Кода, со ту уӷанглян анда кадэя брашура пала Дэл, поможысардя тути инке май фартэ тэ любис лэ Иеговас. Но трэбуй тэ терэс вся, кай тири любовь тэ авэл май бари (1 Петра 2:2). Если ту лэса тэ уӷанэс пала Дэл и тэ сытёс па Библия, тоди ту жувэса вечно. (Адиносар Иоанна 17:3; Иуды 21.)

Со май бут ту лэса тэ уӷанэс пала Дэл, со май фартэ ту лэса тэ патяс лэсти. Када поможыя тути тэ кандэс лэ Дэвлэс (Евреям 11:1, 6). Тоди ту закамэса анда оди тэ каиспэ и тэ парудёс андэ лащи риг. (Адиносар Деяния 3:19.)

Канешно, ту закамэса тэ росԥэнэс аврэнди пала кода, со уӷанглян, важ кода кай всаворэнди амэнди чалёл тэ росԥэнас и лашэ новости. Если ту на парашэса тэ уӷанэс пала Дэл, тоди ту сытёса тэ росԥэнэс па Библия, андэр со ту патяс. (Адиносар Римлянам 10:13—15.)

Бут мануша спэрва росԥэнэн и лащи новость лэ чаченди и лэ друӷонэнди. Дэ дума ковлэс и на ԥэн аврэнди, кай лэндири вера нэправильно. Фэдэр росԥэн лэнди пала кода, со камэл тэ стерэл о Дэл. На бистэр, кай о мануш май фартэ шол сама пэ кода, сар ту пэс андярэс, ай най со дэс дума. (Адиносар 2 Тимофею 2:24, 25.)

Ту авэса май пашэ каринг о Дэл, если сытёса па Библия. Прожала время и ту ашэса лашо лэ Иеговаско друӷо. Ту дажэ сможэш тэ авэс андэ лэ Дэвлэско ери. (Адиносар 2 Коринфянам 6:18.)

Если ту камэс тэ ашэс лэ Дэвлэско друӷо, сытю па Библия (Евреям 5:13, 14). Манг варикас анда лэ Иеговастирэ свидетеля тэ сытярэл тут па Библия. Андэ када поможыя и книжка «Сости сытярэл амэн и Библия?». Со май бут ту лэса тэ уӷанэс анда Библия, со май бахтали и май радосно жызня тутэ авэла. (Адиносар Псалом 1:1—3; 73:27, 28.)

И лащи новость жал лэ бахталэ Дэвлэстар лэ Иеговастар. Ту сможэш тэ ашэс май пашэ каринг о Дэл, если авэса машкар лэско народо (Евреям 10:24, 25). Кала ту радуис лэ Иеговас пэстиря диласа, ту ашэс май пашэ каринг и чачуни вечно жызня. Тер вся, кай тири дружба лэ Дэвлэса тэ авэл май састи. Када со май куч, со кати можэт тэ авэл кай о мануш андэ жызня! (Адиносар 1 Тимофею 1:11; 6:19.)