СТАТЬЯ ВАЖ И ИЗУЧЕНИЯ 31
ДИЛИ 12 Иегова Велико Царё
Со стердя о Иегова, кай тэ спасый амэн лэ бэзэхэстар и ла смэртятар
«О Дэл фартэ любий лэ мирос и важ када отдя пэстирэ особенонэ Шавэс» (ИОАН. 3:16).
АМЭ УӶАНАСА
Сар о Иегова дэл амэнди помощь тэ борисавас лэ бэзэхэса и со во стердя, кай тэ спасый амэн лэ бэзэхэстар и тэ дэл вечно жызня.
1, 2. а) Со када бэзэх и сар амэ можэм тэ биросарас лэс? (Кадяжэ диқэн и сноска.) б) Пала со амэ подаса дума андэ кадэя статья и андэ авэр штар? (Кадяжэ диқэн «Шув сама» андэ кадэва выпуско.)
КАМЛОП ту тэ ӷанэс, пэскати дэ фартэ тут любий о Иегова? Кай тэ виарақэс о ответо пэ кадэва вопросо, уӷан, со во стердя, кай тэ спасый тут лэ бэзэхэстар и ла смэртятар. О бэзэх a — када жэстоко вороӷо, и нико не можэт тэ бирой лэс пэстирэ зорэса. Всаворэ амэ шылисавас кажно дес. Кадяжэ амэ бэзэхэстирэ, важ када амэ мэрас (Римо 5:12). Но исин и лащи новость. Амэ можэм тэ вицэлас андэ кадэя война. Ӥто о Иегова спасыя амэн лэ бэзэхэстар и ла смэртятар!
2 О миро жувэл пэ ԥув ужэ варикай 6 000 бэрш. И вся кадэя время о Иегова поможый лэ манушэнди тэ ашэн лэстирэ друӷоря. Васо во када терэл? Важ кода кай любий лэн. Во любий лэ манушэн жы анда кодэя время, сар лэн создал, и бут со стердя, кай тэ поможый лэнди тэ боринпэ лэ бэзэхэса. О Дэл ӷанэн, кай о бэзэх андярэл каринг и смэрть. Но во на камэл, кай амэ тэ мэрас, — во камэл, кай амэ тэ жувас вечно (Римо 6:23). Акада во и камэл важ тутэ. Андэ кадэя статья амэ розласа трин вопросоря: 1) Сави надия о Иегова дя лэ бэзэхэстирэ манушэнди? 2) Сар и мануша андэ дэлмутни время уӷодинас лэ Иеговасти? 3) Со стердя о Исусо, кай тэ спасый лэ манушэн лэ бэзэхэстар и ла смэртятар?
САВИ НАДИЯ О ИЕГОВА ДЯ ЛЭ БЭЗЭХЭСТИРЭ МАНУШЭНДИ?
3. Сар о Адамо и Ева ашэлэ бэзэхэстирэ?
3 Кала о Иегова создал пэрвонэ муршэс и жувля, во камэлас, кай вонэ тэ авэн бахталэ. Во бут со лэнди подарисардя: лэндэ сас райкано цэр, бахтали еряли жызня и интересно дила. Лэндар трэбуй сас тэ жан всаворэ мануша, и вонэ трэбуй сас па вся ԥув тэ стерэн кацаво жэ раимос, саво сас андо Едэмско садо. Но о Дэл стодя ек просто, но важно законо. И во май данглал ԥэндясас лэ манушэнди, кай, если вонэ на кандэна лэс, вонэ мэрэна. И амэ ӷанас, со тердяпэ. О найлашо анӷело, саво на любияс ни лэ Дэвлэс, ни лэ манушэн, подмардя лэн тэ ԥагэн о законо. И о Адамо и Ева стердэ кадя, сар камэлас кадэва анӷело. Вонэ парашэлэ тэ патян пэстирэ Дадэсти, саво кадя бут важ лэндэ стердя, и жылэ против лэско алав. Вся ашэля кадя, сар о Иегова лэнди и ԥэндя. Кодэлэ десэстар о Адамо и Ева линэ тэ ԥурён и потом мулинэ. (Быт. 1:28, 29; 2:8, 9, 16—18; 3:1—6, 17—19, 24; 5:5).
4. Васо лэ Иеговасти гряца о бэзэх? (Римо 8:20, 21).
