1, 2. Васо о Иегова создя амэн кадя, кай тэ авас май бахталэ тоди, кала терас варисо важ авэр?

 АМЭ бахталэ, кала варисо терас важ авэр. Кадэлэстар амэ лошавас май фартэ, чем тоди, кала авэр варисо терэн важ амэндэ (Дила 20:35). Кадя амэн создя о Иегова. Но хэба амэнди на чалёл тэ получисарас и подаркоря? Канешно чалёл! И всаек амэ ашас май бахталэ, кала екжэнэ терас подаркоря важ авэр. Сар дэ драго, кай о Иегова создя амэн имено кацавэнца! Васо?

² О Иегова создя амэн кадя, кай амари бах тэ авэл андэ амарэ вас. Кай май фартэ тэ лошавас, амэ просто трэбуй тэ терас варисо важ авэр. Наис лэ Иеговасти, кай во кадя драго амэн создя! (Пс. 139:14).

3. Васо по Иегова ԥэнэн — бахтало Дэл?

³ Андэ Библия ԥэнэнпэ, кай кала заботиспэ пала авэр, када анэн бах. Важ када нэ удивительно, кай о Иегова — «бахтало Дэл» (1 Тим. 1:11). Во пэрво, ко дя варисо аврэнди, и нико нэ можэт тэ дэл май бут, чем во. О апостало Павло ԥэндя: «Лэстирэ зорэса амэ жувас, и ԥирас, и ԥурдас» (Дила 17:28). Чаче, «вся о лашымос и бахталимос» — лэ Иеговастар (Иак. 1:17).

4. Со поможыя тэ авас инке май бахталэ?

⁴ Камлоп ту тэ авэс инке май бахтало кодэлэстар, кай терэс лашымос аврэнди? Тоди лэ примеро амарэ Дэвлэстар лэ Иеговастар, саво дэл анда вся ди (Еф. 5:1). Андэ кадэя статья амэ роздиқаса, сар о Иегова заботийпэ пала авэр. Кадяжэ амэ подаса дума, со тэ терас, если здэлпэ, кай авэр на цэнин амаро лашымос. Кода, со амэ уӷанаса, поможыя  тэ на здаспэ, кала терас лашымос важ авэр. И тоди амэ аваса инке май бахталэ.

АВ, САР О ИЕГОВА, САВО ДЭЛ АНДА ВСЯ ДИ

5. Со амэнди дэл о Иегова?

⁵ Андар со дицол, кай о Иегова дэл анда вся ди? Акэ кати дэсавэ маменторя. О Иегова дэл амэнди кода, со трэбуй важ и жызня. Када на сыкавэл, кай амэ всаворэ сам барвалэ. Но бутэндэ андар мэндэ исин вся, со трэбуй важ и жызня. И вся блаӷодаря лэ Иеговасти. Например, во диқэл, кай амэндэ тэ авэл со тэ хас, со тэ лас пэр пэстэ и кай тэ жувас (Пс. 4:8; Матф. 6:31—33; 1 Тим. 6:6—8). Васо о Иегова вся када дэл амэнди? Кати важ кода, кай када трэбуй? Най. Тоди со побудий лэс каринг када?

6. Сости амэ сытювас анда Матфеё 6:25, 26?

⁶ О Иегова заботийпэ пала амэндэ, важ кода кай любий. Погиндосарам пала лэ Исусостирэ алава анда Матфеё 6:25, 26 (проадинон). Кала во дэлас дума пала птицы, во шутя сама: «Вонэ на сеин, на стидэн о зэрно и никай лэс на гаравэн, но тумаро небесно Дад праварэл лэн». Тоди во ԥэндя: «Пэскати жэ тумэ май куч лэндар!» Со када сыкавэл? Важ о Иегова лэстирэ мануша пэбутэстэ май куч, чем и птицы и жывотни. Если во диқэл пала птички, хэба во на лэла тэ заботийпэ пала амэндэ? О Иегова любящё Дад. Важ када во праварэл, паярэл и утидэл пэстирэ бэятонэн (Пс. 145:16; Матф. 6:32).

7. Сар амэ можэм тэ лас примеро лэ Иеговастар, кала поможысарас аврэнди? (Диқэн кадяжэ и картинка.)

