Мэ арақаделэмпэ андо форо Квебеко, саво андэ Канада. Котэ май бут мануша дэнас дума пэ француско шыб. Мэрно дад о Луи и дэй Зелия фартэ любинас ман и драго заботинаспэ пала мандэ. Мэрно дад сас лажавно и любияс тэ адиной. Ай мэ любисаравас тэ пистросарав и камавас тэ авав журналисто.

Кала манди сас 12 бэрш, амэндэ цэрэ авеля о Родольфо Суси, каса о дад терэлас бути. Во авеля пэстирэ друӷоса. Вонэ сас лэ Иеговастирэ свидетеля. Мэ набут ӷанавас важ и свидетеля и манди сас найинтересно, андэр со вонэ патян. Но манди чалеля, сар годявэрнэс и па порядко вонэ дэнас атветоря па Библия пэ всаворэ вопросоря. Мэрнэ дадэсти и мэрня дати када кадяжэ фартэ чалеля, и амэ закамлям тэ сытювас па Библия.

Мэ ԥиравас андэ католическо школа и росԥэнавас лэ однокласниконэнди пала кода, со уӷанавас анда Библия. Пала када уӷанглэ и учителёря, ай вонэ сас рашая. Вонэ на линэ па Библия тэ росԥэнэн, со мэ ԥэндэм най кадя, ай линэ англа вся класо тэ ԥэнэн, кай мэ жав против всаворэ! Хоть манди сас найвушэро, но через када мэ полэм, кай кода, сости сытярэн андэ школа пала қандири, на сжалпэ кодэлэса, со пистромэ андэ Библия. И мэ полэм, кай манди андэ кадэя школа най со тэ терав. Мэ пушлэмпэ кай мэрнэ родителя и пэрэжылэм андэ авэр школа.

Мэ на парашавас тэ сытював па Библия, но лэ Иеговасти мэ на лэм фартэ тэ патяв, важ кода кай мэ даравас тэ росԥэнав важ о Дэл па цэра. И католическо қандири фартэ тасавэлас пэ мануша и терэлас вся, кай амэ тэ на росԥэнас важ о Дэл. Андо Квебеко о премьер министро о Морисо Дюплесси сас само пашутно политическо союзнико ла қандиряко. Во стердя вся, кай лэ Иеговастирэ свидетелёнэн и мануша тэ марэн и тэ ԥэнэн пэр лэндэ найлашэ алава. Андэ кодэя  время, кай тэ росԥэнэс важ о Дэл трэбуй сас тэ авэс фартэ смило.

Кай тэ на дарав манди поможысардя о Джоно Реё, саво сытеля андо девято класо андэ Школа Галаад. О Джоно бут сости сытеля андэ служэния, но во на гиндояс пала пэстэ бут. Лэстэ сас ковло ди и лэса вушэро сас тэ дас дума. Во на ԥэнэнас манди ворта, со мэ терав най кадя, кай тэ сытярэл ман, но пэстиря диласа во сытярэлас фэдэр, чем лэ алавэнца. Кай о Джоно найдраго вижалас тэ дэл дума пэ француско шыб, важ када во часто ман лэлас пэса, кай тэ поможысарав лэсти тэ полэл и тэ дэл дума пэ кадэя шыб. Кода, кай мэ лэса ладисаравас, поможысардя манди тэ залав лэ Иеговастири риг и андэ 1951 бэрш 26 мая, через дэш бэрш посли кода, сар мэ пэрво разо диқлэмпэ лэ Иеговастирэ свидетелёнэнца, мэ болделэм.

Андэ амари найбари собрания андо Квебеко сас май бут пианероря. И через кода, со вонэ терэнас, мэ кадяжэ закамлэм тэ ашав пианероса. Андэ кодэя время, сар амэ росԥэнасас важ о Дэл, амэндэ на сас нисави литература, ек кати и Библия. Важ када амэнди сас трэбуй драго ла тэ ӷанас и кода, кай савэ стихоря сас пистромэ андэр латэ. Мэ старысававас май драго тэ уӷанав и Библия и тэ виарақав кодэла стихоря, савэ поможынас тэ доԥэнав о чачимос андар латэ. Но всаек май бут на камэнас тэ адинон и Библия, если ла на прижанэнас и католическо қандири.

