Мэ арақаделэм андо 1929 бэрш 22 декабря андо Нови́ллё. Када цынёнё гаворо андэ Бельгия. Котэ исин 9 фермы паша Басто́ни андэ Арде́нны. Манди драго по ди, кала мэ вспоминаю пэско децтво пэ ферма мэрнэ дадэса и ла даса. Амэ мэрнэ цыкнэдэрэ ԥралэса, савэс ақарэн Раймо́но, доисарасас лэ гурувнян кажно дес и поможысарасас тэ стидас о урожаё. Андэ амаро цынёнё гаворо всаворэ мануша поможынас ек еқэсти и вмести терэнас бути.

Мэрнэ родителя, о Эми́лё и Али́са, сас католикоря. Кажно разо в курте вонэ жанас андэ қандири. Но варикай андо 1939 бэрш андэ амаро гаворо авелэ пианероря анда Англия и предложыли мэрнэ дадэсти тэ подпистройпэ, кай лэсти тэ бишалэн журнало «Утешэния» (акана пэр лэстэ ԥэнэн «Прошонпэ!»). Мэрно дад ӥто поля, кай када чачимос, и ля тэ адиной и Библия. Кала во парашэля тэ ԥирэл андэ католическо қандири, амарэ сосидоря, савэ варикала драго амэнца обжанаспэ, фартэ холяйлэ. Вонэ линэ тэ тасавэн пэ мэрно дад, кай во тэ ашэлпэ католико. Вонэ бут разоря пала када лэса споринаспэ.

Манди сас фартэ ԥарэс тэ диқав, сар и сосидоря тасавэнас пэ мэрно дад. Важ када мэ полэм, кай манди трэбуй тэ родав помощь кай о Дэл, и анда вся оди манглэмпэ лэсти. Пала кадэя молитва мэ и росԥэндэм май данглал. Кала и сосидоря парашэлэ тэ тасавэн пэ мэрно дад, мэ сымас фартэ бахтало! Тоди мэ полэм, кай о Иегова ашунэл мэрнэ молитвы.

Пэ Бельгия дя и нацыско Германия. Када сас 10 мая андо 1940 бэрш. Через када бут мануша ашадэ кадэя страна. Амаро ери унашля андэ Южно Франция. О дром сас найвушэро, амэ попэрасас  андэ кацавэ ҭана, кай жэстоко марэнаспэ и немецки и француски халавдэ.

Кала амэ рисайлям пэ пэстири ферма, амэ додиқлям, кай амаро хабэ росчордэ. Амэн аштярэлас кати амаро риконо, о Бо́би. Через вся, со мэ диқлэм, мэ лэм тэ загиндосавав: «Васо терэлпэ о ԥаримос и война?»

Варикай андэ кодэя время каринг амэндэ ля тэ авэл о Эми́лё Шранцо a, саво сас барэдэр ԥрал андэ собрания и пианеро. Во драго росԥэндя амэнди па Библия, васо исин ԥаримос, ай кадяжэ дя ответоря и пэ авэр вопросоря, пала савэ мэ пэрэжывал. Мэрни дружба лэ Иеговаса ашэля май састи и мэ полэм, кай во — Дэл, савэстар жал и любовь.

Хоть и война инке жалас, амаро ери ля май часто тэ диқэлпэ аврэ лэ Иеговастирэ свидетелёнэнца. Андо авӷусто андо 1943 бэрш пэ амари ферма авеля о ԥрал Жозе́-Никола́ Мине́. Кала во ԥэндя и речь, во пушля: «Ко камэл тэ болдёл?» О дад и мэ вазглям о вас. Амэ болделям андэ найбари лэноры, сави сас найдур амэндар.

Андо декабрё андо 1944 бэрш и немецки халавдэ стидэпэ, кай послиднё разо тэ дэн пэ западно риг. Пэ када линэ тэ ԥэнэн Арде́ннско сражэния. Вонэ марэнаспэ найдур кодэлэ ҭанэстар, кай амэ жувасас. Важ када амэнди прижыляпэ варикай шон тэ гарадювас андо подвало. Еқвар, кала мэ вижылэм тэ праварав лэ жывотнонэн, линэ тэ стреляют. Ек снарядо попэля андэ амари ферма и кадя взорвисайля, кай зындярдя и крыша па амаро сараё. Американско халавдо, саво гарадёлас котэ, кай амэ ритярасас лэ грастэн, зацыписайля манди: «Пэр пэ ԥув!» Мэ поднашлэм каринг лэстэ и пэлэм рядом. Во зля пэстири каска и стодя манди по шэро.

