1. Саво сындо ӥто аштярэл всаворэ́ манушэн пэ ԥув?

 АМЭ жувас андэ особо время! Ӥто о Исусо лэла тэ сындой всаворэ́ манушэн пэ ԥув. Во росԥэндя пэстирэ учениконэнди, со лэла тэ терэлпэ англа лэско сындо, андэ «послидни деса кадэла люмати» (Матф. 24:3). Лэ Исусостирэ алава запистромэ андэ 24 и 25 ӷлава Матфеё, ай кадяжэ андэ 13 ӷлава Марко и 21 ӷлава Лука.

2. Со амэ роздиқаса андэ кадэя статья и васо?

² О Исусо дя важни советоря через трин примероря. Во росԥэндя пала бакрэ и бузнэ, пала годявэрнэ и найгодявэрнэ щея и пала таланторя. Кадэла примероря поможын амэнди тэ полас, кай о Исусо лэла тэ сындой лэ манушэн па кода, сар вонэ пэс андярэн. Давайте роздиқаса, со росԥэндя о Исусо и савэ важни советоря во дя. Спэрва подам дума пала бакрэ и бузнэ.

БАКРЭ И БУЗНЭ

3. Кала о Исусо лэла тэ сындой лэ манушэн?

³ Андо примеро пала бакрэ и бузнэ о Исусо росԥэндя, пэр со во лэла тэ шол сама, кала лэла тэ сындой лэ манушэн. Во диқэла, прилинэ вонэ и лащи новость чи най? Подритярэнас вонэ лэстирэ ԥралэн чи най? (Матф. 25:31—46). Кадэва сындо авэла тоди, кала лэла тэ жал и «бари бида», ворта англа Армагедоно (Матф. 24:21). О пастухо отделий лэ бакрэн лэ бузнэндар. Точно кадя жэ и о Исусо лэла тэ розделий лэ манушэн пэ дуй рига. Пэ ек риг авэна мануша, савэ подритярэнас кодэлэн, кас о Дэл витидя свынтонэ зорэса, ай пэ авэр риг кодэла, ко на терэлас када.

4. Васо амэ патяс, кай о Исусо лэла тэ сындой лэ манушэн справедливо? (Исайя 11:3, 4). (Диқэн и картинка пэ обложка.)

 ⁴ Анда Библия дицол, кай екжэно о Иегова стодя лэ Исусос сындомареса. Важ када о Исусо лэла тэ сындой справедливо. (Проадинон Исайя 11:3, 4.) Ужэ адес во шол сама пэ кода, сар и мануша дэн дума, со терэн, пала со гиндон и сар вонэ обжанпэ лэстирэ ԥралэнца, савэ витидэ свынтонэ зорэса (Матф. 12:36, 37; 25:40). Кала авэла о сындо, о Исусо лэла точно тэ ӷанэн, ко подритярэлас лэстирэ ԥралэн, савэ правина лэса a. Сар амэ можэм тэ сыкавас, кай подритярас лэн? Ек анда важни маменторя — када вмести лэнца тэ росԥэнас пала Дэл. Кодэла, ко кадя терэн, авэна прижанглэ найдошалэнца, и лэндэ авэла возможность тэ жувэн вечно пэ ԥув (Матф. 25:46; Тайна 7:16, 17). Сави дэ лащи наӷрада! Если вонэ на парашэна тэ кандэн лэ Дэвлэс андэ бари бида и посли латэ, тоди лэнго алав ашэлапэ андэ ла жызняко лил (Тайна 20:15).

5. Савэ советоря исин андо примеро пала бакрэ и бузнэ? Касти кадэла советоря анэн лашымос?

⁵ Никала на ашав лэ Иеговас. Лэ Исусоско примеро пала бакрэ и бузнэ май бут поджал каринг кодэла, ко лэла тэ жувэл пэ ԥув. Сар вонэ моӷут тэ сыкавэн пэско патяимос? Када дицола па кода, если вонэ поможын лэ Христостирэ ԥралэнди тэ роспэнэн важ о Дэл и кандэн годявэрнэ и кандинэ рабос (Матф. 24:45). Но и христианоря, савэ надеинпэ тэ жувэн по нэбо, тожэ трэбуй тэ приашундён каринг о совето анда кадэва примеро. Васо? Важ кода кай о Исусо внимательно диқэл пэр лэндэ: со вонэ дэн дума, со терэн и пала со гиндон. Вонэ тожэ трэбуй тэ на парашэн тэ кандэн лэ Иеговас. Важ лэндэ о Исусо росԥэндя инке дуй примероря. Вонэ запистромэ андэ 25 ӷлава Матфеё. Ек андар лэндэ — пала годявэрнэ и найгодявэрнэ щея. Подам дума пала кадэва примеро.

