«Кадэя лащи весть пала Царство росԥэнэна»
«Кадэя лащи весть пала Царство росԥэнэна»
«Кадэя лащи весть пала Царство росԥэнэна па вся и ԥув, кай тэ уӷанэн всаворэ народоря, и тоди авэла конец» (МАТФЕЯ 24:14).
Со када сыкавэл. О Лука пистросардя, кай о Иисусо «жыля па гава и фороря, тэ росԥэнэн пала радосно новость важ лэ Дэвлэско Царство» (Луки 8:1). Ай екжэно о Иисусо ԥэндя: «Мэ трэбуй тэ росԥэнав и лащи новость пала лэ Дэвлэско Царство и андэ авэр фороря, важ кода кай ман пала када и бишалдэ» (Луки 4:43). Во бишалдя пэстирэ учениконэн тэ росԥэнэн и лащи весть па фороря па гава, ай май позжэ приԥэндя лэнди: «Тумэ авэна мэрнэ свидетеля... жы кай само дурутнэ ҭана пэ ԥув» (Деяния 1:8; Луки 10:1).
Сар терэнас и пэрви христианоря. Лэ Иисусостирэ ученикоря сразу жэ линэ тэ терэн кода, со во приԥэндя. Вонэ «кажно дес андо храмо и па цэра... на парашэнас тэ сытярэн и тэ росԥэнэн лащи новость, кай о Иисусо, када Христос» (Деяния 5:42). Росԥэнэнас всаворэ христианоря, ай най кати и избранни. О историко Августо Неандеро ԥэндя, кай «о Цельсо, пэрво, ко пистросардя, кай против христианства... [приасаласпэ] кодэлэстар, кай и шерстобитчикоря, сапожникоря, валяльщикоря, и сами ӷруби мурша анда вся оди росԥэнэнас и евангелия». О Жано Бернарди пистросардя андэ книӷа «Ранние века церкви»: «[Христианоря] трэбуй сас тэ жан и тэ дэн дума всаворэнца. Пэ барэ дрома и андэ фороря, пэ площади, кай бут мануша и андэ цэра. Кай лэн камэн и кай на камэн [...] ...Жы кай и краёря ԥув» (Les Premiers Siècles de L’Église).
Ко терэл кадя адес? Английско рашай Дейвидо Уотсоно пистросардя: «Ек анда причина васо и мануша хасардэ интересо кай и вера, када, кай и қандиря най серьёзно относяца каринг пэстири обязанность тэ росԥэнэн и тэ сытярэн». Андэ пэстири книӷа «Почему католики уходят из церкви?» О Хосе Луис Перес Гвадалупе, пистрой пала кода, со терэн и евангелисторя, адвентисторя и авэр веры, во ԥэндя, кай «вонэ на ԥирэн па цэра». Ай пала лэ Иеговастирэ свидетеля во пистросардя: «Вонэ на промэкэн тэ ԥирэн тэ росԥэнэн па цэра» (¿Por qué se van los Católicos?).
Андо журнало, андо саво пистрон само важни решения, савэ виандярдя о Верховно сындо США, сас пистромэ интересно и чачуно выводо, саво стердя о Джонатано Терли. Котэ пистромэ: «Стоит кати тэ ԥэнас пала лэ Иеговастирэ свидетеля и бутэнди сразу вспоминаюца и мануша, савэ росԥэнэн важ о Дэл и авэн нэ вовремя амэндэ цэрэ. Важ лэ Иеговастирэ свидетеля тэ росԥэнэн важ о Дэл па цэра, када лэндири вера, ай най просто способо кай и мануша тэ авэн андэ лэндири вера» (Cato Supreme Court Review, 2001-2002).
[Рамка]
Пэр кастэ вся када сыкавэл?
Андэ кадэла панч статьи амэ роздиқлям, со ԥэнэнпэ андэ Библия пала чачунэ христианоря, сар па тирятэ, ко пэр лэндэ шолпэ? Хоть исин фартэ бут веры, савэ ԥэнэн, кай вонэ христианоря, сэрэн, со ԥэндя о Иисусо пэстирэ учениконэнди: «Най кажно, ко ԥэнэн манди: „Ӷосподо, Ӷосподо“, зажала андо Царство, саво по нэбо, ай кати кодэва, ко терэл, со камэл мэрно Дад, саво по нэбо» (Матфея 7:21). Если тумэ арақэна кодэлэн, ко терэн кода, со камэл о Дад, кодэлэн, ко шонпэ пэ чачунэ христианоря, и присоедининапэ лэндэ, то тумэндэ авэна вечни блаӷословения тала лэ Дэвлэско Царство. Арак лэ Иеговастирэ свидетелёс, саво дя тути када тэ проадинос, кай тэ уӷанэс май бут пала лэ Дэвлэско Царство и пала блаӷословения, савэ во анэна (Луки 4:43).