Посли кода сар закончилась и война, амэ часто общялись лэ ԥралэнца и лэ ԥэянца анда собрания андэ Лье́же, када варикай 90 километроря амэндар пэ северно риг. Через дэсави время амэ стидям найбари ӷрупа андэ Бастони. Мэ лэм тэ терав бути андэ налоӷово и андэ кодэя жэ время лэм тэ изучаю и законоря андэ страна. Потом мэ теравас бути лэ лилэнца андэ юридическо кантора. Андо  1951 бэрш амэ проандярдям андэ Бастони найбаро раёно канӷрэсо. Пэр лэстэ сас варикай 100 мануш, ай кадяжэ ек пианерка и Э́ли Ро́йтер, сави служыяс лэ Иеговасти анда вся ди. Кай тэ авэл пэ кодэва канӷрэсо, вой пролагля по велосипедо 50 километроря. Ӥто амэ чалелям ек еқэсти, и мэ пушлэм, камэл вой, кай амэ тэ пожэнисавас, вой ԥэндя, кай да. Тоди ла Эляти авеля и приӷлашэния пэ Школа Галаадо, сави сас андэ США. Вой пистросардя андэ ӷлавно управления, васо вой, файма, нэ сможэт тэ авэл пэ кадэя школа. О ԥрал Норо андэ кодэя время диқэлас пала дила, сави терэлас лэ Дэвлэско народо. Во бишалдя лати письмо, андэ саво сас бут лашэ алава, и ԥэндя, кай надеийпэ, кай варикала вой сможэт тэ авэл пэ кадэя Школа пэстирэ хуласа. Андо февралё андо 1953 бэрш амэ пожэнисайлям.

Андэ кодэва жэ бэрш амэ ла Эляса авелям по канӷрэсо, саво назывался «Общество нового мира». Во прожалас андо Нью-Йорко по стадионо «Янки». Котэ мэ познакомился еқэ ԥралэса, саво предложыл манди лащи бути, но кати ԥэндя, кай мэ трэбуй тэ пэрэладав андэ США. Англа кода сар тэ прилав и ришэния, амэ ла Эляса поманглямпэ. Посли када мэ отԥэнделэм кодэла бутятар, и амэ рисайлям андэ Бельгия, кай тэ позаботисавас пала 10 вазвещятеля андэ Бастони. Пэ авэр бэрш амэндэ арақаделя розлашоро шаворо, Се́ржо. Кала лэсти сас семь месяцев, во занасвайля и муля. Амаро ди росшындёлас дуқатар. Амэ бут мангасаспэ. Амэ виритярдям кадэва ԥаримос через кода, кай ӷанас, кай о Дэл рия каринг и жызня кодэлэн, кас на ашэля.

Андо октябрё андо 1961 бэрш мэ арақлэм бути, пэ сави трэбуй сас тэ терав най вся о дес. Кадэя бути идиально поджалас манди важ и пианерско служэния. Но андэ кодэва жэ дес, манди позвонисардя о ԥрал, саво диқэлас пала дила андо филиало андэ Бельгия. Во пушля мандар, моӷу мэ тэ служысарав сар раёно барэдэр ԥрал? Мэ ԥэндэм: «Ай можно амэ спэрва послужысараса сар пианероря?» Во соӷласисайля. Амэ самас пианеронэнца 8 месяцев и андо сентябрё андо 1962 бэрш лям тэ терас раёно дила.

Через дуй бэрш амэн ақардэ андо Вефилё андо Брюсселё. Амэ лям тэ служысарас котэ андо октябрё андо 1964 бэрш. Када сас фартэ бахтали время. Андо 1965 бэрш андо амаро Вефилё авелясас о ԥрал Норо. Ӥто посли када, ман назначили тэ авав служытелё андо филиало. Када сас фартэ нэожыдано важ мандэ! Потом амэн ла Эляса ақардэ андо 41 класо андэ Школа Галаадо. Кода, со ԥэндя о ԥрал Норо 13 бэрш палпалэ, кадя и ашэля. Посли кода сар амэ закончили и Школа, амэ рисайлям андо Вефилё андэ Бельгия.

