СТАТЬЯ ВАЖ И ИЗУЧЕНИЯ 34
ДИЛИ 107 Сытювас любить лэ Дэвлэстар
На парашэн тэ любин кодэлэн, ко стердя бэзэх, и тэ авэн одялэ каринг лэндэ
«[О Дэл] па пэско баро ковло ди... камэл тэ поможый тути тэ каиспэ» (РИМО 2:4).
АМЭ УӶАНАСА
Сар и барэдэр ԥрала старыинпэ тэ поможын кодэлэнди, ко стердя бэзэх.
1. Пэр со моӷут тэ надеинпэ кодэла, ко стердя бэзэх?
АНДА кодэя статья амэ уӷанглям, со о апостало Павло приԥэндя тэ стерэн, кала ек ԥрал андо Каринфо стердя бэзэх. Кадэва мануш на камэлас тэ каийпэ, важ када во будэр не моӷ тэ ашэлпэ андо христианско ӷурто. Но сар дицол анда Библия, о Дэл можэт тэ поможый лэ манушэсти тэ каийпэ (Римо 2:4). Со важ када терэн и барэдэр ԥрала?
2, 3. Со амэ трэбуй тэ стерас, если уӷанглям, кай варико анда ӷурто стердя бэзэх, и васо?
2 Если и барэдэр ԥрала на ӷанэн, кай варико андо ӷурто стердя бэзэх, лэндэ на вижала лэсти тэ поможын. Важ када, если амэ уӷанглям, кай варико анда ԥрала и ԥэя стердя бэзэх, со амэ трэбуй тэ стерас? Амэ трэбуй тэ ԥэнас кацавэ манушэсти тэ жал кай и барэдэр ԥрала и тэ мангэл лэндар помощь (Ис. 1:18; Дила 20:28; 1 Пёт. 5:2).
3 Ай со, если о ԥрал или и ԥэй на камэл тэ жал кай и барэдэр ԥрала? Тоди амэ екжэнэ жаса лэндэ, кай вонэ тэ поможын кодэлэсти, ко стердя бэзэх. Кадя амэ сыкаваса, кай любисарас лэс. Васо? Важ кода кай на камас тэ хасарас амарэ ԥралэс или амаря ԥья. Если о христианино на парашэла тэ андярэл пэс неправильно, во можэт инке май фартэ тэ римой пэстири дружба лэ Иеговаса. Кадяжэ пэ вся о ӷурто можэт тэ жал найлашо алав. Сар бы тэ на авэл ԥарэс, амэ всаек жаса и подаса дума дума лэ барэдэрэ ԥралэнца, важ кода кай любисарас лэ Иеговас и амарэ ԥралэс или ла ԥья (Пс. 27:14).
САР И БАРЭДЭР ԤРАЛА ПОМОЖЫН КОДЭЛЭНДИ, КО СТЕРДЯ БЭЗЭХ
4. Со камэн тэ домардён и барэдэр ԥрала, кала диқэнпэ лэ манушэса, саво стердя бэзэх?
4 Кала варико андо ӷурто стердя бэзэх, лэ барэдэрэ ԥралэнго круӷо стидэла камитето a, андэ саво авэна трин барэдэр ԥрала. Кадэла ԥрала трэбуй тэ авэн сэжи и найпутярдэ. Канешно, вонэ пристона вся о зор, кай тэ поможын кодэлэсти, ко стердя бэзэх, тэ каийпэ. Но всаек вонэ полэн, кай лэндэ на вижала тэ заставин лэ манушэс тэ парудёл (Втор. 30:19). Кадэла ԥрала ӷанэн, кай най всаворэ закамэна тэ каинпэ и тэ бандён каринг о Иегова кадя, сар када стердя о царё Давидо (2 Сам. 12:13). Дэсавэ на приашундёна каринг лэ Иеговаско совето (Быт. 4:6—8). И всаек, и барэдэр ԥрала камэн тэ стерэн вся, кай тэ поможын кодэлэсти, ко стердя бэзэх, тэ каийпэ. Пала со трэбуй тэ сэрэн и ԥрала, кала вонэ диқэнпэ лэ манушэса, саво стердя бэзэх?
