Андэ Исайя 60:1 ԥэнэнпэ: «Ущи, жувли, светисав, важ кода кай тутар ля тэ жал о свето. Тутар марэл лэ Иеговастири стэма». Кода, со пистромэ андэ Исайя, сыкавэл, кай и «жувли» — када о Сионо, или о Иерусалимо, саво сас андэ кодэя время ӷлавно форо андэ Иудея (Ис. 60:14; 62:1, 2) a. О Исая пистросардя пала кода, со авэла англэ. Кала во взвисайля каринг о форо, када сыкавэл, кай во взвисайля кай вся о народо. Амэндэ моӷут тэ авэн дуй вопросоря. Пэрво, кала и сар о Иерусалимо «ущеля» и ля тэ светийпэ? Дуйто, кадэла алава исполнисайлэ кати андэ дэлмутни время или вонэ инке трэбуй тэ исполнинпэ англэ?

Кала и сар о Иерусалимо «ущеля» и ля «тэ светийпэ»? И евреёря сас андо вавилонско плено 70 лет. Вся кадэя время о Иерусалимо и лэско храмо сас розмардэ. Но и мидяноря и персоря захутилдэ о Вавилоно. Вонэ домэклэ лэ израильтянонэнди, савэ жувэнас па вся Вавилонско царство, тэ ринпэ пэ пэстирэ краёря и упалэ тэ тэлён лэ Иеговасти кадя, сар во камэл (Езд. 1:1—4). Андо 537 бэрш до н. э. лэ Дэвлэстирэ мануша, савэ лэс кандэнас, авелэ андо Иерусалимо. Када сас мануша анда всаворэ 12 лэ израилёстирэ коленоря (Ис. 60:4). Вонэ линэ тэ анэн лэ Иеговасти жэртвы, тэ справин и празникоря и тэ ваздэн о храмо (Езд. 3:1—4, 7—11; 6:16—22). Упалэ лэ Иеговастири стэма ля тэ марэл лэ Иерусалимостар, аврэ алавэнца, лэ Дэвлэстирэ народостар. И народоря, савэ жувэнас паша Израилё, сас андэ дэвликуни тэмнота, вонэ на ӷанэнас лэ Иеговас. Ай лэ Дэвлэско народо ашэля важ лэндэ, сар о свето.

Но кати дэсо анда лэ Исаяско пророчество исполнисайля по дэлмутно Иерусалимо. Ӷэт май интя бут израильтяноря парашэлэ тэ кандэн лэ Иеговас (Неем. 13:27; Мал. 1:6—8; 2:13, 14; Матф. 15:7—9). Потом вонэ дажэ отшутэ лэ Исусос, саво сас Христос (Матф. 27:1, 2). И тунчалэ, андо 70 бэрш н. э., о Иерусалимо и лэско храмо сас розмардэ до дувар.

О Иегова май данглал ԥэндя, кай авэла кадэя бида (Дан. 9:24—27). Андэ 60 ӷлава Исайя запистромэ пала кода, кай вся трэбуй тэ рийпэ, сар сас. Но дицол, кай лэ Иеговастэ на сас гиндо, кай всаворэ маменторя анда кадэя ӷлава тэ исполнинпэ кати по Иерусалимо, саво пэ ԥув.

Трэбуй кадэла лэ Дэвлэстирэ алава тэ исполнинпэ инке пэ варисо? Да, вонэ сыкавэн по «упруно Иерусалимо», пэ саво кадяжэ ԥэнэнпэ жувли. О апостало Павло ԥэндя пала лэстэ: «Када амари дэй» (Гал. 4:26). О упруно Иерусалимо — када небесно часть андэ лэ Иеговастири арӷанизацыя. Андэр латэ исин бут анӷелоря, савэ на парашэн тэ кандэн лэ Иеговас. Ай латирэ бэяцэ — када о Исусо и 144000 христианоря, савэн витидя о Дэл. Вонэ кадяжэ, сар и о Павло, лэна тэ жувэн по нэбо. Кадэла избрани мануша — «свынто народо», лэ Дэвлэско Израилё (1 Пёт. 2:9; Гал. 6:16).

Сар о упруно Иерусалимо «ущеля» и ля «тэ светийпэ»? «Ущелэ» и линэ «тэ светинпэ» лэстирэ бэяцэ — када и избрани мануша, савэ инке жувэн пэ ԥув. Давайте сыстосараса кода, со ԥэнэнпэ андо 60 ӷлава Исайя, кодэлэса, со сас кадэлэ манушэнца.

Васо и избрани христианоря трэбуй сас «тэ ущен»? Андо дуйто вико н. э. бут мануша оджылэ лэ Дэвлэстирэ чачимастар. Через када и избрани  мануша ашэлэ андэ дэвликуни тэмнота (Матф. 13:37—43). Кадя вонэ попэлинэ андо плено, кай о Ашунгло Вавилоно — када всаворэ хохавнэ веры. И избрани мануша сас андо плено жы каринг и «послидни деса кадэла люмати», савэ залинэпэ андо 1914 бэрш (Матф. 13:39, 40). Андо 1919 бэрш вонэ смоӷли тэ вижан анда плено и сразу линэ «тэ светинпэ». Вонэ линэ бут тэ росԥэнэн и новость пала Царство b. Жы кодэла времятар кадэва свето пашарэл лэ манушэн анда всаворэ народоря, кадяжэ и кодэлэн, ко ужан андэ лэ Дэвлэско Израилё — «царёря», пала савэ ԥэнэнпэ андэ Исайя 60:3 (Тайна 5:9, 10).

Англэ, кодэлэндар, кас витидя о Дэл, лэла инке май фартэ тэ марэл лэско свето. Кала всаворэ избрани мануша парашэна тэ жувэн пэ ԥув и лэна тэ жувэн по нэбо, вонэ ашэна «Нэво Иерусалимо», или лэ Христостири тэрни — када 144000 царёря и рашая (Тайна 14:1; 21:1, 2, 24; 22:3—5).

И алава анда Исайя 60:1 полностью исполнинапэ через о Нэво Иерусалимо (Сыстон Исайя 60:1, 3, 5, 11, 19, 20 и Свынто тайна 21:2, 9—11, 22—26). Андэ дэлмутни время андо форо Иерусалимо жувэлас царё, саво правияс лэ Дэвлэстирэ народоса. Кадяжэ о Нэво Иерусалимо вмести лэ Христоса лэла тэ правий нэвя люмаса. Сар тэ полас, кай о Нэво Иерусалимо «змэкэлпэ па нэбо лэ Дэвлэстар»? Када сыкавэл, кай и избрани лэна тэ заботинпэ пала мануша пэ ԥув. И мануша анда всаворэ народоря, савэ стон бари патив по Дэл, лэна тэ ԥирэн «анд[о]... свето». Вонэ дажэ ашэна свободни лэ бэзэхэстар и ла смэртятар (Тайна 21:3, 4, 24). Каринг со када анэна? Авэла «время, андэ сави вся трэбуй тэ рийпэ сар сас» (Дила 3:21). Пала када кадяжэ ԥэнэнас о Исая и авэр лэ Дэвлэстирэ мануша. Кадэя бари время заляпэ тоди, кала о Исусо ашэля Царёса, и закончица, кала прожала лэстири Тысячелетнё правления.