47 ӶЛАВА

Ӷотово мэ тэ болдював?

ВОСПРОИЗВЕСТИ

Ту ужэ бут со уӷанглян анда Библия пала Иегова и дэсо ужэ парудян андэ пэстири жызня, кай тэ уӷодис лэ Дэвлэсти. Но всаек тут можэт варисо ритярэл, кай ту пока на дэс алав лэ Иеговасти тэ жувэс важ лэстэ и тэ болдёс. Андэ кадэя ӷлава амэ подаса дума, васо кацаво можэт тэ авэл и со кадэлэса тэ терэс.

1. Трэбуй о мануш вся тэ ӷанэн анда Библия, кай тэ болдёл?

Англа кода, сар тэ болдёс, ту трэбуй драго тэ полэс о чачимос (1 Тимофею 2:4). Када на сыкавэл, кай ту трэбуй тэ ӷанэс вся анда Библия. Дажэ кодэла, ко дэлмут болделя, всаек на парашэн тэ уӷанэн варисо нэво анда Библия (Колоссянам 1:9, 10). Но ту трэбуй драго тэ полэс ӷлавно, пала со сытярэл и Библия. И старейшыноря анда собрания поможына тути тэ полэс, ӷотово ту тэ болдёс чи най.

2. Со трэбуй тэ стерэс англа кода, сар тэ болдёс?

Андэ Библия пистромэ, кай англа кода, сар тэ болдёл, о мануш трэбуй тэ каийпэ и тэ парувэл пэстири жызня. (Адиносар Деяния 3:19.) Сар када тэ полэс? Можэт варикала ту терэсас нэправильно и акана тути по ди ԥарэс кодэлэстар и ту мангэспэ лэ Иеговасти, кай во тут тэ простий. Инке трэбуй серьёзно тэ ришыс важ пэстэ, кай ту лэса тэ ритярэс лэ Иеговаско законо и на терэса кода, со англа лэстэ бэзэх. Кадяжэ трэбуй тэ ԥирэс пэ собрании и тэ росԥэнэс пала Дэл аврэнца ԥралэнца и ԥэянца.

3. Васо на трэбуй тэ дарас тэ болдёс?

Дэко дарал, кай нэ сможэт тэ зритярэл о алав тэ жувэл важ о Иегова. Но трэбуй тэ полас, кай амэ всаек ласа тэ терас варисо най кадя. Дажэ и мурша и жувля андэ дэлмутни время, савэ ритярэнас лэ Дэвлэско законо, всаек дэкала шылинаспэ. Но о Иегова и на аштярэл амэндар, кай амэ тэ авас идеальни андэ вся (Псалом 103:13, 14). Лэско ди фартэ радуийпэ, кала во диқэл, кай ту терэс вся, со па тиро зор, кай тэ кандэс лэс! И во точно поможыя тути. О Иегова камэл, кай ту тэ авэс уверено, кай нисо и нико нэ сможэт тэ стерэл кадя, кай о Дэл тэ парашэл тэ любий тут. (Адиносар Римлянам 8:38, 39.)

УӶАНАМ МАЙ БУТ

Андэ кадэя ӷлава амэ уӷанаса, сар кода, кай ту ӷанэс лэ Иеговас и ӷанэс, кай во подритярэл тут, поможыя тэ улэс вся, со на дэл тути тэ болдёс.

4. Уӷан лэ Иеговас май драго

Пэ скати дэ драго тути трэбуй тэ ӷанэс лэ Иеговас, кай тэ болдёс? Трэбуй кадя лэс тэ ӷанэс, кай тэ полюбис лэс и тэ закамэс тэ терэс важ лэстэ кода, состар лэско ди лошавэла. Диқам о ВИДЕО и уӷанам, со поможысардя тэ болдён лэ манушэнди анда разни страны. И потом подам дума пала вопросо, саво май тэлэ.

ВИДЕО: «Со трэбуй, кай тэ болдёс» (3:56)

Со поможысардя кадэлэ манушэнди тэ болдён?

Адиносарам Римлянам 12:2 и подам дума пала вопросоря, савэ май тэлэ.

Патяс ту, кай вся, сости сытярэл и Библия, када чачимос и кай лэ Иеговастирэ свидетеля росԥэнэн чачимос па Библия?
Если най, тоди со ту можэш тэ стерэс, кай точно тэ ӷанэс, кай када чачимос?

5. На домэк, кай варисо тэ на мэкэл тут тэ болдёс!

Сар амэ дас алав лэ Иеговасти и болдювас, амэндэ всаворэндэ исин пэско ԥаримос. Акэ саво ԥаримос сас еқа жувлятэ. Диқам о ВИДЕО и подам дума пала вопросоря, савэ май тэлэ.

ВИДЕО: «Любовь каринг о Иегова улэл любо ԥаримос» (5:22)

Со на дэлас кадэла манушняти тэ болдёл?
Сар любовь каринг о Иегова поможысардя лати тэ виритярэл пэско ԥаримос?

Адиносарам Притчи 29:25 и 2 Тимофею 1:7 и подам дума пала вопросо, саво май тэлэ.

Со поможыя тэ авас смили и тэ на дарас?

6. Патя, кай о Иегова поможыя тути

О Иегова поможыя тути тэ жувэс па лэско законо. Диқам о ВИДЕО и подам дума пала вопросоря, савэ май тэлэ.

ВИДЕО: «О Дэл Иегова поможыя тути» (2:50)

Со на дэлас кадэлэ муршэсти тэ болдёл?
Сар во сытеля тэ патял лэ Иеговасти?

Адиносарам Исайя 41:10, 13 и подам дума пала вопросо, саво май тэлэ.

Васо ту уверено, кай ту зритярэса пэско алав тэ жувэс важ о Иегова?

7. Цэнисар май фартэ кода, кай о Иегова тут любий

Со май бут ту лэса тэ гиндос, сар дэ фартэ тут любий о Иегова, со май фартэ ту камэса тэ служыс лэсти вечно. Адиносарам Псалом 40:5 и подам дума пала вопросо, саво май тэлэ.

Пала савэ лэ Иеговастирэ блаӷословении ту фартэ блаӷодарно?

О пророко Иеремия фартэ любияс лэ Иеговас и Писания. И важ лэстэ сас бари бах, кай лэс приақардэ лэ Иеговастирэ алавэса. Во ԥэндя: «Тирэ алавэстар мэрно ди лошавэл и фартэ радуийпэ, важ кода кай ман приақардэ тирэ алавэса, Иегова» (Иеремия 15:16). Подам дума пала вопросоря, савэ май тэлэ.