1, 2. а) Со сас андэ Иудея, кала о апостало Павло пистросардя о Письмо лэ евреёнэнди? б) Васо лэ Павлоско письмо сас вовремя?

 КАЙ и христианоря, савэ жувэнас андо Иерусалимо и андэ Иудея, сас фартэ бут ԥаримос. Почти сразу посли лэ Исусостири смэрть, лэ ԥралэн и лэ ԥэян анда ӷурто, саво сас найдэлмут стидо, линэ жэстоко тэ ӷонин (Дила 8:1). Ай варикай через 20 бэрш заляпэ баро боқалимос, и через када бут христианоря ашэлэ чорорэ (Дила 11:27—30). Но андэ дэсавэ бэрша на сас кадя дэ бут ԥаримос. Андэ кацави спокойно время, варикай андо 61 бэрш н. э., о Иегова пэстирэ зорэса побудисардя лэ Павлос тэ пистрой о письмо лэ ԥралэнди и лэ ԥэянди. Кадэва письмо сас фартэ вовремя, важ кода кай поможысардя лэнди тэ авэн ӷотови каринг кода, со лэн аштярэлас англэ.

² Васо лэ Павлоско письмо сас фартэ вовремя? Пашолас и бари бида, пала сави дэлас дума о Исусо. Трэбуй сас тэ розмарэн о Иерусалимо (Лука 21:20). Канешно, ни о Павло, ни и ԥрала анда Иудея на ӷанэнас точно, кала када авэла. Но и христианоря анда ӷурто моӷли андэ спокойно время тэ подӷотовятся каринг када, кай тэ ашэнпэ састэ. Кадяжэ лэнди трэбуй сас тэ састярэн пэско патяимос. Лэ Павлоско письмо поможысардя лэнди андэ када (Евр. 10:25; 12:1, 2).

3. Васо о Письмо лэ евреёнэнди поджал важ и христианоря андэ амари время?

³ Англэ амэн аштярэл пэ бутэстэ май бари бида, чем кодэя,  сави сас андо пэрво вико (Матф. 24:21; Тайна 16:14, 16). Важ када давайте роздиқаса и советоря, савэ о Иегова дя лэ христианонэнди андэ Иудея, и уӷанаса, сар вонэ поможына адес.

«ЛАСА ТЭ ТЕРАС ВСЯ, КАЙ ТЭ АШАС ДЭВЛИКУНЭ И САСТЭ АНДЭ ВЕРА»

4. Саво ԥаримос сас кай и христианоря андэ Иудея? (Диқэн кадяжэ и картинка.)

⁴ Лэ христианонэнди андэ Иудея жувэласпэ найвушэро. Бут бэрша и евреёря сас лэ Дэвлэско народо. О Иерусалимо сас особено форо важ лэндэ. Андэ кадэва форо правинас царёря, савэ сыкавэнас лэ Дэвлэстири власть. Кадяжэ котэ тердёлас и қандири — када ӷлавно ҭан, кай тэлёнас лэ Иеговасти. Всаворэ кандинэ евреёря ритярэнас лэ Маисеёско законо и терэнас кадя, сар ԥэнэнас и барэдэра андэ вера. Андо законо сас пистромэ, со вонэ трэбуй тэ терэн андэ пэстири жызня. Андэр лэстэ сас пистромэ пала бут маменторя. Например, пала вопросоря: со тэ хан, сар тэ обжанпэ лэ манушэнца анда авэр народоря и сар тэ обшындён и мурш. Но посли лэ Исусостири смэрть лэ Маисеёско законо сас улино и будэр на трэбуй сас тэ анэн жэртвы. Лэ евреёнэнди, савэ ашэнас христианоря, трэбуй сас тэ парудён и тэ присытён тэ тэлён лэ Дэвлэсти па нэво порядко (Евр. 10:1, 4, 10). Дэсо анда када сас найвушэро тэ стерэн дажэ кацавэ христианонэнди, савэ сас састэ андэ вера, кацавэ, сар о апостало Пётро (Дила 10:9—14; Гал. 2:11—14). Ай инке и барэдэра андэ иудейско вера ӷонинас лэ христианонэн и тасавэнас пэр лэндэ через лэндири нэви вера.