Через кода кай мэ драго розлаваспэ андэ законоря, мэ моӷ тэ поможысарав лэ Иеговастирэ народости тэ зашонпэ пала пэско право тэ тэлён лэ Дэвлэсти андэ Европа и андэ авэр страны (Флп. 1:7). Мэ диқаваспэ лэ барэ манушэнца анда май бут чем 55 страны, андэ савэ пэ амари дила сас оӷраничении или запрето. Кала амэ дасас дума, мэ шавас  лэндири сама най пэ пэско юридическо опыто, ай пэ кода, кай мэ лэ Дэвлэско мануш. Мэ вся и время надеисававас по Иегова, важ кода кай сэравас и алава анда Библия: «Лэ царёско ди [или лэ сындомареско ди], сар паи андэ лэ Иеговаско вас. Во бандярэл лэс кордэ, каринг камэл» (Прит. 21:1).

Ек маменто манди запомнился май драго. Мэ най еқвар мангавас лэ барэ манушэс анда европейско правительство тэ диқэлпэ манца, и акэ амэ доԥэнделям пала встреча. Пэрво, со мэ ашундэм лэстар: «Тутэ исин кати 5 минут». Мэ тэлярдэм о шэро и лэм тэ мангавпэ. Кадэва мурш холяса пушля, со мэ терав. Мэ вазглэм о шэро и ԥэндэм: «Мэ блаӷодарисарав лэ Дэвлэс, важ кода кай ту ек анда лэстирэ слуӷоря». Во пушля, пала со мэ дав дума. Мэ сыкадэм лэсти Римо 13:4. Во сас верущё мануш и дэсо ӷанэнас пала Библия. Важ када лэсти ашэля интересно, и во проадиносардя кадэва стихо. Вижыля кадя, кай кадэлэ манушэса мэ дэм дума полчаса, и када андя лашымос. Во дажэ похвалисардя лэ Иеговастирэ свидетелёнэн и ԥэндя, кай амэ заласпэ лащя диласа.

Кай лэ Иеговастирэ служытеля сас бут сындоря андэ Европа. Пэр лэндэ розлэнас лэнго право тэ на залэн никастири риг андэ политика, тэ барярэн лэ бэятонэн, ай кадяжэ вопросоря пала налоӷоря. Манди випэля бари бах тэ участвую андэ бут кадэла сындоря. Мэ пэстирэ яқэнца диқлэм, сар о Иегова блаӷословисардя амэн и поможысардя тэ вицэлас. Лэ Иеговастирэ свидетеля вицылдэ андо Европейско сындо важ лэ манушэско право май бут чем 140 разоря!

Андэ 1990-ти бэрша манца терэлас дила о ԥрал Фи́липо Бра́мли анда ӷлавно управления и о ԥрал Ва́льтеро Фарне́ти анда итальянско филиало. Вмести амэ старысавасас тэ домардювас, кай по острово Куба и ԥрала моӷли май свободно тэ тэлён лэ Иеговасти, важ кода кай котэ пэ амари дила сас оӷраничении. Мэ пистросардэм андэ Кубинско посольство андэ Бельгия и диқлэмпэ лэ барэ манушэса, саво котэ терэлас и саво залэласпэ амаря диласа. Амэн на дополэнас и важ када стодэ оӷраничении пэ амари дила, и спэрва амэндэ на вижалас тэ улас када.

Амэ мангасаспэ лэ Иеговасти, кай во тэ сыкавэл амэнди, со тэ терас. Ай тоди манглям, кай амэнди тэ домэкэн тэ заандярас пэ Куба 5 000 Библии. И амэнди мэклэ када тэ стерас! И Библии блаӷополучно авелэ андэ страна, и лэн роздинэ лэ ԥралэнди. Када поможысардя май фартэ тэ патяс, кай о Иегова амэн блаӷословий. Тоди амэ манглям, кай амэнди тэ домэкэн инке тэ анас 27 500 Библии. И амэнди упалэ розришыли. Мэ сымас фартэ радо, кай амэ поможысардям, кай кажнонэ ԥралэстэ и ԥьятэ пэ Куба тэ авэл пэстири лично Библия!

