АВЭНА ашундэ всаворэ молитвы, касти бы амэ тэ на мангаспэ? Бут мануша андэ амари время кадя и гиндон. Кацаво гиндо чалёл кодэлэнди, ко нэ против, кай и мануша анда разни веры тэ поможын ек еқэсти, и ко гиндой, кай всаворэ религии лашэ, хоть андэр лэндэ по разному сытярэн. Чаче када кадя чи най?

Сар ԥэнэнпэ андэ Библия, най всаворэ мануша мангэнпэ лэ чачунэ Дэвлэсти. Андэ библейско время и мануша мангэнаспэ лэ дэвлэнди, савэ вишындэ анда каш. Но о Дэл лэнди най еқвар ԥэнэнас, кай на трэбуй кадя тэ терэн. Акэ со ԥэнэнпэ пала хохавнэ дэвла андо Псалом 115:4—6: «Лэндэ исин кан, но вонэ на ашунэн». Вижал трэбуй ту тэ мангэспэ лэ дэвлэсти, саво тут никала на ашунэла?

Андэ Библия пала кадэя тема бут со росԥэнэнпэ. Например, лэ чачунэ Дэвлэско пророко о Илья ԥэндя лэ Ваалостирэ пророконэнди, кай вонэ тэ мангэнпэ пэстирэ дэвлэсти, ай потом во мангэлапэ пэстирэ Дэвлэсти. О Илья ԥэндя, кай о чачуно Дэл атветит, ай о хохавно най. Тоди лэ Ваалостирэ пророкоря линэ тэ мангэнпэ долӷо и настойчиво и дажэ линэ фартэ тэ цыпин, но вся сас евья! Андэ Библия ԥэнэнпэ: «На сас ни звуко, ни атвето и нико лэн на шолас сама» (1 Царей 18:29). Но ай со сас, кала о Илья мангляпэ?

О Дэл сразу атветил лэ Ильясти и бишалдя па нэбо яг, кай тэ сԥабарэл и жэртва, сави во андя важ лэстэ. Васо о Дэл ашундя лэ Ильястири молитва, ай лэ Ваалостирэ пророконэнди най? Андэ лэ Ильястири молитва, сави запистромэ андэ 1 Царей 18:36, 37, сас ԥэндо варисо фартэ важно. Хоть лэстири молитва и на сас лунго, када варикай 30 алава пэ древнееврейско шыб, андэ молитва о Илья тривар взвисайля каринг о Дэл па алавэстэ Иегова.

О алав Ваало значит «хулай» или «ӷосподино». Во сас дэл важ и хананеёря. Интересно, кай андэ разни ҭана сас пэско Ваало. Но алав Иегова, када особо алав, саво па вся и люма исин кати еқэстэ. О Дэл, каско алав Иегова, ԥэндя пэстирэ народости: «Мэ о Иегова. Када мэрно алав. Мэ на отдава пэстири слава никасти» (Исаия 42:8).

Кала тэлёнас лэ Ваалости, андэ лэстири поклонения кадяжэ ужалас и храмово проституцыя. Инке андэ кадэя поклонения ужалас, кай анэнас лэ манушэн андэ жэртва. Вся када терэлас, кай и мануша тэ римонпэ инке май фартэ. Ай о израильско народо, саво тэлёлас лэ Иеговасти, ашэлас май лашо. И кода, кай вонэ тэлёнас лэ Иеговасти, поможысардя лэнди тэ на терэн и абычаи, савэ гряца важ лэстэ. Акэ погиндосар, ту камэс тэ бишалэс письмо пэстирэ друӷости, пэ саво ту стос бари патив. Пистроса ту спецыально аврэ манушэско адресо и авэр алав, хоть и ӷанэс, кай лэстэ фартэ найлащи дила и тирэ друӷости када фартэ на чалёл? Канешно най.

Кала мангэнпэ лэ Иеговасти, тумэ дэн дума лэ Создателёса. Во Дад лэ манушэнго *. О пророко Исаия ԥэндя, кай о Иегова амаро Дад (Исаия 63:16). Када кодэва жэ Дад, пала саво ԥэндя о Иисус Христос пэстирэ учениконэнди: «Мэ жав каринг мэрно Дад и тумаро Дад и каринг мэрно Дэл и тумаро Дэл» (Иоанна 20:17). Лэ Иисусоско дад, када о Иегова. О Иисусо мангэласпэ лэсти и во сытярэлас, кай кадяжэ тэ терэн и лэстирэ ученикоря (Матфея 6:9).

Ԥэнэнпэ андэ Библия, кай можно тэ мангаспэ лэ Иисусости, ла Марияти, лэ анӷелонэнди и пэ святыни? Най. Тэ мангаспэ трэбуй кати лэ Иеговасти. Подаса дума пала дуй причины. Пэрво, и молитва ужал андэ кода, кай тэ тэлёс Дэвлэсти, ай андэ Библия ԥэнэнпэ, кай трэбуй тэ тэлёс кати лэ Иеговасти (Исход 20:5). Дуйто, анда Библия амэ уӷанас, кай лэ Дэвлэстэ исин титуло «Кодэва, ко ашунэл и молитвы» (Псалом 65:2). Хоть о Иегова и дэл власть анӷелонэнди и манушэнди, но во никала и никасти на дэла, кай тэ ашунэн амарэ молитвы. Во дэл алав, кай екжэно лэла тэ ашунэл амарэ молитвы.

Если ту камэс, кай о Дэл тэ ашунэл тирэ молитвы, на бистэр и алава анда Библия: «Кажно, ко ԥэнэн лэ Дэвлэско алав, во спасыяпэ» (Деяния 2:21). Но ашунэл о Дэл всаворэ молитвы? Или трэбуй инке пала варисо тэ уӷанас, если камас, кай амарэ молитвы о Иегова тэ ашунэл?