1, 2. а) Состар о Исусо камэлас тэ фэрий пэстирэ учениконэн? б) Васо и ученикоря ашадэ лэ Исусос? (Кадяжэ диқэн и картинка.)

 О ИСУСО ԥэндя: «Оди цырдэлпэ, ай и тила слабо» (Матф. 26:41б) a. Пала со во ԥэнэнас? О Исусо полэлас, кай и мануша нэидиальни и вонэ моӷут тэ шылинпэ. Пэстирэ алавэнца во камэлас тэ фэрий лэ учениконэн, кай тэ на надеинпэ кати пэ пэско зор. И апосталоря май данглал гиндонас, кай никала на ашавэна пэстирэ Учитилёс (Матф. 26:35). Вонэ екжэнэ андэ када патянас и камэнас кадя тэ терэн. Но и ученикоря на дополэнас, сар дэ ӥто андэ найвушэро ситуацыя, вонэ моӷут тэ здэнпэ и тэ стерэн кадя, сар на камэнас. Акэ васо о Исусо ԥэндя: «На́ совэн, авэн внимательни и на́ парашэн тэ мангэнпэ, кай тэ на подэнпэ лэ бэзэхэсти» (Матф. 26:41а).

² И ученикоря на приашунделэ каринг о Исусо. Сар вонэ пэс андярдэ, кала лэндирэ Барэ Хулас авелэ тэ залэн и халавдэ? Ашэлэпэ и апосталоря лэса, сар динэсас алав? Най, вонэ стердэ кода, со екжэнэ пэстар на аштярэнас: пэрэдарайлэ и занашлэтар (Матф. 26:56).

3. а) Васо о мануш можэт тэ ашавэл лэ Иеговас через кода, кай надеийпэ кати пэр пэстэ? б) Пала со амэ подаса дума андэ кадэя статья?

³ Амэнди нащи тэ надеисавас кати пэр пэстэ. Через када амэ можэм бут со тэ хасарас. Канешно, амэ камас тэ терас правильно и тэ радосарас лэ Иеговас. И всаек, нащи тэ бистрас, кай амэ нэидиальни и можэм тэ подаспэ лэ бэзэхэсти (Рим. 5:12; 7:21—23). Кала амэ на аштярас, амэ можэм тэ попэрас андэ ситуацыя, кала амаро ди лэла фартэ тэ цырдэл амэн каринг  о бэзэх. Кай тэ на ашавас лэ Иеговас и лэстирэ Шавэс, амэнди трэбуй тэ приашундювас каринг кода, со ԥэндя о Исусо. Андэ када амэнди поможыя кадэя статья. Спэрва подаса дума, андэ савэ ситуацыи амэнди трэбуй тэ авас фартэ осторожни. Тоди уӷанаса, сар тэ фэрисарас пэс, кай тэ на подаспэ лэ бэзэхэсти. Кадяжэ роздиқаса, со поможыя амэнди тэ на парашас тэ авас внимательни.

АНДЭР СО АМЭНДИ ТРЭБУЙ ТЭ АВАС ФАРТЭ ОСТОРОЖНИ?

4, 5. Васо важно тэ на терас дажэ найбарэ бэзэха?

⁴ Дэсавэ бэзэха моӷут тэ здэнпэ, кай вонэ найбарэ. Но дажэ вонэ моӷут тэ римон амари дружба лэ Иеговаса. Кадяжэ через лэндэ о мануш можэт тэ стерэл май барэ бэзэха.

⁵ Дэкала кажнонэс андар мэндэ можэт тэ цырдэл каринг о бэзэх. Всаворэ амэ разни, и кажно андэ варисостэ слабо. Дэсавэ боринпэ, кай тэ на стерэн баро бэзэх, например, билажавардимос. Авэр мануша боринпэ, кай тэ на терэн билажавардимос корко пэса или тэ на диқэн билажавардэ картинки и видео. Варикасти ԥарэс тэ зритярэл и холи или тэ на дарал лэ манушэндар. Ай авэр камэн тэ терэн вся па пэстирятэ. Канешно, исин и бут со авэр. Сар пистросардя о Иаково: «Кажно попэрэл андэ ԥари ситуацыя, кала лэско ди цырдэлпэ каринг кода, со камэл, и обдилярэл лэс» (Иак. 1:14).

