1.  Со када «Вавилоно Велико»?

2.  Кала авеля о Христос?

3.  Личения, андэ сави исин рат

4.  Кала моӷут о хулай и хулаи тэ жувэн отдельно ек еқэстар?

5.  Празникоря

6.  Ԥаро инфекцыоно насвалимос, саво можэт тэ пэрэдэлпэ аврэсти

7.  Вся, со сԥангло лэ ловэнца и ла бутяса и юридически вопросоря

 1. Со када «Вавилоно Велико»?

«Вавилоно Велико», када всаворэ хохавнэ веры (Откровение 17:5). Катар амэ када ӷанас?

• Вавилоно Велико исин па вся и ԥув. Андэ Библия пистромэ, кай о Вавилоно Велико (када всаворэ хохавнэ веры) бэшэл пэ «бут народоря, [и] нацыи» и кай во «хулаий пэ всаворэ царёря пэ ԥув» (Откровение 17:15, 18).

• Вавилоно Велико, када най политика и най коммерцыя. «И царёря пэ ԥув» и кодэла, «ко торӷуин» лэна тэ даран, кай вонэ кадяжэ, сар и хохавнэ веры, лэна «тэ ԥабон» (Откровение 18:9, 15).

• Вавилоно Велико хохавэл по Дэл. Пэр лэстэ ԥэнэнпэ «роспутно манушни», важ кода кай во терэл доӷовороря важ и ловэ или инке важ варисо лэ барэ манушэнца анда правительства (Откровение 17: 1, 2). И хохавнэ веры обдилярэн лэ манушэн анда всаворэ народоря. И хохавнэ веры дошалэ, кай умардэ бутэ манушэн (Откровение 18:23, 24).

Рисав каринг 13 ӷлава, 6 пункто

 2. Кала авеля о Христос?

Андэ Библия сас пистромэ, кай жы каринг и время, кала трэбуй сас тэ авэл о Христос, трэбуй тэ прожан 69 курте (Даниил 9:25).

• Кала залинэпэ 69 курте? Вонэ залинэпэ андо 455 бэрш жы кай о Иисусо. Андэ кодэя время андо Иерусалимо авеля о Неемия, кай «тэ ваздэл» о форо (Даниил 9:25; Неемия 2:1, 5—8).

• Скати жанас 69 курте? Андэ дэсавэ библейски пророчества, ек дес жал ек бэрш (Числа 14:34; Иезекииль 4:6). Вижал, сар кажно курко жал семь бэрш, тоди 69 «курте», када 483 года (69 умножыть пэ 7).

• Кала парашэлэ 69 курте? Кадэла курте залинэпэ андо 455 бэрш до н. э., жанас 483 года и парашэлэ андо 29 бэрш н. э. a Ворта андэ кадэва бэрш, о Иисусо болделя и ашэля Христос (Луки 3:1, 2, 21, 22).

Рисав каринг 15 ӷлава, 5 пункто

 3. Личения, андэ сави исин рат

Андэ дэсавэ медицынски процэдуры, кай тэ личин лэ манушэс, лэн лэско рат. Но дэсавэ личении най важ и христианоря. Например, и христианоря на пэрэшон никасти пэско рат. Кадяжэ вонэ на жан пэ кода, кай англа операцыя тэ сдэн о рат, кай потом лэсти тэ пэрэшон лэс (Второзаконие 15:23).

Но исин процэдуры, савэ о христианино можэт тэ терэл. Када тэ сдэл анализоря крови, гемодиализо, гемодилюцыя, тэ личийпэ через о апарато искуственого кровообращения и через о сел-сейверо. Кажно христианино екжэно видитэл, со во домэкэла тэ терэн лэстирэ ратэса, кала лэсти трэбуй авэла тэ сдэл и анализоря, или тэ жал пэ операцыя, или лэстэ авэла авэр личения. И врачоря моӷут по разному тэ терэн кадэла процэдуры. Кочай, кала о христианино камэл тэ сдэл анализоря, или англа операцыя, или кала лэсти трэбуй тэ прожал инке варисави личения, во трэбуй драго тэ уӷанэн, со о врачо терэла лэстирэ ратэса. Погиндосар пала када.

