САВО ДЭ ЛАШИМОС АВЭЛА АНГЛЭ! Амаро создателё дэл алав, кай амэ жуваса вечно ворта катэ, пэ ԥув. Но бутэнди ԥарэс андэ када тэ патян. Кацавэ мануша ԥэнэн: «Всаворэ амэ варикала мэраса. Када кадя и трэбуй тэ авэл, кай ек мэрэл, ай авэр арақадёлпэ». Авэр гиндон, кай вечно жизня исин, но най пэ ԥув. Па лэндирятэ вижал амэ жуваса вечно, кати тоди, сар мэраса и жаса по нэбо. Ай со ту пала када гиндос?

Май англал диқаса, со андэ Библия ԥэнэнпэ пала када. Сар кода, со о мануш ӷанэн тэ терэл, сыкавэл, скати во трэбуй тэ жувэл? Саво май англал сас гиндо кай о Дэл важ и ԥув и важ и мануша? Васо и мануша линэ тэ мэрэн?

Кацавэс, сар о мануш, будэр нинай, када со май лашо, со создал о Дэл пэ ԥув. Васо када кадя? Важ кода кай андэ Библия ԥэнэнпэ, кай кати лэ манушэн о Дэл создал кадя, кай вонэ пэр лэстэ тэ шонпэ (Бытие 1:26, 27). Вижал, кай о мануш ӷанэн тэ андярэл пэс кадя, сар о Дэл, важ кода кай кадя лэс о Дэл создал. О мануш ӷанэн тэ любий и ӷанэн, сар тэ обжалпэ аврэнца.

Кати и мануша гиндон и полэн, со авэла англэ и полэн, со лашо, ай со найлашо. Кадяжэ кати и мануша полэн, кай лэнди трэбуй о Дэл. Акэ, васо амэндэ захутилэл оди, кала диқас, сави дэ бари люма и вся со пала латэ. Кадяжэ, сави дэ шукарни исин природа, инке кала диқас пэ шукарнэ картины и ашунас музыка. Но само ӷлавно кати о мануш может тэ уӷанэн пала Дэл и май драго тэ полэл лэс. Када вся драго сыкавэл, кай и мануша фартэ на шонпэ лэ животнонэнца и всаворэса, со жундо.

Погиндон, о Дэл дя лэ манушэнди кода, кай вонэ вся время тэ сытён и май драго тэ терэн кода, со ӷанэн. И здэлпэ, кай када трэбуй тэ терэн вечно. Тоди камлоп о Дэл, кай вонэ тэ жувэн кати 70 чи 80 бэрш? О Дэл дя амэнди вся када и стердя кадя, кай амэ бут со тэ ӷанас тэ терас, кай тэ жувас пэ ԥув вечно.

Всаек дэсавэ ԥэнэн, кай лэ Дэвлэстэ и андо гиндо на сас, кай и мануша тэ жувэн вечно пэ ԥув. Па лэндири дума и ԥув, када ҭан най пэ вся время. Када сар и военно площадка, кай о Дэл диқэл, виритярэна и мануша о ԥаримос чи най. После када о Дэл витидэл, ко жувэла лэса вечно по нэбо, ай ко най. Но сар када чаче, тоди вижал, кай о Дэл терэл, кай тэ авэн и биды и о найлашимос, саво исин пэ ԥув. Но тоди када на сжалпэ кодэлэса, саво о Дэл. Андэ Библия ԥэнэнпэ:  «Во Дэл, саво зритярэл пэстирэ алава. И во дур лэ хохаимастар. Во ритярэл пэско законо и на хохавэл» (Второзаконие 32:4).

Кода, со сас кай о Дэл андо гиндо важ и ԥув, драго дицол анда алава, савэ запистромэ андэ Библия: «О нэбо, о нэбо лэ Иеговаско. Ай и ԥув, во дя лэ манушэндирэ шавэнди» (Псалом 115:16). Дицол, кай о Дэл камэлас, кай вся время и ԥув тэ авэл сар шукарно цэр важ и мануша. Важ када во и дя вся, со трэбуй важ лэ манушэстири жизня, кай о мануш тэ жувэл бахталэс вечно пэ ԥув (Бытие 2:8, 9).

«О нэбо, о нэбо лэ Иеговаско. Ай и ԥув, во дя лэ манушэндирэ шавэнди» (Псалом 115:16).