6. Васо важно тэ диқас пэр пэстэ кадя, сар исин?

⁶ Ай ту ӷанэс, каринг саво бэзэх подмарэл тут тиро ди? Канешно, дэкала о чачимос хал и яқа и ԥарэс тэ прижанас пэстирэ нэдостаткоря. Или амэ можэм тэ гиндосарас, кай амэ састэ и амэн нисо на змарэла. Кадя амэ хохавас пэско ди и када никаринг саво лашымос на анэна (1 Иоан. 1:8). Погиндосар акэ пала со. О Павло пистросардя важ и дэвликунэ састэ мануша, кай дажэ вонэ моӷут тэ подэнпэ лэ бэзэхэсти, если на авэна осторожни (Гал. 6:1). Амэ трэбуй тэ прижанас пэстирэ нэдостаткоря и тэ полас, андэ сави ситуацыя амэн можэт тэ подвэдий амаро ди (2 Кр. 13:5).

7. Состар амэнди особено трэбуй тэ фэрисавас? Призындярэн примеро.

⁷ Если амэ полям, кай амаро ди цырдэлпэ каринг варисаво найлашымос, со тоди тэ терас? Амэнди трэбуй тэ пристас зор, кай тэ полас, сар тэ на подаспэ кадэлэсти. Призындярам примеро. Андэ библейско время круӷом форо строинас и стина. Но и вороӷоря моӷли тэ зажан андо форо через и вороты. Важ када лэн фэринас инке май фартэ. Кадя жэ и амэнди, кай тэ на подаспэ лэ бэзэхэсти, трэбуй тэ фэрисавас кодэлэ найлашымастар, каринг саво цырдэлпэ амаро ди (1 Кр. 9:27).

 САР ТЭ ФЭРИСАВАС, КАЙ ТЭ НА ПОДАСПЭ ЛЭ БЭЗЭХЭСТИ?

8, 9. Состар трэбуй сас тэ фэрийпэ о ӷольтяй анда 7 ӷлава Притчи, кай тэ на стерэл баро бэзэх? (Притчи 7:8, 9, 13, 14, 21).

⁸ Сар тэ фэрисарас пэс, кай тэ на подаспэ лэ бэзэхэсти? Подам дума пала тэрно мануш анда 7 ӷлава Притчи. И найлащи манушни ԥэнэнас лэсти, кай во тэ проандярэл ласа и рят. Лэстэ на хутилдя зор тэ отԥэнэн лати. Андо 22 стихо ԥэнэнпэ: «И акэ во ужэ жал пала латэ». Можэт тэ здэлпэ, кай вся тердяпэ нэожыдано. Но сар дицол анда стихоря май данглал, во приля дэсавэ найгодявэрнэ ришэнии, савэ андэ лэс каринг о бэзэх.

⁹ Савэ ришэнии када сас? Вся заляпэ кодэлэстар, кай вэчэром во «прожалас паша латири вулица». Тоди во жыля каринг лако цэр. (Проадинон Притчи 7:8, 9.) Ай кала во додиқля ла жувля, во на одбанделя латар. Во жыля каринг латэ, домэкля, кай вой тэ чуминдэл лэс и ля тэ ашунэл латири дума. Кала вой ԥэндя лэсти, кай андя и мирни жэртвы, кадэлэса вой, возможно, камэлас тэ висыкадёл, кай райкани сыни. (Проадинон Притчи 7:13, 14, 21.) Кадэва ӷольтяй подяпэ лэ бэзэхэсти и тердя баро бэзэх. Но если во тэ на тердоп кадэла найгодявэрнэ шаӷоря, кацаво на авелоп.

10. Сар адес варико можэт тэ шылийпэ кадя жэ, сар о ӷольтяй анда Притчи?

