Уӷанаса акэ со. И мануша, савэ арақаделэпэ андэ ек дес и вонэ ек па муй, вонэ фартэ пашэ ек еқэсти. И Нэнси Сигал, бари манушни андо Американско цэнтро, кай уӷанэн пала мануша, савэ пэ ек муй. Вой кадяжэ пэ ек муй пэстиря ԥэяса. И Нэнси акэ, со ԥэнэн: «Дэсавэ мануша, савэ пэ ек муй, полэн ек аврэс еқэ алавэса и бут на дэн дума». Ай акэ со ԥэндя ек манушни важ пэстэ и важ пэстири ԥэй, сави ласа пэ ек муй: «Амэ ӷанас ек пала ек вся».

Васо вонэ кадя полэн ек аврэс? И учёни ԥэнэн, через кода, сар лэн сытярдэ и ка́й вонэ барелэ. Но со май фартэ, кай лэндэ еқэндар и ӷены.

ПОГИНДОСАР. Амаро Дэл, саво создал кацави фартэ лащи ӷенетическо система, полэл амэн, сар нико авэр. О Давидо, саво пистросардя о Псалом еқвар ԥэндя: «Ту... фэрисардян ман всаворэ ригэндар андо йло кай мэрни дэй. Ту диқлян, сар мэрнэ кокаля сас драго стидэ андэ лако йло, кала пала када нико на ӷанэнас... Тирэ яқа диқэнас, кала мэрни жызня кати ашэля андо йло кай мэрни дэй и андэ тири книжка сас запистромэ, со трэбуй, кай тэ авэл о мануш (Псалом 139:13, 15, 16). Кати о Дэл фартэ драго ӷанэн и полэл кода, со пэрэдэлпэ лэ дадэстар, ла датар и лэ родостар. Во кадяжэ ӷанэн вся, со сас андэ амари жызня и васо амэ кацавэ ашэлям. О Дэл амэн драго ӷанэн. Тоди амэнди трэбуй тэ патяс, кай во андэ вся амэн полэл.

О Давидо мангэласпэ лэ Дэвлэсти: «Иегова, ту диқлян ман и ӷанэс ман. Ту ӷанэс, кала мэ бэшав и кала мэ ущяв, дурал уӷанэс мэрнэ гиндоря. Инке нинай алав мандэ пэ шыб, но ту Иегова ужэ ӷанэс лэс» (Псалом 139:1, 2, 4). О Иегова кадяжэ ӷанэн амарэ гиндоря, савэ нико на ӷанэн и дажэ «росполэл, васо амэ кадя гиндосарас» (1 Летопись 28:9; 1 Самуила 16:6, 7). Со амэ уӷанас анда кадэла алава важ о Дэл?

Дэкала амэндэ на вижал тэ росԥэнас андэ молитва, васо амэ дэсо стердям. Но амаро создателё най кати диқэл, со амэ терас, но и полэл, васо амэ када стерас. Инке во ӷанэн, саво лашимос камас тэ терас, хоть дэкала варисо андэ жызня и на мэкэл. О Дэл стердя кадя, кай амэндэ тэ авэл любовь андо ди. Вижал, во камэл тэ диқэл андар мэндэ лашо и шол сама пэ всаворэ амарэ лашэ гиндоря и, со лашо камас тэ терас (1 Иоанна 4:7 жы кай 10).

 Кода, со пистромэ андэ Библия, дэл тэ патяс,

• кай «Лэ Иеговастирэ яқа диқэн пэ кодэла, ко кандэл лэс и лэстирэ кан ашунэн, кала вонэ мангэнпэ ясвэнца» (1 ПЕТРА 3:12).

• кай о Дэл дэл алав: «Дава тути тэ полэс, сытярава тут тэ жас па дром, па саво тути трэбуй тэ жас. Подԥэнава тути и лава тэ диқав пала тутэ» (ПСАЛОМ 32:8).

Сар кода, кала амэ ӷанас, кай о Дэл полэл, со амэндэ терэлпэ андэ жызня и со амэндэ по ди, поможый амэнди андэ ԥари время? Акэ со сас ла Аннаса анда Нигерия. Вой росԥэнэн: «Сас кацави время, кай мэрни жызня сас фартэ ԥари и мэ на камавас тэ жував. Мэ сымас ԥивли и диқавас пала мэрни щей, сави пашлёлас андэ больница. Латэ сас насвалимос „гидроцефалия“ (када паи андэ годи). Ай мандэ виарақлэ рако андо колин. Трэбуй сас тэ терэн операцыя, химиотерапия и лучево терапия. Сас фартэ ԥарэс тэ пашлював андэ больница, кала мэрня щяти кадяжэ трэбуй сас тэ поможысарав».

Со дя зор ла Аннати тэ пэрэандярэл када вся? Вой ԥэнэн: «Мэ гиндосаравас пала стихоря анда Библия. Ек андар лэндэ, када Филиппийцам 4:6, 7. Котэ ԥэнэнпэ: „О лашимос андо ди, саво лэ Дэвлэстар, саво май баро кодэлэстар, со о мануш полэл, фэрия тумарэ одя и годя“. Кажно разо, кала мэ сэрав пала кадэла алава, мэ полав, кай о Иегова ашэл инке май пашэ каринг мандэ. Мэ ӷанавас, кай во ман полэл фэдэр, чем мэ корко пэс. Инке ман фартэ подритярэнас и поможынас мэрнэ друӷоря, када ԥрала и ԥэя анда собрания».

И Анна инке росԥэнэн: «Хоть мэрно зор идоси найлашо, амари жызня ла щяса ашэл май фэдэр. О Иегова амэнца и амэ сытелям тэ отшас и гиндоря, савэ кати пала найлашимос. Ай инке амэнди дэн зор и алава анда Иакова 5:11. Котэ ԥэнэнпэ: „Амэ ԥэнас бахталэ пэ кодэла, ко виритярдя. Тумэ ашундэ, сар о Иово виритярдя ԥари время и диқлэ, со о Иегова стердя важ лэстэ, и тумэ диқлэ, сар о Иегова любий и жалуий анда вся оди“». О Иегова драго полэлас, со терэласпэ кай о Иово андэ жызня. И амэ патяс, кай во драго диқэл, саво ԥаримос исин андэ амари жызня.