ARTICOLO STUDIOSCHE 7
GHILI 15 Te lăudisaras le Iechto năștime le Iehovasco
So si anda tute i iertarea le Iehovaschi?
„Tute si i ciaci iertarea.” (PS. 130:4)
ANDA SO DAS DUMA
Va avela te dichas chichiva exemplea cai sicaven sar iertil amen o Iehova. Cadala va ajutina amen te dichas vi mai cuci i iertarea cai del-la amenghe o Iehova fiesavesche.
1. Sostar daștil te avel pharo te hachiaras so si ando ilo ieche manușesco cana iertil amen?
„IERTISARDEM TUT!” Amaro ilo bariol bucuriatar cana așunas cadal dumes, mai but cana jianas că duchadeam varecas. Tha, cana varecon phenel „Iertisardem tut”, so hachiarel-pe ciaces? Camel te phenel că va avena pale lașe amala? Sau că ci mai camel te del duma anda codoi buchi? Daștil te avel pharo te hachiaras so si ando ilo ieche manușesco cana iertil amen.
2. So phenel-pe anda i iertarea le Iehovaschi andi Biblia? (Dich vi i nota de telal.)
2 O Iehova ci iertil sa cadea sar le manușa. Chonic ci daștil te iertil cadea sar cherel o Iehova. O psalmisto phendea anda o Iehova: „Tute si i ciaci iertarea, caște sicavel-pe tuche iech dar pherdi pachiv”. a (Ps. 130:4) Si ciaces, i iertarea le Iehovaschi si i ciaci iertarea. Vo si o corcoro cai daștil te sicavel amenghe so si i ciaci iertarea. Chichiva anda codola cai scriisarde le Scripturi ebraico folosisarde iech duma anda i iertarea le Iehovaschi cai ci phende-la niciech data anda i iertarea le manușenghi.
3. Sostar i iertarea le Iehovaschi na-i sa cadea sar i iertarea le manușenghi? (Isaia 55:6, 7)
3 Sostar i iertarea le Iehovaschi na-i sa cadea sar i iertarea le manușenghi? Cana o Iehova iertil varecas, lesco păcato si choslo cu sea. Cadea că, daștil te avel amen mai dur iech amalimos chidino le Iehovasa. Si iech bari buchi anda amende cana dichas că o Iehova iertil amen cu sea de fiesavi data! (Citisar Isaia 55:6, 7.)
4. Sar ajutil amen o Iehova te hachiaras so si i ciaci iartarea?
4 Dacă i iertarea le Iehovaschi na-i sa cadea sar amari iertarea, sar manușa imperfecți, sar daisaras te hachiaras ciaces sar si leschi iertarea? Ande pesco Lil, o Iehova ajutil amen te hachiaras sar si leschi iertarea prin chichiva șucar exemplea. Mai dur, va avela te dichas cadal șucar exemplea. Von den duma anda sar o Iehova va duriarela o păcato hai, ande sa codo timpo, so cherel caște avel amen pale iech amalimos chidino lesa. Cana sichioas cadal buchia, va avela te iubisaras mai but amare Dades pherdo lașimos hai mila, cai sicavel amenghe prin but buchia că camel te iertil amen.
O IEHOVA DURIAREL O PĂCATO
5. So phenel i Biblia că cherel o Iehova cana iertil amare păcatea?
5 Butivar, i Biblia phenel că o păcato si sar iech baro pharimos pe amare dume. O rege David phendea anda pesche păcatea: „Le buchia nasul cai cărdem-len vazden-pe opral mânro șăro; sile iech baro pharimos, sile prea phare anda mande”. (Ps. 38:4) Cu sea cadala, o Iehova iertil le păcatea codolenghe cai sicaven că fal-len ciaces nasul. (Ps. 25:18; 32:5) I duma ebraico traducime prin „iertil” însemnol „te vazdel” sau „te îngărel”. Daisaras te gândisaras amen le Iehovaste sar ca iech zuralo murș, cai vazdel, caște phenas cadea, o pharimos le păcatosco cai si pe amare dume hai îngărel-les dur amendar.
