Андэ авэр статья росԥэнэнаспэ пала Рая. Через кода, кай латэ сас бут ԥаримос, вой ля бут тэ пэл, кай лати тэ авэл май вушэро. Хоть и Библия на заԥэнэн, кай о мануш никала тэ на пэл, вой ԥэнэн: «На ав машкар кодэла, ко фартэ бут пэл» (Притчи 23:20). Кала о мануш бут пэл, кай тэ матёл, када римой о зор, розмарэл о ери, и авэр на камэн тэ ладин лэса. Кадяжэ кажно бэрш миллионоря мануша мэрэн, важ кода кай бут пэн. Если и мануша тэ приашундёнпэ каринг кода, со подԥэнэнпэ андэ Библия, бут анда када лэнца может и тэ на терэлпэ.

Ла Раятэ вижыля вся тэ стерэл, кай латэ тэ на авэл кацави бида. Акэ со вой ԥэнэн: «О пимос на стердя манди по ди май вушэро. И мэ на парашэлэм тэ гиндосарав, состар манди ашэлас ԥарэс. Мэ тердэм кадя, сар ԥэнэнпэ андэ Филиппийцам 4:6, 7 «Ни пала со фартэ на загиндонпэ. Но андэ вся, кала мангэнпэ и кала мангэнпэ ясвэнца, ԥэнэн „наис“ анда оди и росԥэнэн лэ Дэвлэсти, со камэн. Тоди лэ Дэвлэско миро, саво май баро кодэлэстар, со мануш полэл, фэрия тумарэ одя и годя через о Иисус Христос». Кажно рят, кала мэ лавас тэ гиндосарав, состар манди ашэлас ԥарэс, мэ сразу мангаваспэ лэ Иеговасти. Мэ росԥэнавас лэсти пала вся, со терэласпэ мандэ андо ди. Даже пала мэрни холи, кай мандэ дуқал оди и кай мэ на камав тэ жував. Мэ мангавас, кай во тэ поможый тэ на авэл мандэ кода, состар ԥарэс по ди. Тэсара мэ гиндосаравас кати, состар манди по ди ашэля фэдэр. Када поможысардя манди тэ гиндосарав пала кода, со мандэ исин, ай най со уже нинай. Мэ дэм пэсти  алав, кай даже на диқава по пимос. О лашимос, саво мандэ ашэля андо ди, сас фартэ куч важ мандэ, и мэ на камавас лэс тэ хасарав.

О билажавардимос анэн ԥаримос по ди. Но, со пистромэ андэ Библия, поможый тэ на терас, со анэн каринг о билажавардимос. Ай со анэн каринг када? Кала о мануш диқэл билажавардэ картинки и киноря. Ай кадяжэ, кала вэсэло диқэл пэ щеёра. Ек шаворо, савэс ақарэн Пава, ԥэндя: «Вэсэло тэ диқэс пэ щеёры найԥарэс. Дэкала может и щёй тути и на чалёл. Но кала ту полэс, кай чалёс лати, ту лэс просто вэсэло тэ диқэс пэр латэ». Спэрва кай о Пава даже на сас андо гиндо пэс кадя тэ андярэл. Но лэсти най еқвар ԥэнэнас, кай во кадя пэс андярэл. И во закамля тэ диқэл, сар лэстэ када вижал. Тоди во каринг када присытеля. Но лэсти ашэля ԥарэс кадэлэстар. Во ԥэнэн: «Манди на чалёлас кода, саво мануш мэ ашавас. Мэ гиндосаравас кати ек пала пэстэ».

О Пава проадиносардя и статья важ и молодёжь, сави стерди па Библия. Во погиндосардя пала алава, савэ ԥэнэнпэ андэ Притчи 20:11 «Лэ шаворэс, инке можно тэ полэс, саво во, па лэстири дила, хохавэл во и андярэл во пэс вужэс чи най?» Сар када лэсти поможысардя? О Пава поля, кай тэ диқэл вэсэло пэ щеёра, када найвужэс и хохавнэс. Акана во ԥэнэн: «Мэ полэм, кай кала вэсэло диқэс пэ щеёра, ту уже андярэс корко пэс найдраго. И через када, кала женисапэ, тумэндэ на вижала тэ ладин ек аврэса. Мэ погиндосардэм, сар авелоп мэрня хулаяти тэ диқэл, кай мэ диқав пэ авэр вэсэло. Тоди мэ полэм, кала мануш андярэл пэс кадя, кадэлэса во терэл аврэсти вэрыто. Кала варисо вижал вушэро, када на сыкавэл, кай када драго». О Пава закамля тэ парудёл. Во парашэля тэ диқэл вэсэло пэ щеёра, и на тердя нисаво билажавардимос.

О Кало инке май пашэ ашэля, кай тэ стерэл билажавардимос. Во ля тэ диқэл найлашэ картинки и киноря. Хоть лэстэ и сас хулаи, савя во фартэ любияс, во всаек рияспэ каринг кадэя найлащи дила. О Кало росԥэнэн, кай лэсти фартэ поможысардя, кала во погиндосардя пала алава анда 1 Петра 5:8. Катэ ԥэнэнпэ: «Фэринпэ и на парашэн тэ сэрэн, андэ сави время жувэн. Тумаро ворого, о Сатана, ԥирэл, сар о лево, саво рычий и родэл, кас тэ похал». О Кало ԥэнэн: «Адес андо миро фартэ бут билажавардэ картинки и киноря. Билажавардимос, саво диқлян, ашэлпэ андо шэро и на вижал котар. Но и алава анда Библия поможысардэ манди тэ полав, ко цырдэл ман пэ кадэя найлащи дила. Манди трэбуй сас тэ сытював тэ сэрав, ко тердёл пала кадэла найлашэ картинки и киноря. Акана мэ ӷанав, кай ек о Иегова поможыя манди тэ фэрисавав и тэ на парашав тэ сэрав андэ саво миро жував, кай тэ фэрисарав пэско ери, пэсти годи и пэско ди». Лэ Калэсти када фартэ поможысардя и во парашэля тэ терэл кадэя фартэ найлащи дила, каринг сави во присытеля. Када фэрисардя лэс кодэлэстар, со могло тэ анэн бари бида.

Сар амэ диқас кода, со о Дэл подԥэнэн через и Библия, фэрий амэн кодэлэстар, со анэн бари бида. Ай со кала, каринг со присытелям и со амэндэ андо ди, ԥарэс тэ парувас? Давай уӷанаса, сар кода, со пистромэ андэ Библия поможый.