И читателя пушэн
Андо Псалом 12:7 ԥэнэнпэ: «Ту лэса тэ зашоспэ пала лэндэ». Андэ кадэва стихо и дума жал пала кодэла, «кастэ бида» (стихо 5), чи пала «лэ Иеговастирэ алава» (стихо 6)?
Кода, со пистромэ андо 12 Псалом, сыкавэл, кай андо 7 стихо и дума жал пала мануша.
Андо Псалом 12:1—4 амэ адиносарас, кай будэр на ашэляпэ лэ манушэн, савэнди исин патяимос. Май дур андэ 5 жы кай 7 стихо пистромэ:
«О Иегова ԥэнэн: „Кастэ бида, пэр лэндэ тасавэн,
И чорорэ ровэн лэ ԥаримастар,
Но мэ зашавапэ пала лэндэ.
Спасысарава лэн всаворэндар, ко приасалпэ лэндар“.
Лэ Иеговастирэ алава вужэ.
Вонэ сар о руп, саво пэрэплависардэ андэ ӷлиняно бов и вужардэ семь разоря.
Ту лэса тэ зашоспэ пала лэндэ, Иегова,
Лэса вся и время тэ фэрис лэн кадэлэ манушэндар».
Андо 5 стихо ԥэнэнпэ, со о Дэл стерэла важ кодэла, «кастэ бида». Во спасыя лэн.
Андо 6 стихо инке ԥэнэнпэ, кай «лэ Иеговастирэ алава вужэ», сар о руп, саво пэрэплавимэ андэ яг. И всаворэ христианоря соӷласни кадэлэса (Пс. 18:30; 119:140).
Ай андо 7 стихо пистромэ: «Ту лэса тэ зашоспэ пала лэндэ, Иегова, лэса вся и время тэ фэрис лэн кадэлэ манушэндар». Можэт тэ авэл вопросо: пала кастэ или пала со катэ дэлпэ дума?
Через кода кай андо 6 стихо ԥэнэнаспэ пала «лэ Иеговастирэ алава», можэт тэ здэлпэ, кай о Дэл лэла тэ фэрий лэн. И амэ ӷанас, кай о Дэл чаче фэрияс пэско Алав, и Библия. Вой дожыля жы каринг амари время, хоть бут ко пристолас вся пэско зор, кай тэ запретин и Библия или кай ла тэ на авэл (Ис. 40:8; 1 Пёт. 1:25).
Но амэ кадяжэ ӷанас, кай о Иегова фэрий и лэ манушэн, касти ԥарэс, пала савэ пистромэ андо 5 стихо (Иов 36:15; Пс. 6:4; 31:1, 2; 54:7; 145:20).
Тоди сар тэ полас, пала кастэ или пала со пистромэ андо 7 стихо?
Если тэ шас сама пэ вся, со пистромэ андэ кадэва Псалом, дицол, кай о алав «лэн» сыкавэл лэ манушэн.
Спэрва о Давидо ԥэнэн, кай лэсти и аврэ манушэнди, савэнди исин патяимос, ԥарэс через кода, кай пала лэндэ розындярэн и хохавни дума. Тоди во пистрой, кай о Иегова дэл алав, кай жала против кодэла, ко пэстиря шыбаса анэн дук лэстирэ народости. Дицол, кай кадэва Псалом дэл тэ патяс, кай о Иегова лэла тэ поможый пэстирэ манушэнди.
Важ када андо 7 стихо о Дэл ԥэнэн кодэлэнди, касти ԥарэс, кай во фэрия «лэн» кодэлэстар, со дэн дума и терэн и бэзэхалэ мануша.
Андо еврейско тексто, саво пистросардэ и масореторя, андэ кадэва стихо тердёл о алав «лэн». Андэ греческо Септуагинта пистромэ кацавэ алава: «ту лэса тэ фэрис амэн» и «вся и время тэ зашоспэ пала амэндэ», пала лэ Дэвлэстирэ мануша, пэ савэ тасавэн. Кадяжэ андо 7 стихо ԥэнэнпэ, кай о Иегова лэла «лэн» тэ фэрий «лэ манушэндар» — кодэлэндар, ко «абурон лэ найлашымаса» (Пс. 12:7, 8). Акэ сар кадэва стихо пэрэандярдо пэ арамейско шыб: «Ту, о ХУЛАЙ, лэса тэ фэрис кодэлэн, ко ритярэл тиро законо. Ту лэса тэ фэрис лэн кадэлэ найлашэ манушэндар вся и время. Везде ԥирэн и найлашэ мануша. Вонэ, сар пиявки, пэн о рат лэ манушэндирэ шавэндар». Вся када сыкавэл, кай андо Псалом 12:7 и дума жал най пала лэ Иеговастирэ алава, ай пала мануша.
Кадэва стихо придэл амэнди зор тэ надеисавас, кай о Иегова вся и время лэла тэ зашолпэ пала мануша, савэ на парашэн лэс тэ кандэн.
