СТАТЬЯ ВАЖ И ИЗУЧЕНИЯ 23
ДИЛИ 28 Ав лэ Иеговаско друӷо
О Иегова ақарэл амэн андэ лэстири катуна
«Мэрни катуна авэла лэнца, и мэ авава лэндирэ Дэвлэса» (ИЕЗ. 37:27).
АМЭ УӶАНАСА
Анда кадэя статья амэ уӷанаса, кас о Иегова ақарэл андэ пэстири катуна, со во аштярэл пэстирэ ӷостёнэндар и сар во лэн шол сама.
1, 2. Сави бах исин кай лэ Дэвлэстирэ мануша, савэ лэс кандэн?
КО О ИЕГОВА важ тутэ? Файма, ту ԥэнэса: «Во мэрно Дад, мэрно Дэл и мэрно Друӷо». Наверно, када най вся, со ту можэш тэ ԥэнэс пала Иегова. Сар часто ту гиндос пала Иегова, сар пала хулай, саво анда вся оди шол сама лэ ӷостёнэн?
2 О царё Давидо сыстосардя лэ Иеговас лэ хуласа, ай и ӷостёря андэ лэстири катуна — када и мануша, савэ лэс кандэн. Во пушля: «Иегова, ко можэт тэ авэл ӷостё андэ тири катуна? Ко можэт тэ жувэл пэ тиро свынто плай?» (Пс. 15:1). Анда кадэла алава дицол, кай о мануш можэт тэ авэл лэ Иеговаско ӷостё — лэско друӷо. Сави дэ бари бах! Через кадэва гиндо амэндэ пэрэхутилэл о фано.
О ИЕГОВА ЛЮБИЙ КОДЭЛЭН, КО АВЭЛ АНДЭ ЛЭСТИРИ КАТУНА
3. а) Ко сас лэ Иеговаско пэрво ӷостё? б) Со сас по ди кай о Иегова и кай лэско пэрво ӷостё, кала вонэ проандярэнас и время вмести?
3 Спэрва о Иегова сас екжэно, но прожыля и время, и во создал пэстирэ Шавэс, саво сас пэрво ӷостё андэ лэстири катуна. Важ о Иегова када сас нэви дила — тэ заботийпэ пала пэско ӷостё. Кадэлэстар лэско ди барёлас. Анда Библия дицол, кай лэ Иеговасти чалёлас тэ проандярэл и время пэстирэ Шавэса. И о Шаво лошавэлас тэ авэл паша пэско Дад (Прит. 8:30).
4. Кас о Иегова ақардя андэ пэстири катуна?
4 Ӷэт май интя о Иегова создал аврэ анӷелонэн, савэн во тожэ ақардя андэ пэстири катуна. Кадэла «лэ Дэвлэстирэ шавэ» сас бахталэ, кай сас паша лэстэ (Иов 38:7; Дан. 7:10). Спэрва лэ Иеговастирэ ӷостёря сас кати кодэла, ко жувэлас лэса по нэбо. Но потом во создал лэ манушэн, и лэн во тожэ ақардя андэ пэстири катуна. Машкар лэстирэ ӷостёря сас, например, о Енохо, о Ноё, о Авраамо и о Иово. Во ԥэнэнас, кай вонэ лэстирэ друӷоря, важ кода кай вонэ андярэнас лэстири время (Быт. 5:24; 6:9; Иов 29:4; Ис. 41:8).
5. Со амэ уӷанас анда Иезекииль 37:26, 27?
5 Бут бэрша о Иегова ақарэл пэстирэ друӷонэн, кай вонэ тэ авэн лэстирэ ӷостёря. (Проадинон Иезекииль 37:26, 27.) Анда кода, со ԥэндя о Иезекиилё дицол, кай о Дэл камэл тэ дружый пэстирэ манушэнца, савэ на ашавэн лэс. Во дя алав, кай стерэла лэнца «доӷоворо пала мирно жызня». Кадэла алава сыкавэн, со трэбуй тэ авэл англэ. И мануша, савэ надеинпэ тэ жувэн по нэбо, авэна стидэ андэ «ек стадо» лэ манушэнца, савэ надеинпэ тэ жувэн пэ ԥув, и вонэ авэна вмести тэ жувэн андэ лэ Иеговастири катуна (Иоан. 10:16). Кадэя время ужэ авеля!
