ФЕРНАНДО a нервичияс. Дуй старейшыноря ԥэндэ лэсти, кай камэн тэ подэн дума. Раньшэ, посли кода сар несколько разоря андэ собрания авэлас о раёно старейшына, вонэ ужэ ԥэнэнас лэсти, андэр со во можэт инке тэ парудёлпэ, кай лэсти тэ дэн тэ терэн и авэр почотно дила андэ собрания. Но время жалас, и о Фернандо ужэ и на патялас, кай во варикала авэла старейшынаса. И акэ, андэ лэнго собрания упалэ авеля о раёно старейшына. Со жэ ԥэнэна лэсти ԥрала андэ кадэва разо?

Фернандо ашунэнас, со ԥэнэнас ек анда старейшыноря. Кодэва ԥрал ԥэндя пала алава андэ 1 Тимофею 3:1 и ԥэндя, кай старейшынонэнди андэ собрания авеля о письмо, кай пистормэ, кай о ԥрал Фернандо акана можэт тэ служый сар старейшына. Фернандо фартэ удивисайля и пушля: «Када чаче кадя?» Ԥрала инке еқвар ԥэндэ лэсти, кай да, во акана старейшына. Фернандо фартэ обрадосайля. И кала пала кадэя новость ԥэндэ объявления пэ собрания, всаворэ кадяжэ обрадосайлэ.

Кала мануш пристол зор, кай тэ авэл старейшына или тэ терэл авэр почотно дила андэ собрания, андэ када нинай нисо вэрыто. Дажэ андо 1 Тимофею 3:1 пистромэ, кай «кала о мануш камэл тэ авэл старейшына», када лащи дила. Бут ԥрала кадя и терэн, и через и время лэнди дэн тэ терэн почотни дила андэ собрания или тэ служын сар старейшыноря. Кадэлэсти фартэ ради ԥрала и ԥэя андэ собрания, савэнди поможын кацавэ отвецтвени ԥрала! Но собрании па вся люма ашэн май бут и май бут, важ када фартэ трэбуй бут кацавэ ԥрала, савэ камэн тэ поможын. Сар правильно ԥрала моӷут тэ сыкавэн, кай вонэ камэн тэ терэн лащи и почотно дила андэ собрания? И трэбуй вонэ кадя фартэ тэ пэрэжывают пала када сар Фернандо?

Андэ 1 Тимофею 3:1 стодэ алав «камэл». Па ариӷинально ӷреческо шыб кадэва алав пэрэандярдёлпэ сар «цырдэлпэ, фартэ камэл варисо». Када дэл кацави картинка, кабута мануш пристол зор, кай тэ дорэсэл спило фрукто пэ витка. Но кадэва алав на сыкавэл, кай о мануш жадностяса камэл тэ домардёл кода, кай тэ терэл почотно дила андэ собрания сар старейшына. Андо стихо пистромэ, кай мануш камэл тэ авэл старейшына, важ кода кай када «лащи дила», ай на важ кода кай тэ авэл лэстэ власть и тэ авэл ашунгло машкар миро.

Пала кода со трэбуй, кай о мануш тэ служый сар старейшына, пистромэ андэ 1 Тимофею 3:2—7 и андэ Титу 1:5—9. Пала кадэла серьёзни требовании, ек ԥрал Реймондо, саво ужэ бут бэрша старейшына, ԥэндя кадя: «Канешно, када драго, кала лэ ԥралэстэ драго вижал тэ дэл дума пэ собрания, кала лэстэ задании или кала во сытярэл аврэн. Но дажэ если лэстэ драго вижал вся када, всаек май важно кода, саво во вопще сыно мануш. Важно, кай во тэ авэл кацаво мануш, савэс ни андэр со на дошалярэн, тэ ӷанэл андэ вся мера, тэ авэл годявэрно, орӷанизовано, ӷостеприимно и тэ на цырдэлпэ, кай вся тэ авэл па лэстирятэ».

Кай лэ ԥралэс, саво камэл тэ авэл старейшына, ни андэр со на дошалярэса, дицол андэ кода, кай во андэ вся чесно и андярэл пэс вужэс. Лэ ԥралэнди и лэ ԥэянди андэ собрания авэла вушэро тэ мангэн лэстар и помощь, если во ӷанэл андэ вся мера и годявэрно, орӷанизовано и на цырдэлпэ, кай вся тэ авэл кати па лэстирятэ. Во подритярэл па лэ Дэвлэско дром кодэлэн, ко найдэлмут ля тэ служый и лэ тэрнэн, кала ӷостеприимно каринг лэндэ. Кадяжэ во подритярэл лэ ԥурэн и ко занасвайля. Во терэл када, кай лэсти просто чалёл тэ терэл лащи дила важ авэр. Во старыийпэ кадя пэс тэ андярэл, важ кода кай аврэнди паша лэстэ тэ авэл драго, ай най важ кода, кай кати тэ ашэл старейшынаса b.

