1. Со о Иегова камэл важ всаворэ мануша?

 КАЛА о Иегова создал лэ манушэн, во дя лэнди свобода тэ витидэн. И кажно дес амэ екжэнэ прилас решэнии. Само важно решэния, сави можэт тэ прилэл о мануш, — када тэ отдэл пэстири жызня лэ Иеговасти и тэ андярэл лэстири время вместе лэстирэ ереса. О Иегова камэл, кай всаворэ тэ прилэн кацави решэния. Васо? Важ кода кай во любий лэ манушэн и камэл, кай вонэ тэ авэн бахталэ. О Дэл камэл, кай вонэ тэ ашэн лэстирэ друӷоря и тэ жувэн вечно (Втор. 30:19, 20; Гал. 6:7, 8).

2. Сар о Иегова обжалпэ кодэлэнца, ко стердя баро бэзэх, но инке на каисайля? (1 Иоано 2:1).

² И всаек о Иегова никас на заставий тэ андярэл лэстири время. Во домэкэл кажнонэ манушэсти, кай во екжэно тэ витидэл, со тэ терэл. Но со, если о болдо христианино ԥагэл лэ Дэвлэско законо и терэл баро бэзэх? Если во на каийпэ, лэ ӷуртости трэбуй тэ дурярэн лэс пэстар (1 Кр. 5:13). И дажэ тоди о Иегова всаворэ́ одеса аштярэл, кай кодэва, ко стердя бэзэх, рияпэ каринг лэстэ. Акэ васо лэсти сас важно тэ потинэн и особо цэмин — кай лэстэ тэ  авэл право тэ простий кодэлэн, ко каийпэ андэ пэстирэ бэзэха. (Проадинон 1 Иоано 2:1.) Амаро любящё Дэл анда ди взвийпэ каринг кодэла, ко стердя бэзэх, и мангэл лэн тэ каинпэ (Зах. 1:3; Римо 2:4; Иак. 4:8).

3. Со амэ роздиқаса андэ кадэя статья?

³ О Иегова камэл, кай по бэзэх и пэ кодэла, ко андярэл пэс неправильно, амэ тэ диқас кадя жэ, сар во. Подам дума, сар амэ можэм тэ пэрэлас лэско гиндо. Кала ласа тэ адиносарас кадэя статья, шув сама: 1) сар о ӷурто андо Каринфо обжыляпэ лэ ԥралэса, саво стердя баро бэзэх, 2) со о Павло приԥэндя тэ стерэн, кала кадэва мануш каисайля, и 3) сар о Иегова обжалпэ кодэлэнца, ко стердя баро бэзэх.

САР АНДЯРДЯ ПЭС О ӶУРТО АНДО КАРИНФО, КАЛА О ԤРАЛ СТЕРДЯ БАРО БЭЗЭХ

4. Со тердяпэ андо пэрво вико андо каринфско ӷурто? (1 Каринфо 5:1, 2).

⁴ Проадинон 1 Каринфо 5:1, 2. О Павло ужэ до трито жыля андо дром тэ росԥэнэн важ о Дэл. Андэ кодэя время лэсти пэрэдинэ найлашэ новости пала каринфско ӷурто, саво найдэлмут сас стидо. Ек ԥрал жувэлас пэстирэ дадэстиря хулаяса. Када сас баро дело! Кацаво на ашундёлас дажэ «машкар авэр народоря»! Ай о ӷурто най кати ԥандавэлас и яқа пэ кацави дила, но и ԥэнэса абурояс кадэлэса. Можэт, дэко гиндояс, кай о Дэл кадя сыкавэл, кай полэл лэ бэзэхэстирэ манушэн и жалуий лэн. Но если лэ Иеговаско мануш стердя бэзэх, о Дэл на ашавэл када кадя. О христианино, саво кадя найпативалэс пэс андярэлас, римояс о лашо алав, саво затердя о ӷурто. Тай инке авэр ԥрала и ԥэя моӷли тэ лэн лэстар найлашо примеро. Со о Павло приԥэндя тэ стерэл лэ ӷуртости?

