1. Васо авелоп драго тэ роздиқас Псалом 15:1—5?

 АНДА КОДЭЯ статья амэ уӷанглям, кас о Иегова ақарэл андэ пэстири катуна. Во радо тэ диқэл кодэлэн, ко отдя лэсти пэстири жызня и важ кастэ куч и дружба лэса. Со тэ терас, кай амэндэ всегда тэ авэл лащи дружба лэ Иеговаса? Андэ када амэнди поможыя 15 Псалом. (Проадинон Псалом 15:1—5.) Давайте подаса дума пала всаворэ стихоря андар лэстэ и уӷанаса, со о Иегова аштярэл пэстирэ друӷонэндар.

2. Пала со, возможно, гиндояс о Давидо, кала ԥэндя пала лэ Иеговастири катуна?

² Андо Псалом 15:1 пистромэ: «Иегова, ко можэт тэ авэл ӷостё андэ тири катуна? Ко можэт тэ жувэл пэ тиро свынто плай?». Кала о Давидо дэлас дума пала лэ Иеговастири «катуна», во, наверно, гиндояс пала свынто катуна, сави дэсави время сас андо Гаваоно. О Давидо кадяжэ ԥэндя пала «свынто плай». Возможно, во дэлас дума пала плай Сионо андо Иерусалимо. Кадэва форо сас варикай пала 10 километроря лэ Гаваоностар, по юӷо лэстар. По плай Сионо о Давидо стодя катуна и ԥэндя, кай интя тэ анэн о сэртари важ и важни лила (2 Сам. 6:17). О сэртари сас котэ, пока на построисардэ о храмо.

3. Сар о 15 Псалом поможый амэнди тэ на парашас тэ дружысарас лэ Иеговаса? (Диқэн кадяжэ и картинка.)

³ Канешно, май бут израильтяноря никала на терэнас дила андэ свынто катуна. И кати набут анда кодэла, ко котэ служыяс, моӷли тэ зажан кордэ, кай тердёлас о сэртари важ и важни лила. Но любо лэ Иеговаско мануш, саво лэс кандэлас, моӷ тэ авэл лэско друӷо и, ԥэнэса, тэ авэл ӷостё андэ лэстири дэвликуни катуна. Амэ тожэ фартэ камас  вся и время тэ ашаспэ лэ Дэвлэстирэ друӷонэнца! Андо 15 Псалом о Давидо росԥэнэн, саво характеро амэндэ трэбуй тэ авэл и сар трэбуй пэс тэ андярас, кай тэ на парашас тэ дружысарас лэ Иеговаса.

ВСЯ И ВРЕМЯ ТЕР КОДА, СО ПРАВИЛЬНО

4. Кай тэ дружыс лэ Иеговаса на хутила просто тэ болдёс. Катар амэ када ӷанас? (Исайя 48:1).

⁴ Андо Псалом 15:2 ԥэнэнпэ, кай лэ Иеговаско друӷо «предано лэ Дэвлэсти, терэл кода, со правильно». Но хэба можэт о нэидиально мануш тэ андярэл пэс правильно? Да. Если амэ терас вся, со па амаро зор, кай тэ кандас лэ Иеговас, во лэла тэ диқэл пар мэндэ, кай амэ терас кода, со правильно. Кадя трэбуй тэ андярас пэс вся и время, ай най кати дэкала. Тэ дэс алав тэ жувэс важ о Иегова и тэ болдёс — када кати пэрво шаӷо. Амэнди трэбуй тэ на парашас тэ кандас лэ Иеговас. Например, о Дэл витидя, кай о Израилё тэ авэл лэско народо. Но када на сыкавэлас, кай всаворэ израильтяноря сас лэ Иеговастирэ ӷостёря. Васо кадя можно тэ ԥэнас? Дэсавэ мангэнаспэ най анда вся оди и пэстиря диласа лажаварэнас лэ Дэвлэс. (Проадинон Исайя 48:1.) И израильтяноря, савэ камэнас тэ ашэнпэ андэ лэ Иеговастири катуна, трэбуй сас тэ уӷанэн пала лэстирэ законоря и тэ ритярэн лэн. Кадяжэ и адес, на хутила просто тэ болдёс и тэ авэс лэ Иеговаско свидетелё. Амэнди трэбуй тэ терас «кода, со правильно». Со када сыкавэл?

5. Со када тэ кандас лэ Иеговас андэ вся?

