АНДО Иерусалимо, андо Музеё библейских стран, исин бар. Пэр лэстэ пистросардэ варикай 700 жы кай 600 бэрш жы кай о И. Х. Лэс виарақлэ андо Израилё, найдур лэ Хевроностар андэ пещера, кай гаравэн лэ мулэн. Сар ԥэнэнпэ андо ек научно журнало, пэ кадэва бар сас вимардэ кацавэ алава: «Тэ дэл амрая о Яхве Саваоф лэ Хагавостирэ шавэс, лэ Хагафос». Сар кадэла алава доԥэнэн, кай ла Библияти можно тэ патяс! Котэ пистромэ лэ Дэвлэско алав пэ древнееврейско шыб. Лэс пистросардэ, сар тетраграмматоно. Када штар еврейски буквы. Романэс када ЙХВХ, ай ԥэнэнпэ, сар «Иегова» или «Яхве». Кала пистросарэнас и Библия, кадэва алав драго ӷанэнас и часто ԥэнэнас лэс. Кадяжэ пэ стины андэ пещеры, андэ савэ гаравэнас, сас пистромэ лэ Дэвлэско алав и авэр алава, андэ савэ сас дэсавэ части лэ Дэвлэстирэ алавэстар.

Акэ со росԥэнэн ек учоно, савэс ақарэн Рейчел Набулси анда университето Джорджии (США), саво розлэлпэ андэ шыба: «Кода, кай сас най еқвар пистромэ алав ЙХВХ пэ бара, пэ стины, андэ пещеры, кай гаравэнас лэ мулэн манушэн и андэ библейски тексторя, сыкавэл, пэ скати дэ важно сас кадэва алав важ и мануша андо Израилё и андэ Иуда. Пэ шыб, сави пистрояспэ и Библия, лэ Дэвлэско алав сас пистромэ май бут чем тысяча раз. Кадяжэ и андэ лэ манушэндирэ алава, андэ савэ сас часть лэ Дэвлэстирэ алавэстар.

Кода, кай вимардэ и алава по бар «Яхве Саваоф», романэс када «О Иегова, Хулай пэ войскоря». Вижал, най кати лэ Дэвлэско алав ԥэнэнас андэ время, кала пистронас и Библия, но и ԥэнэнас кадэла дуй алава «Яхве Саваоф». Када доԥэнэн, кай ла Библияти можно тэ патяс. Андэр латэ пистромэ: «О Иегова, Хулай пэ войскоря» и «о Иегова Дэл, Хулай пэ войскоря» 283 разоря. Май часто амэ можэм када тэ диқас андэ книӷи Исаия, Иеремия и Захария.