⁷ Амэ, сар и о Иегова, тожэ можэм тэ сыкавас и любовь пэ дила. Ӷанэс ту варикас анда христианско ӷурто, касти трэбуй хамос или ӥда? О Иегова можэт тэ поможый кадэлэ ԥралэсти или ԥьяти через тутэ. Лэ Иеговаско миро ашунгло кодэлэса, кай во ӥто поможый, кала терэлпэ варисави бида. Например, кала жалас и пандэмия КОВИД-19, и ԥрала и ԥэя дэнас хамос и ӥда кодэлэнди, кастэ када на дохутилэлас. Ай инке бут андар лэндэ анда вся ди дэнас и ловэ пэ всемирно дила. Када поможыяс, кай андэ разни ҭана па вся и люма и ԥрала тэ дэн зор кодэлэнди, ко попэля андэ ԥари ситуацыя. Всаворэ амэ терас кадя, сар пистромэ андэ Евреёря 13:16: «На́ бистрэн тэ терэн лашымос и тэ делинпэ аврэнца, важ кода кай кацави дила, сар жэртва, и вой уӷодно лэ Дэвлэсти».

8. Васо ту блаӷодарно лэ Иеговасти, кай во дэл тути пэско зор? (Филипы 2:13).

 ⁸ О Иегова дэл пэско зор. Кай о Иегова бесконечно зор. И во анда вся ди дэл лэс пэстирэ манушэнди, савэ на парашэн лэс тэ кандэн (Проадинон Филипы 2:13.) Ту варикала мангэсас лэ Иеговастар зор, кай тэ на подэспэ лэ бэзэхэсти или тэ виритярэс варисаво ԥаримос? Ай можэт, ту мангэсаспэ пала кода, кай просто тэ прожувэс инке ек дес? Кала ту диқэсас, кай о Иегова отвечал пэ тирэ молитвы, ту, наверно, гиндосас пала лэ Павлостирэ алава: «Вся манди па зор, важ кода кай о Дэл придэл манди зор» (Флп. 4:13).

9. Сар амэ можэм тэ лас примеро лэ Иеговастар, кала отдас пэско зор? (Диқэн кадяжэ и картинка.)

⁹ Амэ камас тэ шаспэ по Иегова. Но амэндэ нинай кацаво дэ баро зор, сар лэстэ. И амэ нэ можэм тэ одлас пэстар зор, кай тэ дас лэс аврэнди. Но амэ можэм варисо тэ стерас важ авэр. Например, амэ можэм тэ поможысарас лэ ԥралэнди и лэ ԥэянди, кастэ найлашо зор, или кодэлэнди, ко андэ ԥурэ бэрша. Амэ можэм тэ стерас лэндэ варисо па цэр, тэ жас андо маӷазино или тэ стерас инке варисо. Если исин возможность, амэ можэм тэ прилас андо Зало Царство или тэ терас важ лэстэ авэр дила, сави трэбуй. Кала амэ ласа тэ отдас пэско зор важ кацави дила, амэ стераса бут лашымос важ кодэла, ко любий лэ Иеговас.

10. Сар амэ можэм пэстирэ алавэнца тэ придас зор аврэнди?

¹⁰ На бистэр, саво зор исин кай амарэ алава. Возможно, ту сразу погиндосардян пала ԥрал или ԥэй, савэн анда вся ди авелоп драго тэ похвалис. Ай можэт, варикас трэбуй тэ подритярэс. На хутила кати тэ гиндос пала мануш — мэк кадэла гиндоря пэрэжана андэ лашэ алава. Можно тэ зажас каринг лэстэ, тэ позвонис, тэ пистрос открытка или тэ бишалэс сообщения. Нэ пэрэжывай, если тутэ на вижал тэ подтидэс варисавэ особени алава. Часто, кай тэ подритярэс варикас на трэбуй бут алава. Вонэ моӷут тэ авэн прости и ӷлавно, кай анда ди. Возможно, имено када щас трэбуй лэ манушэсти. Тирэ алава моӷут тэ придэн лэсти кодэва зор, саво поможыя инке ек дес тэ кандэл лэ Иеговас (Прит. 12:25; Еф. 4:29).

11. Сар о Иегова дэл годи лэ манушэнди?

¹¹ О Иегова дэл годи. О Иаково пистросардя: «Если варикасти андар тумэндэ трэбуй тэ ашэл май годявэр, мэк мангэл када лэ Дэвлэстар, саво дэл всаворэнди анда ди и никас пала када на лажаварэл» (Иак. 1:5). Сар дицол анда кадэла алава, о Иегова на  гаравэл пэско годявэрнимос. Во анда вся ди дэл лэс аврэнди. И кала во терэл када, во никас «на лажаварэл». Или сар ԥэнэнпэ андэ сноска «никасти на шол када пэ яқа». О Иегова на камэл, кай амэндэ по ди тэ авэл найдраго, кала амэ мангас лэстар помощь. Во дажэ екжэно мангэл, кай амэ тэ взвисавас лэстэ пала совето (Прит. 2:1—6).

12. Сар амэ можэм тэ делисавас аврэнца пэстирэ годявэрнимаса?