5. Ко тасавэлас пэ христианоря?

⁵ Пэ христианоря анда Иудея тасавэнас дуе ригэндар. И барэдэра анда иудейско вера диқэнас пэ евреёря, савэ ашэлэ христианоря, сар пэ кодэла, ко придя пэстири вера. Ай дэсавэ пативалэ христианоря андо ӷурто ԥэнэнас, кай трэбуй тэ ритярэн лэ Маисеёско законо. Возможно, вонэ када терэнас, кай лэн тэ на ӷонин (Гал. 6:12).  Со поможысардя лэ христианонэнди тэ на парашэн тэ кандэн лэ Иеговас?

6. Каринг со о Павло побудисардя лэ ԥралэн и лэ ԥэян? (Евреёря 5:14—6:1).

⁶ Андэ пэско письмо о Павло побудисардя лэ ԥралэн и лэ ԥэян май драго тэ уӷанэн, со пистромэ андэ лэ Дэвлэско Алав. (Проадинон Евреёря 5:14—6:1.) Через и Еврейски Лила во сыкадя, васо и христианоря тэлён лэ Иеговасти май фэдэр, чем иудеёря a. О Павло камэлас, кай кадэла христианоря май бут тэ уӷанэн и драго тэ полэн о чачимос. Када поможыяс лэнди тэ росполэн и тэ отшон о хохаимос.

7. Саво ԥаримос амэндэ исин адес?

⁷ Сар и христианоря андо пэрво вико, амэ постояно ашунас и гиндоря, савэ на сжанпэ лэ Иеговастиря времяса. Амарэ вороӷоря на умэкэн ни ек возможность, кай тэ дошалярэн амэн. Например, кала и дума жал пала кода, со можэт тэ авэл кати машкар хулай и хулаи, амэ приритярдювас кодэлэсти, со пистромэ андэ Библия. Но амарэ вороӷоря ԥэнэн, кай када нэправильно и трэбуй тэ жувас па аврятэ, важ кода кай паруделя и время. Кода, сар адес гиндон и мануша, фартэ на зжалпэ кодэлэса, сар гиндой о Дэл (Прит. 17:15). Важ када амэнди важно тэ росполас, кай о чачимос, ай кай о хохаимос, и тэ на домэкас никасти тэ пэрэдаравэн амэн и тэ дурярэн лэ Иеговастар (Евр. 13:9).

8. Со поможыя амэнди тэ на парашас тэ ашас састэ андэ вера?

⁸ О Павло ԥэндя лэ евреёнэнди, кай вонэ тэ терэн вся, кай тэ авэн дэвликунэ и састэ андэ вера. Каринг лэско совето трэбуй тэ приашундювас и амэ. Трэбуй драго тэ розуӷанас, со ԥэнэнпэ андэ Библия, и тэ сытювас тэ гиндосарас кадя жэ, сар о Иегова. Када трэбуй тэ терас и посли кода, сар болделям — вся амари жызня. Скати бы амэ тэ на андярас лэ Иеговастири время, амэнди трэбуй кажно дес тэ адиносарас и Библия и май драго тэ розуӷанас, со ԥэнэнпэ андэр латэ (Пс. 1:2). Лашо ӷрафико важ и лично изучения Библии поможыя тэ састярас амаро патяимос. Имено пэ када о апостало Павло шутя сама андэ пэско письмо (Евр. 11:1, 6).

«АМЭ САР КОДЭЛА, КО ПАТЯЛ И ФЭРИЙ ПЭСТИРИ ЖЫЗНЯ»

9. Васо лэ христианонэнди андэ Иудея трэбуй сас састо патяимос?