Андэ 1952 бэрш мэ жэнисайлэм пэ Симона Патри. Када сас христианка анда мэрни собрания, сави на парашэлас тэ кандэл лэ Дэвлэс. Амэ пэрэлаглям андо Монреалё и через бэршэстэ посли ябьяв амэндэ арақаделяпэ бэята, и амэ лати приԥэндям Лиза. Каринг о ябьяв мэ парашэлэм тэ служысарав, сар пианеро. Но всаек амэ ла Симонаса старысавасас тэ жувас май просто, кай май бут тэ терас дила андэ собрания.

Прожылэ дэш бэрш и мэ упалэ лэм тэ гиндосарав, кай тэ лав май бут тэ служысарав. Андэ 1962 бэрш мэ сытювавас ек шон андэ Школа священного служэния важ и старейшыноря андо канацко Вефилё. Котэ мэ жувавас лэ ԥралэса, савэс ақарэн Камиллё Уэллетт. Лэстэ, сар и мандэ, сас ери, но во всаек фартэ камэлас май бут тэ служый лэ Иеговасти. Када манди фартэ чалеля. Андэ кодэла бэрша андо Квебеко почти нико анда свидетеля, кастэ сас бэяцэ, на служынас пианеронэнца. Но о Камиллё камэлас тэ служый полновременно. Во най еқварэс ԥэнэнас манди, кай мэ кадяжэ тэ погиндосарав пала када.  Прожыля дэсави время и мэ полэм, кай мандэ вижала упалэ тэ служысарав пианероса. Дэкасти, кода, со мэ витидэм тэ терав, здэласпэ найгодявэрнэс. Но мэ патявас, кай о Иегова подритярэла ман.

Андо 1964 бэрш амэ ла Симонаса лям тэ служысарас андэ амаро форо Квебеко, сар спецыальни пианероря. И котэ амэ служысардям дэсавэ бэрша. Каринг кодэя время ашэля май вушэро тэ росԥэнас важ о Дэл. Но всаек амэн дэкай ӷонинас.

Еқвар андэ суббота андо найбаро форо Сент-Мари найдур лэ Квебекостар, ман залинэ и рая. Ман андярдэ андэ ваздии и бэшардэ, важ кода кай мэ росԥэнавас важ о Дэл па цэра би лилэско, саво вонэ камэнас, кай амэндэ тэ авэл, кай тэ росԥэнас важ о Дэл. Кала ман андэ каринг о холинако сындомари, савэстэ лали Байяржон, во пушля: «Ко авэла тиро адвокато?» Мэ ԥэндэм: «О Глен Хау *». Тоди во нервэнца зацыписайля: «Най! Кати най во!» О ԥрал Глен Хау сас ашунгло адвокато, лэстэ драго вижалас тэ дэл дума важ лэ Иеговастирэ свидетеля. Йто манди ԥэндэ, кай о сындо зля пар мандэ вся и дош.

Важ кода кай амэн ӷонинас андо Квебеко, сас фартэ ԥарэс тэ виарақас ҭан, кай тэ прожал и собрания. Амари цынёни собрания виарақля пурано ӷаражо, саво на топияспэ. Кай хоть набут тэ авэл котэ тато йвэндэ и ԥрала андэ масляно радиаторо. Амэ часто стидасаспэ круӷом лэстэ жы каринг кода, сар залэнаспэ и собрании, и росԥэнасас ек еқэсти кода, со сас амэнца и со амэн подритярдя.

Сар амэ лошалэ тэ диқас, каринг со андя кода, кай амэ бут бэрша росԥэнасас важ о Дэл. Андэ 1960 бэрша андо форо Квебеко, ай кадяжэ паша Кот-Нор и по полуострово Гаспе сас найбут цынёне собрании. Ай адес котэ дуй теократически раёноря, и ԥрала стидэнпэ андэ шукарнэ Залоря Царства.

