ЧАСТЬ 4
Кала дошалярэс пэс: «вивужар ман лэ бэзэхэстар»
«Мэ виарақлэм пэсти нэви бути, и через када амаро ери ля тэ жувэл май андо баро достатко. Но потом мэ лэм тэ ӷуляв андэ фартэ найлащи дила. Инке мэ лэм тэ став и празникоря, тэ ӷуляв андэ политика и дажэ тэ ԥирав андэ қандири. Мэ на служысаравас лэ Иеговасти 40 бэрш. Со май бут время прожалас, со май фартэ манди здэласпэ, кай о Иегова ман на простия. Тай и мэ нэ моӷла пэс тэ простисарав. Мэ ӷанавас о чачимос, но зжылэм па кадэва правильно дром» (Марта).
КАЛА о мануш фартэ пэс дошалярэл, када анэн лэсти бут ԥаримос. О царё Давидо пистросардя: «Май вучес мэрнэ шэрэстар вазгляпэ мэрно бэзэх; во сар нэвыносимо ӷрузо, фартэ ԥаро важ мандэ» (Псалом 38:4). Дэсавэ христианонэнди фартэ ԥарэс по ди лэ гиндонэндар, кай о Иегова лэн никала на простия (2 Каринфо 2:7). Если ту стердян фартэ баро бэзэх, тутэ моӷут тэ авэн кацавэ жэ гиндоря и тэ здэлпэ, кай ту будэр никала нэ сможэш тэ пашос каринг о Иегова. Но трэбуй кадя тэ гиндос? Канешно, най!
«Авэн и розласапэ машкар пэстэ»
О Иегова на отшол пэстар лэ манушэн, савэ каинпэ. О Исусо росԥэндя примеро пала шаво, саво ужыля цэрал и розындярдя всаворэ ловэ. Во ужыля анда цэр и ля тэ андярэл роспутно жызня. Но через дэсави время во каисайля и закамля тэ рийпэ цэрэ. «О дад дурал додиқля лэс, и лэсти ашэля жалко пэстирэ шавэс. Во прастая каринг лэстэ, обля лэс и чуминдя» (Лука 15:11—20). О Исусо сыстосардя лэ Иеговас кацавэ любящёнэ дадэса. Можэт, и тутэ кацаво по ди, кай ту дур лэ Иеговастар. Но камэс ту тэ пашос каринг лэстэ? Сар о дад анда лэ Исусоско примеро, о Иегова любий, полэл и жалуий тут и фартэ аштярэл, кала ту рисапэ каринг лэстэ.
Ай можэт, ту гиндос, кай тирэ бэзэха фартэ барэ, ԥарэ или лэн кадя бут, кай ту на ашэс, кай о Иегова тут тэ простий. Шув сама, со ԥэнэнпэ андэ Исайя 1:18: «Авэн и розласапэ машкар пэстэ. Хоть акана тумарэ ӷрехоря сар лоли материя, вонэ ашэна парнэ, сар ӥв. И хоть вонэ, сар лоли материя, ашэна сар парни шэрсть». О Иегова можэт тэ простий дажэ кацаво бэзэх, саво шолпэ по лоло пятно пэ парни ӥда, саво на отхаладёл.
О Иегова на камэл, кай ту постояно пэс тэ дошалярэс через кода, со ту стердян. Со ту можэш тэ стерэс, кай тути тэ ашэл май вушэро по ди и кай о Дэл тут тэ простий? Например, о царё Давидо акэ со ришыл тэ стерэл: «Росԥэнава лэ Иеговасти пала всаворэ мэрнэ ӷрехоря» (Псалом 32:5). На бистэр, кай о Иегова камэл, кай ту тэ мангэспэ лэсти. Во ԥэнэн: «Ав и розласапэ». Стер, сар во мангэл. Да, прижандюв андэ пэско бэзэх и росԥэн лэ Иеговасти, со тутэ по ди. О Давидо най еқвар андэ пэстири жызня чуствовал, кай о Иегова лэс жалуий. Важ када о Давидо с увереностью мангэласпэ каринг о Иегова: «Вивужар ман лэ бэзэхэстар. ...Ту на отԥэндёса лэ одестар, саво каийпэ и савэсти фартэ ԥарэс» (Псалом 51:2, 17).
Инке о Давидо приля помощь лэ Дэвлэстар через о пророко Нафано (2 Самуила 12:13). Андэ амарэ деса исин барэдэр ԥрала, савэн сытярэн, сар тэ подритярэн лэ манушэн андэ собрания, савэ каинпэ, и ко камэл тэ рий пэстири дружба лэ Иеговаса. Если тэ поджас каринг бэрэдэр ԥрала, вонэ розлэна туса гиндоря анда Библия и мангэнапэ пала тутэ анда вся оди лэ Дэвлэсти. Када поможыя тути упалэ тэ авэл спокойство по ди. Посли дума лэ ԥралэнца ту почуствуеш, кай о Иегова кабута ваздэл тут. И дук по ди набут оджала, ай можэт, дажэ прожала совсем (Иаково 5:14—16).
О Иегова на камэл, кай ту тэ чуствуеш пэс дошалэса
«Бахтало мануш, савэсти простисардэ о бэзэх»
Можэт, тути здэлпэ, кай фартэ ԥарэс тэ прижандёс андэ пэстирэ бэзэха лэ Иеговасти и тэ поджас каринг и барэдэр ԥрала. Май ӥто всаворэстар, кай о Давидо сас кацаво жэ по ди. Дэсави время во на росԥэнэнас пала пэско бэзэх (Псалом 32:3). Но потом во поля, сар дэ важно тэ прижандёс андэ пэстирэ бэзэха и тэ парудёс.
Кала о Давидо када стердя, лэстэ появисайля радость андо ди. Во пистросардя: «Бахтало мануш, савэсти простисардэ о бэзэх и каско бэзэх на лэна тэ сэрэн» (Псалом 32:1). Кадяжэ о Давидо мангэласпэ: «Иегова, стер, кай мандэ тэ авэл муй тэ хвалисарав тут» (Псалом 51:15). И чаче, о Давидо сас фартэ блаӷодарно лэ Дэвлэсти, кай во лэс простисардя. Через када лэстэ упалэ появисайля жэлания тэ росԥэнэн аврэнди пала Иегова.
Сэр, кай о Иегова ақарэл амэн всаворэн: «Каинпэ и парудён, кай тэ простийпэ тумаро бэзэх и кай о Иегова тэ дэл тумэнди покоё» (Дила 3:19). Кадэла алава сыкавэн, кай о Иегова на камэл, кай ту тэ чуствуеш пэс дошалэса. Наоборот, во камэл, кай ту тэ служыс лэсти вужэ одеса и тэ росԥэнэс пала лэско замысло радостяса анда вся оди (Псалом 65:1—4).
Акэ сар сас кай и Марта. Вой росԥэнэн: «Мэрно шаво постояно бишалэлас манди журналоря „Сторожэво Башня“ и „Прошонпэ!“. Полокорэс мэ упалэ лэм тэ полав, саво сыно о Иегова. Май ԥарэс всаворэстар сас тэ мангавпэ лэ Иеговасти, кай во тэ простий мэрно бэзэх. Но мэ всаек када стердэм. На патялпэ, кай прожыля 40 бэрш, и кати потом мэ рисайлэм каринг о Иегова. Мэ жундо примеро, сар через бут бэрша мануш можэт тэ рийпэ каринг о Дэл, тэ служый лэсти и тэ чуствует пэр пэстэ лэстири любовь».