¹² Ай сар амэ можэм тэ сытювас кай о Иегова тэ делисавас аврэнца пэстирэ годявэрнимаса? (Пс. 32:8). Амэ можэм тэ росԥэнас аврэнди кода, со амэ ӷанас. Например, амэ часто сыкавас нэвэ вазвещятелёнэнди, сар тэ росԥэнэн пала Дэл. И барэдэр ԥрала отдэн бут время кодэлэсти, кай тэ сытярэн аврэн. Вонэ росԥэнэн лэ помошниконэнди андо ӷурто и аврэ ԥралэнди, сар тэ терэн разно дила важ о ӷурто. Ай и ԥрала и ԥэя, савэ ӷанэн тэ строин и здании и тэ заботинпэ пала лэндэ, сытярэн аврэн, сар тэ терэн кадэя дила.

13. Сар тэ терас кадя, сар о Иегова, кала сытярас аврэн?

¹³ Кала сытярас аврэн, амэ камас тэ терас кадя жэ, сар о Иегова. Во анда вся ди поможый аврэнди тэ авэн май годявэр. И амэ трэбуй кадя жэ тэ делисавас кодэлэса, со уӷанглям и сости сытелям. Амэ на дарас, кай кодэла, кас амэ сытярас, залэна амаро ҭан. И на гиндосарас: «Манца нико на няньчияспэ. Мэк во екжэно всаворэсти сытёл». Када нэправильни гиндоря. Лэ Иеговастирэ мануша най кати лошаса делинпэ кодэлэса, со уӷанглэ, но и ӷотови «тэ отд[эн]... пэстири жызня» пала авэр (1 Фес. 2:8). Амэ надеисавас, кай кодэла, кас амэ сытярас, «смоӷут тэ сытярэн аврэн» (2 Тим. 2:1, 2). Если амэ анда вся ди делисавас кодэлэса, со уӷанглям, амэ екжэнэ ашас май годявэр, май бахталэ и поможысарас, кай авэр тожэ кацавэ тэ авэн.

ЕСЛИ НА ԤЭНЭН «НАИС»

14. Сар андярэн пэс бут мануша, кала лэнди терэн лашымос?

¹⁴ Кала амэ терас варисо важ авэр, особено важ амарэ ԥрала и ԥэя анда ӷурто, часто вонэ блаӷодарин важ када. Дэкала вонэ дарин открытки или сыкавэн пэстири блаӷодарность варисар па аврятэ (Клс. 3:15). Канешно, амэнди всегда чалёл тэ ашунас «наис».

15. Пала со трэбуй тэ сэрас, если амэнди нэ ԥэндэ «наис»?

¹⁵ Но можэт тэ авэл кадя, кай амэнди на ԥэнэна «наис». Прецтавь, кай ту стодян время, зор и ловэ пэ варисави дила, но о мануш, здэлпэ, совсем на цэний када. Со поможыя тути тэ на хасарэс и радость и тэ на холявэс? Погиндосар пала ӷлавно стихо андэ кадэя статья, Дила 20:35. Амари бах — андэ амарэ вас. Амэ можэм екжэнэ тэ витидас, кай ласа тэ лошавас, кала отдас варисо анда вся ди, и нэважно, шон пэ када сама чи най. Давайте роздиқаса, со амэнди андэ када поможыя.

16. Васо, кала терэс варисо важ авэр, трэбуй тэ терэс, сар о Иегова?

¹⁶ Тер кадя, сар о Иегова. Во заботийпэ пала всаворэ мануша и на шол сама, цэнин вонэ када чи най (Матф. 5:43—48). О Иегова дэл алав, кай если и мануша терэн лашымос и «на аштярэн, кай... [лэнди] отдэна» када, тоди кацавэ манушэндэ авэла «бари блаӷословения» (Лука 6:35). Важ када на умэк и вас, если и мануша на ԥэндэ тути «наис». Сэр: о Иегова точно блаӷословия тут важ о лашымос, саво ту терэс аврэнди (Прит. 19:17). Важ кода кай во любий «кодэлэс, ко лошало тэ дэл» (2 Кр. 9:7).

17. Со важ амэндэ само ӷлавно, кала терас лашымос аврэнди? (Лука 14:12—14).

 ¹⁷ Кадяжэ ласа тэ сэрас кода, со пистромэ андэ Лука 14:12—14 (проадинон). Нинай нисо вэрыто андэ кода, кай тэ ақарас пэстэ и тэ шас сама кодэлэн, ко можэт тэ стерэл кацаво жэ лашымос и амэнди. Но со, если андэ дэсавэ маменторя, амэ додиқас, кай терас лашымос кати важ кода, кай и мануша кадя жэ тэ шон сама и амэн? Авелоп драго тэ прилас лэ Исусоско совето. Можно тэ ақарас пэстэ кодэлэн, кастэ нинай возможность тэ ақарэн амэн пэстэ. Тоди амэ ласа тэ ӷанас, кай терас кадя жэ, сар о Иегова, и кадэлэстар аваса бахталэ. О гиндо анда Лука 14:12—14 кадяжэ поможый амэнди тэ на парашас тэ лошавас тоди, кала амэнди на ԥэнэн «наис».