„Ietisardean” (Ps. 32:5)
6. Chichi de dur îngărel o Iehova amare păcatea?
6 Tha chichi de dur îngărel o Iehova amare păcatea? Ando Psalmo 103:12 phenel-pe cado șucar exemplo: „Chichi de dur si o than catar vazdel-pe o cham le thanestar cai jial tele, cadichi de but duriardea vo amendar amare păcatea”. O esto, cai vazdel-pe o cham, hai o vesto, cai mechel-pe tele o cham, sile cadichi de dur iech averestar, că ci va arachena-pe niciechdata. Aver varesar phendo, o Iehova îngărel amare păcatea cadichi de dur amendar, că ci daisaras te gândisaras amen. So șucar phenel amenghe o Iehova că vo iertil amen cu sea!
”Chichi de dur si o than catar vazdel-pe cham le thanestar cai jial tele” (Ps. 103:12)
7. So phenel o Iehova că cherel amare păcatența? (Mica 7:18, 19)
7 Duriarel o Iehova, te phenas cadea, amare păcatea numai amendar, sau vi pestar? O rege Ezechia phendea: „Șiudean pala che dume sea mânre păcatea”. Sau, pala sar phenel-pe andi nota de telal andai Biblia andi șib vlașico: „Duriardean sea mânre păcatea angla che iacha”. (Is. 38:9, 17; n.t.) Cadaia sicavel că o Iehova lel le păcatea codolenghe cai sicaven că fal-len ciaces nasul hai șiudel-len dur catar pesche iacha. Cadaia daștil te avel phendo vi cadea: „Cărdean sar cana [mânre păcatea] ci sas-le niciechdata”. O Iehova mai phendea cadai buchi cana dea iech aver șucar exemplo ando lil Biblico Mica 7:18, 19. (Citisar.) Cadal versetea sicaven că o Iehova șiudel amare păcatea ando mai duriardo than la mareaco. Andel purane ghiesa, te les parpale vareso cai sas șiudino ando mai duriardo than la mareaco sas iech buchi cai ci daștilas chonic te cherel-la.
„Șiudean pala che dume sea mânre păcatea.” (Is. 38:17)
„Va avela te șiudes amare păcatea ando mai duriardo than la mareaco.” (Mica 7:19)
8. So sichileam ji acana?
8 Prin cadal șucar exemplea, sichileam că, cana o Iehova iertil amen, vo lel o baro pharimos le păcatosco cai mechel-pe pe amare dume. Chichi de ciace si le vorbe cai phendea-len o David: „Fericime sile codola savenghe buchia nasul sas-le iertime hai savenghe păcatea sas-le pachiarde; fericime si o manuș savesche o Iehova ci încărel conto catar lesco păcato”. (Rom. 4:7, 8) Cadaia si i ciaci iertarea!
O IEHOVA CHOSEL AMARE PĂCATEA
9. Prin so exemplo ajutil amen o Iehova te hachiaras că vo iertil amen cu sea?
9 Prin aver șucar exemplea, o Iehova ajutil amen te hachiaras sar, prin o merimos le Isusosco, chosel le păcatea codolenghe cai sicaven că fal-len ciaces nasul. I Biblia phenel că si sar cana o Iehova halavel hai ujiarel amare păcatea. Pala so cherel cadaia, codo cai păcătuisardea silo ujiardo. (Ps. 51:7; Is. 4:4; Ier. 33:8) O Iehova sicadea so întâmplol-pe pala codoia. Vo phenel: „Chiar cana tumare păcatea sile sar iech gad zurales lolo, va avena cărde parne sar o iv. Chiar cana sile lole sar iech gad lolo, va avena parne sar i poșom”. (Is. 1:18) Si zurales pharo te cheres iech gad lolo te avel pale parno. Cu sea cadala, prin cadal șucar exemplea, o Iehova phenel amenghe ciaces că amare păcatea va avena cadea de mișto ujiarde, că ci va mai dichela-pe chanci anda so sas mai anglal.
„Chiar cana tumare păcatea sile sar iech gad zurales lolo, va avena cărde parne sar o iv.” (Is. 1:18)
10. So aver exemplo phenel o Iehova caște sicavel chichi de bari si leschi iertarea?
10 Cadea sar dichleam ando articolo cai nachlea, daisaras te phenas că amare păcatea sile sar le camimata. (Mat. 6:12; Luca 11:4) Cadea că, de fiesavi data cana cheras iech păcato contra le Iehovasche, si sar cana cheras amenghe camimata sea mai bare. Cadea că, le camimata cai si amen le Iehovaste sile zurales bare. Tha, cana o Iehova iertil amen, si sar cana vo chosel le camimata cai si amen. Dacă ci avelas te cherel cadaia, trebulas te pochinas-len. O Iehova na manghel amendar te pochinas anda le păcatea cai chosel-len. Amaro ilo bariol bucuriatar cana dichas prin cado exemplo sar o Iehova chosel amare păcatea!
