1, 2. а) Сар о Иегова диқэл пэ кодэла, ко на парашэл тэ андярэл пэс неправильно и на каийпэ? б) Со о Иегова аштярэл кодэлэндар, ко стердя бэзэх?

 О ИЕГОВА на здрымыдий амэн и на ԥандавэл и яқа по бэзэх (Пс. 5:4—6). О Дэл камэл, кай амэ тэ ритярас лэско правильно законо, саво во запистросардя андэ Библия. Канешно, о Иегова ӷанэн, кай амэ най идеальни, и во на аштярэл, кай амэндэ вижала тэ кандас лэс андэ вся (Пс. 130:3, 4). Но во на домэкэл, кай и найлашэ мануша «[тэ] пользуюца кодэлэса, кай лэстэ баро ковло ди, и через када... тэ виправинпэ, кай бесовестно пэс андярэн» (Иуда 4). Андэ Библия ԥэнэнпэ, кай кацавэ мануша похындёна, кала авэла лэ Дэвлэстири война Армагедоно (2 Пёт. 3:7; Тайна 16:16).

² Но о Иегова на камэл, кай варико тэ хасарэл и жызня. Сар амэ уӷанглям анда авэр статьи анда кадэя серия, андэ Библия ворта ԥэнэнпэ, кай «во камэл, кай всаворэ тэ каинпэ» (2 Пёт. 3:9). И барэдэр ԥрала лэн примеро лэ Дэвлэстар и ковлэс поможын кодэлэнди, ко стердя бэзэх, кай вонэ тэ каинпэ и тэ ринпэ каринг о Иегова. Но най всаворэ взвинпэ (Ис. 6:9). Дэсавэ на парашэн тэ андярэн пэс неправильно, хоть и ԥрала най еқвар старыинпэ лэнди тэ поможын. Со тоди трэбуй тэ терас?

«ДУРЯРЭН ПЭСТАР КОДЭЛЭС, КО ТЕРЭЛ НАЙЛАШЫМОС»

3. а) Сар пистромэ андэ Библия, со трэбуй тэ стерас кодэлэнца, ко на каийпэ? б) Васо можно тэ ԥэнэс, кай кодэва, ко стердя бэзэх и на каисайля, екжэно витидя тэ авэл дурярдо лэ ӷуртостар?

³ Если кодэва, ко стердя бэзэх, на каийпэ, лэ барэдэрэ ԥралэнди прижалапэ кати тэ стерэн кадя, сар пистромэ андо  1 Каринфо 5:13: «Дурярэн пэстар кодэлэс, ко терэл найлашымос». Вонэ прилэн решэния тэ дурярэн кацавэ манушэс лэ ӷуртостар. Можно дажэ тэ ԥэнэс, кай кацаво мануш екжэно када витидя. Во хал кода, со екжэно садисардя (Гал. 6:7). Васо амэ можэм кадя тэ ԥэнас? Важ кода кай и барэдэр ԥрала най еқвар старыинаспэ лэсти тэ поможын, но во на камэлас тэ приашундёл (2 Цар. 17:12—15). Пэстиря диласа во сыкадя, кай на камэл тэ кандэл лэ Иеговас и тэ жувэл па лэстирэ законоря (Втор. 30:19, 20).

4. Васо и барэдэр ԥрала ԥэнэн пэ собрания, кай о мануш, саво на каисайля, будэр най лэ Иеговаско свидетелё?

⁴ Кала кодэва, ко стердя бэзэх и на каисайля, сас дурярдо лэ ӷуртостар a, ек анда барэдэр ԥрала ԥэнэн пэ собрания, кай кадэва мануш будэр най лэ Иеговаско свидетелё. Кадя терэлпэ най кай тэ потпусавэн лэ манушэс. Када трэбуй, кай вся о ӷурто тэ стерэл кадя, сар пистромэ андэ Библия, — будэр тэ на сԥандёл кадэлэ манушэса и дажэ тэ на хал лэса (1 Кр. 5:9—11). О Иегова найевья ԥэндя кадя тэ стерэн. О апостало Павло пистросардя: «Дажэ набут опара ваздэл вся о хумэр» (1 Кр. 5:6). Со авэла, если о мануш, саво на каисайля, ашэлапэ андо ӷурто? Када можэт тэ змарэл аврэ христианонэн па правильно дром и тоди лэнди авэла май ԥарэс всаворэ́ одеса тэ ритярэн лэ Иеговаско законо (Прит. 13:20; 1 Кр. 15:33).

