1. Васо тути куч о чачимос?

 ЛЭ ИЕГОВАСТИРЭ манушэнди куч о чачимос. Пэр лэстэ ритярдёл амаро патяимос (Римо 10:17). Амэ патяс, кай о Иегова стидя о христианско ӷурто, «саво подритярэл и фэрий о чачимос» (1 Тим. 3:15). Амэ анда вся оди кандас кодэлэн, «ко лэлпэ хуласа» машкар амэндэ. Кадэла ԥрала поможын амэнди тэ полас и Библия и тэ ритярас лэ Дэвлэстири время (Евр. 13:17).

2. Со амэнца можэт тэ терэлпэ, хоть амэ ужэ ӷанас о чачимос? (Иаково 5:19).

² Важ амэндэ куч о чачимос и лэ Дэвлэстири орӷанизацыя. Но када на сыкавэл, кай амэ нэ можэм тэ змардювас па дром. (Проадинон Иаково 5:19.) О Сатана кати када и аштярэл. Во лэла фартэ тэ лошавэл, если стерэла кадя, кай амэ тэ парашас тэ патяс ла Библияти или кодэлэсти, со ԥэнэн амэнди лэ Дэвлэстири орӷанизацыя (Еф. 4:14).

3. Васо амэнди трэбуй састэс тэ ритярдювас пала чачимос? (Ефесо 6:13, 14).

³ Проадинон Ефесо 6:13, 14. Ӥто о Бэнг розындярэла фартэ баро хохаимос и заставия лэ народонэн тэ жан против о Иегова (Тайна 16:13, 14). Кадяжэ во пристола вся пэско зор, кай тэ обхохавэл лэ Дэвлэстирэ манушэн (Тайна 12:9). Важ када важно тэ сытювас тэ полас, кай о чачимос, ай кай о хохаимос. Амэ камас тэ приашундювас каринг лэ Дэвлэско чачимос (Римо 6:17; 1 Пёт. 1:22). Када поможыя амэнди тэ пэрэжувас и бари бида.

4. Пала со амэ подаса дума андэ кадэя статья?

 ⁴ Со амэ уӷанаса андэ кадэя статья? Амэ роздиқаса, сар и дар англа Иегова и кода, кай амэ найӷорди, поможый амэнди тэ росполас, кай о чачимос, ай кай о хохаимос и тэ патяс лэ Дэвлэстиря орӷанизацыяти. Ай инке амэ роздиқаса трин маменторя, савэ поможын тэ на оджас лэ чачимастар.

СО ПОМОЖЫЯ ТЭ ПОЛАС, КАЙ О ЧАЧИМОС, АЙ КАЙ О ХОХАИМОС?

5. Сар и дар англа Иегова поможыя тэ полас, кай о чачимос, ай кай о хохаимос?

⁵ Дар англа Иегова. И дар англа Иегова сыкавэл, кай амэ любисарас лэс. Амэ любисарас лэ Дэвлэс кадя дэ фартэ, кай дарас тэ стерас лэсти дуқанэс. Важ амэндэ важно тэ уӷодисарас лэ Иеговасти. Важ када амэ камас тэ сытювас тэ полас, кай о лашымос, ай кай о найлашымос, кай о чачимос, ай кай о хохаимос (Прит. 2:3—6; Евр. 5:14). Нащи тэ домэкас, кай и дар англа мануша тэ авэл май бари, чем и любовь каринг о Иегова. Важ кода кай часто лэ Иеговасти на чалёл кода, со чалёл лэ манушэнди.

6. Сар через и дар англа мануша 10 израильтяноря пэрэбандярдэ о чачимос?

