1, 2. Ко сас о Цадоко? (1 Летопись 12:22, 26—28).

 ПРЕЦТАВЬ пэсти, сар май бут чем 340 000 мурша стидэпэ паша Хевроно, кай сас найбарэ плая. Вонэ авелэ интя, кай тэ стон лэ Давидос царёса понад вся о Израилё. Вонэ трин дес котэ дэнас дума, асанас и андэ диля хвалинас лэ Иеговас (1 Лет. 12:39). Машкар кадэва ӷурто сас ек тэрно мануш, савэс ақарэнас Цадоко. Андэр лэстэ нисо на сас нэобычно. Но о Иегова шутя сама пэр лэстэ и позаботисайля, кай амэ тожэ пала лэстэ тэ уӷанас. (Проадинон 1 Летопись 12:22, 26—28.) Ко сас о Цадоко?

² О Цадоко сас рашай, саво поможыяс лэ ӷлавнонэ рашасти, савэс ақарэнас Авиафаро. О Дэл дя лэсти бари мудрость. Инке андэ Библия ԥэнэнпэ, кай о Дэл дя лэсти тэ ӷанэн кода, со загиндосардя (2 Сам. 15:27). И мануша авэнас каринг о Цадоко пала совето. Кадяжэ во сас смило. Пала када амэ и подаса дума андэ кадэя статья.

3. а) Васо лэ Иеговастирэ мануша трэбуй тэ авэн смили? б) Пала со амэ подаса дума андэ кадэя статья?

³ Андэ кадэла послидни деса о Сатана шол бари холи пэ лэ Дэвлэстирэ мануша (1 Пёт. 5:8). Амэ фартэ аштярас, кала о Иегова улэла лэс и лэстири вэрыто люма (Пс. 31:24). Ай пока кадэя время на авеля, амэнди трэбуй тэ подритярас лэ Дэвлэско Царство и тэ поможысарас лэ ԥралэнди и лэ ԥэянди тэ на ашавэн лэ Иеговас. Важ када амэнди трэбуй тэ авас смили. Давайте роздиқаса, сости амэ можэм тэ сытювас кай о Цадоко.

ПОДРИТЯР ЛЭ ДЭВЛЭСКО ЦАРСТВО

4. Васо трэбуй смилость, кай тэ подритярас лэ Дэвлэско Царство? (Диқэн кадяжэ и картинка.)

⁴ Амэ, лэ Иеговастирэ мануша, залям лэ Царствостири риг и всаворэ́ одеса подритярас кадэва правительство  (Матф. 6:33). Но тэ терас када най всегда вушэро. Например, амэнди трэбуй смилость, кай андэ лэ Сатанастири люма тэ жувас па лэ Иеговаско законо и тэ росԥэнас и лащи новость пала Царство (1 Фес. 2:2). Кадяжэ адес бут мануша на ладин через и политика, важ када амэнди трэбуй тэ авас смили, кай тэ на залас никастири риг андэ кадэя дила (Иоан. 18:36). Амэнди трэбуй тэ авас састэ. Васо? Важ кода кай, кала лэ Иеговаско мануш отԥэндёл тэ жал андэ халавдэ или тэ ӷулел андэ политика, лэс моӷут тэ шон андо баруно, во можэт тэ хасарэл пэско мищимос или тэ мардёл.

5. Васо о Цадоко трэбуй сас тэ авэл смило, кай тэ подритярэл лэ Давидос?

⁵ О Цадоко авеля андо Хевроно най просто тэ радуийпэ, кай о Давидо ашэля царё. Во сас ӷотово тэ жал пэ война и тэ тердёл пэ лэ Давидостири риг (1 Лет. 12:38). Во камэлас тэ фэрий лэ израильтянонэн лэ вороӷонэндар. О Цадоко сас рашай, важ када, файма, лэстэ на сас халавдицко опыто. Но зато лэстэ сас чи мало смилость.

6. О Давидо сас лашо примеро важ о Цадоко, сар тэ авэл смило. Васо кадя можно тэ ԥэнас? (Псалом 138:3).

⁶ Со поможысардя лэ Цадокости, саво сас рашай, тэ ашэл смило? Во проандярэлас и время лэ манушэнца, савэ сас зоралэ и смили. И, канешно, во бут сости сытёлас лэндар. Например, о Давидо сас барэдэр пэ война. Во смило «андярэлас лэ израильсконэ халавдэн, кала трэбуй сас тэ марэнпэ» и важ када вонэ закамлэ, кай во тэ авэл лэнго царё (1 Лет. 11:1, 2). Кала о Давидо жалас против пэстирэ вороӷоря, во всегда надеияспэ по Иегова (Пс. 28:7; проадинон Псалом 138:3). Паша Цадоко сас и авэр смили мануша. Например, о Иодаё и лэско найдарано шаво, о Беная, ай кадяжэ 22 авэр барэдэр мануша, савэ авелэ тэ подритярэн лэ  Давидос (1 Лет. 11:22—25; 12:26—28). Кадэла мануша всаворэ́ одеса камэнас, кай о Давидо тэ авэл лэнго царё, и сас ӷотови тэ зашонпэ пала лэстэ.