4 Кадэва случаё запистромэ андэ Библия найевья. Када поможый амэнди тэ полас, васо лэ Иеговасти кадя гряца о бэзэх, — о бэзэх римой и дружба амарэ небеснонэ Дадэса и анэн каринг и смэрть (Ис. 59:2). Ай о Сатана, наоборот, ԥарол пала бэзэх и вэрыцый лэ Дэвлэс и лэ манушэн. Важ када во подмардя лэ Адамос и ла Ева тэ жан против о Дэл. И во идоси на парашэл тэ змарэл лэ манушэн па правильно дром. Кала о Адамо и Ева шылисайлэ, о Сатана, наверно, погиндосардя, кай во вицэлдя. Но во на полэлас, сар дэ фартэ любий о Иегова. О Дэл на парудя пэско баро гиндо — кода, со во камля тэ стерэл важ лэ Адамостирэ бэяцэ. Во глаба пала мануша, важ када во сразу жэ дя амэнди надия, кай англэ авэла лащи жызня. (Проадинон Римо 8:20, 21.) О Иегова ӷанэнас, кай дэсавэ анда лэ Адамостирэ и ла Еватирэ бэяцэ лэна тэ любин лэс и закамэна лэс тэ кандэн. И сар лэнго Дад и Создателё, во дя лэнди возможность тэ авэн лэстирэ друӷоря и тэ ашэн свободни лэ бэзэхэстар и ла смэртятар. Со во важ када стердя?
5. Кала о Иегова пэрво разо проԥэндясас, кай лэ бэзэхэско миро можэт пэ варисостэ тэ надеийпэ? Росԥэнэн (Бытие 3:15).
5 Проадинон Бытие 3:15. О Иегова сразу жэ ԥэндя, кай умарэла лэ Сатанас. Кадя во дя лэ мирости тэ надеийпэ, кай англэ вся авэла драго. О Дэл инке май данглал ԥэндясас, кай авэла бэято, саво растасавэла лэ Сатанасти о шэро и нисо на ашавэла кодэлэстар, со во повитердя (1 Иоан. 3:8). Но спэрва о Сатана трэбуй сас «тэ дэндалэл» лэ бэятос — када тэ умарэл лэс. О Иегова ӷанэнас, кай кадэлэстар лэстэ лэла тэ росшындёл оди, но во сас ӷотово тэ жал пэ када. Состэ? Кай тэ спасый лэ мирос лэ бэзэхэстар и ла смэртятар.
САР И МАНУША АНДЭ ДЭЛМУТНИ ВРЕМЯ УӶОДИНАС ЛЭ ИЕГОВАСТИ?
6. Со терэнас о Авелё, о Ноё и авэр кандинэ мануша, кай тэ ашэн лэ Иеговастирэ друӷоря?
6 О Иегова полокорэс росԥэнэнас, сар лэ бэзэхэстирэ мануша моӷут тэ ашэн лэстирэ друӷоря. Пэрво мануш, саво патяя андэр лэстэ посли кода, со тердяпэ андо Едэмо, — када о Авелё, лэ Адамоско и ла Евако дуйто шаво. О Авелё любияс лэ Иеговас и камэлас варисо тэ стерэл важ лэстэ. Во диқэлас пала бакрэ и важ када сԥабардя важ лэстэ дэсавэ бакрорэн анда пэско стадо. Чалеля када лэ Иеговасти? Да. «О А́велё уӷодисардя лэ Иеговасти, и во приля лэ Авелёстири жэртва» (Быт. 4:4). Ӷэт май интя о Иегова прилэлас кацавэ жэртвы лэ манушэндар, савэ любинас лэс и патянас лэсти. Например, кацаво мануш сас о Ноё (Быт. 8:20, 21). О Иегова прилэлас лэ манушэндар кадэла подаркоря и кадя сыкавэлас, кай лэ бэзэхэстирэ мануша моӷут тэ уӷодин лэсти и тэ ашэн май пашэ каринг лэстэ b.
7. Сости амэн сытярэл кода, кай о Авраамо сас ӷотово тэ анэн андэ жэртва пэстирэ шавэс?
7 Ӷэт май интя жувэлас о Авраамо, саво сыкадя райкано примеро, сар трэбуй тэ патяс. О Иегова мангля лэс тэ сԥабарэл сар жэртва пэстирэ шавэс, лэ Исакос. Амэнди дажэ ԥарэс прецтавить, сар дэ фартэ кадэлэстар задуқая оди кай о Авраамо. И всаек во сас ӷотово када тэ стерэл. Но англа кода сар тэ зашынэн пэстирэ шавэс, о Дэл лэс тердярдя. Кадэва случаё сыкавэлас, со о Иегова тидэласпэ тэ стерэл англэ — тэ анэн андэ жэртва пэстирэ любимонэ Шавэс. Акэ сар дэ фартэ о Иегова любий лэ мирос (Быт. 22:1—18).
8. Со сыкавэнас и жэртвы, савэ трэбуй сас тэ анэн па лэ Моисеёско законо? (Левит 4:27—29; 17:11).
