Ту сможэш тэ победис!

АКАНА ту можэш тэ прилэс каринг пэстэ алава анда Библия: «Ав смило и тер дила» (1 Летопись 28:10). Со инке ту можэш тэ стерэс, кай тутэ тэ вижал тэ мэкэс тэ цырдэс?

Витидэ о дес. Врачоря ԥэнэн, кай авэла фэдэр, если о мануш, саво ришыл тэ мэкэл тэ цырдэл, стерэла када пока на прожылэ дуй курте посли лэстири ришэния. Када поможыя, кай и жылания тэ мэкэл и цыӷарки тэ ашэлпэ кацави жэ бари. Отметь андо календарё о дес, андэ саво ту камэс тэ мэкэс тэ цырдэс. Ԥэн пала када аврэнди и на домэк, кай варисо тэ мишыий тути андэ када.

Запистросар важ пэстэ гиндоря, савэ поможын тути тэ мэкэс кадэя привычка. Када моӷут тэ авэн гиндоря, савэ поможын тути тэ на умэкэс и вас. Можэт ту запистросарэса важ пэстэ:

● васо ту камэс тэ мэкэс тэ цырдэс;

● номеро телефоно, касти ту позвониса, кала авэла ԥаро маменто и закамэса тэ лэс и цыӷарка;

● лашэ гиндоря, савэ подритярэна тут, например, анда Библия анда Галатам 5:22, 23.

Ритяр кадэва списко вся и время паша пэстэ и адиносар кадэла гиндоря най еқвар андо дес. Дажэ кала ту мэклян тэ цырдэс, адиносар кадэла гиндоря, сар кати появийпэ жылания упалэ тэ лэс и цыӷарка.

По набут мэк и привычки, савэ связани лэ цыӷаркэнца. Пока ту инке на мэклян тэ цырдэс, ту можэш ужэ тэ бориспэ лэ привычкэнца, савэ связани лэ цыӷаркэнца. Например, если ту всегда цырдэс сразу, сар кати прошоспэ, тоди цырдэ най сразу, ай через часостэ. Или если ту цырдэс, кала хас или сразу посли када, тоди параш када тэ терэс. На ав котэ, кай цырдэн. Висытюв кацавэ алава: «Наис, на трэбуй, мэ мэклэм тэ цырдав». Через када вся ту авэса май ӷотово каринг о дес, кала ришыл тэ мэкэс и цыӷарки. И када поможыя тути тэ на бистрэс, кай ӥто ту авэса свободно лэ цыӷаркэндар манушэса.

Драго подготовься каринг када. Каринг кодэва дес, саво ту витидян, кай тэ мэкэс и цыӷарки, тин пэсти май бут жвачкэ, морковка, пэндэӷа, семечки и инке варисо кацаво. Ԥэн инке еқвар лэ родости и лэ друӷонэнди пала кодэва дес и манг лэн, кай вонэ тэ подритярэн тут. Англа кодэва дес вишув анда цэр всаворэ пепельницы и зажыӷалки. Продик, кай ни андо цэр, ни пэ бути, ни андэ машына, ни варикай андэ карманоря или варикай инке тэ на ашэнпэ цыӷарки. Када поможыя тути тэ зритярдёспэ андо ԥаро маменто. Тэ мангэс варикастар и цыӷарка или тэ жас андо маӷазино пала лэндэ авэла май ԥарэс, чем тэ доросэс и цыӷарка анда кармано! На бистэр кадяжэ тэ мангэспэ лэ Дэвлэсти важ и помощь и май фартэ посли када, сар цырдэса пэсти послиднё цыӷарка (Луки 11:13).

Фартэ бут мануша смоӷли тэ мэкэн кадэя привычка, кала полинэ, кай цыӷарка, када най друӷо, ай жэстоко и хытро враӷо. Ту тожэ сможэш тэ мэкэс. И кала ту будэр на авэса ла цыӷаркако рабо, ту почуствуеш пэс пэ бутэстэ май драго и май бахталэс.

[Картинка]

Вся и время ритяр о списко паша пэстэ и адиносар гиндоря, савэ запистросардян кордэ най еқвар андо дес