5. Со о Павло приԥэндя лэ ӷуртости и со када сыкавэлас? (1 Каринфо 5:13). (Кадяжэ диқэн и картинка.)

⁵ Проадинон 1 Каринфо 5:13. Через лэ Дэвлэско зор о Павло пистросардя письмо андо Каринфо. Во приԥэндя лэ ӷуртости тэ дурярэн пэстар кодэлэс, ко терэл бэзэх и на каийпэ. Сар и ԥрала и ԥэя трэбуй сас када тэ стерэн? О Павло пистросардя, кай вонэ «будэр тэ на сԥандён» кадэлэ манушэса. Сар када тэ полас? Вонэ на трэбуй сас дажэ тэ хан и тэ пэн кацавэ манушэса (1 Кр. 5:11). Кала амэ бэшас варикаса пала ек мисяйля, амэ обычно на ашас мулком, ай пала варисо дас дума. Вижал, о Павло камля тэ ԥэнэн, кай и ԥрала и ԥэя на трэбуй сас тэ  проандярэн и время кадэлэ манушэса. Када фэрисардоп аврэ христианонэн, кай лэн нисо тэ на римой (1 Кр. 5:5—7). Ай инке, кадя и ԥрала и ԥэя поможысардоп лэсти тэ полэл, сави дук во андя лэ Иеговасти, тэ прилажал кодэлэстар, сар во пэс андярдя, и тэ каийпэ.

6. Сар о ӷурто приля лэ Павлоско письмо и со стердя о мануш, саво спэрва на каисайля?

⁶ Наверно, лэ Павлости сас интересно тэ уӷанэн, сар о ӷурто приля лэско письмо. И акэ о Тито андя лашэ новости. И ԥрала и ԥэя приашунделэ каринг лэ Павлоско совето и стердэ кадя, сар во ԥэндя (2 Кр. 7:6, 7). Тай инке ужэ через дэсавэ шона посли лэ Павлоско письмо о мануш, саво стердя бэзэх, каисайля! Во ля па аврятэ тэ гиндой и тэ андярэл пэс и упалэ ля тэ ритярэл лэ Дэвлэско законо (2 Кр. 7:8—11). Со акана о Павло приԥэнэна лэ ӷуртости?

 САР О ӶУРТО ОБЖЫЛЯПЭ КОДЭЛЭСА, КО СТЕРДЯ БЭЗЭХ, НО КАИСАЙЛЯ

7. Сар андярдя пэс кодэва, ко стердя бэзэх, посли кода сар лэс дурярдэ лэ ӷуртостар? (2 Каринфо 2:5—8).

⁷ Проадинон 2 Каринфо 2:5—8. О Павло пистросардя, кай «кацавэ манушэсти хутила кода, кай бут мануша виандярдэ лэсти сындо». Вижал, посли кода сар о мануш, саво стердя бэзэх, сас дурярдо лэ ӷуртостар, во поля, кай лэсти трэбуй тэ каийпэ. Важ кода кай кадэва мануш каисайля, лэ ԥралэнди и лэ ԥэянди будэр на трэбуй сас тэ ритярдён лэстар май дур (Евр. 12:11).

8. Со о Павло ԥэндя тэ стерэл лэ ӷуртости посли кода, сар о мануш, саво стердя бэзэх, каисайля?

⁸ Со акана трэбуй сас тэ стерэн и ԥрала и ԥэя? О Павло ԥэндя лэнди «всаворэ́ одеса тэ простин» лэ ԥралэс, саво змарделя па правильно дром и «тэ стерэн лэсти по ди май вушэро». Во кадяжэ пистросардя: «Поможын лэсти тэ патял, кай во тумэнди куч». Шув сама: о Павло на камля, кай и барэдэр ԥрала просто тэ домэкэн кадэлэ манушэсти тэ рийпэ андо ӷурто. И ԥрала и ԥэя трэбуй сас пэстиря думаса и диласа тэ сыкавэн, кай вонэ анда ди лэс простисардэ и па чачимастэ любин лэс. Тоди во патяёп, кай всаворэ па чачимастэ лошалэ упалэ лэс тэ диқэн.

