I Mary hai laco rrom, o John a, train ande iech them cai daștin te phenen i vestea lași bute manușenghe anda Filipine cai aven te cheren buchi ande codo them. Cana sas i pandemia de COVID-19, i Mary astardea te sichiol andai Biblia manușența, na numai anda o them cai trailas, tha vi anda aver thema. Sar?

I Mary pușelas codolen casa sichiolas i Biblia: „Prinjianes varecas cai camelas te sichiol andai Biblia?” Dacă von phenenas că da, pușelas dacă daștil te cherel lache prinjianimos. Cado țâno pușimos cărdea bare buchia. Sostar? Anda codoia că butivar le manușa cai dichen cuci o lil le Devlesco camen te phenen vi codolenghe anda lenghi familia hai le amalenghe so sichile. So miștimata sas la pheia Mary?

Iech anda le jiuvlea casa sichiolas i Mary, i Jasmin, cărdea lache prinjianimos ștare manușența cai camenas te sichion andai Biblia. Iecha anda lende, i Kristine, ciailea lache cadea de but o studio, că manglea la pheia Mary te sichiol lasa duivar po curco. Cana i Mary pușlea-la dacă prinjianelas varecas cai camelas te sichiol andai Biblia, i Kristine phendea: „Da, cherav tuche prinjianimos mânre amalența”. Ande chichiva curche, i Kristine cărdea lache prinjianimos ștarența anda lache amala cai camenas te sichion andai Biblia. Pala codoia, i Kristine cărdea lache prinjianimos vi avere amalența cai, vi von, ji la urmă, cărde lache prinjianimos avere manușența.

I Kristine camlea ca vi lachi familia andai Filipine te prinjianel mai mișto i Biblia. Cadea că dea duma pesche șeiasa, i Andrea. Mai anglal, i Andrea gândisardea-pe: „Le Martori sile iech secta, ci pachian ando Isus hai pachian numai ando Purano Testamento”. Tha, pala so sichilea i dintuni data, voi ci mai pachiaia cadal hohaimata anda le Martori. Cana sichiolas, butivar, i Andrea phendea: „Dacă i Biblia phenel cadaia, atunci trebul te avel ciaces!”.

Ando timpo, i Andrea cărdea prinjianimos la Maryache avere duie amalența hai iecha jiuvleasa cai cherelas buchi ande iech than lasa, hai vi von astarde te sichion andai Biblia. Sa cadea, bi te jianel i Mary, i bibi la Andreachi, i Angela, cai ci dichelas, așunelas so den duma co telefono cana sichionas andai Biblia. Ande iech ghies, i Angela phendea la Andreache te cherel lache prinjianimos la Maryasa anda codoia că vi voi camlea te sichiol. I Angela sas zurales bucurime cana sichiolas buchia andai Biblia. Pala iech șion, voi jianglea te phenel anda goghi mai but versetea andai Biblia hai manglea te studiil ștarvar po curco! Hai sa cadea, i Andrea ajutisardea-la te jial ca fiesavi întrunirea po interneto.

 Cana i Mary așundea că o rrom la Kristinaco, o Joshua, așunelas so den duma cana sichionas andai Biblia, i Mary pușlea-les dacă ci camelas te așel vi vo lența cana sichion. O Joshua phendea: „Va avela te așiav, tha te na pușes man chanci. Cana pușes man vareso, tiliarav”. Ande le dintune panji minutea, vo șiutea mai but pușimata sar i Kristine hai camlea te del duma mai dur andai Biblia.

I țâni buchi cai pușlea-la i Mary ajutisardea-la te avel-la but studii biblico. Poiechdata, i Mary manglea vi avere Martoren te sichion le manușența savența studiilas. I Mary astardea 28 studii biblico ande ștar thema.

I Jasmin, i iechto juvli anda savi deam duma, boldea-pe ande aprilia 2021. I Kristine boldea-pe ando mai 2022 hai gălea parpale ando Filipine caște avel pașa peschi familia. Aver dui jiuvlea cai i Mary prinjiandea-len catar i Kristine bolde-pe vi von. I Angela boldea-pe pala chichiva șiona hai acana slujil sar pioniera regularo. O rrom la Kristinaco, o Joshua, hai lenghi șhei, i Andrea, hai vi aver manușa cai sichion andai Biblia, cheren șucar progresea.

Ando iechto secolo, i vestea lași așundea-pe mai sigo mașcar le familii hai le amala. (Ioan 1:41, 42a; Fap. 10:24, 27, 48; 16:25-33) Sostar ci pușes vi tu che manușen casa sichios andai Biblia cado țâno pușimos: „Prinjianes varecas cai camel te sichiol andai Biblia?”. O Del jianel chichi studii biblico va avela te astares pala cado țâno pușimos, cai daisaras te șioas-les fiesavo de mașcar amende!