Андо 1970 бэрш ман ла Симонаса манглэ тэ служысарав, сар раёно надзирателё, ай андэ 1973, сар обласно надзирателё. Кодэла бэрша мэ бут сости сытелэм кай ԥрала Лорье Сомюр * и Дейвидо Сплэйно * (вонэ лэдуй служынас, сар разъезни надзирателя). Сар прожанас и канӷрэсоря, амэ лэ Дейвидоса дасас дума пала кода, сар май драго тэ сытярэн лэ ԥралэн и лэ ԥэян. Сэрав, еқвар о Дейвидо ԥэндя манди: «Леонсо, манди фартэ чалеля тири послиднё речь. Роздраго! Но ту кадя бут росԥэндян, кай манди када хутилдоп тэ росԥэнав пэ трин речи!» Мандэ часто вижалас фартэ бут тэ росԥэнав андэ мэрнэ речи. Ай трэбуй сас тэ сытював тэ дав дума май набут.

Бут ԥрала и ԥэя андо Квебеко драго ман ӷанэнас и кала мэ ававас андэ лэнго раёно вонэ всаворэ камэнас манца тэ служын. Манди чалёлас тэ служысарав лэнца, но через када мэ май набут шавас сама лэ раёнонэ надзирателёс. Ай лэ обласнонэ надзирателёстири дила када, кай тэ подритярэл  лэ раёнонэ надзирателёс. Ек раёно надзирателё ковлэс манди ԥэндя: «Драго, кай ту бут шос сама лэ ԥралэн и лэ ԥэян, но на бистэр, кай када курко и ман трэбуй тэ шос сама. Ман кадяжэ трэбуй тэ подритярэс!» Кадэла алава поможысардэ манди тэ на бистрав, со андэ мэрни дила май ӷлавно.

Андо 1976 бэрш тердяпэ кода, со мэ никала на аштяравас. Мэрни хулаи и Симона, сави сас важ мандэ фартэ куч, фартэ занасвайля и муля. Манди фартэ чалёлас, кай вой жалас бут пэр со, кай тэ терэл аврэнди лашимос и кай любияс лэ Иеговас. Вой сас важ мандэ со май лашо друӷо и амал. Тэ пэрэандярав кадэва ԥаримос манди поможысардя кода, кай мэ теравас бут дила андэ служэния. И мэ блаӷодарисарав лэ Иеговас, важ кода кай во ман любий и подритярдя андэ кодэя ԥари важ мандэ время. Прожыля время и мэ жэнисайлэм пэ Кэролина Эллиотт. Вой сас пианерка, сави авеля андо Квебеко, кай май бут тэ служый, и дэлас дума пэ английско шыб. И Кэролин шол сама лэ манушэн и любий лэнца тэ дэл дума. Со май фартэ вой шол сама кодэлэн, ко лажал и ко жувэл екжэно. Вой ля драго манди тэ поможый андэ разъезно служэния.

Андэ 1978 бэрш андо январё ман манглэ тэ сытярав андэ пэрво Школа важ и пианероря андо Квебеко. Мэ фартэ пэрэжывал, важ кода кай када сас важ мандэ пэрво разо, и важ кодэла, ко лэла тэ сытёл, када кадяжэ сас варисо нэво. Драго, кай андэ кодэва пэрво класо сытёнас бут пианероря, савэ драго ӷанэнас пэстири дила. Мэ хоть и сытяравас лэн, но бут сости екжэно лэндар сытювавас!

Прожыля набут время и андэ кодэва жэ бэрш по Олимпийско стадионо андо форо Монреалё прожыля международно канӷрэсо «Победоносная вера». Када сас само баро канӷрэсо, саво сас варикала андо Квебеко. Пэр лэстэ сас май бут чем 80 000 мануша. Мэрни дила сас тэ дав дума лэ журналистонэнца и тэ дав атветоря пэ лэндирэ вопросоря. Сар драго сас тэ  адиносарас, кай пистросардэ лашэ алава пала амаро канӷрэсо. Май бут чем 20 часоря па телевизоро и па радио росԥэнэнас важ кадэва канӷрэсо. Ай кадяжэ андэ ӷазеты пистросардэ бут статьи пала лэстэ. Пала кадэва канӷрэсо фартэ бут дэнас дума!

