Cana o Iehova cărdea i familia, vo dea le dadenghe i responsabilitatea te îngrijin-pe catar lenghe șiave (Coloseni 3:20). Dacă san dad, tut situ i responsabilitatea te sicaves che șiaves, caște iubil le Iehovas hai te avel iech adulto responsabilo (2 Timotei 1:5; 3:15). Sa cadea, trebul te aflis so si ando ilo che șiavesche sau chia șeiache. Chio exemplo si foarte importanto. Caște daștis te sicaves che șiaves anda o Cuvânto le Iehovasco ande o mai lașo modo, cado trebul te avel mai anglal ande chio ilo (Psalmo 40:8).

SO PHENEL I BIBLIA: Av „gata te ascultis, na sighiar te des duma” (Iacov 1:19). Sa cadea, cames ca chio șiav sau chi șei te simțol că daștil te del duma tusa sincero. Le șiave trebul te jianen că cames te ascultis-le cana camen te den duma tusa. Cadea că, încheren iech atmosfera pașnico andi familia, cadea cai te avel lenghe ușoro te pâtrăn pengo ilo (Iacov 3:18). Dacă von pachian că va aveia nasul hai că va avela te has-tu lența, daștilas-pe te na phenen tuche so simțon. Sicav răbdarea caring che șiave hai phen lenghe chichi de but iubis-le (Matei 3:17; 1 Corinteni 8:1).

SO DAȘTIS TE CHERES:

• Av dispuso te ascultis le șiaven cana von simțon te den duma tusa.

• De duma sea o timpo che șiavența, na numai cana sile pharimata.

SO PHENEL I BIBLIA: „Cas siles perspicacitatea va arachela o miștimos.” (Proverbe 16:20) Caște hachiares save si ciaces le sentimentea che șiavenghe, po iech data trebul te diches părdal le cuvintea. Nai vareso neobișnuime ca le tărne te exagerin sau te phenen buchia cai ci gândin-le ciaces. „Dacă varecon răspunzol angla so te ascultil, si iech dilimos.” (Proverbe 18:13) Anda cadaia, cher eforturi te na holeaves-tu (Proverbe 19:11).

SO DAȘTIS TE CHERES:

• Oriso phenenas che șiave, av hotărâme hai mechle te den duma hai na holear-tu sigo.

• Încercosar te anes tuche amintea so simțosardean hai so sas mai importanto anda tute cana sanas ande lenghe bărșa.

SO PHENEL I BIBLIA: „Mânro șiav, ascultisar i disciplinarea che dadeschi hai na mech i legea chia deiachi.” (Proverbe 1:8) O Iehova dea cadichi le dadesche tha vi la deiache autoritatea pa le șiave. Trebul te sicaven tumare șiaven te respectin-tume hai te ascultin tumendar (Efeseni 6:1-3). Le șiave den penghi seama cana lenghe dada ci sile „phangle ande sa codo felo gândimasco” (1 Corinteni 1:10). Dacă si tume păreri diferime, na contrazicin-tume angla le șiave pentru că cadai buchi daștilas te cherel-le te na respectin tume sar dada.

SO DAȘTIS TE CHERES:

• Den duma hai stabilin ande iech than sar te disciplinin tumare șiaven.

• Dacă dichen le buchia diferime ande so priveal o sicaimos tumare șiavenghe, încercon te dichen le buchia cadea sar dichel-le ocoaver.

SO PHENEL I BIBLIA: „Sicav le șiaves pala-i rig lași anda leste.” (Proverbe 22:6) O sicaimos le șiavengo ande iech modo potrivime ci si vareso so cherel-pe corcoro. Si tume nevoia catar iech plano ande savo te avel șiuto vi o modo ande sar va avela te disciplinis-le (Psalmo 127:4; Proverbe 29:17). I disciplinarea ci si doar te pedepsis-le, tha si vi te ajutis le șiaven te hachiaren sostar sas stabilime le reguli (Proverbe 28:7). Mai but, sicaven-le te iubin o Cuvânto le Iehovasco hai te hachiaren le principii cai sile ande leste (Psalmo 1:2). Cadea, von va daștina te cheren penghe iech conștiința sensibilo (Evrei 5:14).

SO DAȘTIS TE CHERES:

• Ajutisaren le șiaven te dichen le Devles sar iech Persoana ciaci ande savi daștin te pachian-pe.

• Sicaven-le sar te dichen hai sar te nachen pa le pericolea ande soste priveal i moralitatea, sar exemplo o felo sar folosin o interneto hai le rețele socialo. Sicaven-le so trebun te cheren caște na arăsăn victimea codolenghe cai prasan.