ПЭРЭЖЫВАНИИ исин кажнонэстэ, дажэ кодэлэндэ, ко служый лэ Дэвлэсти. Акэ со ԥэндя о царё Давидо: «Мандэ слинэ гиндоря, савэндар ԥарэс по ди» (Псалом 94:19). Ай инке о Исусо ԥэндя, кай андэ послидни деса через пэстирэ заботы тэ служын лэ Дэвлэсти авэла май ԥарэс (Лука 21:34). Ай со ту можэш тэ ԥэнэс пала пэстэ? Ԥарэс тути кодэлэстар, кай ту нэ можэш тэ затерэс ловэ, кай тутэ исин трудности андо ери или проблемы лэ зорэса? Сар о Иегова можэт тэ поможый тути андэ када?

Амэ нэ сможэм екжэнэ тэ виритярас вся пэско ԥаримос. О апостало Павло пистросардя: «Пар мэндэ тасавэн всаворэ ригэндар... амэ на ӷанас, каринг тэ дас». Но кадяжэ во ԥэндя: «Амэ най совсем би зорэско... амэ можэм тэ надеисавас... амэ жундэ». Со поможыя амэнди вся тэ виритярас? «Зор, саво май баро лэ манушэндирэ зорэстар». Кадэва зор жал лэ Дэвлэстар лэ Иеговастар (2 Каринфо 4:7—9).

Погиндосар, сар о Иегова дэлас тути «зор, саво май баро лэ манушэндирэ зорэстар». Можэт, тутэ сас кацаво: пэ собрания ту ашундян и дума па Библия и полян, кай о Иегова на парашэл тут тэ любий. Тутэ сас бари блаӷодарность каринг о Иегова. И кала ту росԥэнэсас аврэнди пала лащи жызня андо раё пэ ԥув, хэба тири вера на ашэлас май састи? Кала амэ ԥирас пэ собрании и росԥэнас аврэнди, андэр со патяс, амэ лас зор, саво поможый амэнди тэ виритярас о ԥаримос. И хоть амэндэ ашэнпэ бут пэрэжывании, но всаек ашэл спокойно по ди, и амэ можэм тэ служысарас лэ Иеговасти радостяса.

О Иегова ԥэнэн, кай амэндэ тэ авэл по пэрво ҭан лэско Царство и амэ тэ терас вся, кай амэндэ тэ авэл лэса лащи дружба (Матфеё 6:33; Лука 13:24). Но, можэт, тутэ кадя бут дила, кай ту на ӷанэс, пала со тэ хутилдёс. Например, тутар одлэл бут зор, кай через и вера пэр тутэ тасавэл о родо или и мануша пэ бути. Или тутэ найлашо зор и исин ԥаримос андо ери. Ай можэт, через и бути тутэ мало время и зор важ и собрания? И через вся када ту фартэ вицыёс. Тоди тути можэт тэ здэлпэ, кай о Иегова аштярэл тутар кода, со най па тиро зор.

Но када най кадя! О Иегова амэн полэл, во на аштярэл амэндар кода, со амэ нэ сможэм тэ стерас. Кай тэ лас зор и тэ ашэл май спокойно по ди, трэбуй время. И о Иегова када полэл (Псалом 103:13, 14).

Вспомни, сар о Иегова позаботисайля пала пророко Илья. Кала о Илья пэрэдарайля, умэкля и вас и занашля андэ пустыня, о Иегова на ля лэс тэ дошалярэл и тэ ԥэнэн, кай во тэ рийпэ каринг лэ Дэвлэстири дила. Наоборот, дувар о Иегова бишалэлас каринг лэстэ лэ анӷелос, саво полокорэс жунгавэлас лэс и дэлас лэсти тэ хал. Но дажэ кала прожылэ 40 деса, о Илья всаек пэрэжывал и даралас. Сар инке  о Иегова поможысардя лэсти? Во сыкадя лэ Ильясти, кай лэстэ исин зор тэ фэрий лэс. Кала во дя дума лэса, лэстэ сас «спокойно, тихо ӷолосо», и инке во ԥэндя, кай исин тысячи мануша, савэ тожэ тэлён лэ чачунэ Дэвлэсти. Посли када прожыля набут время, и о пророко Илья ля зор и упалэ ля анда вся оди тэ служый лэ Иеговасти (1 Царей 19:1—19). Сости амэ анда када сытювас? Кала о Илья умэклясас и вас через пэстирэ пэрэжывании, о Иегова поля, жалуисардя лэс и сыкадя пэстири терпения, кала поможыяс лэсти. О Иегова на паруделя, во кадяжэ заботийпэ и пала амэндэ.

Кала прилэс ришэния, скати ту лэса тэ терэс важ о Иегова, драго погиндосар, скати тутэ щяс зор. На сыстосар кода, со ту терэсас варикала, кодэлэса, со ту можэш тэ терэс акана. Кадэва гиндо драго дицол па примеро лэ спорцменоса, саво долӷо нэ тренировался. Если сас баро перерыво, тоди во нэ можэт тэ дэл пэсти сразу бари наӷрузка. Спэрва во трэбуй тэ стол пэсти найбарэ цэли. И христианоря шонпэ пэ спорцменоря. Кай тэ получин и вечно жызня, вонэ тожэ стон пэсти цэли па пэско зор (1 Каринфо 9:24—27). Можэт, и тути тэ стос англа пэстэ варисави цэль, сави пашарэла тут каринг о Иегова? Например, лэ тэ ԥирэс пэ собрании. Манг лэ Иеговас тэ поможый тути андэ када. И кала тутэ понабут упалэ появияпэ зор тэ служыс лэ Иеговасти, тоди ту полэса и уӷанэса, пэскати дэ добро о Иегова (Псалом 34:8). Никала на бистэр: о Иегова фартэ цэний вся, со ту терэс, важ кода кай любис лэс, дажэ если када совсем набут (Лука 21:1—4).

Сар о Иегова придя зор ла ԥьяти Джун тэ рийпэ каринг лэстэ? Вой ԥэнэн: «Мэ вся и время мангаваспэ лэ Иеговасти и мангавас лэстар помощь. Мэрни бори ԥэндя манди, кай андэ амаро форо авэла канӷрэсо, и мэ закамлэм тэ жав. Сар жэ сас драго упалэ тэ авав машкар лэ Иеговаско народо! Манди кадя трэбуй сас кадэва зор. Акана мэ упалэ радостяса служысарав лэ Иеговасти, и андэ мэрни жызня ашэля инке май бут смысло, чем сас. Акана мэ полэм, сар дэ фартэ манди трэбуй и ԥрала и ԥэя, и би лэнго мэ нэ смоӷу. Мэ кацави лошали, кай инке сас время тэ рисавав».