Сар лэ Иеговастирэ свидетеля, амэ старысавас, кай амарэ еря, ай кадяжэ еря кай амарэ чаче тэ авэн састэ. Амэ полас, кай о Дэл создал лэ ерес (Бытие 2:21—24; Эфесянам 3:14, 15). Через и Библия во дэл кацавэ советоря, савэ поможын адес лэ манушэнди па вся люма и тэ фэрин пэстирэ бахталэ еря.

 Амэ прилас андэ жызня советоря анда Библия, важ кода кай вонэ поможын лэ хуласти, ла хулаяти, лэ родителёнэнди май фэдэр тэ терэн кода, со трэбуй андо ери (Притчи 31:10—31; Эфесянам 5:22—6:4; 1 Тимофею 5:8). Годявэрнэ советоря анда Библия поможын, кай андо ери, кай най всаворэ служын еқэ Дэвлэсти, кадяжэ тэ авэл бах (1 Петра 3:1, 2). Акэ со ԥэнэн дэсавэ най свидетеля, кастирэ хула́я и хулая́ ашэлэ лэ Иеговастирэ свидетеля.

•   «Пэрви шов шона, сар амэ жэнисайлям, амэ часто холярасас и на поласас ек еқэс. Но посли кода, сар Ивети ашэля лэ Иеговаско свидетелё, вой ля май фартэ тэ любий ман. Кода, кай вой кадя паруделяпэ, фэрисардя амаро брако» (Клауир, Бразилия).

•   «Кала мэрно хулай, савэс ақарэн Чанса, ля тэ сытёл па Библия лэ Иеговастирэ свидетелёнэнца, манди када на чалёлас, важ кода кай мэ гиндосаравас, кай вонэ розмарэн еря. Но прожыля и время, и мэ полэм, кай и Библия поможый, кай амаро брако тэ авэл инке май састо» (Агнесс, Замбия).

 Кала амэ сытярас лэ манушэн па Библия, амэ можэм тэ сыкавас, сар советоря анда Библия моӷут тэ поможын андэ жызня.

•   Драго тэ витидас лэ хулас чи ла хулая

•   «Тэ вижувэс» пэрво бэрш посли ябьяв

•   Тэ ладис лэ хуластирэ чи ла хулаятирэ родителёнэнца

•   Годявэрнэс тэ тратис и ловэ

•   Тэ парашэс тэ спорис

•   Тэ сытёс тэ простисарэс

•   Тэ сытярас лэ бэятонэн

 Трэбуй тэ прижанас, кай дэкала када анэн ԥаримос. Андо 1998 бэрш и компания Софрэс, сави залэлпэ кодэлэса, кай изучает, сар андярэн пэс и мануша, тердя выводо, кай кала ек мануш андо ери ашэл лэ Иеговаско свидетелё, када анэн ԥаримос кати андэ ек анда двацать еря.

 О Иисусо ԥэнэнас, кай кодэлэндэ, ко ритярэл лэско законо, дэкала авэла ԥаримос андо ери (Матфея 10:32—36). Ек историко, савэс ақарэн Вил Дюрант ԥэнэн, кай пэ вся бари Римско ԥув, пала «христианоря гиндонас, кай вонэ римон о миро андо ери». a И адес андэ када жэ дошалярэн лэ Иеговастирэ свидетелёнэн. Но па чачимастэ вонэ дошалэ андэ када?

 Европейско сындо, саво зашолпэ пала мануша, роздиқля кода, кай лэ Иеговастирэ свидетелёнэн дошалярэнас, кай вонэ розмарэн и еря, и шутя сама, кай причина андэ кода, кай андо ери кодэла, ко най свидетеля, на «камэн тэ стон патив по пэско родо и пэ лэстири вера». Андо сындо кадяжэ ԥэндэ: «Кацаво бывает андэ люби еря, кай и мануша ритярэн разни веры. И кай лэ Иеговастирэ свидетеля кадяжэ» b. Но дажэ кала тасавэн пэ свидетеля и на полэн лэн, вонэ пристон зор, кай тэ терэн, сар запистромэ андэ Библия: «Никасти на рин пала найлашимос. Терэн вся пэстиря ригатар, кай тэ авэл миро всаворэ манушэнца» (Римлянам 12:17, 18).

 Свидетеля кандэн лэ Дэвлэско законо анда Библия тэ вижан миростэ чи тэ жэнинпэ кати кодэлэнца, каса патян андо ек Дэл (1 Коринфянам 7:39). Када фартэ годявэрнэс. Пала када андо 2010 бэрш, андо журнало, кай розлэнаспэ вопросоря пала ери, ԥэнэнаспэ, кай «если андо ери хулай и хулаи патян андо ек Дэл и лэндэ ек вера», фартэ часто вонэ май драго полэн ек еқэс c.

 Но када на сыкавэл, кай лэ Иеговастирэ свидетеля трэбуй тэ росжанпэ, если хулай чи хулаи на полэл лэндири вера. Андэ Библия пистромэ: «Если кай о ԥрал исин хулаи, сави на патял лэса андо ек Дэл и вой соӷласно тэ жувэл лэса, мэк во на ашавэл ла. И жувли, савятэ о хулай на патял ласа андо ек Дэл, но камэл тэ жувэл ласа, мэк на ашавэл лэ хулас» (1 Коринфянам 7:12, 13). Лэ Иеговастирэ свидетеля терэн именно кадя.