Кучутно ԥрал или ԥэй!

Сар ту ӷанэс, андэ Библия бут дэлпэ дума пала мануша. Бут андар лэндэ служынас лэ Иеговасти, и лэндэ, кадя жэ сар и амэндэ, сас пэско ԥаримос. Бутэндэ сас кацаво жэ по ди, сар и амэндэ (Иаково 5:17). Дэсавэнди сас фартэ ԥарэс через и проблемы и пэрэжывании. Варикастэ дуқалас оди кодэлэстар, сар лэнца обжылэпэ о родо или кодэла, каса вонэ служынас лэ Иеговасти. Ай варикасти сас ԥарэс по ди через и ошыбки, савэ вонэ терэнас, и кай дошалярэнас пэс.

Но бистэрдэ вонэ через кадэва ԥаримос лэ Иеговас? Най. Дэсавэндэ по ди сас кацаво жэ, сар кай о псалмопевцо, саво андэ молитва ԥэндя кацавэ алава: «Мэ заблудисайлэм, сар о бакроро, саво хасарделя. Виарак пэстирэ служытелёс, важ кода кай мэ на бистэрдэм тирэ законоря» (Псалом 119:176). Можэт, и тутэ сас кацаво по ди?

О Иегова никала на бистрэл пэстирэ служытелёнэн, савэ оджылэ лэстар. Во, наоборот, ақарэл лэн тэ ринпэ каринг лэстэ, и часто во терэл када через варикастэ анда собрания. Згиндон, сар о Иегова поможысардя пэстирэ служытелёсти лэ Иовости, савэстэ андэ ек время сас бут ԥаримос. Во хасардя пэско хабэ, лэ чачен и фартэ занасвайля. Ай инке лэско ди пусавэнас и обидни алава, савэ ԥэнэнас кодэла, ко трэбуй сас лэс тэ подритярэл. И хоть дэсави время во нэправильно полэлас, васо пэр лэстэ динэ всаворэ кадэла биды, но во на оджыля лэ Иеговастар (Иов 1:22; 2:10). Сар о Иегова поможысардя лэсти тэ на здэлпэ через о ԥаримос?

Во поможысардя лэсти через о Елиуё, во тожэ служыяс лэ Иеговасти. Спэрва о Иово виԥэндя вся пэстири дук, сави лэстэ сас по ди, ай о Елиуё драго лэс ашунэлас, и кати посли када во ля варисо тэ ԥэнэн. Со во ԥэндя? Во на ля тэ сындой лэ Иовос, на ля тэ лажаварэл лэс, кай через када во тэ парудёл. О Елиуё на гиндояс, кай во май лашо или май праведно лэ Иовостар. Када сас най кадя! О Дэл дажэ побудисардя лэс тэ ԥэнэн кацавэ алава: «Англа чачуно Дэл мэ кацаво жэ, сар и ту, мэ кадяжэ создано анда ӷлина. Тути на трэбуй мандар тэ дарас, мэрнэ алава на авэна важ тутэ фартэ ԥарэ» (Иов 33:6, 7). Дицол, кай о Елиуё дэлас дума анда ди и камэлас тэ подритярэл лэ Иовос, ай най тэ стерэл лэсти инке май ԥарэс.

Мангас тут, сэр, кай и гиндоря андэ кадэя брашура подтидэ кадя жэ, сар дэлас дума о Елиуё, кай тэ подритярас, ай най кай тэ стерас май ԥарэс тути. Спэрва амэ драго виашунасас кодэлэн, ко оджыля лэ Иеговастар, и старысавасас май драго тэ полас лэндирэ обстоятельства (Притчи 18:13). Потом амэ мангасаспэ и виарақлям примероря анда Библия пала мануша, савэндэ тожэ сас кацаво жэ ԥаримос, сар и тутэ. Амэ диқлям, сар о Иегова поможысардя лэнди. Потом амэ ришыли тэ стидас примероря анда дэлмутни время и анда амарэ деса андэ кадэя брашура. Анда ди мангас тут, проадиносар кадэя брашура, виарак важ пэстэ лашэ гиндоря, савэ подритярэна тут. Ай инке камас тэ ԥэнас тути, кай амэ анда вся ди любисарас тут!

Руководящё совето лэ Иеговастирэ свидетелёнэнго.