¹⁰ Кода, со пистромэ андэ 7 ӷлава Притчи сыкавэл, состар трэбуй тэ фэрийпэ кажно лэ Иеговаско мануш. Кодэва, ко стердя бэзэх, можэт тэ на дополэл, сар када тердяпэ, и тэ ԥэнэн, кай важ лэстэ када сас нэожыдано. Но кала во погиндоя, во, наверно, полэла, состар када вся заляпэ. Возможно, во ля тэ дружый кодэлэнца, ко на любий лэ Иеговас, витидэлас развличении или сайторя, савэ на чалён лэ Дэвлэсти. Ай можэт во сас котэ, кай на трэбуй тэ авэл о христианино. Возможно, во кадяжэ парашэля тэ мангэлпэ, тэ адиной и Библия, тэ ԥирэл пэ мисяйля и тэ росԥэнэн пала Дэл. Вижал, кацаво мануш шолпэ по ӷольтяй анда Притчи, саво стердя бэзэх через кода, кай май данглал прилэлас найгодявэрнэ ришэнии.

11. Состар амэнди трэбуй тэ фэрисавас, кай тэ на стерас бэзэх?

¹¹ Сости амэ сытювас? Амэнди трэбуй тэ фэрисавас най кати лэ бэзэхэстар, но и всаворэстар, со пашарэл каринг лэстэ. Пала када ԥэндя о Саламоно посли кода, сар росԥэндя пала ӷольтяй и найлащи манушни. Во пистросардя: «На жа па лако дром» (Прит. 7:25). Кацаво жэ совето исин андэ 5 ӷлава Притчи: «Ритярдюв май дур латар, на пашув каринг и вудар андэ лако цэр» (Прит. 5:3, 8). Чаче, амэнди трэбуй тэ дурювас всаворэстар, со можэт тэ подмарэл амэн каринг о бэзэх b. Дажэ если варисави дила на жал против лэ Дэвлэско законо, но через латэ амэндэ появинпэ найлашэ жэлании, вой можэт тэ авэл опасно важ амэндэ. Амэнди трэбуй тэ авас осторожни кадэлэса (Матф. 5:29, 30).

12. Со о Иово витидя важ пэстэ и сар када фэрияс лэс лэ бэзэхэстар? (Иов 31:1).

¹² Кай тэ обжас и ситуацыи, савэ андярэн каринг о бэзэх, амэнди трэбуй тэ авас састэ. Андэ када амэ можэм тэ сытювас кай о Иово. Во «доԥэнделя пэстирэ яқэнца» — вижал, во важ пэстэ витидя, кай никала на лэла тэ задиқэлпэ пэ авэр жувли. (Проадинон Иов 31:1.) О Иово жувэлас кадя, сар важ пэстэ витидя и через када во никала на изменисардя пэстиря хулаяти. Амэ тожэ можэм састэс важ пэстэ тэ витидас, кай на ласа тэ терас кода, со подмардоп амэн каринг о бэзэх.

13. Васо важно тэ диқас пала пэстирэ гиндоря? (Диқэн кадяжэ и картинка.)

¹³ Кадяжэ амэнди трэбуй тэ диқас пала пэстирэ  гиндоря (Исх. 20:17). Дэсавэ ԥэнэн, кай нинай нисо вэрыто, кай тэ гиндон пала варисо абисо, ӷлавно, кай вонэ када на терэн. Но кацавэ мануша фартэ пэс хохавэн. Кала варико на парашэл тэ гиндой пала кода, со нэправильно, во закамэла тэ стерэл када. Вижал, во екжэно терэл кадя, кай лэско ди тэ цырдэлпэ каринг о бэзэх и потом лэсти прижалапэ тэ борийпэ кадэлэса. Канешно, всаворэндэ андар мэндэ дэкала моӷут тэ авэн най кодэла гиндоря. Но трэбуй ӥто тэ отшас лэн пэстар и тэ парувас по лашымос. Кала амэ кадя терас, амэ на домэкас, кай и нэправильни гиндоря тэ росԥабон и тэ ашэн сар бари яг, сави авэла ԥарэс тэ мударас и через сави амэ можэм тэ стерас баро бэзэх (Флп. 4:8; Кол. 3:2; Иак. 1:13—15).