5. Пала со сэрэн и барэдэр ԥрала, кала диқэнпэ лэ манушэса, саво стердя бэзэх? (2 Тимафеё 2:24—26). (Кадяжэ диқэн и картинка.)
5 И барэдэр ԥрала ӷанэн, кай, хоть о мануш и стердя бэзэх, во всаек куч важ о Иегова (Лука 15:4, 6). Важ када, кала и ԥрала диқэнпэ лэ манушэса, вонэ на андярэн пэс ӷрубо и на дэн дума лэса холяса. Кадяжэ и барэдэр ԥрала на гиндон, кай вся, со лэнди трэбуй, — када просто тэ задэн вопросоря и тэ стидэн инфармацыя. Вонэ андярэн пэс кадя, сар запистромэ андо 2 Тимафеё 2:24—26 (проадинон). И ԥрала андярэн пэс ковлэс, пативалэс и одялэс. Вонэ старыинпэ тэ поможын лэ манушэсти тэ парувэл пэско гиндо.
Адес и барэдэр ԥрала терэн точно кадя жэ, сар и пастухоря андэ дэлмутни время, — старыинпэ тэ виарақэн лэ бакрорэн, савэ хасарделэ. (Диқэн о абзацо 5.)
6. Со терэн и барэдэр ԥрала англа кода, сар тэ диқэнпэ лэ манушэса, саво стердя бэзэх? (Римо 2:4).
6 И барэдэр ԥрала пристон вся о зор, кай тэ пэрэлэн лэ Иеговаско гиндо. Вонэ старыинпэ кадя жэ, сар о Иегова, тэ обжанпэ кодэлэса, ко стердя бэзэх. Акэ со пала лэстэ ԥэндя о Павло: «Па пэско баро ковло ди во камэл тэ поможый тути тэ каиспэ». (Проадинон Римо 2:4.) И барэдэр ԥрала трэбуй тэ сэрэн, кай само ӷлавно лэндири дила — када тэ заботинпэ пала лэ Дэвлэстирэ бакрорэ. Кадяжэ вонэ трэбуй тэ лэн примеро лэ Христостар и тэ терэн кадя, сар во приԥэндя (Ис. 11:3, 4; Матф. 18:18—20). Англа кода сар тэ диқэнпэ лэ манушэса, саво стердя бэзэх, и ԥрала мангэнпэ, кай вонэ тэ поможын лэ манушэсти тэ каийпэ. Вонэ май драго розуӷанэн, со пистромэ андэ Библия и андэ амари литература, и мангэн лэ Иеговас тэ дэл лэнди помощь тэ полэн лэ манушэс и тэ розлэнпэ андэ лэстири ситуацыя. Лэнди трэбуй тэ погиндон, со вонэ ӷанэн пала мануш и пала кода, сар во бареля, ай кадяжэ тэ полэн, со парудя лэско гиндо и васо во ля па аврятэ пэс тэ андярэл (Прит. 20:5).
7, 8. Сар и барэдэр ԥрала моӷут тэ сытён лэ Иеговастар и кадя жэ, сар во, тэ обжанпэ кодэлэнца, ко стердя бэзэх?
7 И барэдэр ԥрала старыинпэ тэ тэрпин, сар о Иегова. Вонэ сэрэн, сар андэ дэлмутни время о Иегова обжаласпэ кодэлэнца, ко терэлас бэзэх. Например, о Дэл на грабияс тэ холявэл по Каино. Во ԥэндя лэсти, каринг со можэт тэ анэн о бэзэх, ай кадяжэ дя алав тэ блаӷословий лэс, если во кандэла (Быт. 4:6, 7). Каринг о Давидо о Иегова бишалдя лэ Нафанос, саво росԥэндя лэсти примеро, и када поможысардя лэ царёсти тэ каийпэ (2 Сам. 12:1—7). И о Дэл «упалэ и упалэ» бишалэлас пэстирэ особонэ манушэн каринг и найкандинэ израильтяноря (Иер. 7:24, 25). О Иегова на аштярэлас, кала и мануша екжэнэ каинапэ, кай тэ бандёл каринг лэндэ. Во пэрво процырдэлас каринг лэндэ пэско вас, кай тэ поможый лэнди тэ каинпэ.
