Imaginisar tuche i situația cai avel: Cana i Julia dichel-pe andi oglinda, dichel numai că si thuli. „Trebul te slăbiv”, phenel pesche, chiar cana lache dada hai amala phenen lache că si „slabo sar iech sano cașt”.

Na de but timpo, i Julia gândisardea-pe te lel bare măsuri caște del tele „barem dui kilogramea hai dipaș”. Trebul numai te suferil bochatar chichiva ghiesa . . .

Te aveias ande laco than, so chereias?

Ci si greșime te interesil-tu sar sicaves de avreal. Chiar i Biblia del duma șucar anda o felo sar sicade de avreal le jiuvlea hai le murșa, sar avelas i Sara, Rahela, Abigail, Iosif hai o David. I Biblia chiar phenel că iech jiuvli cai bușiol Abișag sas „zurales șucar”. (1 Regi 1:4)

Cu sea cadala, anda but tărne si prea importanto sar sicaven de avreal, hai cadaia si iech problema bari. Gândisar-tu:

• Cadea sar phenel iech studio, 58% anda le șeia pachian-pe prea thule, cana numai 17% sas ciaces cadea.

• Iech aver studio phendea că 45% anda le jiuvlea prea thule pachianas că sile thule!

• Anda codoia că unii tărne camle te aven mai slabo cărdile nasfale de anorexie. Cadaia si iech tulburarea alimentaro cai cherel varecas te na mai camel te hal.

 Dacă diches că situ simptome de anorexie sau aver tulburări alimentaro, mang ajutorii. De duma iecheia anda che dada sau varecaia ande caste situ pachiamos. I Biblia phenel: „Iech amal ciacio iubil sea o timpo hai si iech phral cai cărdilea anda o ghies le necazosco”. (Proverbe 17:17)

Si ciaces, so cherel ame mai șucar si amari persoana cai sam de andral. Gândisaren tume co Absalom, iech andal șiave le regesche David. I Biblia phenel:

„Ci sas iech manuș mai așardo sar o Absalom anda lesco șucarimos. . . . Ci sas-les nici iech defecto”. (2 Samuel 14:25)

Tha cado tărno sas baricano, ambițioso hai pherdo athaimos! Anda codoia, i Biblia ci phenel buchia lașe anda o Absalom, tha sicavel-les sar iech manuș infidelo cai ci sas-les lajiav hai sas pherdo ura mudarimaschi.

I Biblia del-ame o sfato cai avel:

„Huriaven i nevi personalitatea”. (Coloseni 3:10)

„Tumaro șucarimos te na avel codo de avreal . . . , tha te avel i persoana garadi le ileschi”. (1 Petru 3:3, 4)

Chiar cana na-i greșime te cames te aves șucar, chi personalitatea si but mai importanto. Ando timpo, le manușa va iubina-tu mai but anda codoia că situ calități tha na anda codoia că situ iech corpo șucar. „O șucarimos de avreal daștil te țârdel i atenția avrenghi iech țâra timpo, tha ande lenghi goghi va așela chi personalitatea, che șucar calități”, phenel iech tărni po anav Phylicia.

San butivar holiardo anda o felo sar sicaves de avreal?

Gândisardean-tu te cheres tuche operația sau te suferis bochatar caște sicaves mai mișto?

Dacă daisareias, so paruveias tute? (Încercuisar codol buchia save cames te paruves-le.)

• UCIMOS

• LE KILOGRAMEA

• BAL

• I FORMA LE CORPOSCHII

• CHIPO

• TENO

Dacă dean o răspunso „da” le prime duie pușimatande hai încercuisardean trin andal aspectea sicade co trinto pușimos, gândisar-tu: Siguro, aver ci dichen-tu cadichi de nasul sar diches-tut tu. Si ușoro te arăsăs andel extreme hai te îngrijoris-tu prea but anda o felo sar sicaves de avreal. (1 Samuel 16:7)