О ДЭЛ ШОЛ САМА ВСАВОРЭН, КО АВЭЛ АНДЭ ЛЭСТИРИ КАТУНА
6. Кала о мануш ашэл ӷостё андэ лэ Дэвлэстири катуна и кай находийпэ лэстири катуна?
6 Андэ дэлмутни время андэ катуна можно сас тэ отцыён и тэ гарадён ла балвалятар и лэ брышындэстар. Кала о мануш авэлас варикастэ андэ катуна, о хулай анда вся оди шолас лэс сама. Кала амэ отдас пэстири жызня лэ Иеговасти, амэ ашас ӷостёря андэ лэстири катуна (Пс. 61:4). Котэ амэ можэм тэ проандярас время аврэ лэ Дэвлэстирэ манушэнца, ай кадяжэ тэ хас па лэстири бари мисяйля. Лэ Иеговастири катуна — када най варисаво ҭан. Кадэя катуна котэ, кай лэстирэ мануша (Тайна 21:3). Если тумэ варикала сас андэ авэр страны, — например, по спецыально канӷрэсо, — тумэ, наверно, диқлэпэ бутэ ԥралэнца и ԥэянца, савэ, сар и тумэ, служын лэ Иеговасти. Вонэ тожэ ӷостёря андэ лэ Дэвлэстири катуна.
7. Васо можно тэ ԥэнас, кай лэ Иеговастирэ мануша, савэн на ашэля, идоси ӷостёря андэ лэстири катуна? (Диқэн кадяжэ и картинка.)
7 Ай со можно тэ ԥэнас пала лэ Иеговастирэ мануша, савэ кандэнас лэс, если лэн ужэ на ашэля? Можно тэ ԥэнас, кай вонэ идоси андэ лэ Иеговастири катуна? Да. Васо? Важ о Иегова вонэ жундэ, важ кода кай во фартэ драго ӷанэн и сэрэл лэн. Када дицол анда лэ Исусостирэ алава: «Ай кода, кай и мулэ жундён, сыкадя дажэ о Маисеё: кала во росԥэнэнас пала кусто, саво ԥаболас, во ԥэндя по Иегова „лэ Авраамоско Дэл, лэ Исакоско Дэл и лэ Иаковоско Дэл“. Во най лэ мулэнго Дэл, ай лэ жундэнго, важ кода кай важ лэстэ всаворэ вонэ жундэ» (Лука 20:37, 38).
Лэ Иеговастирэ мануша, савэ лэс кандэнас, ашэнпэ ӷостёнэнца андэ лэстири катуна дажэ тоди, кала лэн на ашэля (Диқэн о абзацо 7.)
СОСТАР О ИЕГОВА ФЭРИЙ ПЭСТИРЭ ӶОСТЁНЭН И СО ВО ЛЭНДАР АШТЯРЭЛ?
8. Состар о Иегова фэрий пэстирэ ӷостёнэн?
8 И катуна можэт тэ фэрий лэ брышындэстар и ла балвалятар. О Иегова тожэ фэрий кодэлэн, ко андэ лэстири катуна. Во поможый, кай нисо тэ на римой лэндири дружба лэса и кай вонэ тэ на парашэн тэ надеинпэ по лашымос. Если амэ ашаспэ лэ Иеговаса, тоди о Сатана нэ сможэт тэ стерэл амэнди кацаво найлашымос, саво авэла амэндэ вся и жызня (Пс. 31:23; 1 Иоан. 3:8). Ай андо раё пэ ԥув о Иегова лэла тэ фэрий пэстирэ друӷонэн, савэ лэс кандэн, най кати кодэлэстар, со можэт тэ римой и дружба лэса, но и ла смэртятар (Тайна 21:4).
9. Со о Иегова аштярэл пэстирэ ӷостёнэндар?