7. а) Кастар адес амэ можэм тэ сытювас тэ авас смили? б) Сости тумэ сытелэ кай о ԥрал Нси́лу анда видео?

⁷ Со амэнди поможыя тэ авас зоралэ и смили? Амэ можэм тэ гиндосарас пала кодэла, ко би дарако подритярэлас лэ Иеговастири правления. Со май лашо примеро сыкадя амаро Царё, о Исус Христос. Во састэс отԥэнделяпэ тэ ӷулел андэ политика, сави ужал андэ лэ Сатанастири люма (Матф. 4:8—11; Иоан. 6:14, 15). Ай инке, о Исусо на надеияспэ пэ пэско зор. Во вся и время мангэлас помощь лэ Иеговастар. Адес кадяжэ исин кацавэ мануша. Бут тэрнэ мурша екжэнэ витидэ тэ на жан андэ халавдия и тэ на ӷулен андэ политика. Пала лэндэ май драго можно тэ уӷанас по амаро сайто jw.org a.

ПОМОЖЫСАР ЛЭ ԤРАЛЭНДИ И ЛЭ ԤЭЯНДИ

8. Кала лэ барэдэрэ ԥралэнди трэбуй смилость?

⁸ Лэ Иеговастирэ манушэнди чалёл тэ поможын ек еқэсти (2 Кр. 8:4). Дэкала пэ када трэбуй смилость. Например, кала жал и война. Лэ ԥралэндэ и лэ ԥэяндэ можэт тэ на авэл Библия, амари литература, хамос и ӥда. И барэдэр ԥрала любин лэ Иеговастирэ бакрорэн и заботинпэ, кай лэндэ тэ авэл вся, со трэбуй. Кадяжэ вонэ поможын лэнди тэ полэн, кай о Дэл заботийпэ пала лэндэ. И барэдэр ԥрала терэн када дажэ тоди, кала исин опасность (Иоан. 15:12, 13). Андэ када вонэ шонпэ по смило Цадоко.

9. Сави дила о Давидо дя лэ Цадокости? (2 Самуила 15:27—29). (Диқэн кадяжэ и картинка.)

⁹ Лэ Давидос камэлас тэ умарэл лэско шаво о Авессаломо. Лэстэ ԥаболас оди тэ ашэл царёса вместо пэско дад (2 Сам. 15:12, 13). Лэ Давидости трэбуй сас ӥто тэ нашэл анда Иерусалимо. Во ԥэндя пэстирэ слуӷонэнди: «Тидэнпэ, трэбуй тэ нашас, ато нико андар  мэндэ на спасыяпэ!» (2 Сам. 15:14). Кала о Давидо и лэстирэ друӷоря ужанас анда форо, во поля, кай андо Иерусалимо трэбуй тэ ашэнпэ надёжни мануша, савэ лэна тэ пэрэдэн лэсти кода, со загиндой о Авессаломо. Кадэя дила о Давидо дя лэ Цадокости и аврэ рашанди. (Проадинон 2 Самуила 15:27—29.) Лэнди трэбуй сас тэ авэн фартэ осторожни. Если варико тэ уӷанглоп, со вонэ терэн, лэн моӷли тэ умарэн. О Авессаломо фартэ любияс корко пэс, сас жэстоко и нэӷожо мануш. Кати погиндосар, со во тердоп лэ Цадокоса и аврэ рашанца, если тэ уӷанглоп, кай вонэ розуӷанэн пала лэстэ.

10. Сар о Цадоко и лэстирэ друӷоря фэрисардэ лэ Давидостири жызня?

¹⁰ Кай о Давидо сас ек гиндо, сар тэ фэрийпэ. Важ када во мангля помощь кай о Цадоко и кай пэско друӷо о Хушаё, саво лэс никала на ашавэлас (2 Сам. 15:32—37). Па лэ Давидоско гиндо, о Хушаё трэбуй сас тэ притерэлпэ, кай подритярэл лэ Авессаломос, и тэ потԥэнэн лэсти, сар тэ дэл по Давидо. Через када, кай о Давидо авелоп время тэ подӷотовица каринг и война. О Хушаё росԥэндя лэ Цадокости и лэ Авиафарости, саво совето во дя лэ Авессаломости (2 Сам. 17:8—16). Ай вонэ пэрэдинэ када лэ Давидости (2 Сам. 17:17). Кадя лэ Иеговастирэ зорэса о Цадоко и авэр рашая фэрисардэ лэ Давидостири жызня (2 Сам. 17:21, 22).

