PUȘIMOS 10
Sar daștil te ajutil-ma i Biblia?
SO CHEREIAS TU?
Imaginisar tuche i situația cai avel: O David tradel i mașina ande iech zona cai ci prinjianel chanci. Le semnea sicaven că ci silo cai trebulas te avel acana. O David del peschi seama că hasardea-pe. Si posibilo că varecai, po drom, lea-la ande iech direcția greșime.
Dacă aveias ande lesco than, so chereias?
BEȘ IECH ȚÂRA HAI GÂNDISAR-TU!
Situ mai but variante:
-
Te manghes ajutorii.
-
Te diches-tu pe iech harta sau po GPS-o.
-
Te trades mai dur, hai te pachias că va aracheia o drom.
I varianta catar o puncto C na-i i mai lași.
I varianta catar o puncto B si mai lași sar i iechto. Iech harta sau iech GPS-o daștil te ajutil-tu pe sea o drom, caște te araches o lașio drom.
I Biblia daștil te ajutil-tu sa cadea!
Cado lil, cai si mașcar le mai bichinde lila, daștil te ajutil-tu
-
te araches o drom ciacio cana naches prin pharimata andi viața
-
te prinjianes-tu mai mișto hai te aves iech manuș mai lașio
-
te avel-tu i mai lași viața
RĂSPUNSO LE MAI BARE PUȘIMATANDE ANDAI VIAȚA
De cana sichioas te das duma, șioas pușimata.
-
Con cărdea o cerii?
-
Anda soste sile cărde le cerhaia?
Pala codoia, începosaras te șioas pușimata anda i lumea cai si pașa amende.
-
Sostar întâmplon-pe buchia nasul?
-
Sostar meren le manușa?
So phenenas dacă o răspunso cadale pușimatande arachel-pe andi Biblia de but timpo?
But pachian că i Biblia sili pherdi paramicianța hohamne, că sili purani sau că si phari hachiarimasco. Tha, si i Biblia i problema sau so phenen le manușa anda late? Oare prinjianen von o ciacimos anda i Biblia?
Sar exemplo, le manușa pachian că i Biblia phenel că sea i lumea sili ando vast le Devlesco. Tha cadea te avel? I lumea ande savi traisaras nai controlime! Si pherdi ducha hai necazurea, nasfalimos hai merimos, ciorâmos hai bare dezastrea. Daștilas iech Del iubitorii te cherel sea cadala?
Cameias te araches o răspunso? So phenel i Biblia anda codo cai controlil i lumea, daștilas te na avel tuche te pachias!
Poate că, dichlean că le sfaturi cai dea-le cadai broșura sile bazome pi Biblia. Le Martori le Iehovasche sile siguri că i Biblia si demno pachiamasco cana phenel amenghe so te cheras, pentru că sili „inspirime le Devlestar hai lași te sicavel, te mustrol, te ortol le buchia”. (2 Timotei 3:16, 17) Si foarte importanto anda tute te studiis cado lil purano tha lașio anda amare ghiesa!