5. Сар амэ трэбуй тэ диқас по мануш, саво сас дурярдо лэ ӷуртостар, и васо?

⁵ Ай сар амэ трэбуй тэ диқас по ԥрал b, саво сас дурярдо лэ ӷуртостар? Канешно, амэ будэр на ласа тэ проандярас лэса и время. Но амэнди трэбуй тэ сэрас: хоть во сар бакроро, саво хасарделя, када на сыкавэл, кай лэстэ нинай дром палпалэ. О бакроро, саво одмарделя лэ стадостар, можэт тэ рийпэ. Важно тэ сэрас, кай кадэва мануш отдя пэстири жызня лэ Иеговасти. Да, акана во на жувэл кадя, сар солахадя лэ Иеговасти, и кадэлэса цырдэл бида пэ пэско шэро (Иез. 18:31). Но амэ ӷанас, кай лэстэ инке исин время и кай о Иегова — одяло и жалуимаско Дэл, важ када амэ надеисавас, кай кадэва мануш рияпэ. Со терэн и барэдэр ԥрала, кай тэ поможын кодэлэсти, ко сас дурярдо лэ ӷуртостар?

САР ПОМОЖЫН И БАРЭДЭР ԤРАЛА?

6. Со лэна тэ терэн и барэдэр ԥрала, кай тэ поможын лэ манушэсти тэ рийпэ андо ӷурто?

⁶ Если о мануш сас дурярдо лэ ӷуртостар, сыкавэл када, кай всаворэ лэс ашадэ и акана лэсти екжэнэсти трэбуй тэ виарақэл о дром палпалэ каринг о Дэл? Канешно най! Кала лэ барэдэрэ ԥралэнго камитето прилэл решэния тэ дурярэл лэ ӷуртостар кодэлэс, ко на каийпэ, кадэла ԥрала кадя жэ росԥэнэна лэсти, со во трэбуй тэ стерэл, кай тэ рийпэ андо ӷурто. Но када инке най вся. И барэдэр ԥрала кадя жэ моӷут тэ ԥэнэн лэсти, кай камлоп тэ диқэнпэ лэса через дэсавэ шона, кай тэ уӷанэн, паруделя лэско гиндо чи най. Если о мануш най против, вонэ диқэнапэ лэса и ковлэс ԥэнэна лэсти тэ каийпэ и тэ рийпэ. И дажэ если каринг кодэя время кодэва мануш на парудёла, и барэдэр ԥрала всаек лэна тэ пристон зор, кай упалэ тэ диқэнпэ лэса через дэсави время и тэ поможын лэсти тэ каийпэ.

7. Сар и барэдэр ԥрала, кадя жэ сар о Иегова, жалуин кодэлэн, ко дурярдо лэ ӷуртостар? (Иеремия 3:12).

⁷ И барэдэр ԥрала старыинпэ тэ терэн кадя, сар о Иегова, саво жалуий кодэлэн, ко дурярдо лэ ӷуртостар. Например, погиндосар, сар во обжаласпэ пэстирэ народоса  андэ дэлмутни время. Во на аштярэлас, кала и израильтяноря, савэ зжылэ па правильно дром, екжэнэ обгиндонапэ и бандёна каринг лэстэ. Во пэрво бандёлас каринг лэндэ. Во бишалэлас лэндэ пэстирэ особонэ манушэн, хоть инке совсем на дицолас, кай вонэ каинпэ и парудён. Кадяжэ андэ дуйто статья важ и изучения андэ кадэва журнало, амэ адиносардямас пала лэ Дэвлэско особо мануш, савэс ақарэнас Осия. О Иегова ԥэндя лэсти тэ простий пэстиря хулая́ и тэ залэл ла палпалэ, хоть вой идоси андярэлас пэс неправильно (Ос. 3:1). Кадя о Дэл сыкадя пэстирэ народости, кай во жалуий лэн анда вся ди (Мал. 3:7). И барэдэр ԥрала лэн примеро лэ Иеговастар: вонэ анда вся ди камэн, кай о мануш, саво стердя бэзэх, тэ рийпэ, и на мишыин лэсти када тэ стерэл. (Проадинон Иеремия 3:12.)