⁶ Если амэ ласа тэ дарас лэ манушэндар май фартэ, чем лэ Дэвлэстар, тоди амэ ласа тэ патяс лэ хохаимасти. Погиндосар, со сас, кала о Маисеё бишалдя 12 манушэн тэ роздиқэн и ԥув, пала сави о Дэл дя алав. И 10 андар лэндэ пэрэдарайлэ через и хананеёря. Кадэя дар сас май бари, чем лэндири любовь каринг о Иегова. Вонэ ԥэндэ аврэ манушэнди анда пэско народо: «Амэ нэ можэм тэ жас против кодэла, ко котэ жувэл, важ кода кай вонэ май зоралэ амэндар» (Чис. 13:27—31). Варисо анда кадэла алава сас чачимос. Лэ израильтянонэнди чаче моӷло тэ здэлпэ, кай и хананеёря май зоралэ лэндар. Но хэба правильно сас тэ ԥэнэн, кай и израильтяноря нэ смоӷут тэ победин пэстирэ вороӷонэн. Кодэла, ко кадя ԥэнэнас, совсем бистэрдэ пала  Иегова! Кадэла 10 мануша трэбуй сас тэ гиндон май бут пала кода, со камэл о Иегова. Ай во ԥэндя лэ израильтянонэнди, кай вонэ тэ захутилэн кодэя ԥув. Кадяжэ лэнди трэбуй сас тэ на бистрэн, сар о Дэл найдэлмут спасысардя пэско народо. Тоди вонэ полиноп, кай и хананеёря на сыстонапэ лэ Иеговастирэ барэ зорэса. Кай кодэла 10 мануша сас слабо вера. Ай о Исусо Навино и о Халево фартэ патянас андо Дэл. Важ лэндэ само ӷлавно сас тэ уӷодин лэ Иеговасти. Вонэ ԥэндэ лэ народости: «Если о Иегова любий амэн, тоди во анэна амэн пэ кадэя ԥув и отдэла ла амэнди» (Чис. 14:6—9).

7. Со тэ терэс, кай тэ авэл дар англа Иегова? (Диқэн кадяжэ и картинка.)

⁷ Со поможыя амэнди тэ авэл дар англа Иегова? Кажно разо, кала прилэс и ришэния, погиндосар, со кай о Дэл по ди (Пс. 16:8). Кала ту адинос варисо анда Библия, пуш пэстар: «Тэ авелоп мэ андэ кадэя ситуацыя, со мэ стердоп?» Прецтавь, кай ту находиспэ машкар израильтяноря и ашунэс, сар 10 андар лэндэ виԥэнэн кода, со лэнди на чалеля. Патяёп ту лэнди? Пэрэдарайлоп ту? Или тири любовь каринг о Иегова авелоп май бари, чем и дар англа мануша? О Исусо Навино и о Халево ԥэнэнас о чачимос лэ народости, но вонэ на патяе. Через када о Дэл на домэкля, кай вонэ тэ зажан андэ кодэя ԥув, пала сави дя алав (Чис. 14:10, 22, 23).

8. Савэ амэ трэбуй тэ авас и васо?

⁸ Ав найӷордо. О Иегова поможый тэ полэн о чачимос кати кодэлэнди, ко найӷордо (Матф. 11:25). Кай тэ уӷанас о чачимос, амэ самас ӷотови тэ сытювас (Дила 8:30, 31). Но амэнди трэбуй тэ авас осторожни, кай тэ на ашас ӷорди. А то амэ ласа тэ гиндосарас, кай амаро гиндо май важно, чем и библейски принцыпоря и кода, со ԥэнэн лэ Дэвлэстири орӷанизацыя.

9. Со поможыя амэнди тэ ашаспэ найӷорди?

⁹ Кай тэ ашаспэ найӷорди, амэнди трэбуй тэ сэрас, кай амэ англа Иегова фартэ цынёне (Пс. 8:3, 4). Амэ можэм тэ мангаспэ, кай во тэ поможый амэнди инке май фартэ тэ тэлярас пэско ди и тэ камас тэ сытювас лэстар. О Иегова дэл амэнди бут со, кай амэ тэ уӷанас лэстирэ гиндоря и тэ прижанас, кай вонэ май лашэ, чем амарэ. Во терэл када через и Библия и через пэстири орӷанизацыя. Кала адинос и Библия, шув сама пэ кода, со доԥэнэн, кай важ о Иегова куч найӷордо ди и важ лэстэ гряца и ӷордость, путяримос и абуримос. Фартэ важно тэ ашаспэ найӷорди, кала амэнди дэн почотно дила или кала амэн фартэ шон сама.

СО ПОМОЖЫЯ ТЭ НА ОДЖАС ЛЭ ЧАЧИМАСТАР?

10. Через кастэ о Иегова дэлас руковоцтво андэ дэлмутни время и сар во када терэл адес?

