«Тумэ ритярдён кодэлэсти, сости мэ сытярав»
«Тумэ ритярдён кодэлэсти, сости мэ сытярав»
«Если тумэ ритярдён кодэлэсти, сости мэ сытярав, тоди тумэ па чачимастэ мэрнэ ученикоря. Тумэ уӷанэна о чачимос и о чачимос дэла тумэнди свобода» (ИОАННА 8:31, 32).
Со када сыкавэл. Кода, сости сытярэлас о Иисусо, сас дино лэсти лэ Дэвлэстар. Во ԥэндя: «О Дад бишалдя ман и ԥэндя, со мэ трэбуй тэ ԥэнав» (Иоанна 12:49). Кала о Иисусо мангэласпэ пэстирэ небеснонэ Дадэсти, лэ Иеговасти, во ԥэндя: «Тиро алав исин чачимос». Кала во сытярэлас, во часто шолас сама по лэ Дэвлэско Алав (Иоанна 17:17; Матфея 4:4, 7, 10). Важ када и чачунэ христианоря ритярдёнпэ кодэлэсти, со ԥэндя о Иисусо. Лэ Дэвлэско Алав важ лэндэ чачимос и ӷлавно, со сыкавэл, сар тэ патян андо Дэл и сар тэ андярэн пэс.
Сар андярэнас пэс и пэрви христианоря. О апостоло Павло, саво бут пистросардя и када ужыля андэ Библия, кадяжэ сар и о Иисусо, столас патив по лэ Дэвлэско Алав. Во ԥэндя: «Всаворэ алава анда Писания лэ Дэвлэстар и вонэ лашэ» (2 Тимофею 3:16). И мурша, савэн стонас, кай тэ сытярэн аврэ христианонэн, трэбуй сас «тэ приритярдён лэ чачунэ алавэсти» (Титу 1:7, 9). Пэрвонэ христианонэнди дэнас совето тэ ашавэн «и мудрость кадэлэ мирости и хохавни и йвутни дума... када ритярдёл пэ традицыи, пэ принцыпоря кадэлэ мирости, ай най пэ кода, сости сытярэл о Христос» (Колоссянам 2:8).
Ко адес кадя терэл? Андэ книӷа пала Католическо қандири сас запистромэ и алава анда книӷа пала лэ Дэвлэстири Откровения, сави прилинэ андо Ватикано андо 1965 бэрш. Котэ ԥэнэнпэ: «И католическо қандири, савяти динэ тэ росԥэнэн и тэ полэн и Откровения, „ашэл уверенно андэ кода, со сас ԥэрнадо най кати через и Свынто Писания. Важ када пэ Писания и пэ учении, савэ пэрэдэнас алавэнца, трэбуй тэ стон бари патив еқэндар“». Андо журнало «Маклинз» сас запистромэ алава еқа жувляти, сави служыяс андэ қандири андо Торонто (Канада). Вой ԥэндя: «Сости тэ терэс кадя, сар сас ԥэндо варикай дуй тысячи бэрш палпалэ?». Амэндэ екжэнэндэ исин райканэ идеи, сар варисо тэ терас, но вонэ ашэн нисо важ кода, кай амэ вся и время шас сама по Иисусо и пэ Писания».
Ай пала лэ Иеговастирэ свидетеля андэ «Нэви католическо инцыклапедия» пистромэ: «Важ лэндэ и Библия, када ӷлавно, пэр со вонэ шон сама, кала витидэн, андэр со тэ патян и сар пэс тэ андярэн». Найдэлмут ек мурш андэ Канада пэрэмардя и дума еқа жувляти, сави сас лэ Иеговаско свидетелё и задя дума лэса. Во сыкадя пэ латири Библия и ԥэндя: «Мэ полэм ко ту па тири визитно карточка».