8. Сар о примеро пала шаво, саво «хасарделя и рисайля», поможый тэ полас, сар о Иегова диқэл пэ кодэла, ко лэс ашадя? (Лука 15:7).

⁸ Погиндосар пала лэ Исусоско примеро важ о шаво, саво «хасарделя и рисайля». Амэ дям дума пала када андэ дуйто статья важ и изучения. Кала о дад дурал додиқля, кай лэско шаво рийпэ цэрэ, во «прастая каринг лэстэ, обля лэс и чуминдя» (Лука 15:20). Шув сама: о дад на ля тэ аштярэл, пока лэско шаво поджала каринг лэстэ и лэла тэ мангэл тэ простий лэс. Най, во стердя кода, со пэ лэско ҭан стердоп любо лашо дад, — во прастая каринг пэско шаво, важ кода кай любияс лэс. Кадэва примеро драго сыкавэл, со по ди кай о Иегова, кала во диқэл пэ кодэла, ко змарделя па правильно дром. И барэдэр ԥрала старыинпэ тэ сытён лэстар и тэ авэн кацавэ жэ, сар во. Вонэ камэн, кай кажно бакроро, саво хасарделя, тэ рийпэ цэрэ (Лука 15:22—24, 32). И кала о мануш, саво стердя бэзэх, каийпэ и рийпэ, тоди лошавэн всаворэ: о Иегова, о Исусо, и анӷелоря и вся о ӷурто! (Проадинон Лука 15:7.)

9. Со о Иегова ԥэнэн кодэлэнди, ко стердя бэзэх?

⁹ Со амэ уӷанглям? О Иегова на домэкэл, кай андо ӷурто тэ ашэнпэ кодэла, ко андярэл пэс неправильно и на каийпэ. Но када на сыкавэл, кай во одбанделя лэндар и будэр на старыийпэ тэ поможый лэнди. О Дэл камэл, кай вонэ тэ ринпэ каринг лэстэ. Акэ со во ԥэнэн андо Осия 14:4: «Мэ исцэлисарава лэн и вонэ на лэна тэ придэн ман, лава тэ любисарав лэн всаворэ́ одеса, важ кода кай мэ будэр на холявав». Савэ дэ састэ алава! Кадэла алава дэн зор лэ барэдэрэ ԥралэнди, кай вонэ тэ додиқэн любо маменто, саво сыкавэла, кай о мануш лэл тэ каийпэ. Ай кодэлэсти, ко стердя бэзэх, и алава анда Осия 14:4 поможын тэ полэл, кай о Иегова лэс любий и аштярэл.

10, 11. Сар и барэдэр ԥрала пристон вся о зор, кай тэ поможын кодэлэнди, ко дэлмут сас дурярдо лэ ӷуртостар?

¹⁰ Ай со, если прожылэ ужэ бут бэрша, сар о мануш сас дурярдо лэ ӷуртостар? Можэт, во дэлмут парашэля тэ андярэл пэс неправильно или дажэ на сэрэл, саво бэзэх во стердя. Скати бы тэ на прожал время, и барэдэр ԥрала пристона вся о зор, кай тэ виарақэн кажнонэ кацавэ манушэс и тэ диқэнпэ лэса. Кала и ԥрала лэна тэ дэн дума лэса, вонэ дажэ моӷут тэ мангэнпэ вместе лэса и анда ди тэ ԥэнэн лэсти, кай во тэ каийпэ и тэ рийпэ андо ӷурто. Канешно, если о мануш бут время на сас андо ӷурто, во фартэ дуреля лэ Дэвлэстар. Важ када, если во камэл тэ рийпэ, и барэдэр ԥрала моӷут тэ ԥэнэн лэсти, кай варико тэ адиной вместе лэса и Библия, хоть во инке и на рисайля андо ӷурто. Если во не против, и барэдэр ԥрала витидэна лэ ԥралэс или ла ԥья, савэ лэна лэса тэ адинон и Библия.