Старейшыноря андэ собрания авэна ради тэ поможын лэ ԥралэсти, саво камэл тэ терэл почотно дила и подԥэнэна лэсти, андэр со во инке можэт тэ парудёлпэ важ када. Но всаек май бут зависит лэ ԥралэстар, пэ скати во екжэно пристол зор, кай тэ ашэл кацаво мануш, пала саво пистромэ андэ пэрво письмо лэ Тимофеёсти. Опытно старейшына, савэс ақарэн Хенри, ԥэнэн: «Если ту камэс тэ авэс старейшына, анда ди старысав, кай тэ соотвецтвуеш кодэлэсти, саво трэбуй тэ авэл старейшына. „Вся, со можэт тэ терэл тиро вас, тер анда вся зор“ — пистромэ андэ Экклезиаст 9:10. Када значит, кай любо дила, сави тути моӷут тэ дэн старейшыноря, тер анда вся оди. Мэк тути чалёл тэ терэс любо дила важ и собрания, дажэ тэ халавэс о поло. Авэр шона сама пэ кода, кай ту терэс вся анда ди». Если ту камэс тэ служыс старейшынаса, тоди сави бы дила важ о Иегова ту тэ на тердоп, тер када анда вся ди и сыкав, кай тути можно тэ патяс. Пэрво гиндо пала тутэ трэбуй тэ авэл, кай ту сэжо, ай най кода, кай ту камэс тэ авэс ашунгло (Матф. 23:8—12).

Дэсавэ ԥрала, савэ камэн тэ авэн старейшыноря, моӷут дэсдурал тэ проԥэнэн или варисар па аврятэ дэн тэ полэн аврэнди, кай лэндэ исин кацави цэль или можэт дажэ камэн варисар тэ повлияют пэ бэрэдэрэ ԥралэнго круӷо. Ай варикасти на чалёл, кала лэнди дэн совето андэр со тэ парудёнпэ, кай тэ служын старейшынаса. Кадя тэ терэн на трэбуй. Фэдэр тэ пушэн пэстар: «Васо мэ камав тэ авав старейшына? Просто, кай тэ доԥэнав варисо пэсти или камав тэ заботисавав пала лэ Иеговастирэ бакрорэ?»

Ԥрала, савэ камэн тэ служын сар старейшыноря, трэбуй тэ сэрэн инке пала ек маменто. Вонэ трэбуй тэ андярэн пэс кадя, кай лэндар тэ сытён авэр андэ собрания (1 Пет. 5:1—3). Ԥрал, саво андярэл пэс кадя, на лэла тэ гиндой и тэ андярэл пэс хытрияса. Лэстэ трэбуй тэ авэл бари терпения, и нэ важно исин лэстэ почотно дила андэ собрания чи най. И дажэ если во гиндой, кай во ужэ можэт тэ авэл старейшынаса, аврэндэ можэт тэ авэл причина, васо вонэ гиндон па аврятэ (1 Кор. 4:4). Важ када кала старейшыноря дэн совето кацавэ ԥралэсти, во трэбуй тэ приашундёлпэ би холяко и тэ пристол зор, кай тэ парудёлпэ. Но трэбуй кадяжэ тэ сэрас, кай кала ԥрал авэла старейшынаса, во на авэла андо кодэва жэ маменто совершэно (Чис. 12:3; Пс. 106:32, 33).

Дэкасти можэт тэ здэлпэ, кай вонэ аштярэн кадэя назначения ужэ фартэ долӷо. Можэт и ту ужэ най ек бэрш аштярэс и пэрэжываеш пала када? Если кадя, тоди шув сама пэ алава анда Притчи 13:12: «Кала долӷо аштярэс лэл тэ дуқал оди, ай кала стерэлпэ кода со камэс, када сар витка сави дэл жызня».

Кала здэлпэ, кай цэль, сави ту камэс тэ домардёс, никала на исполнияпэ, кадэлэстар моӷут тэ умэкэнпэ и вас. Кацаво сас кай о Авраамо. О Иегова дя лэсти алав, кай лэстэ авэла шаво. Но жанас бэрша, ай лэстэ ла Сарраса кадя и на сас бэяцэ (Быт. 12:1—3, 7). Кала во ужэ сас ԥуро, во взвисайля каринг о Иегова, кай тэ пушэл, со жэ во лэсти дэла? Во ԥэндя лэсти, кай ужэ ԥуро, ай бэятонэн идоси нинай. И хоть о Иегова упалэ ԥэндя лэсти, кай дэла лэсти лэ шавэс, всаек лэ Авраамости прижыляпэ тэ аштярэл када аж 14 бэрш, ай можэт дажэ и май бут (Быт. 15:2—4; 16:16; 21:5).

