PUȘIMOS 3
Sar daștiv te dav duma mai mișto mânre dadența?
SO CHEREIAS TU?
Imaginisar tuche i situația cai avel: Si tetraghine riat. O Geoff, cai siles 17 bărș, cărdea pesche buchia cai sas-les ando chăr hai acana, daștil te beșel vi vo iech țâra! Del drom o televizoro hai șudel-pe ando fotolio cai placial-les o mai but.
Ande codo momento avel lesco dad cai ci silo prea voime.
„Geoffrey! Sostar hasares o timpo co televizorii? Mai mișto avelas te ajutis che țâne phrales te cherel pesche lecții! Ci cheres niciechdata chanci cana phenel-pe tuche!”
„Pale începosaras”, phenel o Geoff holiardo, na voceaia zurali, tha cadea cai te avel așundo.
O dad jial pașa leste hai phenel lesche: „So phendean, tărneia?”
„Chanci, dade”, phenel o Geoff holiardo hai del pesche iacha pe șăreste.
Acana lesco dad chiar holiarel-pe. „Na de duma manța cadea!” phenel lesche holiardo.
Dacă aveias ande lesco than, sar chereias te na arăsăs ande cadai situația?
BEȘ IECH ȚÂRA HAI GÂNDISAR-TU!
Te des duma che dadența si sar cana trades iech mașina. Cana angla tute avel vareso cai ci mechel-tu te jias mai dur, daștis te araches iech aver drom.
SAR EXEMPLO:
„Si manghe pharo te dav duma mânre dadeia”, phenel iech șei po anav Leah. „Po iechdata, cana phenav lesche vareso, pușel-ma: «Iertisar-ma, manța des duma?».”
LA LEAH SILA TRIN VARIANTE.
-
Te del cingar pe pesco dad.
I Leah del cingar: „Ci hachiares că si vareso importanto? Sostar ci ascultis-ma?”.
-
Te na mai del duma pesche dadeia.
I Leah ci mai del duma pesche dadeia anda lachi problema.
-
Te ajucărel iech momento lașio te phenel pesche dadesche so holiarel-la.
I Leah del duma pesche dadeia pala iech timpo sau phenel lesche prin iech lil savi si lachi problema.
Ce varianta pheneias tu te alosarel i Leah?
GÂNDISAR-TU: Laco dad ci silo atento hai ci del peschi seama so simțol i Leah. Dacă i Leah alosarel i Varianta A, laco dad ci va hachiarela sostar del cingar pe leste, hai vo ci va mai camela te ascultil-la. Mai but, dacă cherel cadea, i Leah ci sicavel că sila respecto caring laco dad. (Efeseni 6:2) Cadai buchi ci va anela miștimata nici iechesche.
Cadea sar daștis te jias mai dur chiar cana avel vareso po drom angla tute, sa cadea daștis te araches iech modalitatea caște hachiares-tu che dadența.
I Varianta B părilas te avel i mai ușoro, tha ci si i mai lași decizia. Sostar? Anda codoia că, i Leah trebul te del duma pesche dadeia caște nachel părdal le probleme. Caște daștil te ajutil-la, laco dad trebul te jianel save si lache probleme. Cana ci des duma, ci cheres chanci.
Dacă alosarel i Varianta C, i Leah ci va mechela ca iech buchi cai avel angla late te așiavel-la anda laco drom. Voi va dela duma pesche dadeia aver data. Hai dacă scriil lesche iech lil, i Leah daștil te simțol-pe mai mișto.
Cana va scriila lesche o lil, voi va daștila te alosarel pesche cuvintea hai te phenel lesche exacto so camel. Cana citil o lil, laco dad va jianela so camlea i Leah te phenel lesche hai va hachiarela mai mișto anda soste nachel voi. Dacă i Leah alosarel i Varianta C, cadichi la, hai vi lache dades va avena-le miștimata. Chiar cana den duma mașcar ștar iacha, sau părdal iech lil, cadai varianta respectil o sfato la Bibliaco: „Te alosaras le buchia cai îngăren ca pacea”. (Romani 14:19)
Ce variante pachias că mai si la Leah?
Dacă araches aver, scriisar-le mai tele. Pala codoia phen save daștin te aven le urmări.
CHER-TU MIȘTO HACHIARDO
Na bâstăr, so phenes daștil te avel hachiardo greșime che dadendar.
SAR EXEMPLO:
Che dada pușen-tu sostar ci san mișto. Tu phenes: „Ci camav te dav duma anda cadaia”.
Tha le dada hachiaren: „Ci sima cadea de but pachiamos ande tumende caște phenav tumenghe so simțosarav. Mai mișto dav duma mânre amalența anda cadaia”.
Imaginisar tuche că situ iech phari problema, hai che dada camen te ajutin-tu. Cana phenes: „Așen liniștime. Daștiv te nachav vi corcoro părdal mânri problema”.
-
So daștinas te hachiaren von?
-
So avelas mai mișto te phenes?