⁵ Тэ терэс «кода, со правильно» — када май бут, чем просто тэ на промэкэс и собрании (1 Сам. 15:22). Амэ трэбуй тэ кандас лэ Иеговас андэ вся, со бы амэ тэ на терас, дажэ кала амэн нико на диқэл (Прит. 3:6; Эккл. 12:13, 14). Важно тэ кандас лэ Иеговас дажэ андэ найбари дила. Кадя амэ сыкаваса, кай любисарас лэс. И тоди во лэла тэ любий  амэн инке май фартэ (Иоан. 14:23; 1 Иоан. 5:3).

6. Сар ԥэнэнпэ андэ Евреёря 6:10—12, васо на хутила и дила, сави тердямас варикала, кай тэ ашаспэ андэ лэ Иеговастири катуна?

⁶ О Иегова цэнуий вся, со амэ терасас важ лэстэ. Но амэ нэ можэм тэ ашаспэ андэ лэстири катуна кати важ кодэя дила, сави варикала тердямас. Када дицол анда Евреёря 6:10—12 (проадинон). Во камэл, кай амэ и май дур анда вся оди тэ на парашас тэ служысарас лэсти. Если амэ на здасапэ, во блаӷословия кода, со амэ терас, и амари дружба лэса авэла вся и вечность (Гал. 6:9).

ԤЭНЭН ЧАЧИМОС АНДЭ ПЭСКО ДИ

7. Со када тэ ԥэнэс чачимос андэ пэско ди?

⁷ Кодэва, ко камэл тэ авэл лэ Иеговаско ӷостё трэбуй тэ ԥэнэн чачимос «андэ пэско ди» (Пс. 15:2). Када драго, кала о мануш на хохавэл андэ дума. Но о Иегова камэл, кай андар мандэ ни ӷрама тэ на авэл хохаимос, и када трэбуй тэ дицол андэ амарэ алава и дила (Евр. 13:18). Када важно, «важ кода кай хохавно мануш гряца лэ Иеговасти, ай важ кодэла, ко кандэн лэс, во пашутно друӷо» (Прит. 3:32).

8. Состар амэнди трэбуй тэ фэрисавас?

⁸ Кодэва, ко ԥэнэн чачимос андэ пэско ди, кандэл лэ Дэвлэс най кати кала лэс диқэн авэр мануша. Во ритярэл лэ Дэвлэско законо, дажэ кала никас нинай паша лэстэ (Ис. 29:13). Во на камэл тэ притерэлпэ. Сар тоди о мануш можэт тэ ашэл двухлично? Спэрва во лэл тэ на допатял, кай лэ Дэвлэстирэ законоря па чачимастэ правильни (Иак. 1:5—8). Потом во парашэл тэ кандэл лэ Иеговас, кала лэсти здэлпэ, кай када най фартэ важно. И кала када сразу на анэн варисаво найлашымос, во лэл тэ андярэл пэс инке май вэрыто и инке май фартэ оджал лэ Дэвлэстирэ законостар (Эккл. 8:11). И хоть во инке служый лэ Дэвлэсти, о Иегова будэр на прилэл кода, со во терэл. Да, амэ камас ни андэр со тэ на авас хохавнэ.

9. Со лэ Исусости чалеля андо Нафанаило и сости амэ анда када сытювас? (Диқэн кадяжэ и картинка.)

⁹ Тэ дас дума чачимос андэ пэско ди фартэ важно. Када дицэля, кала о Филипо андя  каринг о Исусо пэстирэ друӷос, савэс ақарэнас Нафанаило. Хоть о Исусо май данглал на ӷанэнас лэс, во ԥэндя: «Акэ чачуно израильтянино, андэ саво ни ӷрама нинай хытрия» (Иоан. 1:47). Канешно, о Исусо пэ всаворэ пэстирэ ученикоря диқэлас, кай вонэ найхохавнэ. Но о Нафанаило сыкадя пэ дила када инке май фартэ. Сар и амэ, о Нафанаило сас нэидиально, но андэр лэстэ ни ӷрама на сас хытрия. Лэ Исусос када фартэ удивисардя, и во похвалисардя лэс важ када. Камэлпэ, кай о Исусо кадяжэ тэ ԥэнэн и пала амэндэ!

10. Васо амэнди трэбуй тэ слидосарас пала кода, со амэ дас дума? (Иаково 1:26).

¹⁰ Андо 15 Псалом росԥэнэнпэ, со о Иегова аштярэл пэстирэ ӷостёнэндар. Бут гиндоря андэ кадэва Псалом шон сама пэ кода, сар амэ обжаспэ аврэнца. Андо трито стихо ԥэнэнпэ, кай кодэва, ко камэл тэ авэл андэ лэ Иеговастири катуна, «на хохавэл пэстиря шыбаса. Кодэлэнди, ко паша лэстэ, на терэл вэрыто, во на ашунэл и на розмэкэл и найлашэ думы важ пэско друӷо». Если амэ на слидосарас пала пэстири дума, то можэм тэ анас аврэнди бари дук. И тоди амэ нэ сможэм будэр тэ ашаспэ андэ лэ Иеговастири катуна. (Проадинон Иаково 1:26.)