Андо 1996 бэрш мэрни жызня фартэ паруделя. Жы кодэла времятар, сар мэ болделэм, мэ росԥэнавас важ о Дэл кати пэ француско шыб андо Квебеко. Ай акана ман бишалдэ андо Торонто андэ область, кай дэн дума пэ английско шыб. Мэ гиндосаравас, кай на поджав важ кадэя служэния. Сар кати мэ гиндосаравас, кай манди прижалапэ тэ росԥэнав речи пэ английско шыб, ман лэлас тэ тиной. Манди трэбуй сас инке май часто тэ мангавпэ и май бут тэ патяв лэ Иеговасти.

Кала мэ сгиндосарав кодэла дуй бэрша, савэ служысаравас андо Торонто, камав тэ ԥэнав, кай вонэ сас фартэ лашэ. И Кэролин поможыяс манди май драго тэ дав дума пэ английско шыб и ԥрала ман фартэ подритярэнас. И амэндэ котэ ашэлэ бут нэвэ друӷоря.

Кажно пятница мандэ сас бут дила важ о раёно канӷрэсо. Но вэчэронэнца мэ витидавас варикай часо тэ росԥэнав важ о Дэл па цэра. Варико моӷ тэ гиндой: «Состэ тэ росԥэнэс важ о Дэл, если пэ выходни авэла о канӷрэсо?» Но кода, кай амэндэ андэ служэния сас лашэ думы, када дэлас манди зор. Дажэ акана, кала мэ росԥэнав важ о Дэл па цэра, манди ашэл инке май драго по ди.

Андэ 1998 бэрш ман и ла Кэролина бишалдэ андо Монреалё тэ служысарас спецыальнонэ пианеронэнца. Дэсавэ бэрша мэ диқавас пала кода, кай тэ росԥэнэн важ о Дэл котэ, кай прожан чи стидэнпэ бут мануша. И инке теравас дила лэ журналистонэнца, савэ пистрон андэ ӷазеты, дэн дума па телевизоро чи андо интэрнэто, кай тэ на гиндон пала лэ Иеговастирэ свидетеля найдраго. Ай акана, мэ и Кэролин, росԥэнас важ о Дэл лэ манушэнди, савэ найдэлмут пэрэлаглэ андэ Канада анда авэр страны. Бут андар лэндэ камэн тэ уӷанэн май бут важ и Библия.

Кодэлэ десэстар, сар мэ болделэм, прожылэ 68 бэрш. Кала мэ гиндосарав пала кодэла бэрша, мэ полав, кай андэ мэрни жызня сас бут лашимос. Со май бут лашимос манди андя кода, кай манди чалёлас тэ росԥэнав важ о Дэл и тэ поможысарав бутэ манушэнди тэ уӷанэн о чачимос. Кала кай мэрни щей кай и Лиза, вибарелэ и бэяцэ, вой и лако хулай линэ тэ служын пианеронэнца. Вой терэл када анда вся оди и кадэлэстар манди драго по ди. Ай инке мэ фартэ блаӷодарно мэрнэ друӷонэнди, савэ пэстиря диласа и лашэ советонэнца поможынас манди, кай мандэ тэ авэл май лащи дружба лэ Иеговаса и тэ терав важ лэстэ бут дила. Мэ полэм, кай тэ терас дила, сави дэл амэнди лэ Иеговастири арӷанизацыя, трэбуй тэ мангас кай о Иегова зор, када о свынто духо (Псалом 51:11). Мэ на парашав тэ блаӷодарисарав лэ Иеговас, кай во стодя пэр мандэ бут патив, кала домэкля тэ хвалисарав лэско алав! (Псалом 54:6).