Всаворэ ли христианоря чачунэ?

СКАТИ мануша ԥэнэн, кай вонэ христианоря? Сар дицол анда «Атласо па христиански веры», андо 2010 бэрш па вся и люма сас варикай 2,3 милиардоря христианонэн (Atlas of Global Christianity). Котэ жэ ԥэнэнпэ, кай всаворэ вонэ ужан андэ май бут чем 41 000 разни веры и кай кажно андар лэндэ исин пэстирэ учения и кода, сар трэбуй пэс тэ андярэн. Акана понятно, васо дэсавэ мануша, кала диқэн кадя бут разни «христиански» веры, на ӷанэн, со тэ витидэн, и дажэ умэкэн и вас. Вонэ моӷут тэ пушэн: «Чаче ли всаворэ, ко ԥэнэн, кай вонэ христианоря, чачунэ христианоря?»

Роздиқаса примеро. Кала о мануш пэрэладэл и ӷраница, во трэбуй тэ сыкавэл, саво лэстэ ӷражданство. Но када на хутила. Во трэбуй тэ доԥэнэн, кай во па чачимастэ кодэва, пала кастэ пэс видэл, и тэ сыкавэл, например, пэско лил. Кадяжэ о чачуно христианино трэбуй най кати тэ ԥэнэн пала пэстири вера, но во трэбуй тэ сыкавэл, кай во па чачимастэ христианино. Сар када?

О алав «христианино» линэ тэ ԥэнэн варикай андо 44 бэрш лэ И. Х. О Лука, саво пистрояс и Библия, ԥэндя: «Андэ Антиохия, кадя, сар камля о Дэл, пэ ученикоря пэрво разо линэ тэ ԥэнэн христианоря» (Деяния 11:26). Шон сама, кай пэ Иисусостирэ ученикоря ԥэнэнас христианоря. Но ко када лэ Иисусоско ученико? Андо «Нэво международно теологическо словарё важ о Нэво Завето» ԥэнэнпэ: «Тэ авэс лэ Иисусоско ученико, сыкавэл еқварэс и пэ вся и время тэ отдэс вся пэстири жызня» (The New International Dictionary of New Testament Theology). Вижал, чачуно христианино, када кодэва, ко андэ вся пэстири жызня ритярэл лэ Иисусостирэ учении и законоря, савэ во стодя, сар кодэва, кастар жыля о христианство.

Исин ли адес кацавэ машкар кодэла, ко ԥэнэн пэр пэстэ христианоря? Сар амэ можэм тэ ӷатярас чачунэ христианонэн, сар ԥэндя о Иисусо? Давайте роздиқаса анда Библия атветоря пэ кадэла вопросоря. Андэ авэр статьи пистромэ панч маменторя, сар па лэ Иисусостирэ алава, амэ можэм тэ ӷатярас лэстирэ учениконэн. Амэ роздиқаса, сар андярэнас пэс и христианоря андо пэрво вико, и пристаса зор, кай тэ розлас, ко адес андярэл пэс кадя, сар ԥэндя о Иисусо.