Ав ӷотово, кай на авэла вушэро

«Мэ ришыл будэр тэ на цырдав важ амаро цынёнё бэято. Важ када мэ дажэ амбладэм табличка „Тэ на цырдэн“. Но ужэ через часостэ манди кадя фартэ закамляпэ тэ цырдав, кай мэ лэм и цыӷарка» (Йошимицу, Япония).

САР дицол анда кадэва примеро, тэ мэкэс тэ цырдэс най кадя вушэро. Сас ек иследования через саво полинэ, кай почти 90 процэнторя мануша, упалэ лэн тэ цырдэн, если лэндэ сас срыво. Важ када, если ту камэс тэ ашавэс кадэя найлащи привычка, ав ӷотово, кай авэна ԥарэ маменторя. Савэ?

Бари жылания тэ цырдэс упалэ. Кацави бари жылания исин андэ пэрви трин дес посли послиднё цыӷарка, и прожал варикай через дуй курте. Ек мурш, саво будэр на цырдэл, ԥэнэн: «Кадэя жылания най вся и время, ай появийпэ время времяса». Дажэ если ту на цырдэса ужэ бут бэрша, тути можэт фартэ тэ закамэлпэ тэ цырдэс. Если кацаво авэла, лэ пэс андэ вас, тэрписар панч минуты, и диқэса, кай кадэя жылания прожала.

Пока ту отсытёс ла цыӷаркатар, авэла ԥарэс. Спэрва о мануш можэт тэ авэл сар суто и лэсти ԥарэс тэ авэл состредоточено. Во можэт тэ ҭулёл. Лэсти можэт тэ авэл найдраго, можэт тэ ханджёй и тила, май фартэ тэ потой, тэ хасал. Можэт тэ парудёлпэ настроения, тэ авэл нервино, холинако или дажэ тэ появийпэ депресия. Бут анда када ԥарэ маменторя прожана через штар, панч или шов курте.

Андэ кадэва ԥаро маменто тути поможына советоря, савэ май тэлэ.

● Драго висовпэ.

● Пи май бут паи и сокоря. Ха разно и лашо хамос.

● Залэпэ лэ спортоса па тиро зор.

● Кала ԥурдэс, лэ май бут воздухо и прецтавь пэсти, кай андэ тирэ лёгкие попэрэл вужо воздухо.

Через со ту можэш упалэ тэ лэспэ пала цыӷарка. Дума жал пала кацавэ ситуацыи, кала тутэ можэт упалэ тэ появийпэ жылания тэ лэс и цыӷарка. Можэт ту присытелян тэ цырдэс, кала пэс чаё чи кофе. Тоди пи када май ӥто. Канешно, потом кала ту мэкэса тэ цырдэс, ту сможэш упалэ тэ пэс чаё чи кофе, каринг со ту присытелян, и тэ на грабиспэ.

Но дажэ кала орӷанизмо ужэ вужо лэ никотиностар, андэ память можэт инке долӷо тэ ашэлпэ привычка тэ цырдэс андэ определёни ситуацыи. О Торбено, пала саво дэласпэ дума май упрэ, ԥэнэн: «Прожыля ужэ 19 бэрш, но идоси, сар мэ терав перерыво пэ кофе, мандэ бывает появийпэ жылания тэ лав и цыӷарка». Но потом обычно, жылания тэ цырдэс, саво появийпэ андэ определёни маменторя, ашэл най кацави бари и потом прожал совсем.

Ай кала дума жал пала спиртни напиткоря, катэ совсем авэр дила. Если ту мэкэс тэ цырдэс, фэдэр вообще пока тэ на пэс алкоӷолё и тэ на авэс андэ ҭана, кай лэс предлаӷают. Сар шутэ сама, май часто мануша упалэ лэн и цыӷарка, имено кала мануш пиля алкоӷолё. Васо?

● Дажэ если ту пилян совсем набут, удовольствия ла цыӷаркатар, ашэл пэ бутэстэ май бари.

● Часто котэ, кай мануша пэн, котэ жэ вонэ и цырдэн.

● Через алкоӷолё ту ужэ най кадя ритярэс пэс андэ вас и ужэ най кадя драго гиндос англа кода, сар варисо тэ стерэс. Най евья андэ Библия пистромэ, кай о вино залэл и годи (Осия 4:11).