Парашэля о Авраамо тэ служый лэ Иеговасти радостяса, важ кода кай лэсти прижыляпэ кадя долӷо тэ аштярэл? Най, во на парашэлас тэ патял, кай о Дэл зритярэла пэско алав. О апостоло Павло пистросардя, кай о Авраамо получисардя кадэя обещяния кати посли кода, сар сыкадя терпения (Евр. 6:15). Важ када о Иегова блаӷословисардя лэс кадя, сар во и прецтавить пэсти нэ моӷ. Ай сости амэ можэм тэ сытювас па лэско примеро?

Если ту камэс тэ служыс старейшынаса, но пока тути на динэ када, хоть жал бут время, на параш тэ полаӷаешся по Иегова. На хасар и радость андэ служэния. Уоррен, саво поможысардя бутэнди тэ ашэн старейшыноря, ԥэнэн: «Трэбуй дэсави время, кай аврэнди тэ дицол, кай ԥрал чаче можэт тэ служый сар старейшына. Па кода сар во терэл задания андэ собрания и сар во пэс андярэл, по набут лэла тэ дицол, саво во мануш. Дэко нэправильно гиндой, кай во авэла па чачимастэ бахтало, кати если ашэла старейшына или если лэстэ авэла авэр варисави почотно дила андэ арӷанизацыя. Кацавэ гиндоря моӷут тэ схан лэ манушэс. Трэбуй тэ сэрэс, кай бы ту тэ на авелоп, и сави дила ту тэ на тердоп важ о Иегова, если ту на парашэс лэсти тэ служыс, када и исин бах».

Ек ԥрал май бут чем 10 бэрш аштярэлас, кала лэс стона старейшынаса. Во бут сости сытеля анда видения пала лэ Дэвлэстири вурдон па нэбо, сави запистросарди андэ пэрво ӷлава андэ книӷа Иезекииль. Во ԥэнэн: «Екжэно о Иегова витидэл, сави авэла скорость кай лэско вурдон. И важно най кода, сар время жал важ мандэ, ай кода, сар время жал важ лэстэ. И хоть мэ и камав тэ служысарав сар старейшына, но ӷлавно най кода, со мэ камав и пала со гиндосарав. О Иегова фэдэр ӷанэл, со манди па чачимастэ трэбуй».

Если ту камэс, кай тутэ тэ авэн почотни дила андэ собрания, пристов зор важ када и старысав, кай андэ собрания тэ авэл май бут радость. Если тути здэлпэ, кай время цырдэлпэ фартэ долӷо, тоди андо ди можэт тэ авэл пэрэжывания. На домэк када и борисав, кай андо ди тэ авэл спокойство и терпения. О Реймондо, пала саво пистрояспэ май упрэ, ԥэндя: «Кала гиндос пала пэстэ фартэ бут, када на дэл тэ авэс довольно кодэлэса, савэ тутэ ужэ исин дила андэ собрания. Если ту вся и время пэрэжываеш, ту умэкэса и радость, сави дэл и служэния лэ Иеговасти». Май драго старысав тэ авэс терпеливо. Анда вся зор старысав, тэ авэл май лащи дружба лэ Дэвлэса. Андэ када поможыя лично изучения Библии. Май бут проповедуй и проандяр библейски изучении, кодэлэнца ко камэл. Сыкав примеро пэстирэ ерести, сар тэ служын лэ Дэвлэсти и проандяр семейно поклонения. Лошав кажно разо, кала можэш тэ авэс лэ ԥралэнца и лэ ԥэянца анда собрания. Тоди ту авэса радосно най кати, кала ашэса старейшынаса, но и вся время пока тути инке на динэ кадэя дила.

Имено Иегова дя лэ ԥралэнди лащи возможность тэ парувэн пэс, кай тэ авэн приӷодни тэ терэн разни почотни дила андэ собрания. Ни о Дэл ни арӷанизацыя на камэн, кай о мануш тэ авэл разочаровано, и умэкля и вас, и хасардя радость андэ служэния. Иегова подритярэл и блаӷословий всаворэн, ко служый лэсти вужэ одеса. Кала Во блаӷословляет, Во никала «на дэл дук» каринг када (Прит. 10:22).

Если ту ужэ долӷо пристос зор, кай тути тэ дэн почотни дила андэ собрания, но пока нисо нинай, када можэт тэ анэн тути и лашымос. Кадэлэстар тири дружба лэ Дэвлэса ашэля май лащи и тутэ май драго дицол лашэ качестворя. Иегова никала на бистрэла кода, со ту стердян андэ служэния лэсти, кала ту пристосас зор тэ авэн тутэ лашэ качестворя, кала ту анда вся ди поможыяс андэ собрания и на бистрэлас тэ заботийпэ пала пэско ери. Служыс ту старейшынаса или служэбнонэ помошникоса или тутэ авэр варисави дила андэ лэ Дэвлэстири арӷанизацыя, мэк служэния лэ Дэвлэсти всегда анэн тути бах!