8 И барэдэр ԥрала лэн примеро лэ Иеговастар и старыинпэ тэ поможын кодэлэнди, ко стердя бэзэх. Андо 2 Тимафеё 4:2 пистромэ, кай лэнди трэбуй тэ тэрпин. Сар трэбуй тэ андярэл пэс о барэдэр ԥрал, кала дэл дума кодэлэса, ко стердя бэзэх? Во трэбуй тэ ритярэл пэс андэ вас и тэ дэл дума лэса спокойно, тоди кадэва мануш закамэла тэ андярэл пэс правильно. Если о барэдэр ԥрал лэла тэ холявэл или на лэла тэ зритярэл пэс андэ дума, кадэлэса во можэт тэ одмарэл лэ манушэс тэ каийпэ.
9, 10. Сар и барэдэр ԥрала поможын лэ манушэсти тэ загиндойпэ, васо во дуреля лэ Иеговастар и со андя каринг о бэзэх?
9 И барэдэр ԥрала камэн тэ полэн, со андя каринг о бэзэх. Васо о христианино дуреля лэ Иеговастар? Можэт, во парашэля кажно дес тэ адиной и Библия и анда ди тэ мангэлпэ? Или май набут ля тэ росԥэнэн важ о Дэл? Можэт, во домэкля, кай и неправильни гиндоря тэ хулаин лэса? Сар во проандярэл и время и каса вэдийпэ? На парудя када лэско гиндо? Полэл во, кай через кода, сар во пэс андярдя, лэстирэ Дадэсти, лэ Иеговасти, ашэля фартэ ԥарэс по ди?
10 И барэдэр ԥрала старыинпэ правильно тэ подтидэн и вопросоря. Кадя вонэ поможын кодэлэсти, ко стердя бэзэх, тэ погиндой, васо во дуреля лэ Иеговастар и со андя каринг о бэзэх (Прит. 20:5). И ԥрала терэн када ковлэс и на пушэн пала кода, со лэнди на трэбуй тэ ӷанэн. Кадяжэ вонэ моӷут тэ призындярэн примеро, сар када стердя о Нафано, кала дэлас дума лэ Давидоса. Када можэт тэ поможый кодэлэсти, ко стердя бэзэх, тэ полэл, сар дэ найдраго во пэс андярдя. Можэт, ужэ тоди, кала вонэ диқэнапэ пэрво разо, о мануш загрыжояпэ через кода, со стердя. Во можэт дажэ тэ каийпэ.
11. Саво примеро подя о Исусо?
11 И барэдэр ԥрала сытён лэ Исусостар. О Исусо поможысардя лэ Савлости анда Тарсо тэ загиндойпэ, кала задя лэсти кацаво вопросо: «Савло, васо ту ман ӷонис?». Кадя во дя лэ Савлости тэ полэл, кай во терэлас неправильно (Дила 9:3—6). Ай акэ со о Исусо ԥэндя пала «кадэя манушни, пала Езавель»: «Мэ дэм лати время тэ каийпэ» (Тайна 2:20, 21).
12, 13. Со моӷут тэ стерэн и барэдэр ԥрала, кай тэ дэн лэ манушэсти, саво стердя бэзэх, время тэ каийпэ? (Кадяжэ диқэн и картинка.)
12 Кадя жэ сар о Исусо, и барэдэр ԥрала на лэн сразу тэ гиндон, кай кодэва, ко стердя бэзэх, никала на каияпэ. Дэко каийпэ ужэ тоди, кала о камитето пэрво разо стидяпэ тэ дэл дума лэса. Ай варикасти трэбуй май бут время. Важ када и барэдэр ԥрала моӷут инке най еқвар тэ диқэнпэ кацавэ манушэса. Можэт, посли кода сар и барэдэр ԥрала пэрво разо диқлэпэ лэ манушэса, во загиндояпэ пала кода, со лэсти сас ԥэндо. Тоди лэско ди ковлёла, и во мангэла лэ Иеговас тэ простий лэс (Пс. 32:5; 38:18). Важ када, кала вонэ диқэнапэ пэ авэр разо, во можэт тэ гиндой совсем па аврятэ.
13 Кай тэ поможын лэ манушэсти, саво стердя бэзэх, тэ каийпэ, и барэдэр ԥрала старыинпэ тэ полэн лэс и тэ обжанпэ лэса ковлэс. Вонэ мангэн лэ Иеговас, кай во тэ подритярэл лэн, и надеинпэ, кай лэнго ԥрал или ԥэй обгиндояпэ и каияпэ (2 Тим. 2:25, 26).
