1. Соса о Давидо сыстосардя лэ Иеговас андо Псалом 18:46?

 АМЭ жувас андэ люма, кай вся ӥто парудёл. Можэт тэ терэлпэ кода, со амэ на аштярдям, и тоди амари жызня можэт тэ ашэл май ԥари или дажэ полностью тэ парудёл. Но амэ бахталэ, кай амэ най екжэнэ. Амаро Дэл вся и время амэнца. Сар амэ уӷанглям анда статья, сави сас май данглал, «о Иегова — жундо Дэл», и во всегда ӷотово тэ поможый. (Проадинон Псалом 18:46.) О Давидо ԥэндя, кай о Иегова — жундо Дэл, но андэ кодэя жэ время сыстосардя лэс кодэлэса, со найжундо, — лэ плаеса. Пала со во дэлас дума?

2. Пала со амэ подаса дума андэ кадэя статья?

² Андэ кадэя статья амэ роздиқаса, васо о Иегова сыстойпэ лэ плаеса и сар када поможый амэнди май драго тэ уӷанас, саво во. Кадяжэ амэ май драго уӷанаса, сар о Дэл можэт тэ ашэл амаро плай. Инке амэ подаса дума, сар амэ можэм тэ шаспэ по Иегова.

ВАСО О ИЕГОВА СЫСТОЙПЭ ЛЭ ПЛАЕСА?

3. Андэ савэ библейски стихоря о Иегова сыстойпэ лэ плаеса и васо? (Диқэн и картинка пэ обложка.)

³ Бут лэ Иеговастирэ мануша, кала хвалинас лэс, сыстонас лэс лэ плаеса. Васо андэ Библия исин кацаво примеро? Во поможый амэнди тэ шас сама по райкано характеро, саво исин кай амаро Дэл. Пэрво разо по Иегова ԥэнэнпэ, кай во «Плай» андэ Второзаконие 32:4. Ай инке, кала и Анна мангэласпэ лэ Дэвлэсти, вой ԥэндя кацавэ алава: «Нинай кацаво плай, кай тэ сыстойпэ амарэ Дэвлэса» (1 Сам. 2:2). О Аввакумо, саво пэрэдэлас лэ Дэвлэстирэ алава, взвисайля каринг о Иегова: «Ту Плай» (Авв. 1:12). О мануш, саво пистросардя о 73 Псалом, ԥэндя: «О Дэл, сар баро плай, фэрий мэрно ди» (Пс. 73:26). Дажэ екжэно о Иегова ԥэндя пэр пэстэ «Плай» (Ис. 44:8). Давайте подаса дума пала кода, саво амаро Дэл, и шаса сама пэ трин маменторя. Вонэ поможына амэнди тэ полас, васо о Иегова сыстойпэ лэ плаеса.  Инке амэ уӷанаса, сар во можэт тэ ашэл «амаро Плай» (Втор. 32:31).

4. Васо можно тэ ԥэнас, кай о Иегова — ҭан, кай тэ гарадювас? (Псалом 94:22).

⁴ О Иегова — ҭан, кай амэ тэ гарадювас. О плай можэт тэ фэрий лэ барэ брышындэстар и баря балвалятар. Кадяжэ о Иегова фэрий амэн кодэлэстар, со можэт тэ анэн амэнди найлашымос. (Проадинон Псалом 94:22.) Во поможый амэнди тэ на парашас тэ дружысарас лэса. О Иегова на домэкэла, кай амэнди тэ стерэн кацаво найлашымос, саво ашэлапэ амэнца пэ вся и жызня. Ай англэ о Иегова стерэла кадя, кай будэр нисо тэ на анэн дук амарэ одести и кай амэ ни пала со тэ на пэрэжываем (Иез. 34:25, 26).

5. Васо о Иегова можэт тэ авэл важ амэндэ ҭан, кай тэ гарадювас?

⁵ Со амэ можэм тэ терас, кай о Иегова тэ авэл важ амэндэ ҭан, кай тэ гарадювас? Тэ мангаспэ лэсти. Кала амэ мангаспэ, о Иегова дэл амэнди покоё по ди, саво фэрий амаро ди и годи (Флп. 4:6, 7). Акэ со сас лэ Артёмоса, савэс залинэ андэ ваздии важ кода, кай во патял андо Дэл. Кажно разо англа кода, сар лэс тэ допушэн, во пэрэжывал. О рай тасавэлас пэр лэстэ и ԥэнэнас найлашэ алава. Со терэлас о Артёмо? Во ԥэнэн: «Мэ мангаваспэ лэ Иеговасти, кай по ди тэ авэл спокойство, и пала мудрость». Кала о Артёмо диқэлас, кай лэ растэ нисо на вижал, лэс када фартэ радуияс. Во ԥэнэн: «Лэ Иеговаса манди сас найсостар тэ дарав».