14. Сар инке амэ можэм тэ фэрисарас пэс, кай тэ на подаспэ лэ бэзэхэсти?

¹⁴ Сар инке амэ можэм пэс тэ фэрисарас, кай тэ на подаспэ лэ бэзэхэсти? Амэ трэбуй састэс тэ патяс, кай если жувас па лэ Иеговаско законо — када всегда анэн амэнди лашымос. Дэкала амэнди можэт тэ авэл ԥарэс тэ стерас кадя, кай лэ Иеговасти тэ чалён амарэ гиндоря и кода, со амэндэ андо ди. Но пэ када трэбуй тэ пристас вся пэско зор! Важ кода кай о покоё по ди, саво дэла амэнди о Иегова, када фартэ бари бах.

15. Сар кода, кай амэ любисарас о лашымос, поможыя тэ дурювас лэ бэзэхэстар?

¹⁵ Амэ трэбуй тэ пристас о зор, кай амаро ди тэ цырдэлпэ каринг о лашымос. Если амэ сытюваса тэ вэрыцысарас о найлашымос и тэ любисарас о лашымос, тоди авэла май вушэро тэ терас правильно и тэ дурювас кодэлэстар, со можэт тэ анэн каринг о бэзэх (Ам. 5:15). Кала оди цырдэлапэ каринг о лашымос, тоди авэла май вушэро тэ на подаспэ лэ бэзэхэсти андэ нэожыдано ситуацыя. Амэ ласа тэ ӷанас, сар пэс тэ андярас, кала тердяпэ кода, пала со амэ на гиндосардям или со амэ нэ можэм тэ тердярас.

16. Сар и дэвликуни дила фэрий амаро ди, кай во тэ на цырдэлпэ каринг о найлашымос? (Диқэн кадяжэ и картинка.)

¹⁶ Со амэ можэм тэ терас, кай амаро ди тэ цырдэлпэ каринг о лашымос? Амэнди трэбуй май бут тэ терас и дэвликуни дила. Кала амэ  внимательно ашунас пэ христианско мисяйля или росԥэнас пала Дэл, андэ кадэя время амэн на цырдэл каринг о найлашымос. Кадэя дила поможый, кай амаро ди тэ ԥабол тэ уӷодий лэ Иеговасти (Матф. 28:19, 20; Евр. 10:24, 25). Кала амэ адиносарас и Библия, май драго уӷанас ла и гиндосарас пала латэ, амэ сытювас тэ любисарас о лашымос и тэ вэрыцысарас о найлашымос (Иис. Н. 1:8; Пс. 1:2, 3; 119:97, 101). Сэр, о Исусо ԥэндя пэстирэ учениконэнди: «На́ парашэн тэ мангэнпэ, кай тэ на подэнпэ лэ бэзэхэсти» (Матф. 26:41). Кала амэ мангаспэ, амэ проандярас и время пэстирэ небеснонэ Дадэса. Кадя амэ дас лэсти возможность тэ поможый амэнди май фартэ тэ камас тэ радосарас лэско ди (Иак. 4:8).

НА ПАРАШ ТЭ АВЭС ВНИМАТЕЛЬНО

17. Состар о Пётро най еқвар даралас?

¹⁷ Возможно, варисаво найлашымос амэндэ вижыля тэ улас. Но варисо анда када можэт тэ рийпэ палпалэ. Роздиқам лэ Петроско примеро. Через кода, кай во даралас лэ манушэндар, во триварэс отԥэнделя пэстирэ Учитилёстар (Матф. 26:69—75). Ӷэт май интя о Пётро тердёлас англа Синедрионо и смило дэлас дума пала Исусо. Здэлпэ, кай и дар во уля (Дила 5:27—29). Но прожылэ бэрша и во парашэля тэ хал кодэлэнца, ко на сас евреёря. Васо? Важ кода кай даралас, кай када на чалёла лэ евреёнэнди (Гал. 2:11, 12). Дицол, кай и дар англа мануша рисайля каринг о Пётро. И возможно, во кадэлэса борияспэ упалэ и упалэ.

18. Дажэ если амэ улям варисави привычка, пала со трэбуй тэ сэрас?

