Ande 25 aprilia 2022, sas neviardo o Ghido de cercetare anda le Martori le Iehovasche anda i aplicația JW Library. Acana, ande leste arachel-pe iech lista mai bari versetența explichime.

Ande 2013, cana sas cărdo, ando Ghido de cercetare arachenas-pe numai versetea explichime andal publicații neve.

Tha ande le palutne bărșa, sas-le șiute ande JW Library vi publicații mai purane. Le mai but anda le publicații cai sile ando Watchtower – BIBLIOTECA ONLINE arachen-pe vi andi aplicația JW Library. Ande cado nevo Ghido de cercetare arachen-pe referințea anda cadal publicații mai purane hai vi anda o lil Perspicacitate anda o hachiarimos le Scripturengo. Ando Ghido de cercetare cai silo ando JW Library, arachel-pe vi o texto anda le referințea, cadea că daștin te dichen cadal referințea vi cana na-i tumen interneto.

Ande cadai nevi versiunea arachen-pe vi referințe anda o lil Bucurisar-tu viațatar anda sea o timpo!. Iech phei cai bușiol Kari phendea: „Cana predichisarav co telefono marel zurales murro ilo catar le emoții, tha jianav anda sea o ilo că le manușen silen bari nevoia te așunen vareso lașio cai te zuriarel-len. Poiechdata anav manghe amintea le versetea, tha siman nevoia catar iech ajutorii caște daștiv te explichiv-len ande iech modo simplo hai te arăsav ca lengo ilo caște das duma pale. Cadea că, pala so arachav o verseto jiav sigo ca i referința anda o Ghido de cercetare, sau chiar ca iech lecția anda Bucurisar-tu viațatar anda sea o timpo!, hai cadala ajutin man te dav duma mișto hai te arachav bucuria andi predicarea”.

O Ghido de cercetare sas-lo cărdo mai simplo caște daștil te avel disponibilo ande mai but șiba. O Ivo, cai slujil co Betelo andai Chile, phendea: „O fapto că o Ghido de cercetare silo cărdo andi șib mapadungun si vareso deosebime. Ci cărdeam ji acana buchi ca iech publicația sar cadaia, tha sas ușoro. Le phralenghe ci avilea lenghe te pachian că si amen cadai publicația ande amari șib. Ci pachiaie că voi daștil te avel cărdi ande iech șib cai den-la duma numai cadea de țâra manușa. Lengo ilo sas-lo pherdo bucuria anda cado șucar instrumento cai ajutil-len pregătin-pe mai mișto anda penghe teme hai te daștin te beșen mai but le Iehovasa corcore hai te sichion mai but buchia anda leste”.

• Jian andi Biblia co verseto cai camen te prinjianen mai but buchia pa leste.

• Jian co număro le versetosco. Cana pâtrel-pe o menio, jian co simbolo catar o Ghido de cercetare. Dacă ci arachel-pe o simbolo, însemnol că na-i nici iech referința ando Ghido de cercetare anda o verseto selectime.

Ando Ghido de cercetare, le referințe daștin te aven arachle catar le neve, cai sile le dintune, ji ca le mai purane, cai arachen-pe mai telal. Anda le versetea cai parudea-pe lengo hachiarimos ando timpo so nachlea, le referințea mai neve sicaven lengo nevo hachiarimos.