• И врачоря дэкала терэн кадя, кай набут о рат тэ вижал анда тила, и котэ лэс тердярэн пэ дэсави время. Но о рат на одлэн лэ манушэстар. Со мэ гиндосарав пала када, кадэва рат всаек инке мэрно или лэс трэбуй тэ вишон «пэ ԥув?» (Второзаконие 12:23, 24).

• Исин процэдура, кала лэн набут о рат, дэсо парувэн андэр лэстэ и кадэва рат упалэ шон андэ тила. Мэрни совесть мэкэла ман кадя тэ личисавав?

Рисав каринг 39 ӷлава, 3 пункто

 4. Кала моӷут о хулай и хулаи тэ жувэн отдельно ек еқэстар?

Андэ Библия пистромэ, кай о хулай или и хулаи тэ на ужантар ек еқэстар. Андэр латэ ворта ԥэнэнпэ, если о мануш ужалатар лэ ерестар, во нэ можэт упалэ тэ жэнийпэ (1 Коринфянам 7:10, 11). Но исин дэсавэ ситуацыи, через савэ о хулай чи и хулаи моӷут тэ жувэн отдельно ек еқэстар.

• О хулай отԥэндёл тэ заботийпэ пала пэско ери. Через када о ери ашэлпэ би ловэнго и би хамаско (1 Тимофею 5:8).

• Фартэ жэстоко обжанпэ. Через када о мануш андо ери можэт фартэ тэ занасвавэл или тэ авэл опасность важ лэстири жызня (Галатам 5:19—21).

• Ек анда ери, о хулай чи и хулаи, тасавэл, кай во чи вой тэ на полэл и тэ на кандэл лэ Иеговас. Через када, о христианино, нэ можэт тэ служый лэ Иеговасти (Деяния 5:29).

Рисав каринг 42 ӷлава, 3 пункто

  5. Празникоря

И христианоря на терэн и празникоря, савэ на чалён лэ Иеговасти. О христианино трэбуй екжэно тэ витидэл, со во лэла тэ терэл, кала жана кацавэ празникоря. Кай правильно тэ витидэл, лэсти поможыя лэстири совесть, сави во сытярэл па Библия.

• Со тэ ԥэнэс, кала тут варико поздравляет празникоса? Ту можэш тэ ԥэнэс «наис». Ай кала о мануш камэл тэ уӷанэн, васо ту на терэс кадэва празнико, можэш лэсти тэ росԥэнэс.

• Со тэ терэс, если тиро хулай чи хулаи, савэ на полэн лэ Иеговас, ԥэнэн, кай ту тэ жас по празнико кай о родо? Если тири совесть мэкэла тут тэ жас, тоди ту май англал можэш тэ ԥэнэс, кай если ту жаса, ту на лэса тэ терэс по празнико кода, со жыля анда хохавни вера.

• Со тэ терэс, если о начальнико камэл тэ дэл тути премия каринг о празнико? Погиндосар акэ пала со. Тиро начальнико гиндой, кай кадэла ловэ во дэл каринг о празнико? Или во камэл тэ сыкавэл тути, кай блаӷодарно, кай ту драго терэс пэсти бути? Трэбуй ту тэ отԥэндёс кадэлэ ловэндар чи най? Ту екжэно трэбуй тэ витидэс, лэса ту лэн чи най.

• Со тэ терэс, кала тути дарин подарко по празнико? О мануш можэт тути тэ ԥэнэн: «Мэ ӷанав, кай ту на прижанэс кадэва празнико, но манди закамляпэ тэ дав тути кадэва подарко». Можэт кадэлэса, во камэл тэ шол тут сама или камэл тэ диқэл, пэ скати дэ фартэ ту приритярдёс кодэлэсти, андэр со патяс. Или о мануш камэл кадэлэ подаркоса тэ ԥэнэн, кай ту тэ терэс варисо важ о празнико. Погиндосар пала вся када и екжэно витидэ, тэ лэс кадэва подарко чи най. Анда кода, со ту витидэса, трэбуй тэ дицол, кай ту кандэс лэ Иеговас и камэс, кай тутэ тэ ашэлпэ вужи совесть (Деяния 23:1).