⁹ Лэ христианонэнди андэ Иудея трэбуй сас састо патяимос, кай тэ пэрэжувэн и бида, сави ӥто пашолас (Евр. 10:37—39). О Исусо май данглал ԥэндя, кай о Иерусалимо опкружына и халавдэ. Тоди лэстирэ учениконэнди трэбуй авэла тэ нашэн андэ плая. Каринг када важно сас тэ приашундён всаворэ христианоря — кодэла, ко андо форо, и паша лэстэ (Лука 21:20—24). Андэ дэлмутни время, кала пэ мануша дэнас и вороӷоря, вонэ гарадёнас андо форо, кай сас састэ стины. Важ када здэласпэ найгодявэрнэс тэ нашэс андэ плая. Кай тэ кандэн лэ Исусос, трэбуй сас састо патяимос.

10. Каринг со трэбуй тэ побудий о састо патяимос? (Евреёря 13:17).

¹⁰ Кадяжэ лэ христианонэнди андэ Иудея трэбуй сас тэ патян лэ ԥралэнди, через савэ о Исусо ԥэнэнас лэ ӷуртости, со тэ терэн. Наверно, и барэдэр ԥрала ворта ԥэндэ, кала и сар трэбуй тэ нашэн. (Проадинон Евреёря 13:17.) О греческо алав, саво пэрэандярдо андэ Евреёря 13:17 сар «приашундёнпэ», сыкавэл, кай о мануш кандэл лэ  барэдэрэ ԥралэн най через кода, кай када трэбуй, ай важ кода, кай патял лэнди. Важ када лэ христианонэнди трэбуй сас тэ сытён тэ патян лэ барэдэрэ ԥралэнди инке жы каринг кода, сар тэ авэл и бари бида. Если вонэ терэнас када, кала сас спокойно, лэнди сас май вушэро тэ кандэн лэн и андэ ԥари время.

11. Васо амэндэ трэбуй тэ авэл састо патяимос?

¹¹ Амэндэ тожэ трэбуй тэ авэл састо патяимос. Андэ Библия ԥэнэнпэ, кай ӥто пашола и время кадэла люмати. Бут мануша кадэлэсти на приашундёнпэ. Вонэ дажэ асанпэ амэндар, кай амэ патяс андэ када (2 Пёт. 3:3, 4). Хоть анда Библия амэ ӷанас дэсавэ маменторя пала бари бида, бут со амэ инке на ӷанас. Амэндэ трэбуй тэ авэл састо патяимос, кай о сроко кадэла люмати пашола точно андэ кодэя время, сави стодя о Дэл. Ай инке, кай о Иегова никала на парашэла тэ заботийпэ пала амэндэ (Авв. 2:3).

12. Со поможыя амэнди тэ пэрэжувас и бари бида?

¹² Амэнди тожэ трэбуй май фартэ тэ патяс андэ кода, кай о Иегова дэл руковоцтво через «о кандино и годявэрно рабо» (Матф. 24:45). Кала авэла и бари бида, амэнди, возможно, тожэ авэла ԥэндо, со имено трэбуй тэ терас. Кандаса амэ или най? Па када дицола спасысаваса амэ чи най. Кода, со сас кай и христианоря андо пэрво вико, кала о Иерусалимо опкружысардэ, можэт тэ шолпэ пэ кода, со авэла англэ. Акана вой и время, кай май фартэ тэ патяс лэ ԥралэнди, савэн о Иегова стодя тэ диқэн пала пэско народо. Если амэ акана лэн на кандас, тоди хэба ласа амэ тэ кандас англэ?

13. Васо о совето анда Евреёря 13:5 сас тоди, кала када трэбуй?

