О апостало Павло пистросардя лэ христианонэнди андэ Фесалоники: «Если варико на приашундёла каринг кода, со амэ приԥэнас андэ кадэва письмо, на́ злэн и яқа па кацаво мануш» (2 Фес. 3:14). Варикала амэ ԥэнасас, кай андэ кадэва стихо пистромэ, со трэбуй тэ терэн и барэдэр ԥрала. Если варико на камэлас тэ приашундёл, хоть лэсти най еқвар дэнас советоря па Библия, и барэдэр ԥрала моӷли тэ ԥэнэн пэ собрания особо речь. Посли када и ԥрала и ԥэя парашэнас тэ дружын кадэлэ манушэса.

Но акана амэ па аврятэ полас кода, со пистромэ андо 2 Фесалоники 3:14. Сар дицол, о Павло дя кадэва совето всаворэ́ христианонэнди андо ӷурто, кай андэ дэсавэ ситуацыи вонэ екжэнэ тэ прилэн пэстири решэния. Важ када лэ барэдэрэ ԥралэнди на трэбуй тэ ԥэнэн и особо речь. Васо када паруделя? Роздиқаса, пала со дэлас дума о Павло, кала дя кадэва совето.

О Павло шутя сама, кай дэсавэ андо фесалоникийско ӷурто андярэнас пэс «найпрепи». Вонэ на приашундёнас каринг кода, со сас пэрэдино лэ Дэвлэстар. Кала о Павло сас лэндэ кодэва разо, во приԥэндя: «Ко на камэл тэ терэл, мэк во и на́ хал». Но дэсавэ всаек отԥэндёнас тэ жан пэ бути и тэ затерэн важ пэстэ, хоть лэндэ и сас пэ када зор. Кадяжэ вонэ ӷуленас най андэ пэстири дила. Сар и христианоря трэбуй сас тэ обжанпэ кодэлэнца, ко кадя пэс андярэлас? (2 Фес. 3:6, 10—12).

О Павло ԥэндя: «На́ злэн и яқа па кацаво мануш». О греческо алав, саво катэ пэрэандярдо сар «на́ злэн и яқа», сыкавэлас, кай кацавэ манушэса трэбуй сас тэ авэн осторожни. О Павло приԥэндя када всаворэ́ ӷуртости, ай най кати лэ барэдэрэ ԥралэнди (2 Фес. 1:1; 3:6). Важ када, если и ԥрала и ԥэя додиқэнас, кай варисаво христианино на камэл тэ прилэл о библейско совето и андярэл пэс найпрепи, вонэ моӷли тэ прилэн пэстири решэния тэ дурён лэстар.

Трэбуй сас кадэлэ манушэса тэ обжанпэ кадя жэ, сар кодэлэса, кас о ӷурто «[дурярдя] пэстар»? (1 Кр. 5:13). Най. Важ кода кай о Павло ԥэндя: «На́ парашэн тэ дэн лэсти годи сар ԥралэсти». Кочай и ԥрала и ԥэя моӷли тэ дэн дума лэса пэ собрании и тэ ԥирэн лэса па лэ Дэвлэстири дила. Но лэнди трэбуй сас тэ парашэн просто кадя тэ проандярэн и время кадэлэ манушэса и вместе тэ отцыён. Васо? О Павло ԥэндя: «Кай лэсти тэ ашэл лажаво». Кала кацавэ христианиноса парашэнас тэ вэдинпэ сар друӷоса, лэсти моӷло тэ ашэл лажаво, кай во андярэлас пэс неправильно, и во моӷ тэ парудёл (2 Фес. 3:14, 15).

Сар и христианоря моӷут тэ прилэн кадэва совето адес? Спэрва трэбуй точно тэ полас, кай о мануш чаче «андярэл пэс найпрепи». О Павло на дэлас дума пала кодэла мануша, савэ терэн кода, со на жал против лэ Дэвлэско законо, но со варикасти на домэкэл и совесть. Кадяжэ катэ и дума на жалас пала мануша, савэ просто витидэн разно. И инке во на ԥэнэнас пала кодэла, ко варисар пусадя амаро ди. О Павло катэ дэлас дума пала христианоря, савэнди па Библия ворта дэнас советоря, но вонэ на закамлэ тэ приашундён.

Если амэ шас сама, кай о христианино жал против кода, сости сытярэл и Библия a, амэ на трэбуй тэ аштярас, кай варико тэ ԥэнэн амэнди тэ на проандярас и время кацавэ манушэса и вместе тэ на отцыювас. Амэ екжэнэ прилас кацави решэния. И андэ кацави ситуацыя амэ на ласа тэ дас дума пала када аврэнца — можэт, кати кодэлэнца анда ери, каса жувас андэ ек цэр. Но амэ вся кадя жэ ласа тэ дас дума кацавэ манушэса пэ собрании и тэ ԥирас лэса па лэ Дэвлэстири дила. Ай кала во парудёла, амэ упалэ дружысараса лэса.