11. Сар амэ можэм тэ авас смили, сар о Цадоко, кала поможысарас лэ ԥралэнди и лэ ԥэянди?

¹¹ Со, если амэн мангэна тэ поможысарас лэ ԥралэнди и лэ ԥэянди тоди, кала када опасно? Со поможыя амэнди тэ авас кацавэ жэ смили, сар о Цадоко? 1) Кандэн. Андэ ԥари время фартэ важно, кай амэндэ тэ авэл ек гиндо. Кандэн лэ ԥралэн анда филиало, кала вонэ ԥэнэн, со тумэнди тэ терэн (Евр. 13:17). И барэдэр ԥрала анда ӷурто трэбуй най еқвар тэ дэн дума ек еқэса, со тэ стерэн, кай всаворэ ԥрала и ԥэя тэ авэн ӷотови каринг и ԥари ситуацыя андэ люма и  тэ ӷанэн, со тэ терэн, кала вой авэла (1 Кр. 14:33, 40). 2) Авэн смили, но осторожни (Прит. 22:3). Англа кода, сар варисо тэ стерэн, погиндон. Кала када возможно, обжан и ситуацыи, савэ моӷут тэ анэн каринг и бида. 3) Надеинпэ по Иегова. Кала поможын лэ ԥралэнди и лэ ԥэянди, сэрэн, кай важ о Иегова фартэ важно, кай драго тэ авэл най кати лэндэ, но и тумэндэ. Во дэла зор, кай тумэ тэ полэн, сар тэ поможын лэнди, кай када тэ авэл безопасно.

12, 13. Сости тумэ сытён анда кода, со росԥэндэ о Виктор и о Виталий? (Диқэн кадяжэ и картинка.)

¹² Дуй барэдэр ԥрала анда ӷурто, о Виктор и о Виталий, анэнас хамос и паи лэ ԥралэнди и лэ ԥэянди андэ Украина. О Виктор росԥэнэн: «Амэ, кай кати на родасас хамос. Часто када прижаласпэ тэ терас тоди, кала стреляли. Еқвар ек ԥрал дя бут хамос. Блаӷодаря кадэлэсти бут ԥрала и ԥэя смоӷли тэ проритярдён дэсави время. Кала амэ стасас о хамос андэ вурали, варикай 20 метрав амэндар пэля и ракета, но вой на зорвисайля. Вся кодэва дес мэ мангавас лэ Иеговас, кай во тэ дэл манди смилость, кай мэ и май дур тэ поможысарав лэ ԥралэнди и лэ ԥэянди».

¹³ О Виталий ԥэнэн: «Трэбуй сас бари смилость. Пэрво разо манди трэбуй сас тэ ладав 12 часов. Вся о дром мэ постояно давас дума лэ Иеговаса». О Виталий сас смило, но осторожно. Во кадяжэ ԥэнэн: «Мэ вся и время мангаваспэ, кай тэ авав годявэрно и тэ полав, пэр со мандэ исин право, ай пэр со най. И власти домэклэ, кай и мануша тэ ездин най па всаворэ дрома. И мэ ладавас кати па кодэла дрома, па савэ можно сас. Мэрно патяимос ашэля инке май састо, кала мэ диқлэм, сар и ԥрала и ԥэя терэн дила всаворэ, сар ек. Варико вилэлас па дром кода, со на дэлас амэнди тэ проладас. Авэр стидэнас и стонас андэ амари бари вурали хамос, ӥда и кода, со трэбуй сас. Ай кадяжэ и ԥрала и ԥэя праварэнас амэн лэ Виктороса и заботинаспэ, кай амэ моӷли тэ отцыювас».

НИКАЛА НА АШАВ ЛЭ ИЕГОВАС

14. Со можэт тэ авэл по ди, кала о мануш, саво куч тумэнди, ашадя лэ Иеговас?

¹⁴ Кала тумаро друӷо или родо ашавэл лэ Иеговас, через када можэт тэ авэл фартэ ԥарэс (Пс. 78:40; Прит. 24:10). Особено ԥарэс тоди, кала кадэва мануш сас пашэ тумарэ одести. Если тумэндэ сас кацаво андэ жызня, тумэнди придэла зор лэ Цадокоско примеро, саво никала на ашавэлас лэ Иеговас.

15. Васо о Цадоко трэбуй сас тэ авэл смило, кай тэ на ашавэл лэ Иеговас? (1 Царей 1:5—8).