Рисав каринг 44 ӷлава, 1 пункто

 6. Ԥаро инфекцыоно насвалимос, саво можэт тэ пэрэдэлпэ аврэсти

Если манушэстэ исин насвалимос или во гиндой, кай можэт лэстэ исин варисави инфекцыя, сави можэт тэ пэрэдэлпэ аврэнди, тоди во трэбуй тэ терэл вся, кай тэ фэрий аврэ манушэн, важ кода кай любий лэн. Амэ камас тэ терас кадя, сар пистромэ андэ лэ Дэвлэско законо: «Любисар манушэн, сар корко пэс» (Римлянам 13:8—10).

Тоди сар тэ фэрис аврэн? Кала о мануш насвало, во на лэла тэ пашол кай и мануша, кай тэ облэл лэн или тэ чуминдэл. Кадяжэ во на лэла тэ холявэл, если варико на ақарэл лэс пэстэ цэрэ, через кода кай камэл тэ фэрий пэско ери. Инке кацаво мануш, англа кода сар тэ болдёл, трэбуй обязательно тэ ԥэнэн координатору совета старейшын пала пэско насвалимос. Кадя и ԥрала фэрина аврэн ԥралэн и ԥэян, савэ лэна тэ болдён кодэлэ манушэса. О мануш, саво моӷ тэ насвавэл найлащя болезняса, трэбуй тэ здэл о рат пэ анализоря англа кода, сар лэла встречаца варикаса. Кадя во сыкавэла, кай заботийпэ пала авэр и терэл, сар запистромэ андэ Филиппийцам 2:4: «Терэн драго най кати важ пэстэ, ай и важ авэр».

Рисав каринг 56 ӷлава, 2 пункто

 7. Вся, со сԥангло лэ ловэнца и ла бутяса и юридически вопросоря

Вся, со сԥангло лэ ловэнца и ла бутяса, драго если вся авэла па лила. Кацаво доӷоворо трэбуй тэ авэл дажэ кай и христианоря. Тоди авэла май набут проблемы (Иеремия 32:9—12). Но если дажэ проблемы авэна, тоди и христианоря трэбуй тэ ришают лэн ӥто, мирно и кати ек еқэса.

Ай со тэ терэс, если варисо зажал андэ бари дила? Например, када кала хохавэн лэ манушэс или хохавэн по мануш. (Адиносарам Матфея 18:15—17.) О Иисусо ворта ԥэндя, кай трэбуй тэ терэн трин шаӷоря.

1. 1) Спэрва тэ старыинпэ тэ ришын и проблема кати машкар пэстэ (Диқэн о стихо 15.)

2. 2) Если на вижала, тоди тэ мангэн помощь кай ек или дуй христианоря, савэндэ лащи дружба лэ Иеговаса (Диқэн о стихо 16.)

3. 3) И кати посли вся када, если и проблема всаек ашэляпэ, можно тэ жан каринг и старейшыноря (Диқэн о стихо 17.)

Андэ бут ситуацыи амэнди на трэбуй тэ подас заявления андэ рая по ԥрал или ԥэй анда собрания, кай тэ на жал нисаво алав ни по Иегова, ни пэ собрания (1 Коринфянам 6:1—8). Но дэкала лэ христианиности прижалпэ тэ подэл по сындо. Када можэт тэ авэл кацави дила, кай тэ лэл опекунство, кала о мануш розвэдийпэ, кала дила жал пала алименты, или пала страхови выплаты, пала банкротство, ай инке кала и дума жал пала завещяния. Если кай о мануш исин када и во жала андо сындо, кай тэ ришый кадэла вопросоря, тоди во на терэла нисо против кода, со пистромэ андэ Библия.

Кадяжэ о христианино на терэл нисо против лэ Дэвлэско законо, кала жал андэ ваздии тэ росԥэнэн, кай лэстар чи латар асаепэ или варикас умардэ или обчордэ, ай кадяжэ, кала бэятостар асаепэ.

Рисав каринг 56 ӷлава, 3 пункто