ТЕМА ПА ОБЛОЖКА | ХОХАИМОС, ЧЕРЕЗ САВО ԤАРЭС ТЭ ЛЮБИС ЛЭ ДЭВЛЭС
Хохаимос, через саво и мануша на ӷанэн пала Дэл
АНДЭР СО ПАТЯН БУТ МАНУША?
«Трин со май барэ христиански веры — када и католикоря, и православни и протестанторя — прижанэн еқэ Дэвлэс, савэстэ трин Муя. Када: О Дэл Дад, о Дэл Шаво и о Дэл Свынто духо. И христианско вера на прижанэн, кай када трин разни дэвла, но прижанэн, кай кадэла трин Муя, када ек» (Нэви британско инцыклапедия).
ЧАЧИМОС АНДА БИБЛИЯ.
О Иисусо никала на сыстояспэ пэстирэ Дадэса и на ԥэнэнас, кай во, сар Дэл. Наоборот, во ԥэнэнас: «Мэ жав каринг мэрно Дад, важ кода кай во май баро мандар» (Иоанна 14:28). Инке о Иисусо ԥэндя еқэ пэстирэ ученикости: «Мэ жав каринг мэрно Дад и тумаро Дад и каринг мэрно Дэл и тумаро Дэл» (Иоанна 20:17).
О свынто духо, када най личность. Андэ Библия ԥэнэнпэ, кай пэ пэрви христианоря «сжыля о свынто духо». Инке о Дэл обещял: «Мэ дава пэско свынто духо разнонэ манушэнди» (Деяния 2:1— 4, 17). О свынто духо, када най ек анда Троица. Када лэ Дэвлэско зор.
ВАСО КАДА ВАЖНО?
Сар ԥэнэн и рашая анда католическо қандири о Карло Ранеро и Герберто Форгримлеро, кай «Троица, када сикрето...саво нэвозможно тэ уӷанэс, если пала када на авэла росԥэндо, и дажэ посли кода, сар авэла росԥэндо всаек нэ можэт тэ авэл полностью понятно». Моӷли тумэ тэ полюбин кодэлэс, пала кастэ нэвозможно тэ уӷанэн или тэ полэн? Сар дицол, кай кода, со сытярэн пала Троица, када на дэл тэ уӷанэн и тэ полюбин лэ Дэвлэс.
Кадяжэ и учения пала Троица на дэлас лэ Маркости тэ уӷанэн пала Дэл, лэстирэ алава запистромэ андэ пэрво статья. Во ԥэнэн: «Мэ гиндосаравас, кай о Дэл на камэл, кай мэ лэс тэ ӷанав, и када инке май фартэ мандар дурярэлас лэс. И о Дэл сас сар варисаво баро сикрето и каринг лэстэ нисар на пашоса». Но «Во [о Дэл] вся терэл па порядко» (1 Коринфянам 14:33). Во на гаравэл пэс амэндар. Во камэл, кай амэ тэ ӷанас лэс. О Иисусо ԥэндя: «Амэ тэлювас кодэлэсти, со ӷанас» (Иоанна 4:22).
О Марко ԥэнэн: «Кала мэ полэм, кай о Дэл када най Троица, тоди мэ смоӷ тэ авав май пашэ каринг лэстэ». Если о Иегова важ амэндэ чачуно, ай най варисави нэ знокомо личность, тоди амэнди авэла май вушэро лэс тэ любисарас. «Ко на любий, кодэва на уӷангля лэ Дэвлэс,— ԥэнэнпэ андэ Библия,— важ кода кай о Дэл исин любовь» (1 Иоанна 4:8).