6. Васо амэ можэм вся и время тэ надеисавас по Иегова? (Исайя 26:3, 4).

⁶ О Иегова никала на подвэдий. О плай вся и время тердёл пэ ек ҭан. Кадяжэ о Иегова всегда авэла амэнца. Во никала на ашавэла амэн. Амэ можэм тэ надеисавас пэр лэстэ, важ кода кай во «вечно Плай». (Проадинон Исайя 26:3, 4.) О Иегова вечно. Када сыкавэл, кай во всегда лэла тэ ашунэл амарэ молитвы и тэ поможый амэнди. Кадяжэ во сможэт тэ зритярэл всаворэ пэстирэ алава. Инке, васо амэ можэм тэ патяс лэ Иеговасти, — када кай во никала на мэкэл пэстирэ манушэн (2 Сам. 22:26). Во на бистрэла амари лащи дила и дэла амэнди бут лашымос (Евр. 6:10; 11:6).

7. Саво лашымос авэла, если амэ надеисавас по Иегова? (Диқэн кадяжэ и картинка.)

⁷ О Иегова ашэл амаро плай, кала амэ андэ вся надеисавас пэр лэстэ. Амэ патяс, кай всаворэ лэстирэ советоря анэн амэнди лашымос. Важ када амэ кандас лэс дажэ андэ ԥари время (Ис. 48:17, 18). Кала диқас, сар во подритярэл амэн, амэ лас тэ патяс лэсти инке май фартэ. Ай када поможый тэ авас ӷотови каринг о ԥаримос, саво авэла англэ и саво амэ на виритяраса би лэ Иеговаско. Кала амэнди будэр найко тэ поможый, амэ полас, кай можэм тэ надеисавас кати по Иегова. Во амэн никала на подвэдия! Акэ со ԥэнэн о ԥрал Владимиро пала время, кала во бэшэлас андо баруно: «Моӷу тэ ԥэнав, кай када сас со май лащи время андэ мэрни дружба лэ Иеговаса. Кала мэ ашэлэмпэ екжэно, кати о Иегова моӷ тэ поможый манди вся тэ виритярав, и мэ сытелэм инке май бут тэ патяв лэсти».

8. а) Соса инке о Иегова шолпэ по плай? б) Васо амэ лошалэ, кай о Дэл — амаро плай? (Псалом 62:6, 7).

⁸ О Иегова на парудёл. Прицтавь баро плай. Пэр лэстэ нэ влияет и время и поӷода.  Точно кадя жэ и о Дэл. Лэско характеро и кода, со во загиндосардя, на парудёл (Мал. 3:6). Кала андо Эдэмско садо о Адамо и Ева звазглэпэ против о Иегова, када нисар на парудя кода, со во загиндосардя важ и мануша. О апостало Павло пистросардя, кай о Иегова «нэ можэт тэ отԥэндёл корко пэстар» (2 Тим. 2:13). Када сыкавэл, кай о Иегова на парудёл. Пэр лэстэ нэ влияет кода, со терэлпэ андэ люма, и кода, сар андярэн пэс авэр. Во никала на жала против пэско гиндо и против пэско законо. Андэ кадэя время, кала вся ӥто парудёл, амэ можэм полностью тэ надеисавас по Иегова. Во амаро спасителё и плай. (Проадинон Псалом 62:6, 7.)

9. Сости ту сытёс кай и Таня?

⁹ О Иегова авэла амаро плай, если ӷлавно, пала со амэ гиндосарас, — када лэско характеро и кода, со во загиндосардя. Када поможыя, кай амаро ди тэ ашэлпэ састо андэ ԥари время (Пс. 16:8). Када драго поля и Таня, сави сас тала домашнё аресто через кода, кай патял андо Дэл. Вой ԥэнэн: «Мэ ашэлэмпэ екжэни. Спэрва сас ԥарэс. Мэ часто умэкавас и вас». Со вой терэлас, кай по ди упалэ тэ авэл покоё? Вой ля май бут тэ гиндой пала Иегова и пала кода, со во загиндосардя. И Таня ԥэнэн: «Мэ полэм, васо вся када манца тердяпэ. Када поможысардя манди тэ на бистрав, васо мэ трэбуй тэ виритярав кадэва ԥаримос. Мэ терав када важ о Иегова. Када поможысардя манди тэ на гиндосарав пала пэстэ».

10. Со трэбуй тэ терас, кай о Иегова тэ авэл амаро плай?