8 Прожыля бут время, и о Иегова дя лэ израильтянонэнди законо. Па кадэва законо лэ Дэвлэско народо трэбуй сас тэ анэн и жэртвы, кай тэ ашэлпэ вужо лэ бэзэхэстар. (Проадинон Левит 4:27—29; 17:11.) Вонэ сыкавэнас пэ май бари жэртва, через сави всаворэ мануша ашэна свободни лэ бэзэхэстар по вико вечно. Лэ Дэвлэстирэ особи мануша лэстирэ зорэса росԥэнэнас, кай о бэято, пала саво сас дино алав, — лэ Дэвлэско особено Шаво, — трэбуй тэ пэрэандярэл и бида и тэ хындёл. Во авэла умардо, сар о бакроро важ и жэртва (Ис. 53:1—12). Кати погиндосар: лэ Иеговасти на сас жалко тэ отдэл пэстирэ любимонэ Шавэс, кай тэ спасый лэ манушэн вместе туса лэ бэзэхэстар и ла смэртятар!
СО СТЕРДЯ О ИСУСО, КАЙ ТЭ СПАСЫЙ ЛЭ МАНУШЭН?
9. Со о Иоано Крестителё ԥэндя пала Исусо? (Евреёря 9:22; 10:1—4, 12).
9 Андо пэрво вико андэ амари эра лэ Дэвлэско мануш о Иоано Крестителё додиқля лэ Исусос и ԥэндя: «Акэ лэ Дэвлэско Бакроро, саво залэл ла люмако бэзэх!» (Иоан. 1:29). Кадэлэ алавэнца во сыкадя, кай о Исусо — када кодэва бэято, пала саво сас ԥэндо май данглал, и када во трэбуй сас тэ отдэл пэстири жызня сар жэртва. Акана всаворэ лэ бэзэхэстирэ мануша моӷли инке май фартэ тэ надеинпэ, кай авэна спасымэ лэ бэзэхэстар. (Проадинон Евреёря 9:22; 10:1—4, 12.)
10. Сар о Исусо сыкадя, кай авеля тэ поможый лэ бэзэхэстирэ манушэнди тэ каинпэ?
10 О Исусо шолас бари сама пэ мануша, пэ савэ тасавэлас о бэзэх. Во ақарэлас лэн тэ ԥирэн лэса и тэ ашэн лэстирэ ученикоря. Во ӷанэнас, кай вся лэ манушэндири бида жал лэ бэзэхэстар. Важ када во поможыяс лэ мирости, савэсти сас фартэ ԥарэс через о бэзэх. Еқвар во ԥэндя: «О врачо трэбуй най лэ зоралэнди, ай лэ насвалэнди», — и инке во ԥэндя: «Мэ авелэм тэ поможысарав, кай тэ каинпэ най и правильни, ай лэ бэзэхэстирэ мануша» (Матф. 9:12, 13). О Исусо жувэлас кадя, сар сытярэлас. Кала ек манушни вихаладя лэстирэ пэрнэ пэстирэ ясвэнца, во обжыляпэ ласа ковлэс и простисардя лако бэзэх (Лука 7:37—50). О Исусо поможысардя ла самаритянкати паша хаинг тэ полэл о чачимос, хоть и ӷанэнас, кай вой андярэл билажаварди жызня (Иоан. 4:7, 17—19, 25, 26). Лэстэ дажэ исин право лэ Дэвлэстар тэ бирой и смэрть — само вэрыто лэ бэзэхэстири дила. И важ када во жундярэлас лэ манушэн — лэ муршэн и лэ жувлян, лэ бэятонэн и лэ взрослонэн (Матф. 11:5).
11. Васо лэ манушэнди, савэ андярэнас найлащи жызня, сас драго и вушэро паша Исусо?
11 Дажэ кодэлэ манушэнди, савэ андярэнас фартэ найлащи жызня, сас драго и вушэро паша Исусо. Во полэлас и жалуияс лэн. Кацавэ мануша на даранас тэ поджан каринг лэстэ (Лука 15:1, 2). Кала о Исусо диқэлас, кай вонэ патян андэр лэстэ, во дэлас дума пала лэндэ лашэ алавэса и обжаласпэ лэнца ковлэс (Лука 19:1—10). Во драго сыкадя, саво дэ одяло лэско Дад (Иоан. 14:9). Лэ Исусостири дума и дила драго доԥэнэнас, кай лэско жалуимаско и одяло Дад любий лэ мирос и камэл тэ поможый кажнонэ манушэсти тэ бирой о бэзэх. Лэ Дэвлэско Шаво андярэлас пэс лэ манушэнца кадя, кай вонэ камэнас тэ парудён и тэ ашэн лэстирэ ученикоря (Лука 5:27, 28).
12. Сости о Исусо камэлас тэ сытярэл лэ учениконэн, кала росԥэнэнас пала пэстири смэрть?