 ¹¹ О Иегова фартэ глаба пала мануша. И барэдэр ԥрала камэн тэ сытён лэстар, важ када вонэ старыинпэ тэ виарақэн всаворэн, ко дуреля лэ Иеговастар, и поможын лэнди тэ патян, кай вонэ инке моӷут тэ ринпэ. Сар кати о мануш каияпэ и парашэла тэ терэл неправильно, во сразу жэ можэт тэ авэл рисардо андо ӷурто (2 Кр. 2:6—8).

12. а) Кала лэ барэдэрэ ԥралэнди трэбуй тэ авэн со май осторожни? б) Васо амэнди нащи тэ гиндосарас, кай через дэсавэ бэзэха о Иегова никала на авэла одяло каринг о мануш? (Кадяжэ диқэн и сноска.)

¹² Андэ дэсавэ ситуацыи англа кода, сар тэ рин лэ манушэс андо ӷурто, лэ барэдэрэ ԥралэнди трэбуй тэ авэн со май осторожни. Например, о мануш сас дошало, кай  жэстоко обжаласпэ лэ бэятонэнца, сытярэлас лэ хохаимасти или хытрияса стердя кадя, кай тэ розжалпэ пэстирэ хуласа или ла хулаяса. Тоди лэ барэдэрэ ԥралэнди трэбуй драго тэ полэн, кай о мануш каийпэ па чачимастэ (Мал. 2:14; 2 Тим. 3:6). И барэдэр ԥрала трэбуй тэ фэрин лэ ԥралэн и лэ ԥэян андо ӷурто. Но кадяжэ лэнди трэбуй тэ сэрэн, кай о Иегова прилэла палпалэ любонэ манушэс, саво анда ди каисайля и парашэля тэ терэл неправильно. Канешно, если о мануш обжыляпэ аврэнца жэстоко и хытрияса, и барэдэр ԥрала инке май внимательно лэна тэ роздиқэн лэстири дила. Но лэнди нащи тэ гиндон, кай каринг кацаво мануш о Иегова никала на авэла одяло (1 Пёт. 2:10) c.

САР МОЖЭТ ТЭ ПОМОЖЫЙ О ӶУРТО?

13. Сар амэ андярас пэс кодэлэнца, касти сас дино совето тэ парудёл, и кодэлэнца, ко парашэля тэ авэл лэ Иеговаско свидетелё?

¹³ Сар амэ роздиқлям андэ кодэя статья, дэкала пэ собрания ек анда барэдэр ԥрала можэт тэ ԥэнэн, кай лэ манушэсти сас дино совето тэ парудёл. Если амэ када ашунаса, амэ на ласа тэ дурювас кацавэ манушэстар, важ кода кай ӷанас, кай во каисайля и парашэля тэ андярэл пэс неправильно (1 Тим. 5:20). Во вся кадя жэ ашэлпэ андо ӷурто и лэсти трэбуй, кай и ԥрала и ԥэя тэ подритярэн лэс (Евр. 10:24, 25). Но кала о барэдэр ԥрал пэ собрания ԥэнэн, кай варико будэр най лэ Иеговаско свидетелё — када ужэ совсем авэр дила. Амэ на вэдисавас кацавэ манушэса и дажэ на бэшас лэса тэ хас (1 Кр. 5:11).

14. Сар о христианино лэла тэ андярэл пэс кодэлэнца, ко сас дурярдо лэ ӷуртостар? (Кадяжэ диқэн и картинка.)