¹⁸ Варисо кацаво можэт тэ авэл и амэнца. Сар када тэ полас? Амэ можэм тэ гиндосарас, кай улям варисави найлащи привычка, ай вой можэт нэожыдано тэ рийпэ. Акэ со росԥэнэн ек ԥрал: «Мэ на диқавас билажавардимос дэш бэрш и гиндосаравас, кай улэм кадэя проблема пэ вся и время. Но па чачимастэ кадэя найлащи жэлания шоласпэ по дыко зверё, саво гараделя андэ мэрно ди и аштярэлас и время, кай тэ вихукэл и тэ подмарэл ман каринг о бэзэх. Андэ дэсавэ ситуацыи мэрно ди упалэ цырдэлас ман тэ диқав о билажавардимос». Но амаро ԥрал на здяпэ. Во поля, кай лэсти трэбуй тэ на парашэл тэ борийпэ кадэлэса кажно дес и, возможно, лэсти трэбуй авэла када тэ терэл, пока пэ ԥув на авэла о раё. Во мангля,  кай лэсти тэ поможый лэстири хулаи и барэдэр ԥрала анда христианско ӷурто. Амаро ԥрал ашэля инке май осторожно, кай тэ на рийпэ каринг о найлашымос, саво сас андэ лэстири жызня.

19. Со тэ терас, если и привычка, савяса амэ борисавасас, ашэляпэ?

¹⁹ Со тэ терас, если и привычка ашэляпэ? Амэнди трэбуй тэ авас внимательни каринг пэско ди и тэ приашундювас каринг лэ Исусоско совето: «На́ совэн, авэн внимательни». Дажэ кала амэ полас, кай амэ зоралэ, важно тэ на попэрас андэ кацави ситуацыя, сави подмарэл каринг и нэправильни жэлании (1 Кр. 10:12) Терэн кода, со поможыяс тумэнди май данглал. Андэ Притчи 28:14 ԥэнэнпэ: «Бахтало кодэва, ко вся и время дарал тэ стерэл о найлашымос» (2 Пёт. 3:14).

САВО ЛАШЫМОС ТУТ АШТЯРЭЛ?

20, 21. а) Саво лашымос аштярэл амэн, если ритярдювас май дур всаворэстар, со подмарэл каринг о бэзэх? б) Если амэ терас вся, со па амаро зор, со стерэла о Иегова? (2 Каринфо 4:7).

²⁰ Кала амэ пристас о зор, кай тэ ритярдювас май дур всаворэстар, со подмарэл каринг о бэзэх, амэ можэм тэ авас уверени, кай када анэна бут лашымос. О мануш можэт тэ лошавэл лэ бэзэхэсти кати «набут время» (Евр. 11:25). Амэ па чачимастэ бахталэ кати тоди, кала жувас па лэ Иеговаско законо (Пс. 19:8). Васо? Важ кода кай о Дэл кадя амэн создя (Быт. 1:27). Важ када, кала амэ пэстиря жызняса радосарас лэ Иеговас, амэндэ авэла бари блаӷословения — вужо ди и састи надежда пэ вечно жызня (1 Тим. 6:12; 2 Тим. 1:3; Иуда 20, 21)

²¹ Чаче, сар ԥэндя о Исусо, «и тила би зорэсти». Но када на сыкавэл, кай о бэзэх лэла о вэрхо понад амэндэ. Амаро небесно Дад ӷотово тэ дэл амэнди зор. (Проадинон 2 Каринфо 4:7.) Шон сама: о Иегова дэл зор, саво май баро лэ манушэндирэ зорэстар. Ай со када тоди лэ манушэско зор? Када вся со амэ терас, кай тэ на подаспэ лэ найлашымасти, саво амэндэ андо ди. И када — амари отвецтвеность. Если амэ терас вся пэстиря ригатар, амэ можэм тэ авас уверени, кай о Иегова ответит пэ амарэ молитвы. Во поможыя тэ борисавас кодэлэса, пэр со амэндэ на хутилэл зор (1 Кр. 10:13). Лэстирэ зорэса амэндэ вижала тэ на подаспэ лэ бэзэхэсти!