„Chos amare camimata” (Mat. 6:12)
11. Sostar phenel i Biblia că o Iehova chosel amare păcatea? (Fapte 3:19)
11 O Iehova na numai că iertil amare camimata sau amare păcatea, tha vi chosel-len cu sea. (Citisar Fapte 3:19.) Cana varecon ci mai manghel pesco camimos, daștil-pe că țârdel iech linia po lil cai sas scriime so trebulas te des lesche parpale. Cu sea cadala, tela i linia dichel-pe so sas scriime. Tha i duma „chosel” andal Fapte 3:19 cherel amen te gândisaras amen ca aver buchi. Caște hachiaras, te anas amenghe andi goghi că, andel ghiesa biblico, i cerneala saveasa scriilas-pe sas zurales ușoro te avel chosli. Cadea că, cana iech camimos sas ‘choslo’, ci mai dichelas-pe, sas sar cana ci sas niciechdata. Si zurales cuci anda amende cana gândisaras amen că o Iehova na numai iertil amare păcatea, tha chosel-len cu sea, sar cana ci sas-le niciechdata! (Ps. 51:9)
„Caște aven chosle tumare păcatea” (Fap. 3:19)
12. So camlea te sicavel amen o Iehova cana phendea că șiol opral amare păcatea iech noro?
12 Caște ajutil amen te hachiaras mai mișto sar o Iehova iertil amen cu sea, vo mai del amen iech exemplo. Vo phenel: „Va avela te garavav che greșeli sar cana avelas te șioav opral lende iech noro hai che păcatea sar cana avelas te șioav opral lende iech baro noro”. (Is. 44:22) Cana o Iehova iertil amare păcatea, si sar cana șiol opral lende iech baro noro caște garavel-len, hai cadea le păcatea ci mai daștin te aven dichle.
„Va avela te garavav che greșeli sar cana avelas te șioav opral lende iech noro” (Is. 44:22)
13. So si ande amaro ilo pala so o Iehova iertil amare păcatea?
13 So sichioas anda cadal exemplea? Pala so o Iehova iertil amare păcatea, amaro ilo ci mai trebul te doșarel amen sea i viața. O rat șiordo le Isusostar pochinel cu sea amare camimata. Cana o Iehova chosel iech păcato, si sar cana ci cărdeam-les niciechdata. Cadaia si i ciaci iertarea cai o Iehova del-la codolenghe cai sicaven că fal-len ciaces nasul anda so cărde!
O IEHOVA CHEREL TE AVEL AMEN PALE IECH AMALIMOS CHIDINO LESA
Anda codoia că amaro dad andal ceruri iertil amen daștil te avel amen iech amalimos chidino lesa (Dich o paragrafo 14)
14. Sostar daisaras te pachias ciaces că o Iehova iertil amen cu sea? (Dich vi .)
14 Cana o Iehova iertil amen ciaces, daștil te avel amen pale iech amalimos chidino lesa. Anda codoia că o Iehova iertil amen cu sea, ci mai trebul te doșaras amen. Sa cadea, ci trebul te daras că o Iehova încă si holiardo pe amende hai că camel te pedepsil amen. Ci va cherela cadaia niciechdata! Daisaras te pachias anda sea o ilo că o Iehova iertil amen. O profeto Ieremia phendea le dumes le Iehovasche: „Va avela te iertisarav le buchia nasul cai cărde-len hai ci va mai avela te anav ande mânri goghi lengo păcato”. (Ier. 31:34) Pala but bărșa, o apostolo Pavel phendea vi vo sa cadal dumes: „Ci va mai avela te anav manghe amintea lenghe păcatea”. (Evr. 8:12) Tha so trebul te hachiaras de catar?