¹³ И христианоря аштярэнас, кала и ԥрала лэнди ԥэнэна тэ нашэн андэ плая. Но андэ кодэя жэ время, пока вонэ аштярэнас, лэнди трэбуй сас тэ андярэн просто жызня и «тэ на здран пала ловэ». (Проадинон Евреёря 13:5.) Дэсавэ пар пэстэ полинэ, сар када тэ на дохан и тэ жувэн чорорэс (Евр. 10:32—34). И хоть варикала вонэ сас ӷотови варисостар тэ отԥэндён важ и лащи новость, ӷэт май интя дэсавэ линэ тэ надеинпэ пэ ловэ и мищимос. Но кала линоп тэ розмарэн о Иерусалимо, нисавэ ловэ лэнди на поможысардоп (Иак. 5:3). Если лэнго ди тэ авелоп приԥангло каринг о мищимос, тоди лэнди авелоп ԥарэс тэ ашавэн вся и тэ нашэн.

14. Сар о састо патяимос поможый правильно тэ диқас пэ ловэ и мищимос?

¹⁴ Если амэ патяс, кай о Иегова ӥто улэла кадэя найлащи люма, амэ на ласа тэ гиндосарас, кай само ӷлавно андэ жызня — када ловэ или мищимос. Кала авэла бари бида, и ловэ хасарэна пэстири цэмин. Андэ Библия ԥэнэнпэ, кай и мануша «вишона аврял вся пэско руп». Вонэ полэна, кай «ни о руп, ни о сомнак на спасыя лэн андо дес, кала о Иегова шола пэстири холи» (Иез. 7:19). Важ када на трэбуй тэ старысавас тэ захутилас всаворэ ловэ андэ люма. Фэдэр тэ андярас просто жызня. Канешно, и бути трэбуй, кай тэ проправарас пэс и пэско ери. Но амэ на камас тэ домэкас, кай и бути тэ тердёл сыста лэ Иеговастиря времяса андэ амари жызня. Авелоп найгодявэрнэс тэ заӷуляс андо вужылимос и тэ заԥэрас пэстири жызня мищимаса, саво на трэбуй. Кадяжэ нащи тэ домэкас, кай амаро ди тэ авэл приԥангло каринг кода, со амэндэ ужэ исин (Матф. 6:19, 24). Ӥто или ӷэт май интя кажнонэсти андар мэндэ прижалапэ тэ витидас — тэ надеисавас по Иегова или пэ пэско мищимос.

 «ТУМЭ ТРЭБУЙ ТЭ АШЭНПЭ САСТЭ»

15. Васо лэ христианонэнди андэ Иудея трэбуй сас тэ авэн састэ?

¹⁵ Лэ христианонэн андэ Иудея англэ аштярэлас ԥаримос, важ када лэнди трэбуй сас тэ авэн састэ (Евр. 10:36). Дэсавэ андар лэндэ па пэстири жызня ӷанэнас, со када, кала ӷонин и тасавэн. Но бут мануша ашэлэ христианоря тоди, кала сас спокойно. О Павло ԥэндя, кай всаворэ вонэ трэбуй тэ авэн ӷотови тэ пэрэандярэн инке май баро ԥаримос и дажэ, если авэла трэбуй, тэ мэрэн пала пэстири вера, сар када стердя о Христос (Евр. 12:4). Со май бут евреёря ашэнас христианоря, со май фартэ через када холятар заԥабонас авэр евреёря. Важ дэсавэ бэрша англа кода сар тэ пистрой о Письмо лэ евреёнэнди, о Павло авеля андо Иерусалимо. Котэ и мануша стидэпэ ӷуртоса и мангэнас, кай лэс тэ умарэн. Май бут чем 40 евреёря «доԥэнделэ между пэстэ и динэ солах, кай на хана и на пэна, пока на умарэна лэ Павлос» (Дила 22:22; 23:12—14). Сар амэ уӷанглям, и евреёря вэрыцынас всаворэн, ко ашэлэ христианоря. Но всаек лэ Дэвлэстирэ мануша трэбуй сас тэ стидэнпэ еқэҭанэ, кай тэ тэлён лэсти, тэ росԥэнэн и лащи новость и тэ састярэн пэско патяимос.

16. Сар о Письмо лэ евреёнэнди поможый правильно тэ диқас по ԥаримос? (Евреёря 12:7).