¹⁰ Вся и время патя кодэлэсти, со ԥэнэн лэ Дэвлэстири орӷанизацыя. Андо дэлмутно Израилё о Иегова ԥэнэнас пэстирэ народости, со тэ терэн, через о Маисеё, ай ӷэт май интя — через о Исусо Навино (Иис. Н. 1:16, 17). И израильтяноря трэбуй сас тэ прижанэн, кай кадэла мурша пэрэдэнас лэ Дэвлэстирэ алава, и всаворэ трэбуй сас тэ стон патив пэр лэндэ. Кала вонэ кадя терэнас, лэндэ вся драго сас. Прожыля бут время, и сас стидо о христианско ӷурто. Спэрва о руковоцтво жалас через и 12 апосталоря (Дила 8:14, 15). Ӷэт май интя лэнди линэ тэ поможын авэр барэдэр ԥрала анда Иерусалимо. Кала и христианоря терэнас кадя, сар ԥэнэнас лэнди кадэла кандинэ мурша, «кадэлэстар и ӷурторя ашэнас май састэ андо патяимос, и лэ ԥралэн и лэ ԥэян кажно дес ашэлас май бут» (Дила 16:4, 5). Адес амэнди кадяжэ анэн лашымос, кала  амэ терас кадя, сар ԥэнэн о Дэл через пэстири орӷанизацыя. Со авэла по ди кай о Иегова, если амэ на стаса патив пэ кодэла, касти во дя тэ диқэн пала амэндэ? Амэ сможэм тэ дас ответо пэ кадэва вопросо, кала роздиқаса, со сас лэ израильтянонэнца, кала вонэ жанас андэ кодэя ԥув, пала сави о Дэл дя алав.

11. Со тердяпэ лэ израильтянонэнца, савэ на стодэ патив по Маисеё? (Диқэн кадяжэ и картинка.)

¹¹ Кала и израильтяноря жанас андэ кодэя ԥув, пала сави о Дэл дя алав, дэсавэ пативалэ мурша линэ тэ ԥэнэн, кай лэ Маисеёстэ нинай право тэ авэл барэдэр андо народо. Вонэ ԥэндэ: «Всаворэ [ай най кати о Маисеё] андо народо свынти, и машкар лэндэ о Иегова» (Чис. 16:1—3). Чаче, важ о Дэл «всаворэ израильтяноря» сас свынти. Но тэ авэл барэдэр по народо, во дя лэ Маисеёсти (Чис. 16:28). Кала и мануша ԥэнэнас кода, со лэнди на чалёл андо Маисеё, вонэ па чачимастэ ԥэнэнас вся када по Иегова. Васо вонэ подвазглэ лэ мирос? Вонэ май бут гиндонас пала кода, со камэнас екжэнэ, ай най пала кода, со камэл о Иегова. Лэнго ди цырдэлас лэн тэ хулаин лэ манушэнца и кай пэр лэндэ тэ стон май бари патив. О Дэл умардя лэн, ай кадяжэ тысячи манушэн, савэ залинэ лэндири риг (Чис. 16:30—35, 41, 49). Адес нисо на паруделя: если варико на стол патив пэ кода, со ԥэнэн лэ Иеговастири орӷанизацыя, када холярэл лэ Дэвлэс.

12. Васо амэ можэм тэ патяс кодэлэсти, со ԥэнэн лэ Дэвлэстири орӷанизацыя?

¹² Амэндэ нинай ни ек причина тэ на патяс кодэлэсти, со ԥэнэн лэ Дэвлэстири орӷанизацыя. Кала и ԥрала анда Руководящё совето диқэн, кай варисо трэбуй тэ парувэн, вонэ терэн када ӥто (Прит. 4:18). Например, вонэ моӷут тэ шон сама, кай варисаво гиндо анда Библия трэбуй тэ полэн май точно или тэ парувэн о порядко важ лэ Царствостири дила. Важ лэндэ само ӷлавно — тэ терэн кода, со камэл о Иегова. Кадяжэ всаворэ  ришэнии вонэ прилэн па Библия, сави важ амэндэ примеро.

13. Со када «примеро важ и правильни алава» и васо амэнди трэбуй тэ на оджас лэстар?

¹³ На оджа «лэ примеростар важ и правильни алава» (2 Тим. 1:13). Андэ Библия запистромэ «примеро важ и правильни алава» — када вся, сости сытярэлас о Исусо (Иоан. 17:17). Пэ кадэла правильни алава ритярдёл вся, андэр со амэ патяс. Лэ Дэвлэстири орӷанизацыя сытярэл амэн тэ на оджас кадэлэ примеростар. Если амэ кадя терас, када фэрия амэн.

14. Сар дэсавэ христианоря андо пэрво вико оджылэ «лэ примеростар важ и правильни алава»?