11. Пала саво хохаимос ԥэндя о псалмопевцо и со аштярэл кодэлэн, ко розындярэл и хохавнэ сплетни и на каийпэ?

¹¹ О псалмопевцо ԥэнэн, кай лэ Иеговаско ӷостё «на хохавэл пэстиря шыбаса». Пала саво хохаимос катэ ԥэнэнпэ? Када хохавни дума, сави римой варикаско лашо алав. Если о мануш розындярэл кацавэ хохавнэ сплетни и на каийпэ, лэс исключин анда христианско собрания (Иер. 17:10).

12, 13. Дэкала амэ можэм екжэнэ тэ на полас, сар лям тэ дас дума пала варикастэ найдраго. Сар кацаво можэт тэ авэл? (Диқэн кадяжэ и картинка.)

¹² Андо Псалом 15:3 кадяжэ ԥэнэнпэ, кай лэ Иеговаско ӷостё на терэл вэрыто «кодэлэнди, ко паша лэстэ, ...на ашунэл и на  розмэкэл и найлашэ думы важ пэско друӷо». Сар амэ можэм тэ розмэкас и найлащи дума пала пэстирэ друӷоря?

¹³ Дэкала амэ можэм дажэ екжэнэ тэ на полас, сар лям тэ дас дума пала варикастэ найдраго. Например, погиндосар пала кацавэ ситуацыи: 1) и ԥэй парашэля тэ авэл пианеро, 2) о ери уладалтар анда Вефилё, 3) о ԥрал будэр на служый сар барэдэр ԥрал или помошнико андэ собрания. Авелоп нэправильно тэ старыиспэ тэ полэс, васо када тердяпэ, и тэ дэс дума пала када аврэнца. Наверно, ту на ӷанэс вся пала кода, васо сас прилини кацави ришэния. Сар амэ сэрас, лэ Иеговаско ӷостё на терэл вэрыто «кодэлэнди, ко паша лэстэ, ...на ашунэл и на розмэкэл и найлашэ думы важ пэско друӷо».

СТОН ПАТИВ ПЭ КОДЭЛА, КО ДАРАЛ ЛЭ ИЕГОВАСТАР

14. Сар лэ Иеговастирэ друӷоря моӷут тэ полэн, саво мануш найлашо? Росԥэнэн.

¹⁴ Андо Псалом 15:4 ԥэнэнпэ, кай лэ Иеговаско друӷо «на прилэл лэ найлашэ манушэн». Ай ко можэт тэ прижанэн лэ манушэс найлашэса? Амэ нэ можэм тэ полас, лашо о мануш чи най, если ласа тэ шас сама кати пэ кода, со амэндэ андо ди. Важ кода кай амэ нэидиальни, амэнди варикаса май вушэро тэ ладисарас, ай варикаса най. Амэ дурювас дэсавэндар важ кода, кай варисо андэр лэндэ амэнди на чалёл. Кати кай о Иегова исин право тэ ԥэнэн, кай о мануш найлашо и лэстар трэбуй тэ ритярдён май дур (1 Кор. 5:11). Када, например, и бэзэхалэ мануша, савэ на каинпэ. Кадяжэ амэнди трэбуй тэ дурювас кодэлэндар, ко на стол патив пэ кода, андэр со амэ патяс, или старыийпэ тэ римой амари дружба лэ Иеговаса (Прит. 13:20).

15. Сар амэ можэм тэ сыкавас, кай стас патив пэ кодэла, ко «дарал лэ Иеговастар»?

¹⁵ Инке андо Псалом 15:4 ԥэнэнпэ, кай амэнди трэбуй тэ стас патив пэ кодэла, ко «дарал лэ Иеговастар». Важ када амэ старысавас тэ андярас пэс лэ Иеговастирэ друӷонэнца ковлэс и пативалэс (Рим. 12:10). Андэр со када дицола? Андо Псалом 15:4 ԥэнэнпэ, кай лэ Иеговаско ӷостё «зритярэл о алав, дажэ кала екжэно кадэлэстар варисо хасарэл». Если амэ на зритярас пэско алав, када можэт тэ анэн аврэнди дук (Матф. 5:37). О Иегова аштярэл, кай о хулай и хулаи тэ зритярэн и солах, сави вонэ динэ ек еқэсти. Кадяжэ лэско ди лошавэл, кала и родителя терэн кода, со обещяли лэ бэятонэнди. Если амэ любисарас лэ Дэвлэс и лэ манушэн, тоди ласа тэ зритярас любо алав, саво дям аврэнди.

