Лэ Иеговастири арӷанизацыя вимэкля бут литература пэ шыб ами, сави поможый тэ уӷанэн о чачимос анда Библия (Деян. 10:34, 35).

Андо 1960 жы кай 70 бэрша бут ԥрала анда ами на жувэнас па лэ Иеговаско законо, важ кода кай на дополэнас принцыпоря, вонэ андярэнас билажаварди жызня, матёнас, чамбэнас о бетелё и цырдэнас. Кала о Харви авэлас андэ собрании, во поможыяс лэ ԥралэнди тэ полэн, сар о Иегова пэ када диқэл. Еқварэс, кала амэ ладасас андэ авэр собрания, стердяпэ кода, состар мэ залэм тэ росԥэнав мэрни дума.

И ԥрала, савэ на заваздэнас о шэро, камэнас тэ парудёнпэ, но кацавэ сас най всаворэ. Кала амэ авелям пэ Тайвань, лэ вазвещятелёнэн котэ сас май бут чем 2 450, ай через 20 бэрш, котэ ашэляпэ кати 900. Через када амэнди сас фартэ ԥарэс по ди. Но амэ поласас, кай о Иегова на домэкэла, кай андэ пэстири арӷанизацыя тэ авэл найвужэс (2 Кор. 7:1). Во поможысардя, кай андэ собрании тэ авэл вужэс. И акана пэ Тайвань май бут чем 11 000 вазвещятелёнэн.

Андэ 1980 бэрша, кай и ԥрала анда амийски собрании и дружба лэ Иеговаса ашэля май састи. Важ када, о Харви моӷ тэ отдэл май бут время важ и китайски собрании. О Харви поможысардя дэсавэ ԥэяндирэ хуланди, кай вонэ тэ ашэн лэ Иеговастирэ свидетеля. И во сас кадэлэсти фартэ лошало. Сэрав, сар во анда вся оди росԥэнэнас, сар ек мурш анда кодэла мануша пэрво разо мангляпэ лэ Иеговасти. Мэ тожэ фартэ лошали, кай дэм помощь дэсавэ жувлянди тэ дружын лэ Иеговаса. Манди дажэ випэля кацави бах, кай тэ служысарав лэ бэятонэнца кодэла жувляти, савяса мэ изучала и Библия.

Акана паша мандэ нинай о Харви. Амэ лэса прожувдям варикай 59 бэрш. Андо 2010 бэрш 1 января, лэс на ашэля. Мэрно кучутно Харви муля лэ ракостар. Во сас андэ полновременно служэния варикай 60 бэрш. Манди идоси кадэлэстар ԥарэс. Но мэ фартэ лошали, кай сымас паша лэстэ, кала лэ Дэвлэстири дила кати залэласпэ андэ Тайвань и Япония. Амэ сытелям тэ дас дума, ай о Харви дажэ сытеля тэ пистрой пэ дуй ԥарэ азиацки шыба.

И бэрша лэн пэско. И дэсави время палпалэ, о Руководящё совето мангля, кай мэ тэ рисавав палпалэ андэ Австралия. Ай мэ погиндосардэм: «Най. Анда Тайвань мэ на ладаватар». Но о Харви сытярдя ман, никала тэ на ԥэнав най лэ Иеговастиря арӷанизацыяти. Важ када мэ ԥэндэм, кай пэрэладава. И кала прожыля время, мэ полэм, кай када сас годявэрнэс.

Акана мэ служысарав андо австралазийско филиало, ай пэ выходни мэ росԥэнав важ о Дэл разнонэ вазвещятелёнэнца. Мэ фартэ лошали, кай моӷу тэ проандярав экскурсии андо Вефилё, важ кода кай ӷанав дуй шыба, японско и китайско. Ман фартэ подритярэн лэ Дэвлэстирэ алава, кай во рия каринг и жызня кодэлэн, ко муля! Мэ ӷанав, кай о Иегова сэрэл пала Харви, саво сытеля тэ на ԥэнэн лэсти никала «най» (Иоан. 5:28, 29).