Тирэ друӷоря и каса ту общяешся. Витидэ, каса тэ проандярэс и время. Старысав пэ скати када возможно, тэ на авэс машкар и мануша, савэ цырдэн или савэ предлаӷают када тути. И фэдэр тэ на авэс машкар мануша, савэ ԥэрясуют и приасанпэ тутар, кай ту ришыл тэ мэкэс тэ цырдэс.

Если тутэ стресо или ту нервичис. Кала пропушлэ бутэ манушэн, полинэ, кай май бут чем епаш мануша упалэ линэ тэ цырдэн имено посли кода, сар лэндэ сас стресо или вонэ через варикастэ росхоляйлэ. Если через када и тутэ появийпэ жылания тэ лэс и цыӷарка, тоди отвлекись: жа пи паи, лэ и жвачка или вижа пэ вулица. Погиндосар пала варисо лашо. Например, ту можэш тэ подэс дума андэ молитва лэ Дэвлэса или тэ проадинос набут анда Библия (Псалом 19:14).

Сар мануш можэт тэ хохавэл корко пэс

● Мэ стерава кати ек затяжка.

Па чачимастэ. Када ужэ хутила, кай почти епаш никотинови рецэптороря андэ тиро мозго кабута тэ прошонпэ. Када часто анэн каринг кода, кай мануш упалэ лэла тэ цырдэл.

● Кала мэ цырдав, када поможый манди тэ успокоюсь.

Па чачимастэ. Сар полинэ и учони, кала мануш цырдэл, через о никотино андо орӷанизмо ашэл май бут гормоноря, савэ ваздэн о стресо. Ай кода, кай тути здэлпэ, кай тути ашэля май спокойно посли цыӷарка, кадэва времено чуство появийпэ просто важ кода, кай пока ту на цырдян варисави время, важ тиро орӷанизмо када сас ԥарэс.

● Мэ цырдав ужэ бут время, манди ужэ позно тэ мэкав када.

Па чачимастэ. Гиндо, кай тутэ на вижала, на дэл зор тэ мэкэс тэ цырдэс. Андэ Библия пистромэ: «Если андэ ԥари время ту умэклян и вас, тоди тутэ на авэла зор» (Притчи 24:10). Отшув пэстар кацавэ гиндоря. Если манушэстэ исин бари жылания тэ мэкэл кадэя привычка, тоди лэстэ када точно вижала.

● Мэ на виритярава када.

Па чачимастэ. Канешно, пока мануш мэкэл тэ цырдэл, во чуствует пэс фартэ найдраго, но ужэ кати через дуй курте, лэсти ашэл фэдэр. Важ када на умэк и вас! Дажэ если жылания тэ цырдэс упалэ появияпэ через шона или бэрша, вой можэт тэ прожал ужэ через панч минуты, — ӷлавно тэ на лэс и цыӷарка.

● Манди нащи тэ мэкав, мандэ и кадя най састи психика.

Па чачимастэ. Если тутэ депресия или шизофрения и ту лечиспэ кадэлэстар, манг тирэ врачос тэ поможый тути тэ мэкэс тэ цырдэс. Во авэла кати радо тэ поможый тути. Во ӷанэл тиро насвалимос и савэ драба ту пэс. Во шола сама пэ када и подтидэла личения имено важ тутэ.

● Если мэ упалэ лава тэ цырдав, мэ парашава уважать корко пэс.

Па чачимастэ. Если ту на виритярэса и упалэ лэса и цыӷарка, сар када бывает и бутэ аврэ манушэндэ, савэ мэкэн када, ӷан, кай када нэ значит, кай тутэ никала на вижала тэ мэкэс. Лэ зор и упалэ старысав тэ мэкэс. Если ту на зритярдян корко пэс, када нэ значит, кай тутэ никала на вижала. Но если ту умэкэса и вас и парашэса тэ старыиспэ тэ мэкэс и цыӷарка — када значит, кай вой тут победисардя. Важ када на умэк и вас и тоди ту ла победиса!

Акэ со росԥэндя о Ромуальдо, саво цырдэлас 26 бэрш и потом мэкля када и ужэ на цырдэл май бут чем 30 бэрш: «Мэ на сэрав скати разоря мандэ на вижалас тэ зритярав пэс и мэ упалэ лавас и цыӷарка. Када сас фартэ часто. И кажно разо, кала мэ упалэ лавас и цыӷарка, мэ чуствовал пэс, кай нисо на ашав. Но мэ точно ришыл тэ уӷодисарав лэ Иеговасти, мэ бут мангаваспэ лэсти, и тоди мандэ вижыля тэ мэкав тэ цырдав».