ГОДЯВЭРНЭ И НАЙГОДЯВЭРНЭ ЩЕЯ

6. Васо пэ панч щея о Исусо ԥэндя, кай вонэ годявэрнэ? (Матфеё 25:6—10).

⁶ О Исусо росԥэндя примеро пала дэш щея, савэ вижылэ тэ встречают лэ тэрнэс (Матф. 25:1—4). Вонэ всаворэ патянас, кай вмести лэса попэрэна пэ ябьявицко мисяйля. О Исусо ԥэндя, кай сас панч годявэрнэ щея, ай панч — най. И годявэрнэ драго подӷотовились и сас внимательни каринг вся. Вонэ сас ӷотови тэ аштярэн лэ тэрнэс, скати када трэбуй авэла. Если во тэ заритярделоп и тэ авелоп фартэ позно, вонэ линэ пэса лампы и дажэ бутылочки лэ вулееса. (Проадинон Матфеё 25:6—10.) Кала авеля о тэрно, и годявэрнэ щея жылэ лэса пэ ябьявицко мисяйля. Точно кадя жэ и избрани христианоря трэбуй тэ авэн внимательни и тэ на ашавэн лэ Иеговас жы каринг и время, кала авэла о Христос. Если вонэ кадя терэна, тоди получина и наӷрада и авэна паша тэрно, паша Исусо, андэ лэ Дэвлэско Царство (Тайна 7:1—3) b. Ай со аштярэл аврэ панчже щеян, савэ сас найгодявэрнэ?

7. Со тердяпэ лэ панчже найгодявэрнэ щеянца и васо?

⁷ Соса на шонаспэ и найгодявэрнэ щея пэ годявэрнэ? Вонэ на сас ӷотови, кала трэбуй сас тэ авэл о тэрно. Лэндирэ лампы почти мударделэ, ай о вулей важ и яг лэндэ на сас. Кала вонэ ашундэ, кай о тэрно жал, вонэ  жылэ тэ тинэн о вулей, ай кала рисайлэ, нэ успели лэс тэ диқэн. «И щея, савэндэ сас вся ӷотово, зажылэ лэса пэ ябьявицко мисяйля, и пала лэстэ ԥандадэ и двэри» (Матф. 25:10). Кала и найгодявэрнэ щея тожэ камэнас тэ зажан интя, о тэрно ԥэндя лэнди: «Мэ на ӷанав тумэн» (Матф. 25:11, 12). Кадэла щея най вся подӷотовили и важ када на доаштярделэ лэ тэрнэс. Сости моӷут тэ сытён и мануша, савэ витидэ свынтонэ зорэса?

8, 9. Сости и избрани христианоря сытён анда примеро пала щея? (Диқэн кадяжэ и картинка.)

⁸ Ав ӷотово и внимательно. О Исусо на ԥэндя, кай андэ бари бида и избрани авэна розмардэ пэ дуй ӷрупы: кодэла, ко ӷотово, кай во тэ авэл, и ко най. Во просто камэлас тэ шол сама, кай если о христианино, саво надеийпэ тэ жувэл по нэбо, ашавэла лэ Дэвлэс, тоди во на получия пэстири наӷрада (Иоан. 14:3, 4). Кадэва гиндо побудий амэн вся и время тэ диқас пала пэстэ. И избрани христианоря и кодэла, ко лэна тэ жувэн пэ ԥув, трэбуй тэ прилэн лэ Исусоско совето анда примеро пала щея. Кажно андар мэндэ трэбуй тэ авэл внимательно и ӷотово вся тэ виритярэл (Матф. 24:13).

⁹ О Исусо росԥэндя о примеро пала щея, кай тэ сыкавэл, пэ скати дэ важно тэ авас ӷотови и внимательни. Ай андэ авэр примеро — пала таланторя — во шутя сама, сар дэ важно тэ терас и дила анда вся ди.

ТАЛАНТОРЯ

10. Васо пэ дуй раборя сас ԥэндо, кай вонэ кандинэ? (Матфеё 25:19—23).

¹⁰ Андо примеро пала таланторя о Исусо росԥэндя пала дуй кандинэ раборя и пала ек найкандино. Англа кода, сар о хулай тэ ладэл андэ авэр страна, во дя лэнди таланторя — када сас барэ ловэ (Матф. 25:14—18). Дуй кандинэ раборя терэнас пэстири дила драго и анда вся ди. Вонэ годяса обжылэпэ лэ ловэнца. Кала о хулай рисайля, во додиқля, кай вонэ затердэ дувар май бут кодэлэстар, со лэнди сас дино.  Во похвалисардя лэн и ԥэндя кажнонэсти андар лэндэ: «Ав лошало вместе тирэ хуласа!» (Проадинон Матфеё 25:19—23.) Ай со можно тэ ԥэнас пала трито рабо? Со во тердя лэ ловэнца?