¹⁰ Англэ амэн аштярэл инке май ԥари время. Амэнди трэбуй авэла тэ надеисавас по Дэл, сар никала. Акана вой и время, кай инке май фартэ тэ патяс лэ Иеговасти, кай во поможыя амэнди тэ на парашас лэс тэ кандас, со бы тэ на авэл. Со важ када трэбуй тэ терас? Адиносар, сар о Дэл поможыяс пэстирэ манушэнди андэ библейско время и сар во када терэл адес. Гиндосар, сар о Дэл фэрияс лэн и сас важ лэндэ састэ плаеса. Тоди о Иегова ашэла и тиро плай.

АВ, САР О ИЕГОВА

11. Андэр со всаворэ амэ трэбуй тэ шаспэ по Иегова? (Кадяжэ диқэн и рамка  «Цэль важ и тэрнэ ԥрала».)

¹¹ Амэ уӷанглям, кай по Иегова можно тэ ԥэнэс, кай во — плай. Ай акана подаса дума, сар амэ можэм тэ авас кацавэ, сар во. Кала амэ сытювас кай о Иегова, амэндэ вижала тэ подритярас лэ ԥралэн и лэ ԥэян. Например, о Исусо дя лэ Симаности о алав Кифа (пэ греческо шыб Пётро), саво значит «котор лэ плаестар» (Иоан. 1:42). Када сыкавэл, кай о Пётро лэла тэ подритярэл пэстирэ ԥралэн и ԥэян и тэ поможый лэнди тэ ашэнпэ састэ андэ вера. Андэ Библия пала барэдэр ԥрала ԥэнэнпэ, кай вонэ «тень лэ барэ плаестар», важ кода кай фэрин и собрания (Ис. 32:2). Канешно, най кати и барэдэр ԥрала, ай всаворэ амэ трэбуй тэ сытювас лэ Иеговастар, кай тэ авас сар састо плай ек важ еқэстэ (Еф. 5:1).

12. Сар амэ можэм тэ авас важ и ԥрала и ԥэя сар ҭан, кай тэ гарадён?

¹² Ав сар ҭан, кай тэ гарадён. Дэкала лэ ԥралэнди и лэ ԥэянди прижалпэ тэ ашавэн пэстирэ цэра через и природно бида, беспорядкоря андэ страна или война. Тоди амэ можэм тэ  прилас лэн пэстэ, и амаро цэр ашэла важ лэндэ сар ҭан, кай тэ гарадён. Андэ кадэла «послидни деса» и жызня андэ люма ашэл май ԥари и май ԥари (2 Тим. 3:1). И важ када амэнди авэла трэбуй инке май часто тэ поможысарас ек еқэсти. Кадяжэ амэ можэм тэ придас зор лэ ԥралэнди и лэ ԥэянди, кай лэнди тэ ашэл май вушэро по ди и тэ авэл лащи дружба лэ Иеговаса. Сар амэ можэм када тэ терас? Например, амэ можэм тэ пристас вся о зор, кай андо Зало Царства тэ авэл драго, сар андо ери. Тоди кажнонэс, ко авэла пэ собрания, лэла лэ одестар, кай лэс ради тэ диқэн и лэс аштярэн. Амэ жувас андэ люма, кай лэ манушэнди всаек пэ авэр, и вонэ вороӷуин ек еқэса. И инке лэ манушэндэ бут ԥаримос. Важ када амэ камас, кай амарэ собрании тэ авэн сар спокойно ҭаноро важ и ԥрала и ԥэя, кай вонэ моӷли тэ лэн котэ зор.

13. Сар и барэдэр ԥрала моӷут тэ авэн важ авэр сар ҭан, кай тэ гарадён? (Диқэн кадяжэ и картинка.)

¹³ И барэдэр ԥрала андэ собрания моӷут тэ авэн важ и ԥрала и ԥэя сар ҭан, кай тэ гарадён, кала лэндэ разно ԥаримос. Например, кала терэлпэ бида андэ природа, варикасти можэт трэбуй тэ авэл срочно лэ врачонэндири помощь. И барэдэр ԥрала ӥто поможын. Кадяжэ вонэ подритярэн и дэн зор через и Библия. Лэ ԥралэнди и лэ ԥэянди авэла май вушэро тэ мангэн помощь кай о барэдэр ԥрал, если вонэ ӷанэн, кай во анда вся оди виашунэла лэн, полэла и лэла тэ дэл дума ковлэс. Кала амэ полас, кай и барэдэр ԥрала амэн любин, амэнди авэла май вушэро тэ прилас лэндар библейско совето (1 Фес. 2:7, 8, 11).

14. Сар тэ затерэс кацаво алав, кай ту мануш, саво на подвэдия?

