Кала лэ Иеговастирэ свидетеля изучают и Библия, вонэ используют разни переводоря. Но май бут вонэ шон сама пэ «Библия. Нэвэ мироско переводо» (если вой исин пэ лэндири шыб), важ кода кай кадэва переводо точно и понятно и андэр лэстэ пистромэ лэ Дэвлэско алав.

•   Пистромэ лэ Дэвлэско алав. Дэсавэ мануша, савэ вимэкэн и Библия, найблаӷодарни кодэлэсти, касти трэбуй тэ авэн блаӷодарни. Например, андо ек библейско переводо пистромэ май бут чем 70 алава лэ манушэндирэ, савэ поможынас ла тэ вимэкэн. Но андэр латэ ни еқвар най пистромэ о алав кодэлэско, ко дя и Библия, лэ Дэвлэско лэ Иеговаско!

   Но андэ «Библия. Нэвэ мироско переводо» лэ Дэвлэско алав пистромэ май бут чем тысяча раз, кадя жэ, сар када сас пистромэ андо оригинало. Ай и алава кодэлэндирэ, ко пэрэандярэн и Библия на запистрон.

•   Вой точно. Най всаворэ переводоря точно пэрэдэн о гиндо, саво сас андо оригинало. Например, андо ек переводо, о стихо анда Матфея 7:13 пистромэ кадя: «Зажан через вуськи вороты, важ кода кай буӷлэ вороты андо адо и буӷло дром, саво андярэл интя». Но андо оригинало андо кадэва стихо пистромэ алав «мэримос», ай най о алав «адо». Файма, и переводчикоря пистросардэ о алав «адо», важ кода кай патянас, кай и найлашэ мануша авэна вечно тэ мучинпэ андо адо, кай исин яг. Но кадэлэсти на сытярэл и Библия. Андэ «Библия. Нэвэ мироско переводо» кадэва стихо пэрэандярдо точно: «Зажан через и вуськи вороты, важ кода кай баро и буӷло дром андярэл каринг и смэрть».

•   Вой понятно. Лашо переводо трэбуй тэ авэл най кати точно, но и кай лэс вушэро тэ полэн. Например, андэ Римлянам 12:11 о апостоло Павло пистросардя о алав, саво пэрэандярдёлпэ «тирёл оди». Кадэва алав на полэла мануш, саво жувэл андэ амарэ деса, важ када андэ «Библия. Нэвэ мироско переводо», кадэва алав пэрэандярдэ кадя: «ԥабол оди».

 «Библия. Нэвэ мироско переводо» най кати точно, понятно и андэр лэстэ пистромэ лэ Дэвлэско алав, но и кадяжэ, лэс можно тэ лэн би ловэнго. Важ када, милионоря мануша моӷут тэ адинон и Библия пэ пэстири чачи шыб, ай кадяжэ кодэла, ко нэ моӷут тэ тинэн пэсти Библия.