11. Со тердяпэ лэ рабоса, саво сас каштуно, и васо?

¹¹ О трито рабо сас каштуно. Лэсти сас дино ек таланто, но вместо кода, кай тэ мэкэл лэ хуластирэ ловэ андэ дила, во заӷанадя лэн андэ ԥув. Кала о хулай пушля пала ловэ, о рабо моӷ лэсти тэ отдэл кати кодэла ловэ, савэ во лэсти дясас. Кай кадэва рабо сас нэӷожо ди. Во дажэ на погиндосардя тэ мангэл прощения кай пэско хулай и ԥэндя пэр лэстэ, кай во «мануш барунэ одеса». О хулай сас нэдовольно кадэлэ рабоса. Во приԥэндя, кай тэ залэн лэстар и ловэ, ай лэс тэ видаравэн (Матф. 25:24, 26—30).

12. Кас адес сыкавэн дуй раборя, савэ терэнас дила анда вся ди?

¹² Дуй раборя, савэ терэнас дила анда вся ди, сыкавэн кандинэ христианонэн, савэ витидэ свынтонэ зорэса. О хулай, о Исусо, ақарэл лэн тэ лошавэн вместе лэса. Када авэла тоди, кала вонэ получина пэстири небесно наӷрада и ашэна «пэрви, кас жундярдэ» (Матф. 25:21, 23; Тайна 20:5). Ай кода, сар андярдя пэс о каштуно рабо, сыкавэл, состар трэбуй тэ фэринпэ и избрани христианоря.

13, 14. Сости моӷут тэ сытён и избрани анда примеро пала таланторя? (Диқэн кадяжэ и картинка.)

¹³ Тер дила анда вся ди. Андо примеро пала таланторя о Исусо на дэлас дума, кай и избрани мануша лэна тэ шонпэ по каштуно рабо. Во просто сыкадя, со авэла, если вонэ парашэна тэ терэн и дила хваткаса. Кадэва жэ гиндо сас и андо примеро пала щея. Кацавэ мануша ужэ на авэна «достойни тэ ашэнпэ машкар кодэла, кас о Дэл ақардя», и нэ смоӷут тэ зажан андо небесно Царство (2 Пёт. 1:10).

¹⁴ Лэ Исусостирэ примероря пала щея и таланторя сыкавэн, кай всаворэ избрани трэбуй тэ на парашэн тэ кандэн лэ Дэвлэс, тэ авэн внимательни и анда вся ди тэ терэн  пэстири дила. Но када най вся, со аштярэл лэндар о Исусо. Андэ Матфеё 24:40, 41 исин инке ек совето.

КАС «ЗАЛЭНА»?

15, 16. Сар анда Матфеё 24:40, 41 дицол, кай и избрани христианоря трэбуй тэ отшон и линдра?

¹⁵ Англа кода сар тэ росԥэнэн кадэла трин примероря, о Исусо сыкадя, пар со дицола, кай о избрано христианино уӷодно лэ Дэвлэсти. О Исусо росԥэндя пала дуй мурша, савэ терэн пэ мал, и пала дуй жувля, савэ мэлин пэ ручно мельница. Хоть кадэла мануша, здэлпэ, терэн ек дила, о Исусо ԥэндя, кай «еқэс залэна, ай аврэс ашавэна». (Проадинон Матфеё 24:40, 41.) Ай тоди во побудисардя пэстирэ учениконэн: «Отшон и линдра, важ кода кай на ӷанэн, андэ саво дес авэла тумаро Баро Хулай» (Матф. 24:42). Поджан кадэла алава каринг и избрани христианоря? Амэ диқас, кай да. Важ кода кай о Исусо дя кацаво жэ совето андо примеро пала щея (Матф. 25:13). О Исусо залэла андэ небесно Царство кати кодэлэн, ко па чачимастэ витидо свынтонэ зорэса и на ашадя лэ Дэвлэс (Иоан. 14:3).

¹⁶ Отшув и линдра. Кажно избрано христианино трэбуй тэ пристол о зор, кай лэс тэ на лэл и линдра кадэла люматири. Если во кадя на терэла, тоди во на авэла машкар кодэла, кас лэна тэ стидэн и анӷелоря (Матф. 24:31). Но и всаворэнди, ко надеийпэ тэ жувэл вечно пэ ԥув, кадя жэ трэбуй тэ приашундён каринг лэ Исусоско совето. Лэнди тожэ трэбуй тэ отшон кадэла люматири линдра и тэ на парашэн тэ кандэн лэ Иеговас.