¹⁵ О Цадоко на ашадя лэ Иеговас, кала када стердя лэско пашутно друӷо о Авиафаро. Када тердяпэ тоди, кала о Давидо сас ужэ фартэ ԥуро и лэсти ашэляпэ найдолӷо тэ правий. Лэско шаво о Адония закамля тэ захутилэл о троно, хоть о Иегова дя алав, кай царёса ашэла о Саламоно (1 Лет. 22:9, 10). О Авиафаро заля лэ Адониястири риг. (Проадинон 1 Царей 1:5—8.) Кадя во придя най кати лэ Давидос, но и лэ Иеговас. Кати погиндосар, сави када дук андя лэ Цадокостирэ одести! Май бут чем 40 бэрш о Цадоко и о Авиафаро сас лашэ амала. Вонэ вмести терэнас дила, сар рашая и диқэнас пала лэ Дэвлэско сэртари важ и важни лила (2 Сам. 8:17; 15:29). Вся кадэя время вонэ лэдуй подритярэнас лэ Давидос, сар царёс, и лэндэ сас састи дружба ек еқэса (2 Сам. 19:11—14).

16. Со поможысардя, кай о Цадоко тэ на ашавэл лэ Иеговас?

¹⁶ Хоть о Авиафаро ашадя лэ Иеговас, о Цадоко кадя на стердя. О Давидо вся и время  патялас, кай о Цадоко лэс анда вся оди подритярэл. Кала пала кода, со загиндосардя о Адония, уӷанглэ, о Давидо ԥэндя, кай о Цадоко, о Нафано и о Бенаё тэ стон лэ Саламонос царёса (1 Цар. 1:32—34). О Цадоко вся и время сас паша мануша, савэ на ашавэнас лэ Иеговас. Лэсти придэнас зор о Нафано и авэр мануша, савэ подритярэнас лэ Давидос (1 Цар. 1:38, 39). Кала о Саламоно ашэля царёса, во стодя, кай о Цадоко тэ авэл рашай вместо Авиафаро (1 Цар. 2:35).

17. Сости ту можэш тэ сытёс кай о Цадоко, если тиро друӷо или родо ашадя лэ Иеговас?

¹⁷ Сости ту можэш тэ сытёс кай о Цадоко? Если варико анда тирэ друӷоря или родо ашавэл о чачимос, састэс ритярдюв пала Иегова и на ашав лэс (Иис. Н. 24:15). О Дэл дэла тути зор и смилость тэ терэс правильно. Надеисав пэр лэстэ, мангпэ лэсти и проандяр и время кодэлэнца, ко на парашэл лэс тэ кандэл. О Иегова цэний, кай ту на ашавэс лэс и во точно блаӷословия тут (2 Сам. 22:26).

18. Сости тумэ сытён анда кода, со росԥэндэ о Марко и Сидсе?

¹⁸ Акэ со сас андэ жызня кай о Ма́рко и лэстири хулаи Си́дсе. Лэндирэ дуй щея вибарелэ и ашадэ лэ Иеговас. О Марко росԥэнэн: «Кала ту пэрво разо лэс пэстирэ бэятос по вас, ту полэс, кай глабочка пала лэстэ. И ту ӷанэс, кай ӷотово тэ жас пэ вся, кай тэ фэрис лэс всаворэстар. Важ када, кала амарэ щея ашадэ лэ Иеговас, када сас, сар шури андо ди». Акэ, со инке ԥэнэн о Марко: «О Иегова вся и время паша амэндэ. Во заботийпэ пала кода, кай амэ моӷли тэ подритярас ек еқэс. Кала мандэ нинай зор, во исин кай мэрни хулаи, ай тоди, кала вой би зорэстири, мэ моӷу ла тэ подритярав». Акэ, со ԥэнэн и Сидсе: «Би лэ Иеговаско амэ на виритярдоп. Сэрав, кай мандэ сас по ди кацаво, кай када мэ дошали андэ вся. Мэ росԥэндэм пала када лэ Иеговасти. Через дэсавэ деса и ԥэй, савя мэ на диқлэм бут бэрша, поджыля каринг мандэ андо Зало Царства, приобля ман, подиқля манди андэ яқа и ԥэндя: „Сидсе, кучутни, андэ када нинай тири дош“. О Иегова ман на ашавэл и поможый манди лошаса тэ терав и дила важ лэстэ».

19. Со ту закамлян тэ терэс посли кадэя статья?

¹⁹ О Иегова камэл, кай всаворэ лэстирэ служытеля тэ авэн смили, сар о Цадоко (2 Тим. 1:7). Но када на сыкавэл, кай трэбуй тэ надеиспэ кати пэ пэско зор. Если тути на хутилэл и смилость, манг ла кай о Иегова. Во камэл, кай ту тэ надеиспэ пэр лэстэ. Во поможыя тути, кай ту тэ авэс смило, сар о Цадоко! (1 Пёт. 5:10).