12 О Исусо ӷанэнас, со лэс аштярэл англэ. Най еқвар во ԥэнэнас пэстирэ учениконэнди, кай лэс придэна и казнина по столбо (Матф. 17:22; 20:18, 19). Во ӷанэнас, кай через лэстири смэрть о бэзэх парашэла тэ авэл, сар и ԥэнэнас о Иоано Крестителё и лэ Дэвлэстирэ особи мануша. Кадяжэ о Исусо сытярэлас, кай через пэстири смэрть во пашарэла каринг пэстэ «само разнонэ манушэн» (Иоан. 12:32). Если лэ бэзэхэстирэ мануша лэна тэ патян андо Исусо и тэ жан лэстирэ дромэса, вонэ лэна тэ уӷодин лэ Иеговасти. И тоди вонэ парашэна тэ авэн «лэ бэзэхэстирэ раборя» (Римо 6:14, 18, 22; Иоан. 8:32). Кочай о Исусо на даралас и сас смило, кала лэсти прижыляпэ тэ отдэл пэстири жызня (Иоан. 10:17, 18).
13. Сар муля о Исусо и со када росԥэнэн амэнди пала Иегова? (Кадяжэ диқэн и картинка.)
13 Лэ Дэвлэстирэ Шавэс придя лэско пашутно друӷо. Лэ Исусос схутилдэ, лэстар линэ тэ приасанпэ и дошалярдэ андэ кода, со во на стердя. Потом лэсти виандярдэ смэртно приӷоворо и фартэ мучисардэ. И халавдэ андярдэ лэс тэ казнин и примардэ лэстирэ вас и пэрнэ каринг о столбо. О Исусо вся када састэс виритярдя. Но сас кодэва, касти сас инке май ԥарэс. Када о Иегова. Вся сас андэ лэстирэ вас, и во моӷ вся тэ тердярэл. Но во када на стердя. Васо? Васо амаро любящё Дад кадя пэс андярдя? Если тэ ԥэнас еқэ алавэса — через и любовь. Екжэно о Исусо ԥэндя: «О Дэл фартэ любий лэ мирос и важ када отдя пэстирэ особенонэ Шавэс, кай кажно, ко патял андэр лэстэ, тэ на хасарэл и жызня, ай тэ жувэл вечно» (Иоан. 3:16).
Через лэ Исусостири смэрть лэ Иеговасти сас фартэ ԥарэс по ди, но во жыля пэ када, кай тэ спасый амэн лэ бэзэхэстар и ла смэртятар (Диқэн о абзацо 13.)
14. Со амэ полас через лэ Исусостири жэртва?
14 Со фартэ драго доԥэнэн лэ Исусостири жэртва? О Иегова любий лэ Адамостирэ и ла Еватирэ бэятонэн. Кадэя жэртва сыкавэл, кай о Иегова глабочка пала тутэ. Во отдя само кучутно, со лэстэ сас, — пэстирэ Шавэс, савэс во фартэ любий. Амарэ Дэвлэстэ росшындёлас оди, но во сас ӷотово када тэ пэрэандярэл, кай тэ спасый тут лэ бэзэхэстар и ла смэртятар (1 Иоан. 4:9, 10). Да, во фартэ камэл тэ поможый кажнонэсти андар мэндэ тэ борийпэ лэ бэзэхэса и тэ бирой лэс!
15. Со амэ трэбуй тэ терас, кай амарэ бэзэха тэ простинпэ через и особо цэмин, сави потиндя о Исусо?
15 Кала о Дэл отдя пэстирэ Шавэс пэ смэрть, во потиндя бари цэмин, и акана лэстэ исин возможность тэ простий амарэ бэзэха. Но кай о Дэл амэн тэ простий, амэ трэбуй дэсо тэ стерас. Пала со жал и дума? О Иоано Крестителё и о Исусо Христос ԥэндэ пала када: «Каинпэ, важ кода кай о небесно Царство пашэ!» (Матф. 3:1, 2; 4:17). Вижал, если амэ па чачимастэ камас тэ борисавас лэ бэзэхэса и тэ ашас май пашэ каринг амаро любящё небесно Дад, амэнди трэбуй тэ каисавас. Но со када значит тэ каисавас? И, если каисавас, сар амэ можэм тэ радосарас лэ Иеговас, хоть андар мэндэ исин бэзэх? Андэ авэр статья важ и изучения амэ даса ответоря пэ кадэла вопросоря.
ДИЛИ 18 Наис важ о выкупо
a ПОЯСНЕНИЯ. Андэ Библия о алав «бэзэх» дэкала можэт тэ пэрэдэл о гиндо пала неправильно дила: кала амэ на жувас или на приритярдювас лэ Иеговастирэ законости. Но кадяжэ кадэва алав можэт тэ сыкавэл, кай о мануш найидеально, или бэзэхэско, важ кода кай жыля лэ Адамостар. Через о бэзэх, саво пэрэдэлпэ кажнонэ манушэсти, вся о миро мэрэл.