9. Васо дэсавэнди, можэт, сас ԥарэс тэ простин лэ ԥралэс, саво каисайля?

⁹ Ай всаворэ сас лошалэ, кай кадэва мануш рисайля андо ӷурто? Андэ Библия пала када нисо на ԥэнэнпэ, но возможно, кай най. Васо можно кадя тэ ԥэнас? Кадэва ԥрал стердя вэрыто всаворэ́ ӷуртости и, можэт, дажэ лажавардя дэсавэ христианонэн. И ԥрала и ԥэя пристонас вся о зор, кай тэ ашэнпэ вужэ англа Дэл. Ай акана лэнди анда ди трэбуй тэ прилэн кодэлэ манушэс, саво терэлас кацаво чорымос. Варикасти када моӷло тэ здэлпэ несправедливо. (Сыстон Лука 15:28—30.) Васо всаворэ андо ӷурто трэбуй сас анда ди тэ шон сама лэ ԥралэс, саво рисайля?

10, 11. Со авелоп, тэ на простисардоп и ԥрала и ԥэя лэ манушэс, саво каисайля?

¹⁰ Погиндосарам пала ԥрал, саво каисайля. Со тердопэ, тэ на домэклоп лэсти и ԥрала тэ рийпэ андо ӷурто? Или со авелоп лэстэ по ди, тэ на шутоп лэс сама и ԥрала и ԥэя? Лэсти ашэлоп кадя ԥарэс по ди, кай во «умэклоп и вас». Во дажэ линоп тэ гиндой, кай лэстэ нинай нисави надия тэ рийпэ андо ӷурто. Тоди во парашэлоп тэ пристол зор, кай тэ пашол каринг о Дэл.

¹¹ Со инке авелоп, тэ на простисардоп и ԥрала и ԥэя кодэлэ манушэс? Вонэ екжэнэ хасардоп пэстири дружба лэ Иеговаса. Васо? Важ кода кай кадя вонэ сыкадоп, кай шонпэ най по одяло и жалуимаско Дэл, ай по жэстоко и барунэ одеско Сатана. Можно тэ ԥэнэс, вонэ домэклоп лэ Бэнгэсти лэндирэ жэ вастэнца тэ одмарэн кадэлэ манушэс лэ Иеговастар (2 Кр. 2:10, 11; Еф. 4:27).

12. Сар о ӷурто трэбуй сас тэ лэл примеро лэ Иеговастар?

¹² Сар о ӷурто андо Каринфо сыкадоп, кай лэл примеро лэ Иеговастар, ай най лэ Сатанастар? Кала простисардоп кодэлэн, ко каисайля. Шув сама, со пала Дэл пистромэ андэ Библия. О Давидо мангэласпэ: «Ту, Иегова... [ковлэ одеско] и ӷотово тэ простис» (Пс. 86:5). О Михеё пистросардя: «Исин [хоть ек кацаво] Дэл... саво простий... и на згиндой о бэзэх?» (Мих. 7:18). Ай о Исая ԥэндя: «Мэк о найлашо мануш ашавэл пэско дром и кодэва, ко загиндосардя тэ терэл о найлашимос, — пэстирэ [вэрыти] гиндоря. Мэк... [вонэ ринпэ]  каринг о Иегова, саво... [лэн] жалуия анда оди... каринг амаро Дэл, важ кода кай во анда оди простия» (Ис. 55:7).

13. Васо сас правильно тэ рин андо ӷурто лэ манушэс, саво каисайля? (Диқэн и рамка  «Кала о мануш, саво стердя бэзэх, сас рисардо андо ӷурто?».)