 Мэ часто ездисаравас пэ Куба, кай тэ поможысарав андэ разни юридически вопросоря. Пала кадэя время мандэ вижыля тэ поладисарав бутэ барэ манушэнца анда правительство.

Андо 1994 бэрш, кала андэ Руанда умарэнас лэ манушэн анда народо тутси, умардэ май бут чем 1 000 000 мануша. Машкар лэндэ мулинэ лэ Иеговастирэ свидетеля. Прожыля набут время, и дэсавэ ԥралэн манглэ тэ андярэн интя хамос, драба и инке кода, со трэбуй сас лэ манушэнди.

Кала амэ авелям андо ӷлавно форо андэ страна, пэ саво ԥэнэн Кига́ли, амэ додиқлям переводческо офисо, ай кадяжэ складо важ и литература. Дицолас, кай андэ лэндирэ стины фартэ бут стреляли. Амэнди росԥэнэнас бут случаёря пала кода, сар амарэ ԥралэн и ԥэян умардэ барэ шурянца. Но кадяжэ амэ уӷанглям, сар и ԥрала и ԥэя сыкавэнас пэстири любовь. Например, амэ познакомились еқэ ԥралэса анда народо тутси. Ек ери, савэ сас анда народо хуту, поможынас лэсти. Во гарадёлас лэндэ андэ града андэ яма 28 деса. Кай тэ подритярас амарэ ԥралэн и ԥэян и тэ придас лэнди зор, амэ стердям особо встреча андэ Кигали. Пэр латэ авелэ май бут чем 900 мануша.

Посли када амэ пэрэжылям и ӷраница и авелям андо Заиро (адес када Демократическо Республика Конго). Андэ кадэя страна унашлэ бут свидетеля анда Руанда. Вонэ гарадёнас андо тэрмино важ и бежэнцоря найдур лэ форостар Го́ма. Но амэ нащи лэн виарақасас и мангасаспэ, кай о Иегова тэ поможый амэнди тэ полас, кай вонэ сыны. Тоди амэ додиқлям, кай каринг амэндэ жал ек мануш и пушлям лэстар, ӷанэн во варикас анда лэ Иеговастирэ свидетеля. Во ԥэндя: «Да, мэ свидетелё. Мэ одындярава тумэн каринг и ԥрала анда камитето важ и помощь». Посли кода сар амэ диқлямпэ кодэлэ ԥралэнца, амэ авелям каринг 1600 бежэнцоря, кай тэ подритярас лэн и тэ ԥэнас, кай о Иегова лэн любий. Амэ проадиносардям лэнди о письмо анда Руководящё совето. Во лэн фартэ ля лэ одестар. Котэ ԥэнэнаспэ: «Амэ вся и время мангаспэ пала тумэндэ. Амэ ӷанас, кай о Иегова тумэн на ашавэла». И о Руководящё совето сас право. Адес андэ Руанда май бут чем 30000 свидетеля, и всаворэ вонэ радостяса служын лэ Иеговасти!

Андо 2011 бэрш муля мэрни кучутни Эли. Амэ прожудям ласа почти 58 лет. Манди би лако сас фартэ ԥарэс. Мэ росԥэнавас пала када лэ Иеговасти, и во ман подритярэлас. Кадяжэ манди придэлас зор кода, кай мэ росԥэнавас лэ манушэнди важ и лащи новость пала Царство.

Манди акана ужэ пала 90, но мэ кадяжэ кажно курко росԥэнав пала Дэл. Ай инке манди приятно, кай мэ моӷу тэ поможысарав андэ юридическо отдело андо бельгийско филиало, тэ росԥэнав аврэнди пала пэско опыто и тэ подритярав лэ тэрнэ манушэн андо Вефилё.

Кодэла времятар, кала мэ пэрво разо манглэмпэ лэ Иеговасти, прожыля 84 ӷода. Кадя заляпэ мэрни дружба лэ Иеговаса, сави ашэлас бэрш бэршэстар май састи и май састи. Мэ кадя блаӷодарно, кай всаворэ бэрша о Иегова ашунэлас ман и отвечал пэ мэрнэ молитвы! (Пс. 66:19) b.