Андэ Библия драго ԥэнэнпэ кадяжэ пала кода, со о Дэл загиндосардя важ и мануша. Акэ, сави дила во дя лэ пэрвонэ манушэнди: «Тэ авэн тумэндэ бут бэятцэ па вся ԥув, тэ залэнпэ ла ԥувьяса и тэ авэн тумэ хулая... пэ вся жундо, со ԥирэл па ԥув» (Бытие 1:28). О Дэл приԥэндя лэ манушэнди, кай вонэ тэ диқэн пала ԥув и тэ терэн кадя, кай па вся ԥув тэ авэл раё. Па чачимастэ о Адамо и Ева и кодэла, ко лэндар жыля, трэбуй сас тэ жувэн вечно, но най по нэбо, ай пэ ԥув!

Тоди васо мэрэн и мануша? Андэ Библия ԥэнэнпэ, кай ек анда лэ Дэвлэстирэ анӷелоря, саво май интя ашэля ашунгло, сар Сатана, стердя варисо. Со? Кай кода, со загиндосардя о Дэл, тэ на авэл. Сар во када стердя?

Андо Эдемско садо о Сатана стердя кадя, кай о Адамо и Ева тэ жан против о Дэл. О Сатана ԥэндя, кай о Дэл на дя лэнди кода, кай вонэ екжэнэ тэ витидэн, со лашо, ай со найлашо. Тоди о Адамо и Ева витидэ тэ тердён пэ Сатанастири риг и тэ жан против о Дэл. Каринг со када андя? Цэмин кадэлэсти ашэля кацави, сар ԥэндя о Дэл, вонэ мулинэ. И пэрви мануша хасардэ кода, кай тэ жувэн вечно андо раё пэ ԥув (Бытие 2:17; 3:1—6; 5:5).

Кода, кай о Адамо и Ева жылэ против о Дэл, идоси амэнди анэн бида. Андэ Библия ԥэнэнпэ: «Через ек мануш [о Адамо] о бэзэх авеля андо миро, ай через о бэзэх смэрть, и кадя и смэрть пэрэжыля пэ всаворэ мануша, важ кода кай всаворэ ӷрешни» (Римлянам 5:12). И мануша мэрэн важ кода, кай пэр лэндэ пэрэжыля о бэзэх и смэрть лэ Адамостар и ла Еватар, ай най важ кода кай о Дэл кадя загиндосардя.

Кода, кай жылэ против о Дэл андо Эдемско садо, на парудя лэ Дэвлэско гиндо пала кода, со во камэл тэ стерэл важ и мануша и важ и ԥув. Важ кода кай лэ Дэвлэстэ бари любовь, лашимос и чачимос, во закамля тэ виарақэл, сар амэн тэ одмэкэл анда рабство лэ бэзэхэстар и ла смэртятар. О апостоло Павло росԥэндя: «Важ кода кай пала бэзэх о мануш потинэл смэртяса, ай о подарко лэ Дэвлэстар, када и вечно жизня, сави через о Иисус Христос амаро Ӷосподо» (Римлянам 6:23). Важ кода кай о Дэл любий амэн, во «отдя пэстирэ шавэс [лэ Иисусос Христос], саво лэстэ ек, кай кажно, ко сыкавэл, кай патял андэр лэстэ, тэ на мэрэл, ай тэ жувэл вечно» (Иоанна 3:16). Кода, кай о Иисусо екжэно камля и жыля пэ кода, кай тэ отдэл пэстири жизня, кай тэ витинэл лэ манушэн, во рисардя вся кода, со хасардя о Адамо a.

Йто о Дэл стерэла кода, со ԥэндя, кай пэ ԥув авэла раё. Кай тэ диқэс кода, пала со сас дино алав, тути трэбуй тэ приашундёспэ каринг лэ Иисусостирэ алава: «Зажан через и вуськи вороты, важ кода кай баро и буӷло дром андярэл каринг и смэрть и бут жан кадэлэ дромэса. Ай и найбарэ вороты и о вусько дром андярэл каринг и жизня и лэс найвсаворэ виарақэн» (Матфея 7:13, 14). И акэ, авэса ту тэ жувэс андо раё чи най, када андэ тирэ вас. Ай со ту витидэса?