¹⁴ Со можэт тэ авэл, если амэ оджаса «лэ примеростар важ и правильни алава»? Роздиқам, со сас андо пэрво вико. Дэсавэ христианоря анда ӷурто розындярэнас и дума пала кода, кай лэ Дэвлэско дес ужэ авеля. Файма, када сас через о письмо, саво кабута пистросардя о Павло. Дэсавэ христианоря анда Фесалоники на розуӷанглэ, чачуни када инфармацыя чи най, и патяе андэр латэ. Вонэ дажэ линэ тэ пэрэԥэнэн ла аврэнди. Вонэ трэбуй сас тэ сэрэн, сости о Павло сытярэлас лэн, кала инке сас паша лэндэ. Тоди лэн на обхохадоп (2 Фес. 2:1—5). О Павло побудисардя пэстирэ ԥралэн тэ на патян всаворэсти, со ашунэн. Во камэлас тэ поможый лэнди, кай вонэ тэ росполэн, кай о чачимос, ай кай о хохаимос. Важ када о апостало пистросардя андо пэско дуйто письмо андэ Фесалоники: «Када мэ, о Павло, ԥэнав тумэнди „доров“ и пистросарав када пэстирэ вастэса. Мэ терав када андо кажно письмо. Кадя тумэ лэна тэ ӷанэн, кай во мандар» (2 Фес. 3:17).

15. Сар амэ можэм тэ фэрисарас пэс лэ хохаимастар, саво шолпэ по чачимос? Призындярэн примеро. (Диқэн кадяжэ и картинка.)

¹⁵ Сости амэн сытярэн лэ Павлостирэ алава, савэ во пистросардя андэ Фесалоники? Амэ тожэ можэм тэ ашунас варисави бари новость или кода, со на зжалпэ ла Библияса. Андэ кацави ситуацыя амэнди трэбуй тэ ӷанас, сар тэ росполас када. Андо Совецко Союзо и ԥрала еқвар получисардэ о письмо,  кабута анда ӷлавно управления. Андэр лэстэ сас пистромэ, кай вонэ тэ отделинпэ и тэ стерэн пэстири орӷанизацыя. О письмо дицолас кадя, кабута во чачуно, хоть лэс пистросардэ амарэ вороӷоря. Но и ԥрала полинэ, кай када хохаимос. Вонэ шутэ сама, кай и гиндоря анда письмо розжанаспэ кодэлэса, сости лэн вся и время сытярэлас лэ Дэвлэстири орӷанизацыя. Адес и мануша, савэ жан против о чачимос, моӷут через о интэрнэто тэ старыинпэ тэ обындярэн амэн и тэ анэн розладо машкар амэндэ. Важ када амэнди трэбуй вся и время твэрэзо тэ гиндосарас и тэ на грабисавас тэ патяс всаворэсти. Кай тэ фэрисарас пэс, трэбуй драго тэ погиндосарас, зжалпэ кода, со амэ адиносарас и ашунас, лэ чачимаса, саво амэ ужэ ӷанас, чи най (2 Фес. 2:2; 1 Иоан. 4:1).

16. Со амэнди трэбуй тэ терас, если варико андо ӷурто заандярэл о гиндо, саво розжалпэ лэ чачимаса (Римо 16:17, 18)?

¹⁶ Мэк тутэ авэл ек гиндо кодэлэнца, ко кандэл лэ Иеговас. О Дэл камэл, кай всаворэ лэстирэ мануша тэ тэлён лэсти еқэҭанэ. Амэндэ авэла ек гиндо кати тоди, если амэ ласа састэс тэ приритярдювас лэ Дэвлэстирэ чачимасти. Если варико лэл тэ заандярэл андэ ла мисяйляко ӷурто о гиндо, саво розжалпэ лэ Дэвлэстирэ чачимаса, через када можэт тэ на авэл ладо. Важ када о Дэл ԥэнэн амэнди: «Ритярдён май дур кацавэ манушэндар». Если амэ кадя на стераса, тоди патяса андо хохаимос и можэм тэ парашас тэ кандас лэ Иеговас. (Проадинон Римо 16:17, 18.)

17. Васо трэбуй тэ полас, ка́й о чачимос, и тэ на оджас лэстар?

¹⁷ Если амэ полас, ка́й о чачимос, и на оджас лэстар, амэ ашасапэ састэ андэ вера и амэндэ авэла лащи дружба лэ Иеговаса (Еф. 4:15, 16). Када фэрия амэн кодэлэстар, сости сытярэл о Сатана и со во розындярэл. Тоди амэ можэм тэ патяс, кай о Иегова амэн фэрия, кала авэла и бари бида. На́ оджан лэ чачимастар — «и о Дэл, саво дэл мирно жызня, авэла тумэнца»! (Флп. 4:8, 9).