„Ci va mai avela te anav ande mânri goghi lengo păcato” (Ier. 31:34)
15. So însemnol că o Iehova ci mai anel pesche amintea catar amare păcatea?
15 Cana i Biblia phenel anda varecaste că „anel pesche amintea”, poiechdata însemnol mai but sar te gândil-pe ca iech buchi cai sas mai anglal. Daștil te însemnol vi te cherel vareso. Sar exemplo, o manuș cai cherelas nasulimos hai sas-lo mudardo pașa o Isus po stâlpo, phendea le Isusosche: „Isus, an tuche amintea mandar cana va avela te arăses ande chio Regato!”. (Luca 23:42, 43) Manglea codo manuș le Isusostar numai te gândil-pe leste ando viitorii? Na. So phendea lesche o Isus parpale sicadea că avelas te cherel vareso anda leste hai te uștiavel-les andal mule. Cadea că, cana o Iehova phenel că ci mai anel pesche amintea catar amare păcatea, vo camel te sicavel că ci va cherela chanci contra amenghe. Vo ci va cherela amenghe niciech nasulimos ando viitorii caște pedepsil amen anda le păcatea cai iertisardea-len.
16. Sostar phenel o Iehova că sam sar niște sclavi?
16 Cana o Iehova iertil amen, simțosaras amen libero. Caște hachiaras mai mișto cadaia, i Biblia del amen iech aver șucar exemplo. Anda codoia că sam imperfecți hai sam țârdine te păcătuisaras, i Biblia phenel că sam sar niște „sclavi le păcatosche”. Tha, pala so o Iehova iertil amen, phenel că sam sar niște sclavi „eliberime anda o păcato”. (Rom. 6:17, 18; Rev. 1:5) Cana jianas că o Iehova iertisardea amen, daisaras te avas cadea de fericime sar iech sclavo cai sas eliberime!
„Sanas eliberime anda o păcato” (Rom. 6:18)
17. Sar sastiarel amen i iertarea? (Isaia 53:5)
17 Citisar Isaia 53:5. I Biblia phenel că, anda codoia că sam păcătoși, sam sar iech manuș cai siles iech pharo nasfalimos cai mudarel-les. Tha, anda codoia că o Iehova dea le Isusos te merel anda amende caște pochinel amare păcatea, avelas sar cana sam sastiarde. (1 Pet. 2:24) Cana păcătuisaras, covliaras amaro amalimos le Devlesa. Tha, anda codoia că o Isus mulea anda amende, o Iehova daștil te iertil amen hai te avel amen pale iech amalimos chidino lesa. Cana iech manuș cai siles iech pharo nasfalimos sastiarel-pe, bucuril-pe zurales but. Vi amaro ilo bariol bucuriatar cana amaro amalimos le Iehovasa silo sastiardo hai cana sam pale mișto dichle lestar.
„Prin lesche ducha amen samas sastiarde.” (Is. 53:5)
SO SI ANDA TUTE I IERTAREA LE IEHOVASCHI
18. So sichileam ande cado articolo anda i iertarea? (Dich vi o chenarii „Sar iertil amen o Iehova?”.)
18 So sichileam anda le șucar exemplea andai Biblia anda i iertarea le Iehovaschi? Vo iertil amen cu sea hai anda sea o timpo. Cadea că, daștil te avel amen iech amalimos chidino amare Dadesa andal ceruri. Cu sea cadala, i iertarea le Iehovaschi si iech daro cai del-les amenghe anda codoia că iubil amen hai sicavel but lașimos caring amende, na anda codoia că meritisaras cadaia. (Rom. 3:24)
19. a) So trebul te cheras caște iertil amen o Iehova? (Romani 4:8) b) So va avela te sichioas ando articolo cai avel?
19 Citisar Romani 4:8. Sam zurales bucurime anda codoia că le Iehovaste arachas „i ciaci iertarea”! (Ps. 130:4) Cu sea cadala, caște iertil amen trebul te cheras vi amen iech buchi importanto. O Isus phendea: „Că cana chosen le doșa le manușenghe cai cărde tumenghe nasul, vi tumaro Dad andal ceruri va chosela tumare doșa”. (Mat. 6:14, 15) Anda so phendea, hachiaras vareso zurales impotanto, trebul te las amen pala o Iehova cana iertisaras. Ando articolo cai avel, va avela te sichioas sar daisaras te cheras cadaia.
GHILI 46 Mulțumisaras tuche, Iehova!
a Ando texto ebraico, si folosime iech duma cai însemnol „i iertarea”, hai cadaia sicavel că si numai iech corocori iertarea ciaci, chiar cana si mai but feluri iertarea. But traduceri la Bibliache ci sicaven cadai buchi importanto, tha i Traducerea la lumeachi nevi, si i corcori traducerea cai sicavel că i duma ebraico însemnol „i ciaci iertarea”.
