АНДЭ Библия андэ книӷа Даниила ԥэнэнпэ, кай сас кацаво царё Валтасаро. Ай дэсавэ мануша, савэ на патян ла Библияти, бут бэрша доԥэнэнас, кай во никала на сас (Даниил 5:1). Вонэ кадя гиндонас, важ кода кай нико и нисо нащи виарақэнас, кай тэ доԥэнэн, кай во жувэлас. Но андо 1854 бэрш када паруделя. Васо?

Андэ кадэва жэ бэрш о британско консуло о Джоно Тейлоро роздиқэлас кода, со ашэляпэ лэ форостар Уро, саво сас по юӷо, пэ саво адес ԥэнэн Ирако. Котэ андэ ек бари башня во виарақля дэсавэ цылиндроря, савэ стердэ анда ӷлина. Кадэла цылиндроря сас лунгимаса варикай 10 сантиметров и пэр лэндэ сас варисо пистромэ. Пэ ек андар лэндэ сас пистромэ молитва пала вавилонско царё Набонидо и пала лэско барэдэр шаво Валтасаро, кай вонэ тэ жувэн бут бэрша. Лэ манушэнди, савэ на патян ла Библияти, прижыляпэ тэ прижанэн, кай о Валтасаро па чачимастэ варикала сас.

Но сар пистромэ андэ Библия, о Валтасаро найпросто сас, ай инке во сас царё. Кодэла, ко на патянас ла Библияти, асанаспэ кадэлэстар. Английско учоно о Уильямо Толбото, саво жувэлас андо 19 вико пистросардя, «дэко ԥэнэн, кай о... [Валтасаро] и лэско дад о Набонидо правинас, но кай када сас кадя, нисо на доԥэнэн».

Вся терделя пэ пэско ҭан, сар вонэ росполинэ кода, со сас пистромэ пэ цылиндроря, савэ анда ӷлина. Котэ пистромэ, кай о дад лэ Валтасароско, о царё Набонидо улаглясас анда ӷлавно форо анда страна и дэсавэ бэрша лэс на сас. Ко сас правителё андэ страна, пока лэс на сас? Андэ «Британско инцыклапедия» пистромэ: «Кала лэ Набонидос видарадэ, во дя лэ Валтасарости почти вся пэсти армия и дя лэсти тэ правий». Вижал, вся кадэя время андо Вавилоно правияс и о Валтасаро и о Набонидо. Важ када ек баро учоно о Алано Миллардо пистросардя, кай кода, со сас пистромэ андэ книӷа Даниила, правильно. О Валтасаро сас «царё».

Но со лэ Дэвлэстирэ служытелёнэнди доԥэнэн, кай можно тэ патяс кодэлэсти, со пистромэ андэ Даниила и кай вой лэ Дэвлэстар? Кода, кай и книӷа Даниила исин андэ Библия (2 Тимофею 3:16).