Най, и Библия кадэлэсти на сытярэл. На ԥэнэнпэ андэр латэ и пала кода, кай и христианоря трэбуй тэ тэлён ла Марияти или тэ полэн ла сар дэвлэс a. Уӷанам, со када доԥэнэн.

•   И Мария никала на ԥэнэнас, кай вой лэ Дэвлэстири дэй. Сар ԥэнэнпэ андэ Библия, вой андя «лэ Барэ Дэвлэстирэ Шавэс», или «лэ Дэвлэстирэ Шавэс», ай най екжэнэс лэ Дэвлэс (Лука 1:32, 35).

•   О Исусо Христос никала на ԥэнэс, кай и Мария андя лэ Дэвлэс и кай лати трэбуй тэ тэлён. Кала ек манушни ԥэндя, сави вой дэ бахтали, важ кода кай андя лэ Дэвлэстирэ Шавэс, во лашардя ла андэ дума и ԥэндя: «Най, бахталэ кодэла, ко ашунэл о алав лэ Дэвлэстар и терэл кадя, сар во ԥэнэн!» (Лука 11:27, 28).

•   Андэ Библия нинай кацавэ алава, сар «Богородица» и «Богоматерь».

•   И алава «небесно царица», савэ исин андэ Библия, ԥэнэнпэ най пала Мария, ай пала хохавни богиня, савяти тэлёнас и израильтяноря, савэ одбанделэ лэ Иеговастар (Иеремия 44:15—19). Май ӥто всаворэстар, «небесно царица» сас и вавилонско богиня Иштар (Астарта).

•   И пэрви христианоря на тэлёнас ла Марияти и на полэнас ла сар дэвлэс. Сар ԥэнэн ек учоно, вонэ «отшонас вся када пэстар и, май ӥто всаворэстар, даранас, кай, если тэ шон бари сама пэ Мария, тоди авэр гиндона, кай вонэ полэн ла сар дэвлэс» (In Quest of the Jewish Mary).

•   Андэ Библия ԥэнэнпэ, кай о Дэл сас вся и время (Псалом 90:1, 2; Исайя 40:28). Лэстэ на сас начало, важ када лэстэ не можэт тэ авэл дэй. Кадяжэ, и Мария не моӷла тэ ԥиравэл тала ди лэ Дэвлэс, важ кода кай андэ Библия ԥэнэнпэ, кай дажэ о небо не можэт тэ вместий лэ Дэвлэс (1 Царей 8:27).

И Мария — лэ Исусостири дэй, ай най лэ Дэвлэстири

 И Мария сас еврейско щей анда лэ Давидоско колено (Лука 3:23—31). Через латири вера и кай вой лэс кандэлас, вой сас фартэ куч лэ Дэвлэсти (Лука 1:28). Важ када во ришыл, кай вой авэла лэ Исусостири дэй (Лука 1:31, 35). Кай и Мария и кай лако хулай Иосифо сас и авэр бэяцэ (Марко 6:3).

 Хоть па Библия и дицол, кай и Мария ашэля лэ Исусостири ученица, будэр пала латэ нисо фартэ на росԥэнэнпэ (Дила 1:14).