9 Если амэ андэ лэ Иеговастири катуна, када сыкавэл, кай амэ лэстирэ друӷоря. Када бари бах важ амэндэ. Амэ можэм тэ дружысарас лэ Иеговаса вечно. Ай сар тэ сыкавас пэстири блаӷодарность важ кода, кай о Иегова ақардя амэн пэстэ? Если тут ақарэна в ӷости, ту на лэса тэ аштярэс, кай котэ вся авэла па тирятэ. Например, если англа кода сар тэ зажас андо цэр, трэбуй тэ злэс и обувь, ту кадя и стерэса. Кадяжэ амэ камас тэ уӷанас, со о Иегова аштярэл пэстирэ ӷостёнэндар. Амэ любисарас лэ Иеговас и важ када камас тэ уӷодисарас лэсти андэ вся (Клс. 1:10). Да, о Иегова — амаро Друӷо. Но кадяжэ во важ амэндэ Дэл и Дад, и важ када трэбуй тэ стас бари патив пэр лэстэ (Пс. 25:14). Давайте вся и время тэ сэрас пала кода, ко во сыно, кай амэндэ тэ авэл пативали дар англа лэстэ. Када поможыя амэнди тэ слидосарас пала пэстэ и тэ на лажаварас лэс. Амари цэль — тэ авас сэжи и тэ ԥирас амарэ Дэвлэса (Мих. 6:8).
САР АНДЭ ДЭЛМУТНИ ВРЕМЯ О ДЭЛ ОБЖАЛАСПЭ ВСАВОРЭНЦА ЕҚЭНДАР?
10, 11. Васо можно тэ ԥэнас, кай андэ Синайско пустыня о Иегова обжаласпэ еқэндар всаворэ́ израильтянонэнца?
10 О Иегова еқэндар шол сама всаворэ́ пэстирэ ӷостёнэн (Римо 2:11). Када дицол анда кода, сар во обжаласпэ пэстирэ народоса андэ Синайско пустыня.
11 Посли кода сар о Иегова виандярдя лэ израильтянонэн анда Египто, во ԥэндя лэнди тэ стерэн свынто катуна и кай андэр латэ тэ служын и рашая и левиторя. Вижал, дэсавэ мануша моӷли тэ терэн и дила андэ свынто катуна или тэ жувэн паша латэ. Сыкавэлас када, кай о Иегова май фартэ шолас сама лэн, чем аврэн? Най! О Иегова обжаласпэ всаворэнца еқэндар.
12. Андар со дицол, кай о Иегова всаворэ́ пэстирэ народоса обжаласпэ еқэндар? (Исход 40:38). (Диқэн кадяжэ и картинка.)
12 Най всаворэ израильтяноря жувэнас паша свынто катуна и терэнас дила андэр латэ. Но всаворэ вонэ моӷли тэ дружын лэ Иеговаса. Например, о Дэл позаботисайля, кай и туча и о столбо, саво шоласпэ пэ яг, тэ авэн понад и свынто катуна. Важ када вся о народо моӷ тэ диқэл лэн. (Проадинон Исход 40:38.) Кала и туча ваздэласпэ, кай тэ андярэл о народо, када диқэнас всаворэ андо тэрмино, кай бы вонэ тэ на жувэн. Через када вонэ моӷли вовремя тэ стидэнпэ, кай тэ жан (Чис. 9:15—23). Кадяжэ всаворэ моӷли драго тэ ашунэн, сар дилабэн пэ дуй рупунэ трубы. Када сыкавэлас, кай трэбуй тэ ужантар (Чис. 10:2). Если варисаво мануш жувэлас май пашэ каринг и свынто катуна, када на сыкавэлас, кай лэстэ сас май лащи дружба лэ Иеговаса, чем кай авэр. Кажно израильтянино моӷ тэ авэл лэ Дэвлэско ӷостё и тэ патял, кай о Дэл лэла тэ шол сама и тэ фэрий лэс. Кадяжэ и адес: кай бы амэ тэ на жувас, амэ можэм тэ авас уверени, кай амаро любящё Дэл лэла тэ андярэл и тэ фэрий амэн.
И израильтяноря жувэнас андэ разни ҭана андо тэрмино и терэнас разно дила. Но о Иегова обжаласпэ всаворэнца еқэндар (Диқэн о абзацо 12.)
О ИЕГОВА ОБЖАЛПЭ ВСАВОРЭНЦА ЕҚЭНДАР И АДЕС
13. Андар со дицол, кай адес о Иегова обжалпэ еқэндар всаворэнца анда пэско народо?