¹⁴ Сыкавэн и алава анда 1 Каринфо 5:11, кай амэнди трэбуй тэ обнашас лэ манушэс, саво сас дурярдо лэ ӷуртостар? Най. Канешно, амэ на ласа тэ сԥандювас лэса и тэ проандярас лэса и время. Но кай кажно христианино исин пэстири совесть, сави сытярди па Библия, и во можэт тэ прилэл решения тэ ақарэл кацавэ манушэс пэ собрания. Можэт, када варико анда лэско родо  или кодэва, каса во сас фартэ пашэ. Ай если во авэла пэ собрания, сар амэнди трэбуй пэс тэ андярас? Варикала амэ на линоп лэса дажэ тэ здоровкисавас. Но и андэ кадэя ситуацыя само ӷлавно — кода, со лэ христианиности потԥэнэн лэстири совесть, сави сытярди па Библия. Дэсавэ моӷут тэ решын тэ поздоровкаюца лэ манушэса и тэ ԥэнэн лэсти дуй-трин приятни алава. Но амэ на ласа бут тэ дас дума кадэлэ манушэса или варисар инке тэ проандярас лэса и время.

15. Пала кастэ жал и дума андо 2 Иоано 9—11? (Кадяжэ диқэн и рамка  «О Иоано и о Павло пистронас пала ек бэзэх или пала разно?»)

¹⁵ Варико можэт тэ пушэл: «Хэба андэ Библия на ԥэнэнпэ, кай кодэва, ко здоровкиийпэ кацавэ манушэса, ашэл дошало вместе лэса андэ лэстири найлащи дила?» (Проадинон 2 Иоано 9—11.) Если тэ адиносарас вся лэ Иоаноско дуйто письмо, то амэ додиқаса, кай андэ кадэла стихоря и дума жал пала кодэла, ко сытярэл лэ хохаимасти и ко подмарэл аврэн тэ терэн кода, со жал против Библия (Тайна 2:20). Важ када, если о мануш на парашэл сытярэл най лэ чачимасти, ай кодэлэсти, со жал против лэ Дэвлэско законо, и барэдэр ԥрала на лэна тэ диқэнпэ лэса. Канешно, амэ надеисавас, кай о мануш каияпэ. Но пока во када на стердя, амэ на ласа тэ здоровкисавас лэса и тэ ақарас пэ собрания.

СТАРЫСАВАС ТЭ АВАС ОДЯЛЭ И ТЭ ЖАЛУИСАРАС КАДЯ ЖЭ, САР О ИЕГОВА

16, 17. а) Со о Иегова аштярэл кодэлэндар, ко стердя бэзэх? (Иезекииль 18:32). б) Сави дила и барэдэр ԥрала терэн вместе лэ Иеговаса?

¹⁶ Со амэ уӷанглям анда кадэла панч статьи? О Иегова на камэл, кай варико тэ хасарэл и жызня. (Проадинон Иезекииль 18:32.) Во камэл, кай кодэла, ко терэл бэзэх, тэ примиринпэ лэса (2 Кр. 5:20). Акэ васо о Иегова никала на парашэлас тэ взвийпэ пэстирэ манушэндэ, савэ ашадэ лэс, кай вонэ тэ каинпэ и тэ ринпэ каринг лэстэ. Лэ барэдэрэ ԥралэнди випэля бари бах тэ терэн ек дила лэ Иеговаса — тэ поможын кодэлэнди, ко стердя бэзэх, тэ каинпэ (Римо 2:4; 1 Кр. 3:9).

¹⁷ Кати погиндосар, сар всаворэ лошавэн по небо, кала о мануш, саво стердя бэзэх, каийпэ! Кажно разо, кала ек бакроро, саво хасарделя, рийпэ андо ӷурто, лэ Иеговаско ди барёл радостятар. Кала амэ инке май драго полас, саво дэ одяло амаро небесно Дад, сар во жалуий амэн и здиқэл пар мэндэ па пэско баро ковло ди, тоди амэ любисарас лэс инке май фартэ (Лука 1:78).