И барэдэр ԥрала моӷут най еқвар тэ диқэнпэ кодэлэса, ко стердя бэзэх, кай тэ дэн лэсти время тэ каийпэ. (Диқэн о абзацо 12.)
14. Кала о мануш каийпэ, касти прижал и патив важ када? Росԥэнэн.
14 Кала о мануш, саво стердя бэзэх, каийпэ, всаворэ фартэ лошалэ! (Лука 15:7, 10). Касти прижал и патив важ када? Лэ барэдэрэ ԥралэнди? Шув сама, со ԥэндя о Павло пала кодэла, ко стердя баро бэзэх: «Можэт, о Дэл дэла лэнди тэ каинпэ» (2 Тим. 2:25). Вижал, най и мануша, ай о Иегова поможый лэ христианиности тэ парувэл пэско гиндо. Май дур о апостало Павло ԥэнэн, со авэла посли кода, сар о мануш каисайля. Во сможэт май точно тэ полэл о чачимос, тэ обгиндойпэ и тэ спасыйпэ анда лэ Сатанастирэ вас.
15. Посли кода сар о мануш, саво стердя бэзэх, каисайля, сави помощь лэсти дэн и барэдэр ԥрала?
15 Со авэла посли кода, сар о мануш, саво стердя бэзэх, каисайля? И барэдэр ԥрала лэна тэ шон лэс сама и тэ поможын лэсти, кай лэстэ тэ авэл зор тэ терэл лэ Дэвлэстири дила. Када поможыя лэсти тэ жал ворта па правильно дром и тэ борийпэ лэ бэзэхэса (Евр. 12:12, 13). Канешно, и барэдэр ԥрала никасти на росԥэнэн, со стердя кадэва мануш. Но исин кацавэ ситуацыи, кала дэсо трэбуй тэ ӷанэн вся о ӷурто.
«ЛАЖАВАР АНГЛА ВСАВОРЭ»
16. Ко када «всаворэ», пала савэ пистросардя о Павло андо 1 Тимафеё 5:20?
16 Проадинон 1 Тимафеё 5:20. О Павло пистросардя кадэла алава аврэ барэдэрэ ԥралэсти, лэ Тимафеёсти. О апостало ԥэнэнас пала кода, сар трэбуй тэ обжанпэ кодэлэнца, «ко на парашэл тэ терэл бэзэх». Сар када тэ полас? Можэт, о Павло ԥэнэнас, кай лэн трэбуй тэ лажаварэн англа вся о ӷурто? Най. Май ӥто всаворэстар, кала о Павло ԥэндя пала «всаворэ», во дэлас дума пала кодэла, ко ужэ ӷанэнас, саво бэзэх стердя о мануш. Например, када сас кодэла, ко вся диқля пэстирэ яқэнца или касти о мануш, саво стердя бэзэх, прижанделя екжэно. И барэдэр ԥрала трэбуй сас тэ ԥэнэн кати лэнди, кай вонэ розлинэпэ андэ кадэя дила и подинэ дума лэ манушэса.
17. Андэ савэ ситуацыи пэ собрания авэла ԥэндо, кай варикасти сас дино совето тэ парудёл, и состэ када терэлпэ?
17 Андэ дэсавэ ситуацыи бут ко андо ӷурто ужэ ӷанэн важ о бэзэх или ӥто уӷанэна. Тоди «всаворэ» — када вся о ӷурто. Важ када ек анда барэдэр ԥрала ԥэнэна пэ собрания, кай кадэлэ ԥралэсти или ла ԥьяти сас дино совето тэ парудёл. Состэ када терэлпэ? Кай авэр «тэ фэринпэ» и тожэ тэ на стерэн бэзэх.
18. Со терэн и барэдэр ԥрала, если бэзэх стердя о болдо христианино, савэсти инке нинай 18 бэрш? (Кадяжэ диқэн и картинка.)