17. Васо на трэбуй тэ пэрэжываем, андэ сави время о Иегова витидэл лэ манушэс пэстирэ свынтонэ зорэса?

¹⁷ Амэ драго ӷанас лэ Иеговас и патяс, кай во сар сындомари прилэл правильни ришэнии. Если о Иегова найдэлмут витидя варикас пэстирэ свынтонэ зорэса, трэбуй амэ через када тэ пэрэжываем c? Амэ сэрас, со о Исусо ԥэндя пала кодэла, ко терэлас бути андо виноӷрадно садо кати ек часо (Матф. 20:1—16). Кодэлэн, кас ақардэ пэ бути, кала заканчивался о дес, получисардэ кацавэ жэ ловэ, сар кодэла, ко терэлас цыло дес. Кадя жэ можно тэ ԥэнас и пала избрани христианоря. Нэ важно кала и мануша сас витидэ свынтонэ зорэса. Всаворэ вонэ получина еқэндар пэстири небесно наӷрада, если на парашэна тэ кандэн лэ Иеговас.

ПРИЛЭ ЛЭ ИСУСОСТИРЭ СОВЕТОРЯ

18, 19. Савэ важни гиндоря и советоря амэ роздиқлям андэ кадэя статья?

¹⁸ Пала со амэ подям дума? О примеро пала бакрэ и бузнэ поджал каринг кодэла, ко лэла вечно тэ жувэл пэ ԥув. Во сыкавэл, кай вонэ трэбуй тэ на ашавэн лэ Иеговас — и адес и тоди, кала авэла и бари бида. О Исусо лэла тэ сындой всаворэ́ манушэн пэ ԥув. Во прижанэна найдошалэнца кодэлэн, ко кандэн лэ Дэвлэс, и ԥэнэна, кай вонэ достойни тэ получин и вечно жызня (Матф. 25:46).

¹⁹ Амэ кадяжэ роздиқлям дуй лэ Исусостирэ примероря, андэ савэ сас советоря важ и избрани христианоря. Андо примеро пала дэш щея ԥэнэнаспэ, кай панч андар лэндэ андярэнас пэс годявэрнэс. Вонэ сас ӷотови и внимательни каринг вся. Вонэ всаворэ́ одеса аштярэнас лэ тэрнэс, скати трэбуй сас. Авэр панч найгодявэрнэ щея кадя пэс на андярдэ. Важ када о тэрно на мэкля лэн пэ ябьявицко мисяйля. Амэ тожэ  на ӷанас, кала о Исусо улэла кадэя найлащи люма. Важ када трэбуй тэ авас ӷотови тэ аштярас, скати трэбуй авэла. Кадяжэ анда примеро важ и таланторя амэ уӷанглям пала дуй раборя, савэ терэнас и дила анда вся ди. Вонэ старыинаспэ тэ стерэн вся, со ԥэндя лэнго хулай, и во лэн важ када похвалисардя. Ай по каштуно рабо о хулай ԥэндя, кай во нэӷожо, и заля лэстар вся. Сости амэн када сытярэл? Амэ вся и время трэбуй тэ терас лэ Иеговастири дила драго и анда вся ди, пока на поджала о сроко кадэла люмати. Инке амэ подям дума пала кода, кай и избрани христианоря трэбуй тэ отшон и линдра кадэла люматири. Если вонэ кадя на терэна, тоди о Исусо на залэла лэн и лэндэ на авэла небесно наӷрада. Вонэ фартэ аштярэн, кала авэна стидэ по нэбо паша Исусо. Посли Армагедоно авэла лэ Бакрорэско ябьяв. О тэрно авэла о Исусо, ай и тэрни — и избрани христианоря, савэ жундярдэ по нэбо (2 Фес. 2:1; Тайна 19:7, 9).

20. Со о Иегова стерэла важ кодэла, ко приашундён каринг лэстирэ советоря?

²⁰ О дес важ о сындо ӥто пашола, но амэнди най состар тэ дарас. Если амэ на парашаса тэ кандас пэстирэ небеснонэ Дадэс, саво любий амэн, во дэла амэнди «зор, саво май баро лэ манушэндирэ зорэстар» и амэ сможэм тэ тердювас «англа лэ манушэско Шаво» (2 Кр. 4:7; Лука 21:36). И кодэла, ко жувэна пэ ԥув, и кодэла, ко жувэна по нэбо, трэбуй тэ приашундён каринг лэ Исусостирэ советоря. Если амэ всаворэ кадя стераса, тоди радосараса амарэ Дадэс. О Иегова фартэ одяло и во камэл, кай кажно андар мэндэ тэ авэл запистромэ андэ ла жызнятири книӷа (Дан. 12:1; Тайна 3:5).