13 Адес дэсавэ лэ Иеговастирэ мануша жувэн паша ӷлавно управления или паша филиало лэ Иеговастирэ свидетелёнэнго. Варико дажэ котэ служый. Важ када кацавэ ԥрала и ԥэя моӷут тэ поможын андо Вефилё и лично тэ общяюца лэ ԥралэнца, савэ диқэн пала дила, сави котэ терэн. Ай варико терэл раёно или авэр спецыально дила. Если ту нэ можэш тэ терэс варисо анда када, на умэк и вас. Кацавэ ԥралэн и ԥэян май бут, чем кодэлэн, кастэ исин кацави возможность. Ӷлавно, кай ту лэ Иеговаско ӷостё, ай во любий всаворэн, кас пэстэ ақардя. И во шол сама кажнонэс андар мэндэ, праварэл амэн па пэстири дэвликуни мисяйля, фэрий и андярэл (1 Пёт. 5:7).
14. Призындярэн инке ек примеро пала кода, сар о Иегова обжалпэ всаворэнца еқэндар.
14 Акэ инке ек примеро пала кода, сар о Иегова обжалпэ всаворэнца еқэндар. Адес и Библия моӷут тэ адинон всаворэ мануша, андэ любо ҭан пэ ԥув. Спэрва вой сас пистромэ пэ трин шыба: еврейско, арамейско и греческо. Дэсавэ мануша адес моӷут тэ адинон и Библия пэ кадэла шыба. Но хэба можно тэ ԥэнас, кай лэндэ и дружба лэ Иеговаса май састи, чем кодэлэндэ, ко на ӷанэн кадэла шыба? Канешно най! (Матф. 11:25).
15. Андар со дицол, кай о Иегова камэл тэ дружый разнонэ манушэнца? (Диқэн кадяжэ и картинка.)
15 Нэ важно, сави амэндэ образования и ӷанас амэ дэлмутнэ шыба чи най, амэ можэм тэ ашас лэ Иеговастирэ друӷоря. Кай тэ полэс и Библия, на трэбуй тэ авэс учоно. О Иегова позаботисайля, кай ла тэ пэрэандярэн пэ тысячи шыба. Важ када и мануша пэ вся и ԥув моӷут май драго тэ уӷанэн лэ Дэвлэс и тэ прилэн андэ жызня лэстирэ годявэрнэ советоря (2 Тим. 3:16, 17).
Адес кажно мануш пэ ԥув можэт тэ адиной и Библия. Сар када доԥэнэн, кай о Иегова всаворэнца обжалпэ еқэндар? (Диқэн о абзацо 15.)
АШЭНПЭ АНДЭ ЛЭ ИЕГОВАСТИРИ КАТУНА
16. Со о Иегова аштярэл пэстирэ ӷостёнэндар, сар ԥэнэнпэ андэ Дила 10:34, 35?
16 Амэ фартэ бахталэ, кай о Иегова ақардя амэн андэ пэстири катуна. Во со май лашо и любящё хулай андэ люма, саво анда вся оди шол сама пэстирэ ӷостёнэн. Ай инке во всаворэнца обжалпэ еқэндар. Кай о Иегова бут разни ӷостёря, када и мурша и жувля, ԥурэ и тэрнэ. Вонэ жувэн андэ разни ҭана, лэндэ разно нацыя и образования. Но о Иегова аштярэл, кай лэстирэ ӷостёря лэна тэ стон бари патив пэр лэстэ. (Проадинон Дила 10:34, 35.)
17. Со амэ уӷанаса анда авэр статья?
17 Андо Псалом 15:1 о Давидо пушля: «Иегова, ко можэт тэ авэл ӷостё андэ тири катуна? Ко можэт тэ жувэл пэ тиро свынто плай?» Через о свынто зор во пистросардя и ответоря пэ кадэла вопросоря. Андэ авэр статья амэ май драго подаса дума пала 15 Псалом и уӷанаса инке май бут пала кода, со о Иегова аштярэл пэстирэ ӷостёнэндар.
ДИЛИ 32 Ав паша Иегова!