18 Ай со, если баро бэзэх стердя о болдо христианино, савэсти инке нинай 18 бэрш? Лэ барэдэрэ ԥралэнго круӷо витидэла дуе барэдэрэ ԥралэн и ԥэнэна лэнди тэ диқэнпэ лэса и лэстирэ родителёнэнца, савэ лэ Иеговастирэ свидетеля b. И барэдэр ԥрала уӷанэна, со ужэ стердэ и родителя, кай тэ поможын пэстирэ бэятости тэ каийпэ. Со, если о бэято приашундёл каринг пэстирэ родителя и старыийпэ тэ парудёл? Тоди дуй барэдэр ԥрала моӷут тэ прилэн решэния, кай и родителя екжэнэ моӷут тэ поможын пэстирэ бэятости и кай лэнца на трэбуй тэ диқэлпэ лэ барэдэрэ ԥралэнго камитето. И барэдэр ԥрала драго ӷанэн, кай имено лэ родителёнэнди о Иегова дя право тэ сытярэн и тэ дэн годи пэстирэ бэятонэнди (Втор. 6:6, 7; Прит. 6:20; 22:6; Еф. 6:2—4). Посли када и барэдэр ԥрала дэкала лэна тэ пушэн кай и родителя, вижал лэндэ тэ поможын лэ бэятости тэ парудёл чи най. Но со, если о болдо бэято на каийпэ и на парашэл тэ андярэл пэс неправильно? Тоди лэса и лэстирэ родителёнэнца, савэ лэ Иеговастирэ свидетеля, диқэлапэ лэ барэдэрэ ԥралэнго камитето.
Если о болдо христианино, савэсти инке нинай 18 бэрш, стердя баро бэзэх, дуй барэдэр ԥрала диқэнапэ лэса и лэстирэ родителёнэнца, савэ лэ Иеговастирэ свидетеля. (Диқэн о абзацо 18.)
О ИЕГОВА ГЛАБА ПАЛА АМЭНДЭ, И ВО ФАРТЭ ОДЯЛО
19. Сар и барэдэр ԥрала лэн примеро лэ Иеговастар, кала диқэнпэ кодэлэса, ко стердя баро бэзэх?
19 О Иегова стодя лэ барэдэрэ ԥралэн, кай вонэ тэ фэрин о ӷурто кодэлэндар, ко на камэл тэ жувэл па лэско законо (1 Кр. 5:7). Кадяжэ вонэ терэн вся, со па лэнго зор, кай тэ поможын кодэлэсти, ко стердя бэзэх, тэ каийпэ. И вонэ надеинпэ, кай вся, со вонэ терэн, на авэла евья и о мануш парудёла. Кадя вонэ лэн примеро лэ Иеговастар, важ кода кай во «любий амэн и... одяло» (Иак. 5:11). О апостало Иоано фартэ любияс пэстирэ ԥралэн и ԥэян. Шув сама, со во пистросардя: «Мэрнэ сомнакунэ бэяцэ, мэ пистросарав тумэнди пала када, кай тумэ тэ на стерэн нисаво бэзэх. Если жэ варико стердя бэзэх, амэндэ исин помошнико, саво паша Дад, — о Исусо Христос, саво андэ вся правильно» (1 Иоан. 2:1).
20. Со амэ уӷанаса анда авэр статья?
20 Но дэкала о христианино на камэл тэ каийпэ. Тоди во будэр не можэт тэ ашэлпэ андо ӷурто. Со терэн и барэдэр ԥрала андэ кацавэ ситуацыи? Пала када амэ уӷанаса анда авэр статья.
ДИЛИ 103 Пастыри — подарко лэ Дэвлэстар
a Пэ кацави ӷрупа анда трин барэдэр ԥрала амэ ԥэнасас правово камитето. Но кадэла ԥрала трэбуй най кати тэ сындон, или тэ розлэнпэ, правильно о мануш стердя чи най. Важ када амэ будэр на ласа кадя тэ ԥэнас. Акана пэ кацавэ ԥрала лэна тэ ԥэнэн просто лэ барэдэрэ ԥралэнго камитето.
b Если лэ бэятостэ, савэсти нинай 18 бэрш, нико анда родителя най лэ Иеговаско свидетелё, тоди вместе лэса трэбуй тэ авэл взросло болдо христианино анда лэско ери, кодэва, ко сытярэлас лэс па Библия, или авэр взросло Свидетелё, савэса лэ бэятости авэла спокойно.