¹⁶ Со моӷло тэ поможый лэ христианонэнди андэ Иудея тэ виритярэн кода, кай пэр лэндэ тасавэнас? Лэнди трэбуй сас правильно тэ диқэн пэ када. О Павло ԥэндя, кай о Дэл можэт тэ домэкэл о ԥаримос, кай варисости тэ сытярэл лэ христианонэн. (Проадинон Евреёря 12:7.) Например, кала найвушэро, о мануш можэт варисо тэ парувэл андэ пэско характеро, кай май бут тэ шолпэ по Исусо. Если и христианоря тэ ритярдоп андо шэро, кай андо ԥаримос вонэ моӷут бутэсти тэ сытён, тоди лэнди авелоп май вушэро лэс тэ пэрэандярэн (Евр. 12:11).

17. Сости сытеля о Павло, кала лэс ӷонинас?

 ¹⁷ О Павло побудисардя лэ ԥралэн и лэ ԥэян састэс тэ пэрэандярэн о ԥаримос. Во ӷанэнас, пала со дэл дума. Варикала во екжэно ӷонияс лэ христианонэн, ай кала во патяя андо Исусо, лэс тожэ линэ тэ ӷонин. Лэ Павлостири жызня сас найвушэро (2 Кр. 11:23—25). Важ када во точно ӷанэнас, сар тэ ашэлпэ састо: трэбуй тэ надеийпэ по Иегова, ай най пэр пэстэ. О Павло анда ди ԥэндя: «О Иегова поможый манди, мэ на лава тэ дарав» (Евр. 13:6).

18. Со амэн аштярэл англэ и со амэ трэбуй тэ терас ужэ адес?

¹⁸ Адес дэсавэн анда амарэ ԥрала ӷонин. Сар амэ можэм лэн тэ подритярас? Тэ мангаспэ пала лэндэ и, кала исин возможность, тэ поможысарас лэнди пэ дила (Евр. 10:33). Андэ Библия ворта ԥэнэнпэ, кай «о миро лэла тэ ӷоний всаворэн, ко андярэл лэ Христостири лэ Исусостири время и ко камэл баря пативаса тэ терэл лэ Дэвлэстири дила» (2 Тим. 3:12). Кажно андар мэндэ трэбуй тэ авэл ӷотово, кай кацаво можэт тэ авэл и лэстэ андэ жызня. Давайте андэ вся тэ патяс лэ Иеговасти и тэ сэрас, кай во поможыя амэнди тэ пэрэандярас любо ԥаримос. О Дэл стодя время, кала улэла вся када пэстирэ манушэндар, савэ лэс на ашавэн (2 Фес. 1:7, 8).

19. Со поможыя амэнди тэ авас ӷотови каринг и бари бида? (Диқэн кадяжэ и картинка.)

¹⁹ Амэ ӷанас, кай лэ Павлоско письмо поможысардя лэ христианонэнди андо пэрво вико тэ авэн ӷотови каринг и бида. О Павло побудисардя лэ ԥралэн и лэ ԥэян май драго тэ розуӷанэн и Свынти Лила. Када поможысардоп лэнди май драго тэ росполэн и тэ отшон о хохаимос, саво одындярдоп лэн андэ риг. Кадяжэ лэнди трэбуй сас тэ састярэн пэско патяимос. Када поможысардоп лэнди сразу тэ терэн кадя, сар приԥэндя о Исусо, и тэ кандэн кодэлэн, кас во стодя тэ диқэл пала христианско ӷурто. Ай инке о Павло ԥэндя лэ христианонэнди тэ ашэнпэ састэ. Важ када лэнди трэбуй сас правильно тэ диқэн пэ пэско ԥаримос и тэ сэрэн, кай через лэстэ о Иегова можэт лэн варисости тэ сытярэл. Давайте и амэ приласа кадэла советоря. Тоди амэ на парашаса тэ кандас лэ Иеговас, пока на поджала о сроко кадэла люмати (Евр. 3:14).