Андэ послиднё статья важ кадэя тема, амэ шаса сама инке пэ дэсавэ лашэ советоря, савэ поможына тути тэ ашавэс кадэя найлащи привычка.

[Рамка/Картинка]

АНДЯРЭЛ КАРИНГ И СМЭРТЬ АНДО ЛЮБО ВИДО

О табако используют по разному. Дэсавэ табачни изделия дажэ моӷут тэ битинэн андо маӷазино, кай отдело важ и здорово питания и андэ аптеки, кай битинэн и чаря. Но всаек Всемирно арӷанизацыя здравоохранения ԥэнэн, кай о табако «андярэл каринг и смэрть андо любо видо». Мануш можэт тэ хасарэл и жызня через о насвалимос, саво появийпэ лэстар. Када можэт тэ авэл о рако чи сердечно-сосудисти заболевании. А если цырдэл манушни, сави ԥирэл, када можэт тэ анэн вредо лэ бэятости. Андо саво видо можэт тэ авэл о табако?

Биди. Када кацавэ цынёне цыӷарки, савэ цырдэн андэ Азия. Лэн вастэнца заболдэн андэ трубочка. Котэ пэ бутэстэ май бут смола, никотино и окись углерода, чем андэ обычни цыӷарки.

Сиӷары. Када кадяжэ табако, саво заболдэн андэ табачни листоря чи андэ бумаӷа, сави тожэ андо табако. Табако андэ сиӷары слабо щелочно, ай табако андэ цыӷарки — кислотно. Кацави различия дэл возможность, кай о табако андэ сиӷара тэ попэрэл андо орӷанизмо, дажэ кала и сиӷара на дян яг.

Кретек. Када цыӷарки, андэ савэ почти по епаш табако и гвозди́ка. Андэр лэндэ пэ бутэстэ май бут смола, никотино и окись углерода, чем андэ обычни цыӷарки.

Трубка. Кала цырдэн через и трубка, када анэн кацаво жэ вредо, сар и обычни цыӷарки. Када анэн точно кацаво жэ насвалимос, сар и обычни цыӷарки,, ай кадяжэ и рако.

Табачни изделия, савэ на трэбуй тэ дэс яг. Када табако, саво чамбэн и нюхательно табако, ай кадяжэ араматизировано гутха, сави распространёно андэ Юго-Восточно Азия. Када кадяжэ опасно важ о зор, важ кода кай о никотино всаек попэрэл андо орӷанизмо, но кати най через о ҭув, ай кала чамбэн андо муй.

Кальяно (бонг, наргиле, хукка, шиша). Через спецыально трубка мануш ԥурдэл табачно ҭув, саво спэрва прожал через о паи. Но через када андэр лэстэ на ашэл май мало токсиноря и канцерогеноря.

[Рамка/Картинка]

КАЛА ТУ ПОМОЖЫС АВРЭСТИ ТЭ МЭКЭЛ ТЭ ЦЫРДЭЛ...

● Подритяр. Фэдэр тэ хвалис лэ манушэс и тэ терэс най барэ подарочки лэсти, чем тэ подпусавэс лэ манушэс алавэнца или постояно тэ росԥэнэс, саво вредо анэн и цыӷарка. Май бут зор придэн кацавэ алава: «Попробуй тэ мэкэс инке еқвар, тутэ точно вижала», чем тэ ԥэнэс: «Ту со упалэ цырдэс?!»

● На холяв. Кала мануш, саво мэкэл тэ цырдэл, нервно и холинако пэр тутэ, на шув сама пэ када. Фэдэр ԥэн: «Мэ ӷанав, кай када най вушэро, но мэ кадя абуросарав туса, кай ту мэкэс тэ цырдэс». И никала на ԥэн кадя: «Ту май фартэ манди чалёсас, кала цырдэсас!»

● Ав лашо друӷо. Андэ Библия пистромэ: «Чачуно друӷо любий вся и время, во ԥрал, пэ саво можно тэ надеиспэ андэ бида» (Притчи 17:17). Ав терпеливо и добро «вся и время» — када андо любо маменто, нэ важно сави настроения кай о мануш, саво мэкэл тэ цырдэл.