И 70 ученикоря, савэн о Исусо бишалдясас тэ росԥэнэн пала Дэл, на сас пэ Барэ Хуластири мисяйля, кала справинас ла пэрво разо. Но када на сыкавэл, кай вонэ будэр на сас лашэ андэ лэ Исусостирэ яқа или кай вонэ ашадэ лэс. Просто кодэва вэчэро о Исусо камэлас тэ проандярэл кати пэстирэ апосталонэнца.

Лэ Исусости сас уӷодни и 12 апосталоря, и 70 ученикоря. Спэрва анда бут ученикоря, во витидя 12 муршэн, пэ савэ ля тэ ԥэнэн апосталоря (Лука 6:12—16). Кала о Исусо сас андэ Галилея, во «ақардя лэ 12 учениконэн» и «бишалдя лэн тэ росԥэнэн пала лэ Дэвлэско Царство и тэ исцэлин» (Лука 9:1—6). Ӷэт май интя, ужэ андэ Иудея, во «витидя инке 70 учениконэн и бишалдя май англал пэстар по дуй мануш» (Лука 9:51; 10:1). Кадя андэ разни ҭана кай о Исусо появинаспэ и ученикоря, савэ росԥэнэнас пала лэстэ.

И евреёря, савэ ашэнас лэ Исусостирэ ученикоря, вся кадя жэ кажно бэрш справинас и Патради. Наверно, вонэ када терэнас пэстирэ ереса (Исх. 12:6—11, 17—20). Кала поджалас и время, кай о Исусо тэ отдэл пэстири жызня, во лэ апосталонэнца авеля андо Иерусалимо. Но во на мангля всаворэ́ пэстирэ учениконэн анда Иудея, Галилея и Перея тэ стидэнпэ еқэҭанэ лэса, кай тэ справин и Патради вмести. Сар амэ ӷанас, о Исусо камэлас тэ проандярэл кадэва вэчэро кати лэ апосталонэнца. Во ԥэндя лэнди: «Мэ камлэм тэ хав кадэва ла Патрадяко хамос тумэнца жы каринг и ԥари время, сави мандэ авэла» (Лука 22:15).

Васо о Исусо камэлас тэ проандярэл кадэва вэчэро найбарэ ӷуртоса? Ӥто во трэбуй сас тэ отдэл пэстири жызня, сар «лэ Дэвлэско Бакроро, саво залэла ла люмако бэзэх» (Иоан. 1:29). Во трэбуй сас тэ стерэл када андо Иерусалимо. Андэ кадэва форо лэ Дэвлэстирэ мануша ужэ бут викоря анэнас и жэртвы. Кала и израильтяноря справинас и Патради, о бакроро поможыяс лэнди тэ сэрэн, кай о Иегова виандярдя лэн анда египицко плено. Но лэ Исусостири жэртва сыкавэлас пэ бутэстэ май бут. Вой дэлас свобода лэ бэзэхэстар и ла смэртятар (1 Кр. 5:7, 8). Инке вой дэлас лэ апосталонэнди возможность, кай лэндар тэ залэлпэ о христианско ӷурто (Еф. 2:20—22). Интересно, кай и стина круӷом нэво Иерусалимо тердёлас пэ «12 бара, пэ савэ сас пистромэ, сар ақарэн лэ Бакрорэстирэ 12 апосталонэн» (Тайна 21:10—14). Да, о Дэл загиндосардя, кай и апосталоря, савэ на ашадэ лэс, тэ стерэн особено дила. Кочай о Исусо и камэлас, кай вонэ тэ авэн паша лэстэ, тоди кала во справияс и послиднё Патради и лэ Барэ Хуластири мисяйля.

Чаче, и 70 ученикоря и авэр мануша, савэ андярэнас лэ Исусостири время, на сас пэ пэрво лэ Барэ Хуластири мисяйля. Но всаек вой андя и важ лэндэ баро лашымос. Если вонэ на парашэлэ тэ кандэн лэ Иеговас, тоди ӷэт май интя о Иегова витидя лэн свынтонэ зорэса. И пэр лэндэ тожэ ля тэ пэрэл и солах пала Царство, сави о Исусо дя лэ апосталонэнди андэ кодэва вэчэро (Лука 22:29, 30).