¹⁴ На подвэдисар аврэн. Амэ камас, кай авэр пар мэндэ тэ надеинпэ, особено андэ ԥари время (Прит. 17:17). Сар тэ затерэс кацаво алав, кай ту мануш, саво на подвэдия? Трэбуй, кай тиро характеро вся и время, ай най кати дэкала, тэ шолпэ пэ лэ Исусоско. Например, ав састо пэстирэ алавэсти и тер и дила вовремя  (Матф. 5:37). Кадяжэ на тердюв андэ риг, кала варикасти трэбуй помощь. Ай если тути динэ варисави дила, стер ла па руковоцтво и сар тути ԥэндэ.

15. Васо андэ собрания цэнуин лэ барэдэрэ ԥралэн, пэ савэ можно тэ надеинпэ?

¹⁵ И барэдэр ԥрала андэ собрания, пэ савэ можно тэ надеиспэ, — када розлашо подарко важ и ԥрала и ԥэя. Васо можно кадя тэ ԥэнас? Кала и ԥрала и ԥэя ӷанэн, кай вонэ моӷут тэ позвонин лэ барэдэрэ ԥралэнди, кала трэбуй помощь, када поможый лэнди май набут тэ пэрэжывают. Кадяжэ, кала и ԥрала и ԥэя диқэн, савэ дэ внимательни и барэдэр ԥрала, вонэ полэн, кай лэн любин. Если и барэдэр ԥрала вся и время шон сама пэ Библия и пэ публикацыи, савэ вимэкэл о рабо, ай най пэ пэстирэ гиндоря, лэнди май вушэро тэ патян. Ай инке амэ цэнисарас амарэ барэдэрэ ԥралэн важ кода, кай вонэ на росԥэнэн и лично инфармацыя и ритярэн пэско алав.

16. Саво лашымос анэн амэнди и аврэнди, кала амэ вся и время кандас лэ Иеговас?

¹⁶ Вся и время кандэ лэ Иеговас. Если амэ андэ вся кандас лэ Иеговас и прилас ришэнии па Библия, тоди амэ сыкавас аврэнди лашо  примеро. Кала амэ май драго уӷанас и Библия и терас вся, кай май фартэ тэ патяс андо Иегова, тоди амэндэ вижала никала тэ на ашавас лэс и вся и время тэ ритярас лэско законо. Амэ на домэкаса, кай пар мэндэ тэ влияет лэ Сатанаско хохаимос и гиндоря, савэ исин андэ кадэя люма (Еф. 4:14; Иак. 1:6—8). Если амэ патяс, кай о Иегова зритярэла всаворэ пэстирэ алава, тоди и найлашэ новости на змарэна амэн па пэрнэ (Пс. 112:7, 8). Кадяжэ амэ сможэм тэ подритярас кодэлэн, кастэ андэ жызня тердяпэ варисаво ԥаримос (1 Фес. 3:2, 3).

17. Сар и барэдэр ԥрала подритярэн и собрания?

¹⁷ О Иегова аштярэл, кай и барэдэр ԥрала тэ ӷанэн мера андэ вся, здраво тэ гиндон, кай лэндэ тэ авэл порядко андэ вся, и кай вонэ тэ авэн устожливи. И барэдэр ԥрала подритярэн лэ ԥралэн и лэ ԥэян и поможын лэнди тэ авэн састэ. Вонэ терэн када тоди, кала андэ вся приритярдён «лэ чачунэ алавэсти, саво жал лэ Дэвлэстар» (Тито 1:9; 1 Тим. 3:1—3). Кадэла ԥрала, сар лашэ пастухоря, поможын лэ Иеговастирэ бакрорэнди тэ полэн, пэскати дэ важно тэ авэн пэ собрании, тэ росԥэнэн пала Дэл и тэ проандярэн лично изучения. Андэ када вонэ екжэнэ сыкавэн лашо примеро. Ай кала кай и ԥрала и ԥэя исин ԥаримос, и барэдэр ԥрала поможын лэнди тэ шон сама по само ӷлавно — по Иегова и пэ лэстирэ обещянии.

18. Васо амэ камас тэ хвалисарас лэ Иеговас и тэ терас вся, кай амари дружба лэса тэ авэл май састи? (Кадяжэ диқэн и рамка  «Тер вся, кай тири дружба лэ Иеговаса тэ ашэл май састи».)

¹⁸ Кадэя статья поможысардя амэнди инке май драго тэ уӷанас, саво амаро Дэл. И амэ анда вся оди камас тэ ԥэнас и алава, савэ ԥэндя о царё Давидо: «Мэк хвалин лэ Иеговас, мэрно Плай» (Пс. 144:1). О Иегова на подвэдий и на парудёл. Во никала амэн на ашавэла, и амэ камас тэ авас паша лэстэ вся амари жызня. Скати бы тэ на авэл амэнди бэрш, амэ можэм тэ ԥэнас: «Во мэрно Плай» (Пс. 92:14, 15).