16. Сар инке амэ стас патив пэ лэ Иеговастирэ друӷоря?

¹⁶ Инке амэ стас патив пэ лэ Дэвлэстирэ друӷоря, кала ақарас лэн в ӷости и анда вся оди шас лэн сама (Рим. 12:13). Важно, кай амари общения тэ авэл най кати пэ собрания и кала росԥэнас пала Дэл. Если амэ проандярас лэнца и время, када поможыя, кай амэ май фартэ тэ дружысарас ек еқэса и лэ Иеговаса. Кала амэ ақарас лэн тэ побэшэн амэндэ, амэ терас, сар о Иегова.

ФЭРИНПЭ, КАЙ ТЭ НА ЛЮБИН И ЛОВЭ

17. Васо андо 15 Псалом ԥэнэнпэ пала ловэ?

¹⁷ Лэ Иеговаско ӷостё «ловэ пэстирэ на дэл тала процэнторя, лэс на подтинэса, кай тэ дошалярэл лэ найдошалэс» (Пс. 15:5). Васо андо кацаво найбаро Псалом ԥэнэнпэ пала ловэ? Важ кода кай если черезчур бут тэ гиндос пала ловэ, вонэ ашэна май важни, чем и мануша и дажэ чем и дружба лэ Дэвлэса (1 Тим. 6:10). Андэ библейско время  дэсавэ барвадёнас через и ԥрала. Вонэ дэнас лэнди ловэ тала процэнторя. Кадяжэ сас кацаво, кай и сындомаря лэнас ловэ и дошалярэнас лэ найдошалэн. Вся када сас гряца лэ Иеговасти (Иез. 22:12).

18. Савэ вопросоря поможына амэнди тэ полас, сар амэ диқас пэ ловэ? (Евреёря 13:5).

¹⁸ Авелоп драго тэ погиндосарас, сар амэ диқас пэ ловэ. Пуш пэстар: «Сар часто мэ гиндосарав пала ловэ и пала кода, со можно пэр лэндэ тэ тинав? Отдав мэ о вужылимос вовремя или цырдав и время и гиндосарав, кай если о мануш заля манди и ловэ, лэсти вонэ най фартэ трэбуй? На ашав мэ ӷордо и жадно через и ловэ? Ай если о ԥрал или ԥэй драго затерэн, на гиндосарав мэ, кай вонэ фартэ цырдэнпэ пала ловэ? Ай можэт, мэ дружысарав кати лэ барвалэнца и дурював кодэлэндар, кастэ набут ловэ?» О Иегова дя амэнди бари бах тэ авас лэстирэ ӷостёря. Во дя алав, кай никала амэн на ашавэла. Но кай тэ на парашас тэ дружысарас лэса, амэнди трэбуй тэ фэрисавас кодэлэстар, кай андо ди тэ на авэл любовь каринг и ловэ. (Проадинон Евреёря 13:5.)

О ИЕГОВА ЛЮБИЙ ПЭСТИРЭ ДРУӶОНЭН

19. Васо о Иегова камэл, кай амэ тэ терас кадя, сар пистромэ андо 15 Псалом?

¹⁹ Андо 15 Псалом исин ек обещяния. Андо послиднё стихо пистромэ, кай о мануш «саво терэл кадя, о вико на пэрэла» (Пс. 15:5). Катэ о псалмопевцо росԥэнэн, васо о Иегова камэл, кай амэ тэ терас кадя, сар пистромэ андэ кадэва псалом. Тоди амэ аваса бахталэ. Если амэ терас кадя, сар ԥэнэн о Дэл, во амэн блаӷословия и фэрия (Ис. 48:17).

20. Саво лашымос аштярэл англэ лэ Иеговастирэ ӷостёнэн?

²⁰ Лэ Иеговастирэ ӷостёнэн аштярэл англэ райкани жызня. Лэстирэ избрани мануша лэна тэ жувэн по нэбо. О Исусо позаботисайля, кай котэ лэндэ тэ авэн «бут цэра, кай тэ жувэн» (Иоан. 14:2). Ай и мануша, савэ надеинпэ тэ жувэн пэ ԥув, фартэ аштярэн, кала исполнинапэ и алава анда Свынто тайна 21:3. О Иегова стодя пар мэндэ бари патив — домэкля амэн тэ авас лэстирэ друӷоря и тэ ашаспэ андэ лэстири катуна пэ вся и вечность!