¹³ О ӷурто андо Каринфо трэбуй сас анда ди тэ шол сама кодэлэ манушэс, саво каисайля. И ԥрала и ԥэя трэбуй сас тэ сыкавэн лэсти, кай вонэ любин лэс и лошалэ лэс тэ диқэн упалэ андэ лэ Дэвлэско ери. Тэ приашунделоп и ԥрала и ԥэя каринг лэ Павлоско совето, тоди дицэлоп, кай вонэ «кандэн... андэ вся» (2 Кр. 2:9). Хоть прожылэ кати дэсавэ шона посли кода, сар кадэлэ манушэс дурярдэ лэ ӷуртостар, но во ужэ поля пэстири дош и каисайля. Важ када и барэдэр ԥрала трэбуй сас тэ на отстон и дила и тэ рин лэс андо ӷурто.

АВЭН СПРАВЕДЛИВИ И ОДЯЛЭ, САР О ИЕГОВА

14, 15. Сости амэ сытелям анда кода, со тердяпэ андо Каринфо? (2 Пётро 3:9). (Кадяжэ диқэн и картинка.)

¹⁴ Кода, со тердяпэ андо Каринфо, сас запистромэ и фэримэ, «кай амэ тэ ашас годявэрнэ» (Римо 15:4). Анда кадэва случаё амэ уӷанас, сар о Иегова жалуий пэстирэ манушэн. Дэсавэ гиндон, кай если о Иегова одяло, тоди во лэла тэ ԥандавэл и яқа пэ бэзэха, савэ терэн лэстирэ помошникоря. Но о Иегова на проашавэл, если варико анда  лэско народо терэл баро бэзэх. Да, о Иегова жалуий и пестий пэстирэ манушэн, но во на домэкэл лэнди вся. Лэ Иеговаско законо никала на парудёл. Если варико стердя бэзэх и на каийпэ, во не можэт тэ ашэлпэ андо ӷурто (Иуда 4). Кадя о Иегова сыкавэл, кай во любий всаворэ́ пэстирэ манушэн и камэл тэ фэрий лэн лэ вэрытимастар (Прит. 13:20; 1 Кр. 15:33).

¹⁵ Но кадяжэ о Иегова на камэл, кай варико тэ хасарэл и жызня. Во камэл тэ спасый всаворэн, кас кати можно. О Иегова анда ди жалуий кодэлэ манушэн, савэ парувэн пэско гиндо, парашэн тэ андярэн пэс неправильно и камэн тэ ринпэ каринг лэстэ (Иез. 33:11; проадинон 2 Пётро 3:9). Акэ васо, кала о мануш анда Каринфо каисайля и паруделя, о Иегова через о Павло приԥэндя лэ ӷуртости тэ простин лэс и тэ прилэн палпалэ.

16. Посли кода сар амэ роздиқлям и ситуацыя, сави сас андо Каринфо, саво важ тумэндэ ашэля о Иегова?

¹⁶ Кадэя ситуацыя андо Каринфо драго сыкадя, кай о Иегова любий пэстирэ манушэн и справедливо обжалпэ лэнца, ай кадяжэ, кай во андэ вся приритярдёл пэстирэ законости (Пс. 33:5). Хэба через када амэ на камас тэ терас вся, кай инке май фартэ тэ ашундёл амарэ Дэвлэско алав? Кажно андар мэндэ арақадо андо бэзэх и амэнди трэбуй, кай о Дэл амэн тэ простий. Важ када амэ фартэ блаӷодарни лэ Иеговасти, кай во витиндя амэн, важ кода кай би кадэлэско во никала амэн на простисардоп. Сар дэ драго ашэл по ди, кала амэ полас, кай о Иегова глабочка пала пэстирэ мануша и камэл, кай вонэ тэ авэн бахталэ!

17. Со амэ роздиқаса андэ авэр статья?

¹⁷ Ай со, если адес варико стерэла баро бэзэх? Сар и барэдэр ԥрала лэн примеро лэ Иеговастар и поможын кадэлэ манушэсти тэ каийпэ? И сар пэс трэбуй тэ андярэл вся о ӷурто, кала и барэдэр ԥрала виандярэн решэния тэ дурярэн лэс или тэ рин палпалэ? Када амэ роздиқаса андэ авэр статья.