18. Со поможыя амэнди тэ на гиндосарас пала авэр найдраго?

¹⁸ На гиндосар, кай о мануш найблаӷодарно (1 Кр. 13:7). Если варико на шутя сама пэ тиро лашымос, можэш тэ пушэс пэстар: «Чаче кадэва мануш найблаӷодарно или лэстэ просто вижыля анда шэро тэ ԥэнэн „наис“?» Возможно, исин и авэр маменторя, васо во на андярдя пэс кадя, сар амэ аштярдям. Дэсавэндэ андо ди исин бари блаӷодарность, но вонэ на ӷанэн, сар ла тэ сыкавэн. Лэнди можэт тэ авэл лажаво тэ прилэн и помощь, особено, если вонэ присытелэ екжэнэ тэ поможын аврэнди. Но, если амэ па чачимастэ любисарас лэ ԥралэн и лэ ԥэян, амэ на ласа тэ гиндосарас пала лэндэ найдраго и на парашаса лошалэ одеса тэ поможысарас лэнди (Еф. 4:2).

19, 20. Кала на аштярас и блаӷодарность, сар када поможый тэ на парашас тэ лошавас? (Диқэн кадяжэ и картинка.)

¹⁹ На аштяр, кай о мануш сразу ԥэнэна тути «наис». О царё Саламоно еқвар пистросардя: «Мэк пэско марно па паи, важ кода кай, кала прожана бут деса, ту упалэ лэс виарақэса» (Эккл. 11:1). Анда кадэва стихо дицол, кай можэт тэ прожал бут время, англа кода сар лэ манушэстар тэ ашунас  и блаӷодарность. Акэ сар када сас андэ жызня кай ек амари ԥэй.

²⁰ Бут бэрша палпалэ ек ԥэй, савятэ о хулай раёно барэдэр ԥрал, пистросардя открытка ла Сандрати, сави найдэлмут болделя. Вой побудисардя ла никала тэ на ашавэл лэ Иеговас. Варикай через 8 бэрш и Сандра пистросардя лати письмо. Во залэласпэ кацавэ алавэнца: «Наверно, ту дажэ и на додэс, сар ту подритярэсас ман всаворэ кадэла бэрша». Май дур котэ ԥэнэнаспэ: «Тирэ алава фартэ линэ ман лэ одестар. Но май фартэ манди придя зор о библейско стихо a. Во вся и время сас мандэ андо гиндо». И Сандра росԥэндя андо письмо пала дэсавэ трудности и инке пистросардя: «Дэкала манди камэласпэ вся тэ ашавав — всаворэ пэстирэ обязаности и дажэ лэ Иеговас. Но кажно разо, кала ман вся дохалас, андо шэро упалэ авэлас кадэва стихо. Во поможыяс манди тэ на здавпэ». В концэ андо письмо ԥэнэнаспэ: «Всаворэ кадэла восемь бэрш нисо кадя на придэлас манди зор, сар тири открытка и кадэва стихо». Кати погиндосар, сави дэ бахтали сас лэ раёностири хулаи, кала получисардя о ответо через «бут деса», сар и ԥэндя о Саламоно! Возможно, амэнди тожэ ԥэнэна «наис» важ амари лащи дила най сразу, ай через дэсави время.

21. Васо амэ камас тэ терас, сар о Иегова, кала варисо отдас аврэнди?

²¹ Сар ԥэнэнаспэ май упрэ андэ статья, о Иегова создя амэн кадя, кай амэ бахталэ тоди, кала варисо отдас, ай най тоди, кала лас. Амэнди чалёл тэ терас варисаво лашымос важ амарэ ԥрала и ԥэя андо ӷурто. И амэнди приятно, кала вонэ амэн важ када блаӷодарин. Но дажэ если вонэ амэнди на ԥэнэн «наис», амэ всаек лошалэ, важ кода кай терас правильно. Никала на бистэр: со бы ту тэ на отдэс аврэнди, «о Иегова можэт тэ дэл тути май бут» (2 Лет. 25:9). Ту никала нэ можэш тэ дэс аврэнди май бут, чем о Иегова дэл тути. Кала амэ получисарас лэ Иеговастар о лашымос, кадэлэстар нисо нинай май лашо. О Иегова никала на причорэл пэско вас. Давайте вся и время тэ сытювас лэстар андэ када!